
遍知贝玛嘎波大师教言集PK21སེམས་དཔའ་ཆེན་པོ་པདྨ་དཀར་པོའི་རྣམ་ཐར་ཐུགས་རྗེ་ཆེན་པོའི་ཟློས་གར་ཞེས་བྱ་བ།
3-310
༄༅། །སེམས་དཔའ་ཆེན་པོ་པདྨ་དཀར་པོའི་རྣམ་ཐར་ཐུགས་རྗེ་ཆེན་པོའི་ཟློས་གར་ཞེས་བྱ་བ།
༄༅། །སེམས་དཔའ་ཆེན་པོ་པདྨ་དཀར་པོའི་རྣམ་ཐར་ཐུགས་རྗེ་ཆེན་པོའི་ཟློས་གར་ཞེས་བྱ་བ་བཞུགས་སོ། ། ༄༅༅། །སྭ་སྟི། འཇིག་རྟེན་དབང་པོ་ཚངས་པ་ཁྱབ་འཇུག་མིག་གསུམ་ལ་སོགས་ཐམས་ཅད་སྐྱབས་ཞུར་འོངས་པའི་འོད་ཀྱིས་མཐའ་བསྐོར་ཕྱུག་གྱུར་པ། །
3-311
ཤེས་རབ་ཕ་རོལ་སོན་པའི་གང་བར་རྒྱལ་བ་ཀུན་གྱི་སྙིང་རྗེའི་གཟུགས་སུ་གྲུབ་པའི་རྟགས་བྲིས་ས་གསུམ་འགྲོ་བ་ནི། །དད་པ་མང་པོའི་ཆུ་གཏེར་དཔལ་དུ་བདེ་ལེགས་བདུད་རྩིའི་མཆོད་སྦྱིན་འགྱེད་མཁན་སྤྱན་རས་གཟིགས་ཞེས་ཡི་གེའི་གྲགས་འབར་བ། །གང་གི་མཚར་པོའི་ལྟ་བའི་མིག་རྣམས་གཡོ་མེད་བགྱིད་པ་དྲང་སྲོང་ཆེན་པོ་པདྨའི་ནམ་མཁར་བགྱིད་དེར་ཕྱག་འཚལ་ལོ། །(འདི་ཡན་སུམ་བིད།)[*] དེ་ཡི་སྒྱུ་འཕྲུལ་ཤིང་རྟའི་བགྲོད་པ་ཡིས། །བསླང་བའི་རྡུལ་གྱིས་ཆུ་མཐོང་བགགས་པའི་མཐར། །སྲིད་པའི་ཉེས་པ་ཐམས་ཅད་མནན་པ་ནི། །སྒྲ་སྒྲོགས་ཡུལ་དུ་གཙུག་ཕུད་ཅན་ལྟ་བུ། །ཆུ་གཏེར་རིང་ན་རྣ་བའི་བདུད་རྩི་བཅར་ཚེ་བཏུད་པའང་གཞན་ནས་དང་། །ཡོངས་འདུའི་འཁྲི་ཤིང་སུམ་རྩེན་ཕྱོགས་ལྷུང་བསམ་འཕེལ་ནོར་བུའང་རྒྱལ་མཚན་རྩེར། །མཆོད་པའི་སྐབས་ཀ་དེ་བས་ཉེ་རིང་ཐང་ལྷོད་མེད་པར་ཕན་བདེ་ཡི། །རིན་ཆེན་འབྱུང་ཁུངས་ཀུན་ཏུ་དགེ་བའི་བཤེས་གཉེན་འདྲ་བ་ག་ལ་ཡོད། །མི་ཕམ་ཁྱབ་འཇུག་རྐང་བརྫུས་པདྨའི་མཐིལ། །དྲེགས་ལྡན་མགྲིན་སྔོན་རལ་བའི་སྐས་འཛེགས་ཚེ། །སྨྲ་བའིཟླ་བ་དཀར་པོ་དང་འདྲེས་སླར། །ཕྱོགས་ལས་རྣམ་རྒྱལ་ལྷ་སྲས་གུས་ངོ་བྱེ། །ཨེ་མ་སྲིད་པའི་བྱིངས་ཀུན་ལ། །གང་གི་ངང་ཚུལ་རྐྱེན་བྱིན་ནས། །མཐར་པའི་རྣམ་འགྱུར་སྒྲུབ་མཁས་དེ། །ཐམས་ཅད་མཁྱེན་པའི་ཚ་འོ་ལོ། །འདི་སྐད་གཏམ་དུ་གྲགས་ཏེ། 
3-312
འཇིག་རྟེན་ཐམས་ཅད་ལ་ཕན་པ་དང་བདེ་བ་ཅི་འབྱུང་བ་འདི་ཐམས་ཅད་ཀྱི་ཕྱི་མོ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་རྗེ་ཆེན་པོའོ། །དེ་གཟུགས་སུ་གྲུབ་པ་ནི་ཕྱག་ན་པདྨ་ཅན་ཡིན་ལ། དེ་ཡང་། བསྐལ་པ་དཔག་ཏུ་མེད་པའི་ཡང་དཔག་ཏུ་མེད་པ་ན། །འཇིག་རྟེན་དུ་སངས་རྒྱས་རིན་ཆེན་སྙིང་པོ་ཞེས་བྱ་བ་བྱོན་པའི་དུས། །འཁོར་ལོ་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཀྱི་བུའི་ཐུ་བོ་མིག་མི་འཛུམ་ཞེས་བྱ་བར་གྱུར་ནས། །དེས་སེམས་ཅན་གྱི་ཁམས་ཐམས་ཅད་ལ་རྣམ་པར་བལྟས་པས། །སྡུག་བསྔལ་མཐའ་ཡས་པ་མཐོང་སྟེ། དེ་དག་ཐམས་ཅད་བསྐྱབ་པའི་ཕྱིར། བདག་གི་མིང་བྱིན་གྱིས་བརླབ་པར་བྱའོ། །བདག་གི་མིང་གང་གིས་ཐོས་པ་ལ་ངན་འགྲོའི་འཇིགས་མེད་པ་དང་། མི་ཁོམ་པར་མི་ལྟུང་བ་དང་བདེ་བ་ཅན་དུ་སྐྱེ་བར་གྱུར་ཅིག །ཅེས་བྱ་བ་ལ་སོགས་པའི་སྨོན་ལམ་རྒྱ་ཆེན་པོ་བཏབ་པས། དེ་བཞིན་གཤེགས་པ་དེས། དེ་ལ་ལེགས་སོ་ལེགས་སོ། །དེ་དེ་བཞིན་ཏེ། ཁྱོད་ཀྱིས་སེམས་ཅན་གྱི་ཁམས་ཐམས་ཅད་ལ་རྣམ་པར་བལྟས་པའི་ཕྱིར། ཁྱོད་ཀྱི་མིང་ཡང་སྤྱན་རས་གཟིགས་དབང་ཕྱུག་ཅེས་བྱའོ། །ཞེས་བཀའ་སྩལ་པ་ནས་མཚན་དེ་ལྟར་གྲགས་ལ། མཚན་དེ་ཐོས་པ་ཉིད་ཀྱིས་ཀྱང་ངན་འགྲོར་མི་ལྟུང་བ་དང་། 
3-313
བཟང་པོའི་འགྲོ་བ་ཙམ་ལེན་པའི་མཚམས་བཟུང་སྟེ་བྱང་ཆུབ་ཏུ་རིགས་སད་པས་སོ། ། དེས་སེམས་ཅན་གྱི་ཁམས་ཚད་མེད་པ་ལན་མང་དུ་བསྒྲལ་ཡང་། དེ་དག་ཉུང་བར་མ་གྱུར་ནས། དམ་བཅས་པ་སྒྲུབ་པ་ལ་སྒྱིད་ལུག་པས། དབུ་བཅུ་གཅིག་ཏུ་གས་པའི་ཚེ། སྣང་བ་མཐའ་ལས་དགེ་བའི་བཤེས་གཉེན་དུ་འོངས་ཏེ། ཞལ་བཅུ་གཅིག་ཏུ་བྱིན་གྱིས་བརླབས་བ་དང་། གང་གི་སྤྱན་ཆབ་ཀྱིས་ཆུ་སྐྱེས་བསྐྲུན་པའི་སྡོང་པོ་ལས་སྒྲོལ་མ་གཉིས་དང་། གཞན་ཡང་། དེའི་སྒྱུ་མ་ཆེན་པོའི་རྩེ་བ་ལས། བསྐལ་བཟང་འདིའི་སྒྲོན་མ་སྟོང་བྱུང་ལ། དེའི་ནང་ནས་སྙིགས་མ་ལྔ་བདོ་བའི་དུས་པ་ལ། སངས་རྒྱས་གཞན་རྣམས་བརྩེ་བ་ལྷོད་པར་གྱུར་པ་ན། བཅོམ་ལྡན་འདས་ཤཱཀྱ་ཐུབ་པས་ལེགས་པར་བསྐྱངས་ཏེ། ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བར་མཛད་པའི། བླ་ན་མེད་བའི་བདུད་རྩི་དེ་ལ་ངོམས་པར་འཐུངས་པ་བསམ་གྱིས་མི་ཁྱབ་པ་ལས། དཔལ་ལྡན་རྒྱུད་ལ་རྒྱས་འགྲེལ་མཛད་པར། བྱང་ཤམྦྷ་ལ་གྲོང་ཁྱེར་བྱེ་བ་ཕྲག་དགུ་བཅུ་རྩ་དྲུག་པའི་དབུས། ཕོ་བྲང་ཆེན་པོ་ཀ་ལཱ་པར་རིགས་ལྡན་ཆེན་པོ་གྲགས་པའི་སྲས་པདྨ་དཀར་པོར་གྱུར་ལ། ལྷག་པར་གངས་ཅན་འདི་དེ་ཡི་ཞིང་ཁམས་ཏེ། དེ་ཡང་། སྟོན་པ་འཇིག་རྟེན་ན་འཚོ་ཞིང་གཞེས་པའི་ཚེ་མཚོ་ཆེན་པོ་ཞིག་ཏུ་ཡོད་ལ། དེ་ཉིད་མྱ་ངན་ལས་འདས་ནས་ལོ་བརྒྱ་ན། 
3-314
མཚོ་རིམ་གྱིས་བྲི་སྟེ་སཱ་ལའི་ནགས་ཆགས། དེར་འཕགས་པ་འདི་དང་། འཕགས་མ་སྒྲོལ་མའི་སྤྲུལ་པ་གཉིས་ལས་མི་དག་མཆེད་དེ། ལིཙྪ་ཝཱིའི་རིགས་མཆོག་ལས་འོངས་པ་འགའ་ཞིག །དེ་དག་གིས་རྒྱལ་པོར་དབང་བསྐུར་བའི་བརྒྱུད་པ་མང་པོ་འདས་པ་ན། ལྷ་ཐོ་ཐོ་རི་གཉན་བཙན་ཞེས་པས་རྒྱལ་སྲིད་བཟུང་བའི་ཚེ། འཕགས་པ་འདིའི་རྟོག་པ་ཟ་མ་ཏོག་བཀོད་པའི་མདོ་དང་། སྤང་སྐོང་ཕྱག་བརྒྱ་བ་གནམ་ནས་བབས་པས་དམ་པ་ཆོས་ཀྱི་དབུ་བརྙེས་ཏེ། དེ་ལ་དད་པའི་རི་མོར་བགྱི་བ་བྱུང་བས་སོ། །ཕྱི་ནས་འདི་ཉིད་སྲོང་བཙན་སྒམ་པོ། ཞེས་པ་སྤྲུལ་བའི་རྒྱལ་པོ་མགོ་བཅུ་གཅིག་པ་ཞིག་ཏུ་གྱུར་ནས། བལ་པོ་དང་། རྒྱ་ཡུལ་ནས་སྒྲོལ་མ་དཀར་སྔོ་རྒྱལ་པོའི་བུ་མོར་སྣང་བ་གཉིས་བཙུན་མོར་བསུས། ཕྱག་ན་རྡོ་རྗེ་དང་། འཇམ་པའི་དབྱངས་བློན་པོ་འགར་སྟོང་བཙན་དང་། ཐོན་མིར་གྱུར། བོད་སྲིན་མོ་གན་ཀྱལ་དུ་འགྱེལ་བ་འདྲ་བའི་ས་གནོན་པར། མཐའ་འདུལ། ཡང་འདུལ་ལ་སོགས་པའི་གཙུག་ལག་ཁང་བཏབ། རྒྱ་མོ་བཟའི་རྩིས་ལས་བྱུང་བ་བཞིན། རས་ས་སྐྱས་ཏེ་མཚོ་བསུབས་པའི་སྙིང་གར་། དཔལ་ཆོས་འཁོར་ལྷ་ས་འཕྲུལ་སྣང་གི་གཙུག་ལག་ཁང་བརྩིགས་པས་ཡུལ་འདིར་བསྟན་པ་ཆགས་པའི་གནད་གྲུབ་ཅིང་། ཡི་གེ་ལ་སོགས་པའི་གྲ་བཙུགས། དམ་པའི་ཆོས་ཅུང་ཟད་ཉམས་སུ་བླང་བའི་སྲོལ་གཏོད་ལ། 
3-315
དེའི་དབོན་སྲས་ཁྲི་སྲོང་ལྡེ་བཙན་གྱི་རིང་ལ། ཟ་ཧོར་གྱི་རྒྱལ་ཁམས་ཁ་ས་ར་ཎཱར་འཁྲུངས་པའི་བྷིཀྵུ་ཆེན་པོ་ཞི་བ་འཚོ་མཁས་པའི་དབང་ཕྱུག་དང་། དྷ་ན་ཀོ་ཤའི་མཚོ་གླིང་དུ་པདྨའི་ལྡོང་པོ་ལས་བལྟམས་པ། ཛམྦུའི་གླིང་ན་ཆེ་བའི་རིག་སྔགས་མཁན་པདྨ་འབྱུང་གནས་གཉིས་སུ་ཡང་སྣང་ནས། འདྲེ་སྲིན་གདུག་པ་ཅན་རྣམས་བཏུལ། བསམ་ཡས་ལྷུན་གྱིས་གྲུབ་པའི་གཙུག་ལག་ཁང་ཆེན་པོ་བསྒྲུབས། རབ་ཏུ་བྱུང་བ་དང་། བསྙེན་པར་རྫོགས་པ་ལ་སོགས་པའི་སྒོ་ནས་བསྟན་པ་རྒྱས་པར་མཛད་དོ། ། འཕགས་པའི་ཡུལ་ཀསྨཱིར་གྲིབ་བརྟེན་ཏུ་ཡང་རྒྱལ་པོ་དང་། བྲམ་ཟེའི་རིགས་གཞི་མཐུན་པས། ནཱ་རོ་ཏ་པ་ཞེས་བྱ་བའི་བརྒྱུད་དུ་འཁྲུངས་ཏེ། རིགས་ཀྱི་བྱ་བ་བྲམ་ཟེའི་ལས་དྲུག་ལ་མཁས་པར་སྦྱངས་ཤིང་། རྒྱལ་སྲིད་མ་བཞེས་པར། སངས་རྒྱས་ཀྱི་བསྟན་པ་ལ་མི་ཕྱེད་པའི་གུས་པས་རབ་ཏུ་བྱུང་། རིག་པའི་གནས་ལྔ་ལ་ཟླ་མེད་པའི་མཁས་པར་གྱུར་ནས། ཡུལ་དབུས་ན་ལེནྡྲའི་མཁན་པོར་བསྐོས། མུ་སྟེགས་མང་པོ་ཕམ་པར་མཛད་ནས། ཡང་དག་པའི་ལམ་སྟོན་པའི་དགེ་བའི་བཤེས་གཉེན་འཚོལ་བར་བཞེད་དེ་ཁ་ཆེའི་ཡུལ་མེ་ཏོག་ལ་དེ་ལྡན་ཞེས་པར་བདེ་མཆོག་ཡི་གེ་བདུན་པའི་སྒྲུབ་བ་མཛད་པས། ཞག་བདུན་སོང་བའི་ཐོ་རངས། ས་གཡོ་བ་དང་། སྒྲ་དང་། འོད་བསམ་གྱིས་མི་ཁྱབ་པ་བྱུང་བའི་སྒྲ་ལ་བརྟགས་པས། 
3-316
ཁྱོད་ཤར་ཕྱོགས་སུ་སོང་དང་། ཏིལླི་པ་ཞེས་བྱ་བས་རྗེས་སུ་འཛིན་པར་འགྱུར་རོ། །ཞེས་ལུང་བསྟན་པ་བརྙེས་ཏེ། སློབ་མའི་ཚོགས་ཀྱིས་ཅི་བཤོལ་ཡང་མ་གསན་པར་བྱོན། དཀའ་ཕྲན་བཅུ་གཉིས་སྤྱད་པའི་མཐར། ཨོ་ཏནྟྲ་པུ་རི་ཞེས་པ། དཔལ་བསམ་ཡས་ཀྱི་མ་ཕྱི། བྷངྒ་ལའི་ཡུལ་ན་ཡོད་པ་དེར། བླ་མ་རྙེད་ནས། དཀའ་བ་ཆེན་པོ་ལུས་དང་སྲོག་ཐལ་བར་འཐག་པ་བཅུ་གཉིས་ཀྱིས་ཡོངས་སུ་མཉེས་པར་མཛད་པས། ཐེག་ཆེན་གྱི་མཐོང་ལམ་ཐོབ། ཕྱིར་ལོག་ཁ་ཆེའི་ཡུལ་གུར་ཀུམ་གྱི་ལྗོངས་ཆེན་པོའི་དབུས་ན། ཤིང་ཀུན་སྐྱེས་པའི་རི་བོར། པུཥྤ་ཧ་རི་ཞེས་པའི་གཙུག་ལག་ཁང་བཏབ་སྟེ། སྒོམ་པ་ལ་བརྩོན་པར་བཞེད་ཀྱང་དབུས་འགྱུར་འཆང་རྡོ་རྗེའི་གདན་ལས་ཅུང་ཟད་ཤར་དུ་ཕྱིན་པ་རྒྱལ་པོ་དྷརྨ་བཱ་ལས་བསྒྲུབས་པ། བི་ཀྲ་མ་ལ་ཤཱི་ལ་གཙུག་ལག་ཁང་བདུན་བརྒྱ་ཡོད་པ། རིག་པའི་གནས་ཐམས་ཅད་ལ་མཁས་པའི་པཎྜི་ཏ་ཆེན་པོ་ལྔ་བརྒྱ་སློབ་མ་སྡེ་སྣོད་གསུམ་པ་བྱེ་བ་ཕྲག་མང་པོས་བསྐོར་ཏེ་བཞུགས་པ་དེའི་བྱང་སྒོ་པ་ཛེ་ཏཱ་རི་སྟེ་དགྲ་ལས་རྣམ་རྒྱལ་བརྟུལ་ཞུགས་ཀྱི་སྤྱོད་པ་ལ་གཤེགས་ནས། གཅེར་བུ་པ་ཤིན་ཏུ་ཤེས་པ་དང་ལྡན་པ་དག་གིས་རྩོད་པར་འོངས་པ། གཞན་གྱིས་ཐུབ་པར་དཀའ་ནས། ཐམས་ཅད་ཀྱིས་གསོལ་བ་བཏབ་སྟེ། ཕས་ཀྱི་རྒོལ་བ་ཐམས་ཅད་འཇོམས་པའི་སྨྲ་བའི་སེང་གེར་དབང་བསྐུར། 
3-317
མུ་སྟེགས་ཐམས་ཅད་ཆོས་ཀྱིས་ཕམ་པར་མཛད་པས་བྱང་སྒོ་བ་ཆེན་པོར་གྲགས་ལ། ཕྱིས་བརྟུལ་ཞུགས་ཀྱི་སྤྱོད་པས་མཆོག་གི་དངོས་གྲུབ་སྐུ་ཚེ་འདིར་བརྙེས་པར་བསྟན་པ་དང་། དེ་ནས། སྙིང་རྗེ་པདྨ་དཀར་པོ་ལས། དགེ་སློང་འཚོ་བྱེད་ཅེས། རྒྱལ་བའི་བསྟན་པ་རིན་པོ་ཆེ་ལ་བྱ་བ་རླབས་པོ་ཆེ་བྱེད་པར་ལུང་བསྟན་པ། སྙིང་པོའི་བསྟན་པ་ལ་སྟོན་པ་གཉིས་པ་ལྟ་བུ། ཟླ་འོད་གཞོན་ནུ་དང་། ལྷག་པར་གངས་རི་དཔལ་དང་ལྡན་པ་ཧའོ་གང་བ་བཟང་པོའི་ལྷ་ཞོལ། འབྲོག་ཁུ་ལ་གནམ་གྱི་མཐིལ། རྒྱ་གྲོང་ཞེས་པར་རྒྱའི་རིགས་ཀྱི་ཐིག་ལེར་སྤྲུལ་བའི་སྐུར་འཁྲུངས་ནས། གཞུང་ལུགས་དུ་མ་ལ་སྦྱངས་ཏེ། རི་བོ་གངས་ཅན་པའི་ས་ར་ཧ་ཆེན་པོ་དེའི་ཞབས་ལ་གཏུགས་ལྷོ་བྲག་མཁར་ཆུར་ལྷ་འདྲེའི་དམག་ཚོགས་བཏུལ་ནས་ཆོས་ཉིད་ཀྱི་བདེན་པ་གཟིགས་པ་དང་། ཧི་མ་ལ་ཡའམ་ཙཱ་རི་ཏྲ་ཞེས་གྲགས་པར་ཞིང་སྐྱོང་གི་དབང་མོ་དང་ལྷན་ཅིག་ཏུ་བརྟུལ་ཞུགས་ཀྱི་སྤྱོད་པ་མཛད་པ་དང་། བཅོམ་ལྡན་འདས་འཁོར་ལོ་སྡོམ་པས། བསྐལ་པ་བཟང་པོ་འདི་ལ། ཡང་དག་པར་རྫོགས་པའི་སངས་རྒྱས་མོས་པར་ལུང་བསྟན་པ་དང་། རྡོ་རྗེ་བཙུན་མོས་ཀྱང་། བསྟན་པ་བྱ་རྒོད་ཀྱི་ཉིན་ལམ་བཅོ་བརྒྱད་ཁྱབ་བོ། །ཞེས་དབུགས་ཕྱུང་བ་དང་། བྱང་ཆུབ་ཀྱི་ཤིང་ཁ་ཊྭཱཾ་ག་ལྟ་བུའི་དྲུང་དུ། 
3-318
རྫོགས་པའི་སངས་རྒྱས་དཔའ་བོ་བདུན་གྱིས་གཟེངས་བསྟོད་པ་དང་། ཕྱིས་ཞང་བདེ་བའི་རྡོ་རྗེ་ལས་བསྙེན་པར་རྫོགས་དུས། དཔལ་ནཱ་རོ་པ་ཆེན་པོར་བསྔགས་པ་དང་། སངས་རྒྱས་ཀྱི་བསྟན་པ་ལ་སྙིང་པོའི་དོན་ལྷུར་ལེན་པའི་སློབ་མའི་ཚོགས་འདུས་པ་ལ་ཆེ་བ་ཕལ་ཕེར་སྐུ་ཚེ་འདི་ཉིད་ཀྱིས་ནམ་མཁའ་རྡོ་རྗེའི་གྲོང་དུ་ཞུགས་པ་འཇིག་རྟེན་གསུམ་དུ་ལན་གསུམ་བཀྱེ་བ་དང་། ཉིད་ཀྱི་དབོན་དང་། སློབ་མའི་གཙོ་བོ་དྲུག་དང་། ཉིས་སྟོང་བརྒྱད་བརྒྱ་ལ་བསྟན་པ་གཏད་དེ། སྐུའི་གདུང་ལྷ་སྐུ་དང་རིང་བསྲེལ་གྱི་ཕུང་པོར་བསྟན་པ་དང་། གཞན་ཡང་མངོན་པར་དགའ་བའི་ཞིང་དུ། བྱང་ཆུབ་སེམས་དཔའ་སྣང་བ་རྡུལ་བྲལ། ཞེས་པ་དང་། ཡང་དཔལ་ལྡན་འབྲུག་པའི་གདུང་རབས་སུ། བསྟན་པ་གསོ་བའི་དགེ་བའི་བཤེས་གཉེན་ཆེན་པོ་རྒྱལ་བའི་དབང་པོའམ་ཀུན་དགའ་དཔལ་འབྱོར། སྐུ་གཞོན་ནུ་ཉིད་ནས་སྦྱངས་པའི་ཤུགས་ཆེ་བ་དང་། འཁྲུལ་ཞིག་ནམ་མཁའི་རྣལ་འབྱོར་གྱི་དྲིན་གྱིས་མཆོག་གཟིགས་པ་དང་། རྩ་རླུང་ཐིག་ལེ་གནད་དུ་ཕྱིན་པས་དངོས་སུ་གྲོང་འཇུག་ནུས་པ་དང་། པཎྜི་ཏ་ནགས་ཀྱི་རིན་ཆེན་ལ་སོགས་པ་མང་པོའི་གསུང་གི་བདུད་རྩིས་མཁས་པའི་ལང་ཚོ་གང་བས་ལོ་ཙ་བ་ཆེན་པོའི་གྲངས་སུ་ཆུད་པ་དང་། ཁྱད་པར་རྔོག་སྟོན་རིན་པོ་ཆེ་བདུན་པའི་ཞལ་སྔ་ནས། ཆོས་བདག་པོའི་ལག་ཏུ་འཕྲོད་དོ་ཞེས་ནཱ་རོ་པར་ལུང་བསྟན་ཏེ། 
3-319
སྒྲ་བསྒྱུར་ཆེན་པོ་མར་པའི་བཤད་པའི་བསྟན་པ་གཏད་པ་དང་། ཙ་རི་ཏྲ་ལ་སོགས་པར་རྡོ་རྗེའི་སྤྱོད་པ་མཐར་དབྱུང་ཞིང་། ཤར་དགས་ལྷ་སྒམ་པོར། བཅོམ་ལྡན་འདས་བསོད་རྣམས་རིན་ཆེན་གྱི་གདན་སེང་གེའི་ཁྲི་ལ་འཛེགས་པ་དང་། སྐྱེ་དགུ་ཐམས་ཅད་ལ་མ་འདྲིས་པའི་མཛའ་བཤེས་ཆེན་པོས་ཕན་པ་དང་། བདེ་བ་བླ་ན་མེད་པ་སྦྱིན་པའི་ཕྲིན་ལས་བསམ་གྱིས་མི་ཁྱབ་པ་དང་། ཁྱད་པར་མཐའ་དམག་གི་ཇིགས་པ་བསྐྱབ་པའི་ཕྱིར། བུ་ཆུ་གསང་བ་ཆེན་པོའི་ནགས་ཚལ། བདེ་ཆེན་ཧ་ཧར་བཞད་པ་ཡོངས་འདུའི་ཚལ་གྱི་གནས་ཀྱི་སྒོ་འབྱེད་པར། མཁའ་འགྲོ་མས་ལུང་བསྟན་ནས། བུ་ཆུ་གཏེར་གྱི་ལྷ་ཁང་གི་འཕགས་པ་སྤྱན་རས་གཟིགས་ལ་གསོལ་བ་བཏབ། མེ་རག་མདོའི་གནས་དེའི་ལྟེ་བ་ཕ་བོང་གཡུ་སྦྲའི་སྟེང་དུ་ཕེབས་པའི་ཕྱགས་ཕྱིར། གཅོད་པ་སངས་རྒྱས་དཔལ་སྐུ་ཤིན་ཏུ་ཚོ་ཞིང་ན་ཚོད་ཀྱིས་མཐར་ཕྱིན་པ་དེ་ཡོད་པས་ཕ་བོང་གི་རྩེར་ཁོང་གིས་མ་ཐར་ནས་རྗེས་ཞབས་ཀྱིས་ཕ་བོང་བརྫིས་པས་རྐང་ཁུང་བྲུས་པ་ལྟ་བུ་བྱུང་། གནས་སྒོ་ལེགས་པར་ཕྱེ་ནས་སྒྲུབ་པའི་གྲྭ་ཚུགས་ཙམ་མཛད། ཡང་རེས་སྒམ་པོར་དབོན་རིན་པོ་ཆེ་ཆེ་སར་བཏོན། དེ་ནས་བྱ་ཡུལ་དུ་བྱོན། དཔལ་བཀྲ་ཤིས་དར་རྒྱས་ལེགས་པའི་རྒྱལ་པོ་ཡབ་ཡུམ་གྱིས་ཞབས་ཏོག་ཕུལ་དུ་ཕྱིན་པ་བསྒྲུབས་བཞིན་པས། 
3-320
ཇོ་བོ་གསལ་རྗེའི་མགུལ། ཡར་འདྲེན་བྱང་ཆུབ་སྨན་གྱི་ལྗོངས་ཀྱི་འདབ་མ་རྫ་སྟེང་རི་ཁྲོད་ནས། ལོ་གྲོ་ཕྱོགས་སུ་ཐེགས་ཀར། གསོལ་དཀར་ནམ་མཁའི་མདོག་ཅན་ཇ་བཟང་པོས་བཀང་པ། ཅུང་ཟད་ཙམ་གསོལ་བའི་མཐར། དཔལ་ལྷ་མོ་དབྱངས་ཅན་དགའ་མ་ལ་སྩལ་ནས། ངེད་ཕྱིར་འདབ་དུས་གནས་མལ་ཞུ་དགོས་པར་འདུག་གསུངས་པ་ལ། དེ་ཧ་ལས་མ་བླངས། རྗེའི་དྲུང་གིས་བཏང་བས་བར་སྣང་ལ་ཡུན་རིང་པོར་འཁོད་པ་ཡབ་ཡུམ་འཁོར་དང་བཅས་པས་གསལ་པོར་གཟིགས། ལྗགས་ལུད་དོར་བ་གཡམ་སྟེངས་སུ་ལྷུང་བ། དཔོན་ས་དྲུང་དཀར་མས་ཚགས་མཛད་པ། ཕྱིས་ལྗགས་ལུད་གོང་པོ་རྡོ་དང་འདྲེས་པའི་རིང་བསྲེལ་དུ་སོང་བ་ཉམས་མཚར་བ། ད་ལྟ་གསལ་རྗེར་བཞུགས། དེ་ནས་ཡར་དབོན་རིན་པོ་ཆེ་རྗེས་སུ་འཛིན་པའི་ཆེད་དུ་ཐེགས་ནས།ར་ལུང་དུ་ཕེབས། སྟོན་རྒྱབ་དེ་ཁར་སྐུ་ཡལ། དེ་ནུབ་རང་གླིང་ནང་པ་ཐམས་ཅད་ཀྱིས་མཐོང་པ་མཐུན་པར། སྤོས་སྐྱ་ནས་འོད་ཟེར་གྱི་ཕུང་པོ་རྫ་མ་ཙམ་ཞིག་སྒྲ་འོད་བསམ་གྱིས་མི་ཁྱབ་པ་དང་བཅས། ཤར་ཕྱོགས་ར་ལའི་སྟོངས་བརྒལ་ཏེ་སོང་བ། ཙ་རི་དང་། བུ་ཆུའི་སྒྲུབ་སྡེ་གོང་འཕེལ་དུ་མཛད་པའི་ཕྱིར་བསམ་བཞིན་དུ། ཉི་མ་ལྷོ་ཕྱོགས་ཡངས་པའི་རྒྱལ་ཁམས་ཆེན་པོར། གནམ་གྱིས་བསྐོས་བའི་ལྷ་བཀྲ་ཤིས་དར་རྒྱས་ཀྱི་སྲས་སུ་འཁྲུངས་པར་སྣང་ལ། 
3-321
ནུབ་གཅིག་སྲས་ཡུམ་ཞལ་འཐབ་བྱུང་བ་ལས། སྲས་ཀྱིས་ལྗགས་དཔོད་མཛད་པའི་ཡི་གེ་ཕྱིར་འཕངས་པ། དེ་ཀའི་སང་ཉིན་རང་རྒྱལ་དབང་རྗེའི་ཞལ་སློབ་རྣམས་ལ་དུས་གཅིག་ཏུ་འབྱོར་ནས། ཕྱོགས་ཕྱོགས་ན་བཞུགས་པ་ཐམས་ཅད་རྩོལ་བས་བསྡུས་པ་བཞིན། ཕོ་བྲང་ཆོས་རྒྱལ་ལྷུན་པོར་འབྱོར། རྒྱུན་དུ་ཅོག་པུ་བ་བརྒྱད་བརྒྱ་ཙམ་འཚོག་བཞིན་པ་ལ། བརྒྱ་ཕྲག་རེ་རེ་ཙམ་འགྲོ། རེ་རེ་ཙམ་འོང་བ་བྱུང་། དེ་དག་དང་། རྗེ་འབྲུག་པ་རིན་པོ་ཆེ་ངག་དབང་ཆོས་ཀྱི་རྒྱལ་པོ་ཕེབས་པ། དཔོན་སློབ་ཐམས་ཅདཀྱིས་རྒྱལ་ཁམས་ཀྱི་བླ་མར་གསོལ་བ་བཏབ་བའི་ཚེ། སྐུ་མཆེད་གཉིས་ཡོད་ཀྱང་། ཡབ་ཡུམ་གྱི་བཀའ་ནན་ལྕི་བས། རྒྱལ་སྲིད་ཀྱི་དབང་ཕྱུག་ཆེན་པོ་དང་དུ་བཞེས་དགོས་པ་བྱུང་། དེ་ཡང་རྡོ་རྗེ་གླིང་པའི་གཏེར་ཡིག་ཏུ། གཉལ་ལུང་པ་རྒྱལ་པོ་གཅིག་གིས་འབངས་སུ་སྡུད་ལ། དེ་ཙ་ན་ཡུལ་དེར། སྤྱན་རས་གཟིགས་ཀྱི་སྤྲུལ་པའི་སྐུ་ཞིག་རྒྱལ་པོར་འབྱོན་ནོ་ཞེས་ལུང་བསྟན་པའི་དུས་ལ་བབ་པ་ཡིན་ནོ། །དེ་ནས་ཡབ་དང་མཆོད་ཡོན་འབྲེལ་ཆེ་བས་གནམ་ལ་ཉི་ཟླ་ཟུང་གཅིག །ས་ལ་མཆོད་ཡོན་རྣམ་གཉིས་སུ་གྲགས་པ། སྤྲུལ་པའི་སྐུ་ཞྭ་ནག་ཅོད་པན་ཅན་ཆོས་གྲགས་རྒྱ་མཚོའི་ཞལ་སྔ་ནས་ཀྱིས། ཆོས་ཕྱོགས་ནས། ཀརྨ་པ་རང་གི་དྲུང་པ་རྣམ་གཉིས་དང་མཉམ་པའི་ཀུན་ཏིང་གོ་བོ་ཤྲིའི་ལས་ཁ། 
3-322
ཕྱིས་རྗེའི་དྲུང་སྐྱིད་ཤོད་དུ་མཛད་པ་བར་ཆད་དུ་གྱུར་པའི་དབང་ལས། ཀོང་པོར་ཕེབས་དགོས་པ་བྱུང་བའི་ཚེ། གྲུབ་མཐའི་ཀུན་སློང་གིས། དྭགས་པོ་བང་རིམ་པས་ཕེབས་ལམ་བགགས་པའི་ལམ་སེལ་ལ་བྱོན་དུས་ཤིན་ཏུ་མཉེས་ནས། ཀོང་པོ་ང་ལའི་ལ་རྩར། འཇིག་རྟེན་དང་མཐུན་པར་བསོད་ནམས་ཆེན་པོའི་བྱིན་དང་ལྡན་པའི་འཁོར་ལོས་སྒྱུར་བར་རིན་པོ་ཆེ་སྣ་བདུན་བྱིན་ཏེ་དབང་བསྐུར་རོ། །བདག་ཀྱང་མི་ཆེན་པོའི་བགྱི་བ་ལ་ཤིན་ཏུ་མི་དགའ་བ་ཞར་དང་ཞར་ལ་སྡེ་དཔོན་གྱི་འབྱོར་པ་ལ་སྤྱོད་དགོས་པའང་། འདིའི་རྟེན་འབྲེལ་དུ་སྣང་ངོ་།། །། ལྕང་ལོ་ཅན་གྱི་རྡོ་རྗེ་ཐེག་པའི་འཆད་ཉན་པ་རས་ཆུང་རྡོ་རྗེ་གྲགས་པ་ཡང་། སྔར་ལྟ་བུའི་རས་པའི་ཆས་སུ་མཛད་ནས་མི་མང་པོས་མཐོང་བར་བྱོན་ཏེ། དཔལ་མཻ་ཏྲི་པའི་ལུགས་ཀྱི་སྙན་རྒྱུད་ཀྱི་གདམས་ངག་རྩལ་བྱིན་བརླབས་འཕོ་བའི་དབང་གིས། གང་གི་སྐུ་ཡང་དངས་མ་ཆེན་པོར་གྱུར་པས་རྫུ་འཕྲུལ་གྱི་ཞབས་དང་ལྡན་ཏེ། བྱར་སྐྱིད་ཕུག་ཏུ་ཁམས་པ་མི་གསུམ་གྱིས་ཆོས་བྲོ་མཛད་ས་ན། རྡོ་མ་གཡམ་ཞིག་ལ། ཞབས་ཀྱི་པདྨའི་ཤུལ་ཆེས་གསལ་བ་ཚར་བཅུ་དྲུག་ཡོད་པ་དང་། པདྨོ་བཀོད་དུ་སྐུ་བུག་པ་ལྟ་བུ་བྱུང་བའི་མཐར་རྡོ་བ་ལ་སྐུ་སྨད་ཀྱི་ཕྱོགས་ཕྱེད་ཙམ་དིམ་པ་དང་། གཉལ་གསེར་ཕྱེ་འབུམ་བའི་ཟམ་གདོང་གི་གྲམ་པའི་རྡོ་ལ་ཕྱག་རྗེས་དང་། 
3-323
རྡོ་རྗེ་ཆོས་རྫོང་དུ། གསང་ཆབ་ཀྱི་རྗེས་ཕ་བོར་ལ་བྱུང་ཞིང་། ཕྱིས་དེའི་འོག་ཟུར་ནས་ཆུ་མིག་བརྡོལ་བ་དང་། སུ་ཁ་སིདྡྷི་ལ་སོགས་པའི་རྣལ་འབྱོར་མ་རྣམས་ཀྱིས་སྤྱོད་པའི་གྲོགས་དང་། མ་འོངས་པ་ལུང་སྟོན་པ་དང་། ཆོས་རྒྱལ་གླིང་དུ་དུས་འཁོར་གྱི་དབང་སྔ་མ་སྩལ་བའི་དུས། ཀུན་སྤངས་རྗེ་ལ་ཁྲོ་བོའི་དབང་པོ་རྡོ་རྗེ་ཤུགས་དངོས་སུ་ཕེབས་པས། ས་ཚོན་སྟེང་དུ་གཤེགས་ཀྱང་ཅུང་ཟད་ཀྱང་མ་སུབས་པ་དང་། རྗེ་ཉིད་ཀྱིས། ཐམས་ཅད་ཀྱིས་མཐོང་བར་རྡོ་རྗེ་དྲིལ་བུ་བར་སྣང་ལ་བཞག་པ་དང་། ཀླུང་ཤུལ་གནས་དང་། ཡང་རྩེའི་ལྷུན་གྲུབ་གསེར་ཁང་རྩེ་ནས་མཆོད་ཤོམ་དང་བཅས་པའི་ཅོག་རྩེ་རིལ་འཕངས་པ། སྐྱོན་ཅི་ཡང་མེད་པའི་སྟེངས་སུ་ཀ་པཱ་ལིའི་ནང་གི་བདུད་རྩི་མ་བོ་བ་དང་། དཔལ་ལྷ་རྩེ་ལ་སོགས་པར་འཇིག་རྟེན་གྱི་རྡུལ་སྙེད་ཀྱི་དཀྱིལ་འཁོར་གྱི་ལྷ་ཚོགས་མངོན་སུམ་དུ་གཟིགས་ལ། ལྷག་པར་ཀླུང་ཤུལ་གནས་སུ་བཞུགས་པའི་ཚེ། ཤར་ཕྱོགས་མངོན་པར་དགའ་པའི་ཞིང་ཁམས་སུ་བྱོན་ནས། བཅོམ་ལྡན་འདས་མི་འཁྲུགས་པ་ལས། དེ་ཉིད་ལྷ་སོ་བདུན་དུ་བཞེངས་པ་རྣལ་འབྱོར་རྒྱུད་དུ་བཀྲལ་བའི་དབང་ལུང་ནོད་པ་དང་། སློབ་དཔོན་ཆེན་པོ་པདྨ་དྲག་པོ་རྩལ་དམར་པོར་བཞེངས་པ་གྲོགས་སུ་བཀུག་སྟེ་བར་ཆད་ཀྱི་བདུད་བཏུལ་བ་དང་། ཙ་རི་ཏྲར་ཞིང་སྐྱོང་བའི་དཔའ་བོ་སེང་གེའི་གདོང་པས་འདོལ་བ་མཛད་དེ་སྤྲུལ་པའི་ལྷས་ཞལ་བསྟན་པ་དང་། 
3-324
ལོ་གྲོ་དཀར་ནག་འདུས་པའི་རི་བོ། མངྒ་ལའི་རྩེར་སྒྲུབ་པའི་སྡེའི་ས་དྲས་པ་ན། རྒྱ་གར་གྱི་གྲུབ་ཐོབ་ཕོ་མོ་བརྒྱད་ཅུ་རྩ་བཞི་ཚོགས་ཀྱི་འཁོར་ལོར་མངོན་སུམ་དུ་འདུས་ལ། དྲུང་འཁོར་དག་གིས། བྱ་རྒོད་བརྒྱད་དུ་རྩ་བཞི་གྲལ་ལ་བསྒྲིགས། ཚོགས་ཀྱི་འཁོར་ལོར་ལོངས་སྤྱད་དེ་སོ་སོར་གྱེས་པ་མཐུན་གྲུབ་ཏུ་མཐོང་བས། དེ་ལ་བྱ་རྒོད་ཕུང་པོར་གྲགས་པ་དང་། རྗེ་མཐུ་སྟོབས་ཞབས་ཡོན་ཏན་ཡེ་ཤེས་དང་། ཀུན་སྤངས་ཆོས་ཀྱི་རྗེ་ཙཎྜཱ་ལི་པ་ལ་སོགས་པ་རྡོ་རྗེ་སེམས་དཔའི་གསེབ་ལམ་དུ་མང་པོ་བརྫངས་པས་རྡོ་རྗེའི་ས་དོག་པོར་བགྱིས་པ་སོགས་ངོ་མཚར་བ་བསམ་གྱིས་མི་ཁྱབ་པའི་གཏེར་དེ། སྐུ་ན་ཕྲ་བ་ན། རྒྱལ་དབང་རྗེའི་ལྕམ། འཕྲལ་དུ་སྨྱོན་མ་ལྟ་བུ། རྗེ་བཙུན་རིན་ཆེན་དཔལ་འཛོམ་དུ་གྲགས་པ། དོན་ལ་རྣལ་འབྱོར་མའི་དབང་མོར་བཞུགས་པ་དེས་རཏྣ་གླིང་པས་གཏེར་ནས་སྤྱན་དྲངས་པའི། ཚེ་རིལ་ཤིན་ཏུ་མང་བ་ཞིག་ཡོད་པ་བསྣམས་ཏེ་འབུལ་བར་བྱོན་པ། དེ་དུས་རྒྱལ་དབང་རྗེའི་སྤྲུལ་པ་ཡིན་པ་གསང་བར་བཞེད་ནས། ཡུམ་གྱིས་བརྡུང་དུ་བཅུག །འོན་ཀྱང་ཚེའི་རིལ་བུ་ཕུལ་བ་ལས་ཁ་ཤས་གསོལ། ལྷག་མ་བཞེས་ན་མི་རུང་། ཞེས་སྐུ་རྫིས་བཞེས་སུ་མ་བཅུག་པས། གང་གསོལ་བ་རེ་རིང་གི་ལོ་གྲངས་བཞུགས་པར་སྣང་ལ། ཚེ་རིལ་འདི་དང་། 
3-325
དམ་ཆོས་འདུས་པ་སྐོར་བཞི་ལ་སོགས་པ། རྒྱལ་དབང་རྗེས་བཞེས་ཤིང་གསན་ན། སྤྲུལ་པ་ན་རིམས་སྐུ་ཚེ་བརྟན་པ་ཞིག་འོང་བར། པདྨ་སམྦྷ་ཝས་རྟེན་འབྲེལ་བསྒྲིགས་པར་འདུག་སྟེ། འདི་ཕའི་ཁྲོད་ནའང་ཟོག་པོ་མངས་ནས། སོམ་ཉིས་བཞེས་པ་དང་གསན་པ་མ་བྱུང་འདུག །དེའང་གཙང་པ་རྒྱ་རས་ཀྱིས་རྩ་རི་སྦལ་བ་གཡུ་མཚོར་ཚེ་རིང་ཡང་ལྔ་བཅུ་རྩ་གཅིག་ཡིན། ཐུང་ཡང་ལྔ་བཅུ་རྩ་གཅིག་ཡིན། ཞེས་པའི་དབང་གིས་སོ་ཞེས་གླེང་ངོ་། ། ཕལ་ཆེར་རང་ཉིད་ཆེན་པོར་སྒྲུབ་པའི་ཚེ་གཏེར་ཡིག་འདྲེན་ཞིང་། གཏེར་བྱུང་གི་ཆོས་རྣམས་ཚད་ལྡན་མིན། ཞེས་སྨྲ་སྟེ་སྨྱོན་པའོ། །སྐུ་ཚེ་ཡང་དགུང་ལོ་ཞེ་དྲུག་པར་གསར་མཚམས། གཞན་གྱི་སྡེ་དཔུང་པས་མནན་པས། གང་གི་ཆབ་སྲིད་དབྱར་ཀའི་མཚོ་ལྟར་རྒྱས་ཀྱང་། ཆོས་ཀྱི་གྲྭ་མང་པོ་ཕྱག་བྲིས་སུ་མཛད་པ་མཐར་མ་ཕྱིན་པས། སྤྲུལ་སྐུ་མྱུར་དུ་འབྱུང་བའི་ཞལ་ཆེམས་བཞག་སྟེ་མྱ་ངན་ལས་འདས་སོ། །གདུང་གི་དྲུང་དུ་ཡོན་ཆབ་བྱིན་ཕོ་བའི་ལྷག་མ་ཞིག་ཤེལ་དུ་གྱུར་པའང་བྱུང་། ཞལ་ཆེམས་དེར་ཡང་། གཡོ་རུ་ཡར་རམ། གྲྭ་རྡོལ་གཞུང་གང་རིགས་སུ་སྤྲུལ་པ་ལེན་པ་དང་། ཉིད་ཆེན་པོའི་རིགས་སུ་འཁྲུངས་པས་ཐུགས་སུན་པའི་རྣམ་པས། ཤཱ་རིའི་བུའི་སྨོན་ལམ་ལྟར། བར་མའི་རིགས་དང་། སྤུན་ལྔའི་ཁྲོད་དུ་སྐྱེ་བར་ལུང་བསྟན་པ་གཉིས་ཀྱི་སྔ་མ་ནི། 
3-326
དེ་ནས་འཕོས་ཏེ། དཔལ་ཕག་མོ་གྲུ་པ་ཞེས་པའི་སྡེ་སྲིད་ཀྱི་བློན་ཆེན། འཕྱོང་རྒྱས་སྟག་རྩེ་པ་མི་དབང་དཔལ་འབྱོར་ལྷུན་པོ་བ་དང་། རྗེ་ཉིད་ཀྱི་ལྕམ་དོན་ཡོད་སྒྲོལ་མའི་སྲས་སུ་བལྟམས། དེར་འབྲུག་ནས་དབོན་རིན་པོ་ཆེས་ཀྱང་བར་ཆད་མ་བྱུང་བར་གྱིས་ཤིག་ཅེས་གདམས། རྗེ་གོང་མ་ཉིད་ཀྱི་ཞལ་སློབ་བླ་དགོན་སྤྲུལ་སྐུར་གྲགས་པ་བྱ་བྲལ་ཀྱི་སྐབས། འཕྱོང་མདའ་དཔལ་རིར་སྒྲུབ་པ་ལ་ཡོད་པས། ཡུམ་གྱི་མངལ་དུ་བཞུགས་པ་མངོན་ཤེས་ཀྱིས་རིག་ནས། འདི་ནི་ཁོ་བོའི་བླ་མའོ་ཞེས་མཚམས་ཧར་འཐོན་བྱས། ཕྱག་འབུལ་དུ་ཡོངས་པ་དང་། ཡུམ་ལ་དེ་བཞིན་གསོལ་ཞིང་། ལྷག་ཏུ་རྗེ་བླ་མ་དེས། ངེད་ལ་ད་ཁམས་སུ་སོང་། སྔར་གྱི་དགོན་གནས་སུ་སླེབ་པ་དང་འཕྲིན་ལས་ཆེན་པོ་འབྱུང་ཞེས་ལུང་བསྟན་པས། འགྲོ་བའི་དུས་ལ་བབ་བྱུང་ཞུས་པ་ལ། ཁྲི་ལྕམ་གྱི་ཐུགས་ལ། ཇོ་ཇོ་དྲུང་པའི་གྲ་པ་འདི་སྨྱོ་བ་འདྲ་དགོངས་པ་ཤར་ནས། ཕྱི་ཐེན་པའི་བསླབ་བྱ་ཅི་མཛད་ཀྱང་མ་ཉན་པར་སོང་། དེ་ནས་ལོ་གསུམ་ཙམ་ན་ཁམས་འགྲུལ་བ་མང་པོ་རྒྱ་བན་དང་བསྡེབས་ནས་སླེབ་པ་རྣམས་ཀྱིས། འབུལ་བ་ཡི་གེ་ཐམ་ཁ་འབྱར་བ་ཕྱག་ཏུ་ཕུལ། སྔར་གྱི་བཏང་རག་ཡིན་ཚུལ་ཞུས་པ་ན། བླ་དགོན་སྤྲུལ་སྐུ་དེ་སུ་ཡིན་དགོངས་ནས་ཞིབ་ཏུ་རྩད་བཅད་པས་སྔར་གྱི་ཁམས་པ་སྨྱོན་པ་དེ་ཡིན་པར་འདུག་ནས། 
3-327
ཁོང་གི་ལུང་བསྟན་ལ་ཐུགས་ཆེས་ཞེས་གྲགས་སོ། ། དེར་ལོ་གསུམ་ཙམ་དུ་ཤིན་ཏུ་སྐུ་འབྲས་གཙང་ཞིང་ཐུགས་རིག་བཀྲ་བ། ལྷག་པར་སྐྱེས་བུ་དམ་པ་ཁོ་ནའི་མཛད་པ་སྟོན་པས། བཀྲ་ཤིས་སྲོང་བཙན་བང་སོར། གཅེན་ཧོར་བསོད་ནམས་དར་ཞིང་རྒྱས་པའི་ལྷ་དང་། གསུང་དོན་གྲུབ་རྡོ་རྗེ་ཞེས་པའི་སྐུ་མཆེད་གཉིས་དང་ལྷན་དུ་བཞུགས། དེ་ནས་སྐུ་སྐྱེའི་སྙན་པས་བྱ་ཡུལ་ནས། བློན་ཆེན་ལྷས་བྱིན་དར་པོས་མཇལ་ཁ་ཞུས། དེའི་ཁྲོད་ན་དམ་ཚིག་མི་གཙང་བ་གཅིག་ཡོད་འདུག་པའི་རྐྱེན་དང་། ཕྱིར་རས་རྐྱང་པ་གཅིག་གིས་མི་རྐང་གི་གླིང་བུ་བུས་པ་གསན་པའི་མོད་ལ་དངངས་ནས་སྐུ་ཡལ་ལོ། །ཞེས་གཏམ་དུ་གླེང་ཞིང་། དེ་དུས་ཀྱི་མ་མ་དེ་ཡང་དམ་པ་དང་ཕྲད་པས་ཆོས་ལ་ཕྱིན། དུས་ཕྱིས་ཀྱི་སྒོམ་མ་ཙམ་ལ་བཟང་བ། ཤམྦྷོ་གངས་ཀྱ་རི་ཁྲོད་དུ་གཞན་གྱི་ཚོགས་དཔོན་བྱེད་པ། ཨ་མ་མ་མར་གྲགས་པ་ཞིག་བྱུང་ངོ་། །ཐུགས་རྗེའི་སྤྲིན་འཕྲེང་ངོ་མཚར་ཆུ་རིས་ཅན། །གཉིས་འཐུང་ཆེན་པོར་འགིའུ་ཝཾ་དྲི་བཞིན་དང་། །ཀུན་གསལ་གཞོན་ནུའི་འགྲམ་པར་ཨུཏྤ་ལ། །མཐིང་ཁའི་དོག་པ་ལྟ་བུ་ཅི་ཡང་བརྩམས། །དེ་དྲིན་གྲུ་ཆར་རྒྱས་པས་ཕན་བདེ་ཡི། །མྱུ་གུའི་མངལ་གྱིས་ནོར་འཛིན་མ་ལྕི་ལ། །ཐུབ་བསྟན་ཟླ་བའི་མ་མ་རོ་ལྡན་ཅན། །དགའ་བ་རྒྱས་ནས་རྫོགས་ལྡན་རིལ་འཁུ། །
3-328
སྔོན་འཇམ་དབྱངས་བློ་གྲོས་སེང་གེའི་ཞལ་སྔ་ནས། བདེ་ཆེན་ཆོས་ར་བ་སོགས་ཙ་རིའི་མཆོད་ཡོན་མང་པོས། ལན་དུ་མར་གདན་འདྲེན་བྱས། འབྱོན་པར་བརྩམས་ཀྱང་མ་ཐོན། རི་ཐེས་ཕྱི་མ་རྫོང་མཐར་གནང་བའི་དུས་སུ་ཁྱེད་རྣམས་ཀྱི་རི་ཐེས་ཀྱི་རིང་ངམ། རྗེས་སུ་ངེད་ཅི་ནས་ཀྱང་ཕྱོགས་དེར་སླེབ་པར་བྱེད་དོ། །ཞེས་ཞལ་གྱིས་འཆེས་པ་དང་། རྒྱལ་དབང་རྗེའི་དུས། དགོན་ཆོས་རྭར། མཁས་གྲུབ་ལེགས་པ་རིན་ཆེན་གྱི་ཞབས་རྗེས་དང་། གསོལ་མཛོའི་རྨིག་རྗེས་ཡོད་པ་གཟིགས་སུ་བྱོན་པས། ཆུ་མིག་གི་ཁར། དབུ་ཞྭ་རླུང་གིས་བསྐྱོད་པ་ཕྱག་གིས་བརྙབས་པས་ཕ་བོང་ཞིག་ལ་ཕྱག་རྗེས་དོད་པ་དང་། རྗང་ཞེས་པའི་ཡུལ་གྲུར། ཞབས་རྗེས་གསལ་བར་བཞུག་པའི་རྟེན་འབྲེལ་དང་། ཁྱད་པར་དེ་ནས་འཕོས་ཏེ་ཞིང་སྐྱོང་གི་དབང་མོ་ལྷན་ཅིག་སྐྱེས་མ། བུད་མེད་རིན་པོ་ཆེའི་ཆས་སུ་ཞུགས་པ་ཞིག་གིས་འཁྲིད་དེ། ཙ་རི་བསྐོར་ནས་དྭགས་ལྷ་སྒམ་པོའི་ཤར། ཀོང་པོའི་ཡུལ། ཀུ་ཤའི་གྲོང་ཁྱེར་ལྟ་བུར་དཔའ་རྩལ་གྱི་འབྱུང་ཁུངས་དེའི་རལ་གསུམ་གྱི་མཆིམས་ཡུལ་གྱི་སྟོད། གཙང་ཤོད་དགོན་ཞེས་བྱ་བ། སྤུས་རི་སྒྲ་གཅན་གྱི་ལྟེ་བ། ཆུ་བོ་ཆེན་པོ་ལཱུ་ཧི་ཏ་དལ་གྱིས་འབབ་པའི་བྱང་རྒྱུད། ཙན་དན་གྱི་ནགས་མ་མ་ལ་ཡའི་ལྗོངས་ལྟ་བུར་དྲི་ཞིམ་ཞིང་ཉམས་དགའ་བར་བྱས་པ། རྒུན་འབྲུམ་ལ་སོགས་པ་བཟའ་ཤིང་གི་ར་བས་བསྐོར་བ། 
3-329
ལྷ་བཟང་པོ་མཆིམས་ལྷ་སྤུན་བདུན་གྱིས་སྐྱོང་ཞིང་། རྩེ་ཆེན་བྲག་དམར་ལ་སོགས་པ་སློབ་དཔོན་པདྨའི་གཏེར་གནས་མང་དུ་མཆིས་པ། ཙ་རི་ཏྲའི་བྱང་གི་སྒོ་ཡིན་པས། མི་མ་ཡིན་གཏུམ་པོས་ཁྱབ་པར། མཁར་པ་ཞེས་པའི་བརྒྱུད། རྒྱུ་མཚན་བསྙད་ན་སྦྲགས་ཟུར་མཁར་ནས་ཆད་པས་མཁར་པར་བཞག་གིས། རུས་ཆེན་དུ་བསྒྲང་བའི་མཁར་ནི་མ་ཡིན་ནོ། ། དེ་ཡང་། སྣུབས་སངས་རྒྱས་ཡེ་ཤེས་ལ་ཡུལ་ལོག་བྱུང་བའི་དུས་སུ་ཚེ་མཉམ་འཐོར་བ་ཀོང་པོའི་ཡུལ་དུ་འཆགས་པའི་བརྒྱུད་པ། རྡོ་རྗེ་ཕུར་པ་དང་། རྟ་མགྲིན་ཡང་གསང་ལ་ཡི་དམ་བྱེད་པའི་སྔགས་རྙིང་མ་པ། སངས་རྒྱས་གླིང་པ་བྱོན་མན་དགོངས་འདུས་པར་སོར་བ། གྲོང་ཆོག་ལ་ཤིན་ཏུ་བྲིན་པའི་ཇོ་སྲས་ཀླུའི་དབང་པོ་དང་། ཆོས་སྐྱོང་སྒྲོལ་མ་ཞེས་པ་རང་བཞིན་བཟང་པོ། དད་པ་དང་སྙིང་རྗེ་ཤས་ཆེ་བས་སློང་བ་རྣམས་ཀྱི་གནས་སམ་བརྟེན་སར་གྱུར་བ། དེའི་མངལ་དུ་ཞུགས་པའི་དུས་སུ། དེའི་རྨི་ལམ་ལ། ཉིན་མོར་བྱེད་པའི་དཀྱིལ་འཁོར་འོད་མཐའ་ཡས་པ་ཞིག་དཀུ་གཡས་སུ་ཞུགས་པ་རྨིས་ནས་ཚང་ཟླ་ལ་ཅི་ཡིན་ཞེས་དྲིས་སྣང་། དུས་ལ་བབ་པ་ཐམས་ཅད་འདུལ་ཏེ། མེ་མོ་ཕག་གི་ལོ་ལ། ས་གཡོ་བ་དང་། འཇའ་ཟུག་པ་དང་། མེ་ཏོག་གི་ཆར་དང་བཅས་ཏེ། ཡང་ཐོག་གི་གཡབས་ཞིག་ཏུ་ཉི་ཤར་ལ་བཙས་པར་སྣང་ལ། 
3-330
ངེད་སྐྱེས་འཕྲལ་ཆོས་ཉིད་རྣམ་པར་དག་པའི་སྔགས་ལྷང་ལྷང་བསྒྲགས་པས། མས་གྲོགས་མོ་ལ། ཨ་འོ་འདི་ཨབ་ལ་གཅིག་ཀྱུ་འདུག །མི་དགའ་བ་མི་ཡོང་ལ་ཆེ་ཟེར་བ་དྲན། ཕྱོགས་དེར་ལྷ་འདྲེ་བབས་པ་ཐམས་ཅད་ངག་མཐུན་པར། དགོན་དབང་ར་ན་སྐྱེས་པའི་བུ་ཆུང་དེ། ལྷ་མི་ཀུན་གྱིས་མཆོད་པའི་གནས་ཡིན་པས་གཙང་པ་དང་། གཅེས་སྤྲས་སུ་གྱིས་ཤིག་ཅེས་གདམས་ལ། སྐྱེས་ནས་ཞག་ཉི་ཤུ་བསྐོར་ན་དགས་པོ་ལ་བར་རུ་ཞེས་པའི་ལུང་པའི་ཕུན་ན། སློན་དཔོན་ཆེན་པོ་པདྨས་རྙེད་པའི་ཕྱག་ན་རྡོ་རྗེའི་སྐུ་རང་བྱོན་བྱིན་རླབས་ཅན་དུ་བརྩི་བས། ཡུལ་པ་དེ་དག་དེ་བསྐོར་དུ་འགྲོ་བའི་སྲོལ་ཆེན་པོ་ཡོད་པར་མས་ཐོགས་ཏེ་ཕྱིན། བསྐོར་མི་རྣམས་ཀྱིས་མ་ཎི་བྲོ་བརྡུང་དང་བསྐུལ་བ་སོགས་བགྱིས་པ་ན། བུ་ཆུང་དེའི་ངག་ནས་ཡི་གེ་དྲུག་པ་ཤིན་ཏུ་གསལ་བ་ཐེངས་གསུམ་དུ་བགྲངས་པ་ཀུན་གྱིས་ཐོས་ནས། ཐམས་ཅད་ཀྱིས་ཨཱའོ་མ་ཎི་བ་ཞེས་མིང་དུ་བཏགས། འདི་ནི་བླ་མ་དགེ་བའི་བཤེས་གཉེན་ཞིག་གོ་ཞེས་ཁ་ཚོན་བཅད། འོན་ཀྱང་འདི་ལྟ་བུ་ཞེས་གསལ་པོར་ནི་སུས་ཀྱང་མ་ཤེས་སོ། །དེ་དུས་དཔལ་འབྲུག་པ་རིན་པོ་ཆེ་ར་ལུང་དུ་བཞུགས་སྐབས་ཀྱི་སྤྱན་སྔར། ལྷ་མོ་རེ་མ་ཏཱི་བབས་པ་ཞིག་ལ། རྗེས་རྒྱལ་དབང་རྗེའི་སྤྲུལ་པའི་སྐུ་གར་འཁྲུངས། 
3-331
ཞེས་དྲི་བ་མཛད་པ་ན་མདོ་ཁམས་ཀྱི་སྟོད་ལུང་པ་མ་ཋ་ཞེས་པ། ཆུ་ལྷོ་བྱང་ཤར་ནུབ་བཞི་ནས་འབབ་པ། གྲོང་དེ་ནས་རྒྱང་གྲགས་ཕྱེད་ཙམ་ཕྱིན་པ་ན། རིགས་གསུམ་མགོན་པོ་བཞུགས་པའི་མཆོད་རྟེན་བྱིན་རླབས་ཅན་ཞིག་ཡོད། དེར་འཁྲུངས་ཡོད་ཅིང་། དེ་ལ་བར་ཆད་བྱེད་པའི་བདུད་རྐང་ལག་བཞི་ལ་མཛུབ་མོ་དྲུག་དྲུག་ཡོད་པ། མི་སྡུག་པའི་མཚན་དང་ལྡན་པ། དེ་ལས་དཔག་ཚད་དུ་ཕྱིན་པའི་གྲོང་དུ་སྐྱེས། དེ་དག་ལ་སོགས་པའི་བར་ཆད་བཟློག་པའི་ཆེད་དུ། ཁོ་མོའང་ཡུལ་དེའི་ཙན་དན་གྱི་སྡོང་པོ་རྐང་གཅིག་སྐྱེས་པའི་སྟེང་དུ། ཉིན་བྱ་འཇོལ་མོ་ཞིག་ཏུ་སྤྲུལ་ཏེ་བྱ་ར་བྱེད། མཚན་སྐྱེས་བུ་དེ་དང་ལུས་དང་གྲིབ་མ་བཞིན་དུ་གཤིབས་ནས་བར་དུ་གཅོད་པ་ཐམས་ཅད་སྲུང་ངོ་། །ཞེས་འདོད་ཁམས་བདག་མོས་ལུང་དེ་སྐད་བསྟན་ནོ། ། བར་ཆད་དེ་ཡང་ཇི་ལྟ་བུ་ཞིག །ཅེས་དྲི་བར་མཛད་པ་ན། སྔོན་ནཱ་རོ་པའི་དུས། མུ་སྟེགས་རྫུ་འཕྲུལ་ཐོབ་པ་ཞིག་དང་རྩོད་པས་ནཱ་རོ་པ་རྒྱལ་དེ་ཕམ་འོན་ཀྱང་བསྟན་པ་དཔང་དུ་བཙུགས་ཏེ་རྩོད་པ་མ་ཡིན་པས། དེ་ཤིན་ཏུ་ངོ་ཚ་ནས་སྨོན་ལམ་ལོག་པ་བཏབ་པས། ཀླུ་བདུད་ཀྱི་རིགས་གདུག་པ་ཅན་དུ་སྐྱེས་པ། སངས་རྒྱས་ཤཱཀྱ་ཐུབ་པ་དང་ལྷ་སྦྱིན་ལྟ་བུའོ། །ཞེས་ཟེར། འདི་ཡང་རྔོག་གོང་མ་དག་གི་གསུང་རྒྱུན་ལ། 
3-332
ནཱ་རོ་པ་དང་། མུ་སྟེགས་རྫུ་འཕྲུལ་ཐོབ་པ་ཞིག་རྩོད། ནཱ་རོ་པ་རྒྱལ་བས། དེས་གསང་བཙལ་ཏེ་ནཱ་རོ་པའི་ཐུགས་བཏོན་པ། །དཔལ་ལྡན་ལྷ་མོས་རྗེས་བསྟེགས་པས། རྟ་གདོང་གི་མེ་རིའི་ཁྲོད་ནས་ཟིན་ཐུགས་སླར་ལོག་མུ་སྟེགས་བྱེད་དེ་ལྷ་མོས་བསད་དོ། །ཞེས་གྲགས་པ་དང་མཐུན་ནོ། །དེ་བས་ན་སྐུ་སྐྱེ་རྙེད་པའི་ཚེ། བདུད་དེ་ལ་མཆོད་རྟེན་དེའི་འོག་ཏུ་མནན་པ་བྱ། གནས་སྐབས་སུ་ལུས་ལ་བཅང་བའི་སྲུང་བ་འདི་ལྟར་ཐོགས། ཞེས་གདམས་པ་ལྟར། རྗེ་ཉིད་ཀྱིས་ཤངས་མཚལ་ལ་བྲིས་པའི་སྲུང་བ་མཛད། ཕྱིས་དེ་ཀ་ཁོ་བོའི་ལག་ཏུ་ལོན། དེང་སང་གི་བར་དུའང་ལུས་ལ་བཅང་བཞིན་པའོ། །དེ་ཡང་སྔགས་གསར་མ་པའི་གསེབ་ན། ཡེ་ཤེས་ཀྱི་ལྷ་མི་ལ་མི་འབབ། བབས་པ་འདི་དག་འཇིག་རྟེན་པའོ་ཞེས་སྨྲ་བ་ནི་ཤིན་ཏུ་མི་འཐད་པ་སྟེ། དུས་ཀྱི་འཁོར་ལོ་ལས། རྡོ་རྗེའི་ཤུགས་ཕབ་ནས། དེ་ལ་དགེ་མི་དགེ་དྲི་བ་དང་། སླར་གཤེགས་སུ་གསོལ་བ་བཤད་ཅིང་། གཞན་ཡང་། རྡོ་སེམས་དཔའ་དབབ་པའི་ཆོ་ག་བཤད་པ་ཐམས་ཅད་དོན་མེད་པར་འགྱུར་བས་སོ། །ཁ་ཅིག །འཇིག་རྟེན་ལས་འདས་མ་འདས་སོ་མཚམས་པའི་ལྷ་ཞེས་སྨ་བ་ཡང་རྨོངས་པ་སྟེ། ཆོས་མཆོག་ཐ་མ་ཚུན་ནི་འཇིག་རྟེན་པ་དང་། དེའི་ཕྱི་ལོགས་པ་ནི་འཇིག་རྟེན་ལས་འདས་པ་ཡིན་པས་སོ་མཚམས་རྒྱུ་ཅི་ཡོད། 
3-333
ཅེས་ཀྱང་སྨྲས་སོ། །ཡུལ་དེ་ཡང་གཙང་པོ་ནུབ། ཕུ་ལུང་གསུམ་གྱི་ཆུ་རྩེ་ཆེན་མདོ་ནས་ཡར་བལྟས་ནས་འབབ་པ་ཤར། མཆིམས་ཀྱི་དང་པོར་བཟུང་བའི་དཔལ་མཁར་གྱི་གདོང་དུ་འབབ་པ་ལྷོ། དེ་ཉིད་ཀྱི་ལུང་ཆུ་བྱང་། རིགས་གསུམ་མགོན་པོ་བཞུགས་བའི་མཆོད་རྟེན་ཡང་ཡོད། མ་ཐ་ཞེས་པ་འཕྲལ་སྐད་དགོན་པ། བདུད་ཀྱང་དེའི་ཤར་ཕྱོགས་ཞུགས། ཞེས་པ་ན་ཇི་སྐད་བསྟན་བཞིན་བྱུང་ངོ་། །ཤིང་རྐང་གཅིག་ནི་ཁྲོ་བོ་ཤུག་སྡོང་། ཞེས་པ་རྒྱང་ནས་རི་དེའུ་མཐོང་བ་ལྟ་བུ་ཞིག་ཡོད་པ་དེའོ། ། དེ་ནས་རྗེའི་ཞལ་སྔ་ནས་ཀྱིས། ཤམྦྷོ་དཀར་མོ་བ་གངས་ཁྲོད་རས་པའི་སྐྱེ་བ་དཔོན་སློབ་འགའ་འཚོལ་དུ་གནང་ངོ་། །རྗེ་གོང་མའི་བཞེད་ལྟར། སྤུན་ལྔ་ཡོད་པའི་བཞི་པར་སྐྱེས་ལ། ལོ་ངོ་གསུམ་ཙམ་ལོན་པ་ན། རྗེ་འབྲུག་པ་རིན་པོ་ཆེ་དཔོན་སློབ། །ཀོང་ཕྱོགས་སུ་ཅོག་བུ་བ་དྲུག་བརྒྱ་ཙམ་གྱིས་མདུན་བདར་ཏེ། ཙཱ་རི་བརྒྱུད་རིམ་པས་མེ་རག་མདོ་ཙམ་ཕེབས། དེེར་སྒྲུབ་ཐབས་རྒྱ་མཚོ་ལ་སོགས་པ་སྩལ། ཀོང་སྨད་ཕྱོགས་སུ་ཕེབས་པར་གསོལ་བ་བཏབ་འདུག་ཀྱང་། ཆོས་སྐྱོང་གིས་ཕྱིར་ཕེབས་པ་ལེགས་པའི་མཚན་མ་བྱུང་གསུངས་མ་ཕེབས། དེ་དུས་ཁམས་ཕྱོགས་ལ་སྐུ་སྐྱེ་འཚོལ་བར་སྔགས་པ་ཆོས་མགོན་པ་རྒྱུག་གསུང་རྫོང་བ་གནང་། འདི་ཡང་བྱ་པའི་དྲུང་འཁོར་ངོས་མ་སྤུན་རྒན་པ་ཡིན་ནའང་། 
3-334
རྗེ་གོང་མས། ཁྱོད་ཡེ་ཤེས་ཀྱི་མགོན་པོ་ཕྱག་བཞི་པས་རྗེས་སུ་བཟུང་བ་ཡིན་པས། ཆོས་གྱིས་གསུང་ཆོས་སྒོར་བཅུག །མིང་ཆོས་ཀྱི་མགོན་པོ་འཇམ་དཔལ་དགའ་བའི་བཤེས་གཉེན་ཞེས་བཏགས། སྐུ་སྲུང་པ་ཆེན་པོ་རྒྱལ་མཚན་ལྷུན་གྲུབ། དུས་དེའི་ཚེའི་རིག་སྔགས་འཆང་བའི་ཁྲོད་ན་ནུས་པ་གཡེར་དུ་འཐོན་པ་དེ་ལ་གཏད་དེ། འབྲུག་ལུགས་ཀྱི་ཆོས་སྐྱོང་སྲུང་མ་རྣམས་ཀྱི་སྒྲུབ་སྐོར། རིགས་ཀྱི་སྲུང་མ་དང་བཅས་པའི་གདམས་ངག་བུམ་པ་གང་བྱོ་སྦྱིན། ཞེས་བསྒོས་པས། དེས་ཀྱང་བཀའ་བཞིན་དུ་སྩལ་པ་ཡིན་ནོ། །འདོད་པའི་དབང་མོའི་བབས་ངག་ལས་ཀྱང་། འདིས་སྐྱེ་བ་མང་པོར་མགོན་པོ་བསྙེན་ཞིང་། ཡར་འབྲོག་ཏུ་ཡར་མེ་བཞེས་པ། སྒྲུབ་བོན་ཆེན་པོ་ཞིག་གི་དགོན་གནས་ཡོད་པའི་མཁན་པོ་ཡིན་པ་ཞིག །འཇམ་དབྱངས་ཀུན་དགའ་སང་གེ་ལ་མི་ཕྱེད་པའི་དད་པས། དགོན་པ་དེའི་ཡོ་བྱད་ཐམས་ཅད་ཕུལ། བོན་པོ་བསྐྱུར་ཏེ་སངས་རྒྱས་ཀྱི་བསྟན་པའི་སྒོར་ཞུགས། དཔལ་ལྡན་འབྲུག་པའི་ཕྱག་ལེན་ཐམས་ཅད་ཕུལ་དུ་ཕྱིན། ལྷག་པར་ཡེ་ཤེས་ཀྱི་མགོན་པོས་དངོས་སུ་རྗེས་སུ་བཟུང་བ། བླ་མ་ཆེན་པོ་བསམ་རྒྱལ་ཁ་ཆེ་ཞེས་གྲགས་པ་དེ་ཡིན། དེ་ནས་འདིས་སྐྱེ་བ་བདུན་སོང་། དེ་དག་ཐམས་ཅད་དུ་མགོན་པོས་མངོན་སུམ་དུ་བྱིན་གྱིས་བརླབས་པ་ཤ་སྟག་གོ །ཞེས་ལུང་བསྟན་པའོ། །ཁོང་གིས་ཁམས་སུ་འགྲོ་བར་བརྩམས་པའི་རྨི་ལམ་དུ། 
3-335
ལྕང་མའི་ཚལ་ཡོད་པའི་གསེབ་ན། གྲོང་ཕན་ཚུན་གཉིས་ཡོད་པ། ཁང་འབྲུ་རེ་རགས་ཡོད་པའི་ཁྲོད་ན། བུ་ཆུང་ལོ་གསུམ་ཙམ་ལོན་པ། རས་ཁ་ཕྱར་བུ་ལྟར་གྱོན་པ། རལ་པ་ཕྲུག་གེ་བ་གཅིག །བུ་མོ་གཞོན་ནུ་མ་ཞིག་གིས་བསྟན་ནས། སྐུ་སྐྱེ་འདི་ན་ཡོད། དེ་ནས་མར་ཚོལ་ཕྱིན་ཞན་འདྲ་ཟེར་བ་བྱུང་། ཕྱིས་ཡུལ་གྱི་ཆག་ས་ཇི་ལྟ་བ་འདུག་གོ་ལོ། ། དེ་ནས་རྗེ་དཔོན་སློབ་ཕྱིར་ཡང་མཆིམས་ཡུལ་ཉིད་ལ་བྱོན། དེ་དུས་དགོན་ཁང་གསར་བའི་ཆོས་རྗེ་སྐུ་མཆེད་ཀྱིས་སྤྱན་དྲངས། རྗེའི་བཀའ་ལས། འདི་ན་ཨ་འོ་མ་ཎི་འདྲེན་མཁན་ཞིག་ཡོད་ཅེས་ཐོས་པས། དེ་ཁྲིད་ཤོག་གསུང་། དེའི་ཕྱི་ཉིན། ཙ་རིར་གདན་རྒོད་གཉིས་འཁྲུགས་ནས་རྒྱང་ཙམ་སོང་བ། སྐྱེན་པ་རྒྱལ་པོ་མཚན་ལྡན་གྱིས་མགོ་བསྡུས། སྐུ་མདུན་དུ་ཞལ་ཏ་ཞུ་བར་སླེབ་པའི་དམ་སེལ་གྱིས་སྐུ་གཤེགས་ལ་ཐུག་པ་ཞིག་བྱུང་བས་སྐུ་ཁམས་མྱོགས་པའི་སྟོབས་ཀྱིས། སང་ཉིན་ཕས་བདག་ཁྱེར་ཏེ་དྲུང་དུ་ཕྱིན་པ། ཆོས་རྗེ་ཡེ་ཤེས་རྒྱལ་མཚན་པས་སྐུ་གཞོགས་སུ་འཁྱེར། སྐྲ་བཅད་མིང་སྤོས། མིང་ལ་ཆོས་རྗེ་ནས། རྒྱལ་དབང་ལྷུན་གྲུབ་ཅེས་སྩལ་སོང་གསུང་ལ། ཕ་བཟི་ནས་མིང་བརྗེད་པར་འདུག །དེར་ཕྱག་མཛུབ་འགྲམ་པར་བཙུགས་ནས། ༀ་མ་ཎི་པདྨེ་ཧཱུཾ། ཞེས་བཀའ་བཀོད་མཛད། ལྗགས་མཆིལ་མགོ་བོར་བཏབ། ཞབས་དབང་སྩལ། 
3-336
དེ་ཙམ་ལས་མ་བྱུང་། དེ་ནས་ཀོང་པོ་ང་ལར་ཕེབས་དུས། ཨ་འོ་མ་ཎི་བ་དེ་དང་ཕྲད་དགོས་ཡོད་པས་མ་བྱུང་གསུང་པ་ལ། ཁ་རྩང་པར་ཚུལ་འདི་ལྟ་བུ་བྱས་ཞེས་ཞུ་བ་མཛད་པས། ཐུའི་ཐུའི། ངེད་ཀྱིས་ཅི་ཡང་མ་དྲན་པ་འདུག་གསུང་། ཤིན་ཏུ་ཐུགས་འཕྲེང་བ་མཛད་ཅེས་ཆོས་རྗེ་དབོན་པོ་པ་གསུང་ངོ་། །དེ་ནས་སྔོན་རབས་ཅུང་ཟད་གླེངས་མོད་ཀྱང་། བྱ་སྐུར་དཔོན་གཡོག་ཆམ་འཕྲལ་དུ་སོང་བས་དེ་ཕྱོགས་ཀྱི་མི་འགྲིམ་འགྲུལ་ཉུང་བས་ངོ་མ་ཤེས། ལོ་བཞི་ཙམ་ན། སྐྱེ་དམན་གྲིབ་ཅན་གྱི་མལ་ཁྲི་རྐང་མཐོན་པོ་ཡོད་པའི་འོག་ཏུ་བྱིས་པ་ཡིབ་འཚོལ་གྱི་རྩེད་མོའི་གབ་ས་བྱས་པས། གྲིབ་ཀྱིས་ནོགས་ཏེ་ཁ་ཡང་མི་གསལ། ལུས་ལ་ཡང་གྲུམ་བུ་ལྟ་བུའི་གཅོང་ཞུགས་ནས་ལོ་བདུན་ལོན་པའི་བར་དུ་མནར། ཕན་ཨེ་ཡོང་བསམ་ཨ་མས་ཡུལ་སྲོལ་བཞིན་ཆོས་རྗེ་དབོན་པོ་བ་ལ་སྐྲ་བཅད། མིང་སྤོས་ཞུས་པར། ཁོང་གིས་བདུད་ལས་རྣམ་རྒྱལ་ཞེས་བཏགས། དེ་ནས་དྲུང་དཀར་བྲག་ཅེས་པའི་དགོན་པ། ཆོས་ལུགས་སྨད་འབྲུག་ཡིན་པ་དེའི་བླ་མ་བགྲེས་པོ་ཞིག་ཡོད་པ་ལའང་དེ་བཞིན་བྱས་པས་མིང་ཐར་པ་རྒྱལ་མཚན་དུ་བཏགས་པར་སྣང་། ལོ་བདུན་པའི་ངོ་ན་གྲིབ་དེ་བསངས། བྱིས་པའི་ཁྲོད་ན་ཆོས་འཆད། དབང་བསྐུར་བའི་ཚུལ་ཁོ་ན་བྱེད། བྱིས་པ་ཟླ་བོ་རྣམས་ཉ་དང་བྱེའུ་ལ་གནོད་པ་སྐྱེལ་མི་འཇུག །
3-337
འོན་ཀྱང་ཡུལ་དེའི་སྔགས་པ་རྣམས་འཚོགས་ནས་གདབ་ལས་བྱེད་འདུག་པར། བྱིས་པ་ཟླ་བོས་བསླད་ནས། རྩངས་པ་ཞིག་ལ་ལིངྒིའི་ལུགས་བྱས། དེའི་མིག་གཡོན་པ་ལ་རྩང་ཕུར་གྱིས་བསྣུན་པ་ཞིག་མ་གཏོགས་སྡིག་བྱེད་མ་མྱོང་། དེའི་ལེ་ལན་གྱིས་མིག་གཡོན་ལ་ཡ་མ་ནག་པོས་ཡང་ཡང་འཚེ་བ་ཞིག་བྱུང་། ཕྱིས་དེ་བཞིན་གཤེགས་པའི་སྐུ་མང་པོ་ལ་སྤྱན་དབྱེ་བས་དག་པ་འདྲའོ། །མངོན་པར་ཤེས་པ་འདུག་སྙམ། ཁྱིམ་མཚེས་ཀྱི་ན་བ་དྲག་མི་དྲག་དང་། དོན་འགྲུབ་མི་འགྲུབ་ཀུན་འདྲི། བཤད་པ་ལྟར་ཐོག་ཏུ་ཁེལ་བ་འབའ་ཞིག་བྱུང་སྣང་། །ཆུང་ཆུང་རང་ལ་ལུས་ཤིན་ཏུ་བདེ་བས། ཤིང་སྡོང་གི་རྩེ་སུས་ཀྱང་མ་ཐར་པ་ལ་ཐར། ཁང་པ་ཐོག་སོ་ལྔ་དྲུག་ཙམ་ལ་འཛེག་འབབ་ལ་ཐོགས་པ་མེད་པས། སོ་ཤིན་ཏུ་ཚུབ་ནས་འཁྲིས་ཀྱི་མི་རྣམས་སུན་ལ། ཕྱོགས་མི་ཐམས་ཅད་ཡིད་སྨོན་པ་ཞིག་སྟེ། ལར་ཡུལ་དེ་དུད་བརྒྱ་ཁུངས་ཙམ་མི་ཤིན་ཏུ་དར་སྤུན་ལྔ་དྲུག་ཙམ་ཀ་མང་ཡང་། རྒན་གྱིས་དྲན་པའི་བྱིས་པ་ལ་འདི་ལས་དབང་པོ་དངས་པ་དང་རྩལ་བ་ཡོང་མ་མྱོང་ཞེས་གྲགས་སོ། །དེ་དུས་བསྟན་འཛིན་རིན་པོ་ཆེའི་སྐུ་སྐྱེ་ཞབས་ལ་སྐྱོན་ཅུང་ཟད་ཡོད་པ་ཞིག་བྱུང་སྟེ། ཁྲོ་མོ་ལ་ལྟད་མོ་སྟོན་མཛད་ཀྱི་འདུག་པའི་སར་ཕྱིན། དབང་བསྐུར་མཁན་སླེབ་དུས་རྡོག་ཤག་བརྒྱབ་སྟེ་ཚེ་བུམ་བྲུལ་ལ་ཁད་པ་བྱུང་བས་ཐམས་ཅད་ཏ་འགལ། 
3-338
དེ་བཞིན་བླ་མ་སུའི་ཡང་ལྟད་མོ་ལ་འགྲོ། དབང་ཆོས་ཡེ་མི་ཞུ། དུང་དཀར་དུ་ཡང་བླ་མ་དེ་སྒྲུབ་མཆོད་ཀྱི་འཐོན་སྟོན་ལ་དབང་མཛད་དུས་དབང་མི་ཞུ། ཚེ་རིལ་ལན་དུ་འོངས་པ་ལ། དེའི་དགེ་རྒན་རྣམས་ཀྱིས་འཐབས་པས། བླ་མ་དེས། འདི་སྐྱེས་བུ་དམ་པ་ཞིག་ཡིན་པར་འདུག །དེ་སྐད་མ་ཟེར་གསུང་བདག་ལ་ཤིན་ཏུ་བྱམས། ཁོང་གིས་འབར་ཞྭ་གསར་པ་ཞིག་བྱིན་བྱུང་། བཙུན་མའི་ཞྭ་མོ་འདྲ་བ་འདི་འདྲ་མི་གོན་བྱས་བསྐྱུར་བས། བླ་མ་བཞད་ཀྱི་གདའ། དེ་ན་གསོ་དཔྱད་པ་སྐྲོག་པ་ཕ་རྒན་ཟེར་བཞིག་གིས་བུ་གཅིག་པ་ལྟ་བུར་བལྟས། ཕ་མས་དེའི་གྲྭ་ཁྱུ་ལ་འཇུག་བརྩིས། བློ་མ་ཕེབས་ནས་འགྲོ་བར་བརྩམས། དེ་དག་གིས་རིག་ནས་ཁོང་ཚོས་དགོན་པའི་རྒྱལ་སྒོ་བཅད། རྒྱབ་བྲག་གཡང་ཡིན་རུང་། དེ་ནས་བབས་ནས་ཡུལ་དུ་ལོག་གོ །ཆུང་ཆུང་རང་ནས་ཁྱིམ་པའི་གོས་མི་གོན། རས་སམ་དམར་དམར་གྱི་རིགས་ལ་དད། ཤ་མི་ཟ་ཞེས་སོ། །དེ་དུས་བཀྲ་ཤིས་མཐོང་སྨོན་གྱི་བདེ་ཆེན་གླིང་དུ། ཨ་ཆེ་རྡོ་རྗེ་གཡུ་སྒྲོན་མ་ཡིན་ཟེར་བ་ཅིག་བབས་པར། སྐུ་སྐྱེ་བཙལ་བས་མི་རྙེད་། ངེད་ཞིང་སྐྱོང་གི་མཁའ་འགྲོ་མ་རྣམས་ཀྱིས་སྦས་པ་ཡིན། དུས་ལ་བབ་པ་ན་དར་པོ་ཆེ་བསླང་བ་བཞིན་དུ་ཀུན་གྱིས་ངོ་ཤེས་པ་ཞིག་འབྱུང་ངོ་། །ཞེས་བསྒྲགས་གདའོ། །
3-339
ལོ་དགུ་པའི་དཔྱིད་ཀ་སོང་བའི་སྐབས་སུ། ལྷོ་རྒྱུད་བུང་སྙི་བ། བྱ་པ་ནང་སོའི་ཐུགས་དམ་བཀའ་འགྱུར་བཞེངས་པའི་ཏོག་གར་མཁན་པོའི་མི་ཚང་། དཔོན་ཡིག་བཀྲ་ཤིས་ཕུན་ཚོགས་ཟེར་བ་གཅིག །ཕས་རྒྱུད་བཞིའི་གླེགས་བམ་བཞེངས་པར་བཀུག་འདུག་པ་དེས། གླེང་ཚུལ་གྱིས། གོང་མ་ཆོས་རྒྱལ་ནོར་བུའི་སྤྲུལ་པའི་སྐུ་ཡིན་པར་ཐག་ཆོད་བསམ། ཕ་འཁྲིད་བྱ་ཡུལ་དུ་ཕྱིན། གཞིས་ཁ་རྩེ་མོ་རིར་སླེབ། ཆོས་ཀྱི་རྒྱལ་པོ་བསྟན་འཛིན་ནོར་བུ་དང་། མཚོ་སྐྱེས་རྡོ་རྗེ་དཔོན་གཡོག་ལ་སྐད་ཆ་ཕུལ་བས། རྗེ་གོང་མ་ཉིད་ཀྱི་ཁྲིད་གཉེར་ཡང་བྱེད་པ། ཁྲོམ་བུ་ཤཱཀྱ་ཚེ་དབང་ལ་སོགས་པའི་དྲུང་འཁོར་རྒན་པོ་ཐམས་ཅད། རྗེ་གོང་མ་དྲན་ཆེས་པའི་སྤྱན་ཆབ་ཤོར། གཞན་ལས་ཡིད་འཁུལ་བ་ཞིག་བྱུང་ནས། ནས་མོ་རྫོང་དུ། བྱ་མི་ཕམ་ཆོས་ཀྱི་བླ་མ་རྒྱལ་ཚབ་ཏུ་མངའ་གསོལ་བ་དེའི་སྤྱན་སྔར་ཕོ་ཉ་བཏང་། དེ་ཡོང་བའི་ནུབ། རྗེའི་མནལ་ལམ་དུ། བཀྲ་ཤིས་མཐོང་སྨོན་ནས་ཡིན་ཟེར་བའི་བཙུན་པ་དངས་བསངས་ཤིག་བྱུང་ནས། ངེད་རྣམས་ལ་མཁན་པོའི་བསྐོ་གཞག་དགོས་ཞུ་འདུག་པ་ལ། ཁྱེད་རྣམས་ཀྱི་མཁན་པོ་མཆོག་གི་སྤྲུལ་པའི་སྐུ་ཕེབས་པ་འདི་ཀ་ལ་བྱེད་པ་ཡིན་མོད་གསུངས་པ་ཞིག་བྱུང་བས་སྤྲུལ་པའི་སྐུར་ཐེ་མི་ཚོམ། འོན་ཀྱང་དྲུང་ནས་ཆོས་སྒོ་བ། རྗེ་གོང་མ་རང་གི་ཆོས་ཀྱི་རྒྱལ་ཚབ་ཏུ་མངའ་གསོལ་བ་ཡིན་པས། 
3-340
ཁོང་ཐེགས་སུ་ཆུག །ཁོང་གིས་དཔྱད་ནས་ཐུགས་མགུ་ན་དེ་ཀས་ཆོག་གསུངས་ནས་བཀའ་ཐ་མ་གནང་བ་དེའི་ཚེ། གྲུབ་པའི་དབང་ཕྱུག་ཆེན་པོ་དེ་ལོ་རོ་སྟོད་ཀྱི་རི་ཁྲོད་རྔ་སྒྲ་ཞེས་པ་ན་བཞུགས་པའི་དགོངས་མནལ་ལམ་དུ། རྗེ་གོང་མའི་གདུང་ཡིན་སྙམ་པ་ཞིག་ཕྱག་ཏུ་བྱུང་། དེ་ལ་གསོལ་བ་བཏབ་པས་རིང་བསྲེལ་བསམ་གྱིས་མི་ཁྱབ་པ་འཕེལ། དེར་དུས་གསུམ་གྱི་སངས་རྒྱས་ཀྱི་ཐུགས་རྗེ་ལ་རྒྱུན་ཆད་མེད་ཟེར་བ་བདེན་པར་གདའ་དགོངས་པ་དང་། མནལ་སད་དེ་ཅི་ཡིན་ནམ་དགོངས། དེ་ཉིན་ཕོ་ཉ་འབྱོར་པས་གདུང་ཤུགས་ཀྱིས་བརྒྱལ་བ་ཙམ་བྱུང་། དེ་ཀས་སྤྲུལ་པའི་སྐུ་ཡིན་པར་ངེས་ཤེས་འདྲོངས་ནས་རྟབ་རྟབ་པོར། གཉལ་ཆོས་རྒྱལ་ལྷུན་གྲུབ་རྩེ་ཞེས་པའི་ཕོ་བྲང་བརྒྱུད། བྱར་ནས་མོར་བྱོན། བྱ་པཎྜི་ཏ་བཀྲ་ཤིས་རྣམ་པར་རྒྱལ་བ་དང་བཀའ་བགྲོས་ཏེ། ཀོང་པོའི་ཡུལ་དུ་ཆོས་བྱོན་ལ། དེའི་ཚེ་ར་ལུང་ན། རྗེ་རིན་པོར་དུས་གསུམ་མཁྱེན་པ་ཆེན་པོ་བཞུགས་པས་ཐུགས་དམ་བརྟག་པ་ཞུ་བར་ཞལ་འཆམ། ཞུ་མི་བརྫངས་པ་ན། ངེད་ཀྱིས། དཀོན་མཆོག་གསུམ་ལ་གསོལ་བ་བཏབ་སྟེ་ལན་གསལ་བགྱི་གསུངས་ནས། སྤོས་སྐྱ་དཔལ་གྱི་གཟིམས་ཁང་དུ། རང་བྱོན་ཁརྶ་པ་ཎ་ལ་སོགས་ཁྱད་འཕགས་ཐམས་ཅད་ཞལ་དབྱེ། མཆོད་པའི་ཡོ་བྱད་བསམ་གྱིས་མི་ཁྱབ་པ་ཚར་དུ་དངར་བར་ཟླ་བ་གཅིག་གི་རིང་གསུང་བཅད་ལ་བཞུགས་པ་གྲོལ་ནས་བང་ཆེན་གནང་བྱུང་བ། 
3-341
བླ་མ་དང་སྤྱན་རས་གཟིགས་དབང་ཕྱག་ལ་སོགས་པའི་ཡི་དམ་མཁའ་འགྲོ་ཆོས་སྐྱོང་ཐམས་ཅད་ལ་གསོལ་བ་བཏབ་པས། དེ་དག་དབྱངས་གཅིག་ཏུ། སྐུའི་སྐྱེ་བ་ངེས་པར་ཡིན་པ་དང་། བསྟན་པ་ལ་ཡང་ཆེས་ཕན་པ་ཞིག་ཡོང་བར་ལུང་བསྟན་ཏོ། །ཞེས་བཀའ་ཤོག་ཏུ་བཀོད་ནས་སྩལ་བས། ཀུན་ཐུགས་ཡིད་ཆེས་སོ། ། དེ་དུས་བདག་གིས་མགྲོན་པོ་གལ་ཆེ་བ་ཅིག་ཡོང་བར་འདུག་པས། ཨ་མས་གྲབས་གྱིས་ཤིག་ཅེས་བསྐུལ་བ་བཞིན་དུ། ཉེ་བར་ཀུན་སྤངས་རིན་པོ་ཆེ་དཔོན་སློབ་དགོན་དུ་ཕེབས། ཁང་གསར་གྱི་ཀླུ་སྡིངས་ཤིང་ཏོག་སྣ་ཚོགས་ཡོད་པར་ཐོག་མར་མཇལ། བླ་མའི་འོས་སུ་ཤེས་ནས་ཕྱག་འཚལ། ཕྱི་དེ་ཉིན་ཁང་གསར་ནང་དུ་དཔོན་སློབ་ཉུང་བསྡུས་མཛད། སྐུ་ཆས་ཐོར་བུ་བསྣམས་ཡོད་པ་འདྲ་བ་དང་བསྲེས་པ་བསྟན་པ་ལ་མ་ནོར་བར་ངོས་ཟིན་པ་དང་། ཤིན་ཏུ་འགོལ་བར་ཞིབ་རྩད་མཛད་པ་ཐོགས་མེད་དུ་སྨྲས་པས་ཐུགས་ཆེས། ཨ་མ་ལ་བུ་ཆུང་འདི་ལ་གཙང་སྒྲ་ལེགས་པོ་གྱིས་གསུང་བ་ཙམ་གནང་སྟེ་ལྷོ་རྒྱུད་དུ་ཐེགས། ཐུགས་ཆེས་པའི་རྒྱུ་མཚན་ཕུལ་བས། དེ་ཁས་ཆོག་ཕེབས་རུང་། དུས་སྙིགས་པས་ཕྱིས་ཆོས་སྒོ་བའི་སྐུ་སྐྱེ་ཡིན་ཟེར་ན་མི་བཏུབ་པས། གདན་འདྲེན་གནང་། མཐུན་གྲུབ་ཀྱི་བརྟག་པ་བསྐྱར་མ་གནང་ན་ཀུན་ཐུགས་ཡིད་ཆེས་ངེས་པ་ཞིག་ཡོང་བ་འདུག་ཞུས་པས། 
3-342
ངེད་ཀྱི་ཆར་ཁྱེད་ཐུགས་ཡིད་ཆེས་པས་ཆོག །འོན་ཀྱང་། གོང་མ་སྐུ་མཆེད་དྲུང་ལ་དེ་ཁའི་རྒྱུ་མཚན་ཕུལ་གསུང་བ་བཞིན་མཛད་ནས། སྟོན་གཞུག་ཀོང་པོར་བང་ཆེན་བཏང་། དགོན་ཁང་གསར་ནས་དྲུང་ནས་རྒྱ་མཚོ་བ་དང་བཅས་ཏེ་ལྷོ་རྒྱུད་དུ་ཆས་སོ། །འདིའི་སྔོན་ཙམ་ན། མི་གཟུགས་ལུས་མིག་གིས་གང་བ་ཅིག་འོངས་ནས། མ་སྡོད་ཤོག་ཟེར་བ་དང་། གཞན་མི་ནག་པོ་ཆེན་པོ་མང་པོས་དེ་སྐད་ཟེར་བ་ཡང་ཡང་བྱུང་བ་ཆོས་སྐྱོང་གིས་བསྐུལ་མར་འདུག །ཕ་མེས་ཀྱི་ཆོས་སྐྱོང་མ་ནིང་དང་། སྟག་ཞོན་ལ་བྱེད་པས། ཁང་པའི་སྟེང་ཟུར་ན་མགོན་ཁང་ཆུང་ངུ་ཞིག་ཡོད་པ་ནས། སྟག་ཆེན་པོ་ཞིག་འོངས་ཏེ་ངའི་ལག་པ་ཁར་བཅུག་སྟེ་གཏོང་དུ་མ་འདོད། ཕ་ར་མདར་སྦྲན་པས། དེས་ཕྲལ་བ་གཅིག་རྨིས་པ་སྟག་ཞོན་གྱིས་འཁྲེན་དུ་འདུག་གོ། ཆུང་ངུའི་དུས་ན་རྨི་ལམ་དུ་ཀ་ཀ་ནི་ཞིག་གི་འོག་ཏུ་དོང་བྱས། དེར་ཡོད་པ་སྙམ་བྱེད་པ་ན་མཐོངས་བྱེེ་ནས་སླར་འཐོན་པ་དང་། མགྲིན་པའི་སྟེང་དུ་རྩང་ཕུར་མང་པོ་བཏབ་པ་ཞིག་ཡང་ཡང་རྨི། ཕྱིས་གསར་པར་ཡུ་འབོབ་རྒྱབ་པ་ཞེས་ཆག་ལོ་རིན་ཆེན་ཆོས་ཀྱི་རྒྱལ་པོའི་ཉེ་གནས་གཞན་གྱི་བླ་མ་བྱེད་པ་ཞིག་སྣང་བ་དེ་ནས། བྱ་པ་གོང་མ་དེ་སྐྱེས་བུ་དམ་པ་ཡིན་ཐག་ཆོད། དེ་མིན་སྐུའི་སྐྱེ་བ་གསལ་པོ་དང་ལུགས་མཐུན་ཡོང་ས་མེད། 
3-343
དེའི་རྒྱུ་མཚན། ངེད་རྗེ་དཔོན་སློབ་རྣམས་ཀྱིས། རྡོ་རྗེ་འཇིགས་བྱེད་ལ་སོགས་པའི་འཁྲུལ་འཁོར་གྱིས་མནན་སྲེག །ངག་བཅིང་པ་སོགས་ཅི་ཡང་བྱས་པས་མ་གནོད་པ་འདུག་པ་རང་གིས་ཡ་མཚན་གསུངས་འདུག་གོ །འོན་ཀྱང་རྨི་ལམ་དེ་ཙམ་ཡང་དེའི་མཐུར་སྣང་ངོ་། །ཐོག་མར་བྱར་སྐྱིད་ཕུག་ཟབ་ཡངས་ཐེག་ཆེན་རྩེར། ཞབས་དྲུང་བཀྲ་ཤིས་རྣམ་རྒྱལ་འཇལ། དེ་ནས་བཀྲ་ཤིས་མཐོང་སྨོན་དུ་སླེབ། སྡོངས་སྒྲུབ་སྡེའི་སྤྲུལ་སྐུ་ལྷ་ཁང་དུ་བྱུང་བས། གནས་ཁང་དེའི་མིང་ཡང་རྟེན་འབྲེལ་ཆེན་པོར་ཀུན་གླེང་། སང་ཉིན་སྡེ་པ་རྣམས་ཆོས་སྐྱོང་གི་མངའ་གསོལ་མཛད་སར་མཆོངས་པོའི་ཁར་མཇལ། དེ་ནས་ཞག་ཤས་ན་སྡེ་པ་ཡབ་ཡུམ་གསུམ། ཆེན་པོ་ཆོས་སྒོ་ཁྲོམ་བུ་བ་དང་། ཡུར་གོང་པ་ཀུན་དགའ་དར་རྒྱས་ཙམ་ཡོད་སར། ཁོ་བོའི་ཟླ་ལ་དྲུང་ནས་རྒྱ་མཚོ་བ་གཅིག་པུ་བྱས། སྔར་གྱི་སྐུ་ཆས་དང་འདྲ་བ་མང་པོ་བཀོད་པ་མ་འདྲེས་པར་ངོས་ཟིན་པས། ཆེན་པོ་གླིང་སྟོད་སྨད་དུ་གྲགས་པ་ཆོས་རྗེ་གྲགས་པ་བཤེས་གཉེན་དང་། ཆོས་རྒྱལ་བསམ་གྲུབ། ཁྲོམ་བུ་བ་རྣམས་སྤྱན་ཆབ་མང་དུ་ཤོར། ཡིད་མི་ཆེས་པའི་དབང་མི་འདུག་གསུང་ངོ་། །དེ་ནས་གཉལ་དུ་བྱོན། སྐྱེལ་མི་བྱིངས་ཕྱིར་སློག །དྲུང་ནས་རྒྱ་མཚོ་བ་སོགས་འཐོར་བུ་བསྡད། ཟླ་བ་གཉིས་ཙམ་གྱི་རིང་། སྡེ་པ་སྐུ་གཞོན་པ་མཚོ་སྐྱེས་རྡོ་རྗེས་ཞོགས་པ་ཀློག་བསླབས། 
3-344
དེ་དུས་སྡེ་པ་ཡབ་ཡུམ་གྱིས་སྲས་ལྟ་བུར་གཅེས་སྤྲས་མཛད། ཉིན་གཅིག་ཀླུ་ཁང་དུ་ཕེབས། ནམ་མཁའ་དང་པོ་ལ་སྤྲིན་གུག་དབྱིབས་དོད་པ་ཞིག་འདུག་པས། ཐམས་ཅད་སུ་ལ་མི་དགའམ་ཞེས་ཐེ་ཚོམ་སྣང་། ངེད་ཀྱིས་བླ་མ་སྐུ་སྲུང་པ་གཤེགས་པའི་ལྟས་སུ་འདུག་བྱས་པ་ལྟར། དམག་སྡེར་རིག་སྔགས་འཆང་བ་ཆེན་པོ་དེ། ངས་རྒྱལ་དབང་ཆོས་རྗེའི་སྐུ་སྐྱེ་ན་རིམ་གསུམ་དྲན། ད་ནི་ཁོ་བོའང་རིང་པོར་མི་སྡོད་དོ་གསུངས་ནས་གཤེགས་པར་སྣང་། དེ་ནས་བྱ་མི་ཕམ་ཆོས་ཀྱི་བླ་མ་ཁུ་དཔོན་བཀའ་བགྲོས། ཞལ་ངོ་དབོན་སྐྱ་ལྡིང་གི་མི་དཔོན། རྗེ་གོང་མ་ཉིད་ཀྱི་ཞལ་སློབ་ཉེ་བསྐོར་ན་གནས་པ་རྣམས་བསྡུས་ཏེ་ལོ་གྲོ་འབྲུག་ལུང་དཀར་མོར་གྲགས་པའི་ལྟེ་བ། རྗེ་རས་ཆུང་པ་དང་། སུ་ཁ་སིདྡྷིས་ལུང་བསྟན་པ། རི་བོ་ཆེན་པོ་མངྒ་ལའི་ངོགས། བཀྲ་ཤིས་མཐོང་སྨོན་ཞེས་བཤད་སྒྲུབ་ཀྱི་ཆོས་གྲྭར། མེ་ཕོ་སྤྲེའུ་ལོ་བཅོམ་ལྡན་འདས་ཀྱིས་ཆོ་འཕྲུལ་ཆེན་པོ་བསྟན་པའི་དུས་བཟང་གི་ཐོག་མའི་ཉིན། འཇིག་རྟེན་གསུམ་གྱིས་མཆོད་པ་སྔར་གྱི་གདན་སེང་གེའི་ཁྲིར། ཐུབ་པའི་རིང་ལུགས་པ་ཐམས་ཅད་ཀྱི་དཔྱིད་དུ་དབང་བསྐུར། དེ་དུས་མེ་ཏོག་གི་ཆར་ལ་སོགས་པ་ལེགས་པར་བབས་ཤིང་། ཆོས་ཀྱི་རྒྱལ་པོ་བྱ་པས་ཕུད་དུ་ཁུར། རྒྱལ་སྲིད་ཆེན་པོའང་ཡོན་ཉིད་དུ་སྦྱར་ལ། 
3-345
ཉི་མ་འགའི་བར་དུ་དགའ་སྟོན་གྱིས་འདས་སོ། །དེ་དུས་ཆོས་རྗེ་གྱེ་ལ་རབ་འབྱམས་པ་དང་། འཇིམས་པ་རབ་འབྱམས་པ་གཉིས་འབེལ་གཏམ་མཛད་འདུག་པས། མདོ་ལ་མཁས་པར་བསླབ་དགོས་བསམ་པ་ཤར། དེར་ར་ལུང་ནས་མི་སྣར་ཆོས་རྗེ་རྡོར་འཛིན་པ་གནང་སྦྱིན་བཟང་པོ་དང་བཅས་གནང་། ལེགས་སོ་བརྗོད་དོ། །ཕུན་ཚོགས་ནི་ཙུ་ལ་ཡི་ཕང་པ་དེར། །དང་པོར་འོངས་པའི་མྱུ་གུའི་ཡལ་འདབ་རྩེར། །དོན་ཚིག་ཁུ་བྱུག་བུ་མོ་སྙན་སྒྲོག་པ། །ལྷོ་ཕྱོགས་རླུང་གཞོན་སྤྲོན་པའི་ཕོ་ཉ་བཞིན། །སྐལ་བཟང་ན་ཆུང་རྣམས་ལ་སྙིང་དགའ་བའི། །ཆོས་ཀྱི་སྐྱིད་པ་མ་ལུས་སྟེར་བྱེད་ལ། །ཟ་མ་ཏོག་རྩེའི་ནོར་བུའི་གཟིར་མཚུངས་པས། །བསྟན་འཛིན་དུས་བཞིའི་དཔྱིད་དུ་ཀུནགྱིས་བསྐུར། །དེ་དུས་སྒྲུབ་སྡེར་སྒྲུབ་པ་བ་ལོ་གསུམ་མ་རྣམས་ཕྲད་དུ་བྱུང་བའི་ཁྲོད་ནས་དགེ་སློང་ཆོས་ལེགས་པར། འདི་མི་རྣ་པ་ཚ་བོ་ཞིག་ཡིན་བྱས་ངོས་ཟིན། ཐམས་ཅད་བཀའ་བགྲོས། སློབ་དཔོན་དུ་ཤག་མང་ཆོས་མཛད་དང་། གྱེ་ལ་རབ་འབྱམས་པ། སྐུ་འདྲ་རིན་པོ་ཆེ་འཇམ་པའི་དབྱངས་ཆོས་ཀྱི་གྲགས་པའི་ཐུགས་ལྗགས་བཞུགས་པ་དེར། ཟན་རིལ་ཕུལ་བས་ཤག་མང་ཆོས་མཛད་པ་བབས། ཁོང་ཡང་སྔོན་བསྙེན་རྫོགས་བསྒྲུབས་པའི་ཐོབ་དུས་བརྡ་སྤྲོད་ཀར་ས་གཡོས་ཆེན་པོ་བྱུང་ནས། བྱ་འདུལ་བ་འཛིན་པ་ཆེན་པོ་སྐལ་བཟང་ཆོས་ཀྱི་རྒྱ་མཚོས་ས་ཐོབ་ཏུ་ལུང་བསྟན། 
3-346
འཕྲལ་དུའང་བསྐྱེད་རྫོགས་ལ་ལེགས་པར་གོམས་པས་དམིགས་པ་གང་གཏད་ཀྱི་ཆུ་མི་འཁྱགས་པ་དང་། རྟ་ཟེད་སོགས་སྲོག་ཆགས་ཕྲ་མོ་རྣམ་འཇོམས་ཀྱི་གཟུངས་རེ་བཟླས་ཕུ་བཏབ་པས་ཆུ་རུ་བཞུ་ནུས་པ་དངོས་སུ་མཐོང་། ཕྱིས་ཁོ་བོ་ལ། ཞག་ཉི་ཤུ་རྩ་གཉིས་ན་དབུ་ཆེ་ས་དང་པོ་ཐོབ་པ་ཞིག་འཆི་ཟེར་བ་བྱུང་བ་ཁོང་གྲོངས་པ་དང་འགྲིག་སྣང་། དེས་བཅུན་པས་བློ་ལང་དུ་མ་སོང་། དྲིན་ཆེ་བསམ་པ་ཤར་རོ། །བསླབ་སྦྱངས་རང་ནི་འཕྲལ་གྱི་ཆོ་ག་ཁོ་ནའི་སྐྱོར་ཟློས་སོ། །དེ་དུས་ཀུན་སྤངས་རྗེས། དཔོན་པོ་ཆོས་རྒྱལ་བསྟན་པའི་རྒྱལ་མཚན་ཕྱག་ཕྱི་ཞུ་བ་ཡིན་གསུང་སྦྱོར་གཏོད་མཛད། གྲ་པའི་ཐོག་མ་ཡིན། མཐོང་སྨོན་པ་སྐྲ་བཅད། ཆོས་རྒྱལ་དབང་པོར་མིང་བཏགས། ཁོང་སྐྲ་བཅད་ཀྱི་ཐོག་མ་ཡིན། ཕྱིས་ཅོག་གྲའི་བླ་མ་བྱས། ཞི་དུལ་གྱི་དཔེ། ཐུགས་དམ་ལྷག་པར་སྨིན་པ་ཞིག་བྱུང་། དེ་ནས་ཡང་རྩེར་ཕེབས། ཆོས་རྒྱལ་གླིང་དུ་ཁམས་ནས་བླ་མགོན་སྤྲུལ་སྐུའི་དབོན་པོ་གཉིས་ཀྱིས་གཙོས་པའི་འབུལ་སྐྱེལ་གཏོས་ཆེ་བ་སླེབ། བཀྲ་ཤིས་མཐོང་སྨོན་དུ་འགྱེད། གཙུག་ལག་ཁང་དུ་མཆོད་རྫས། ལྷག་པར་ངེད་མཆོད་ཡོན་ལ་འབུལ་ཆས་གཏོས་ཆེ་བ་བྱས། དབོན་པོ་ཞིག་སློབ་གཉེར་ལ་བཞག །ཁོང་རྣམས་ཆོས་འབྲེལ་དགོས་ཟེར་བླ་མའི་རྣལ་འབྱོར་བྱས། དེ་ཆོས་བཤད་པའི་ཐོག་མ་ཡིན། དེ་ནས་རྗེ་མཐུ་སྟོབས་ཞབས་ཕེབས། 
3-347
མངལ་སྒྲིབ་སྦྱང་དགོས་པ་ཡིན་གསུང་རྣམ་འཇོམས་ཀྱི་ཁྲུས་ཉིན་གྱི་རིས་གནང་། མི་རིང་བར་ཆོས་རྗེ་ཐེལ་རུ་བ་དཔོན་སློབ་ཉིས་བརྒྱ་ཙམ་ཙ་རི་བ་རྗེ་ལན་དུ་བྱོན་པ་ལ་མཇལ་ཁ་ཆོས་འབྲེལ་སོགས་བགྱིས། དེ་ནས་བྱར་དུ་ཞལ་ངོ་ཚང་མ་ཕེབས། རྗེ་གོང་མ་ཉིད་ཀྱིས་རྒྱལ་ཚབ་ཏུ་མངའ་གསོལ་ཞིང་། པཎྜི་ཏ་སྨི་ཏིའོ་ཞེས་ཞལ་གྱིས་འཆིས་པ། རིག་པའི་གནས་ལྔ་ལ་མཁས་པ་ཆེན་པོ། བྱ་བཀྲ་ཤིས་རྣམ་རྒྱལ་མི་ཕམ་ཆོས་ཀྱི་བླ་མ་ལ་ཕར་བླ་མའི་རྣལ་འབྱོཪ་ཕུལ། སང་ནས། བདེ་དགྱེས་མགོན་པོ་ཕྱག་བཞི་པའི་དབང་། དུས་ཀྱི་འཁོར་ལོའི་འགྲེལ་ཆེན་དྲི་མེད་འོད་ལ་བཤད་པ། རྗེ་གོང་མ་ནས་བརྒྱུད་པ་ཉན། དེ་དུས་དུས་འཁོར་རྩ་རྒྱུད་ཀྱི་ལུང་འདིར་ཡོད་དང་མེད་པ་ཐོར་ཐོར་དྲུང་དུ་འཐོན་པ་བྱུང་ནས། བག་ཆག་ལ་བསྔགས་པ་མཛད་། གཞན་ཡང་ནག་རྒྱ་ཕག་གསུམ་སོགས་ཀར་ཡུགས་ཀྱང་མང་བར་ཐོབ། ཕྱིར་གཉལ་དུ་ཕེབས། རྗེ་འབྲུག་པ་རིན་པོ་ཆེ་སྤྱན་དྲངས། དེ་ཐོག་ཏུ་སྐྲ་བཅད། ཆོས་ཞུ་བའི་ལུགས་བྱས། ཆེན་པོ་གླིང་སྨད་པ་གདན་འདྲེན་དུ་བརྫངས། དཔོན་སློབ་གཞིས་ཁ་གོང་དཀར་དུ་དཔོན་ས་བདག་མོའི་དྲུང་གིས་སྤྱན་དྲངས་པ་དང་འགྲིགས་ཡོན་རྒྱང་པ་འགྱངས་སྐབས། ངེད་ཀྱི་འཁྲིས་ན་ཡོད་པ་དག །ཕེབས་སམ་མི་ཕེབས་ཞེས་གླེང་འདུག །ངེད་ཀྱིས་ཁོང་བྱེ་སྟོང་ཤིག་ན་ལོག་འོང་བ་མཐོང་ནས། 
3-348
གདན་མ་འདྲོངས་པར་ཁོང་རང་ལོག་བྱུང་བྱས་པས། བདེན་བསམ་པ་མི་སྣང་། རྗེ་བྱང་སྟག་ལུང་ནས་གདན་འདྲེན་དོས་དྲག་པས། དེར་ཐོགས་པར་འདུག་ནས་ཁོང་ལོག་དུས་ཡིད་ཆེས་སྣང་ངོ་། །གསེར་འཕྱང་སྟེ། མེ་མོ་བྱ་ལོ་ཤར་ནས། སེམས་དཔའ་ཀུན་ཏུ་བཟང་པོའི་འཕྲུལ། གསང་བ་ཐམས་ཅད་ཀྱི་བདག་པོ། མར་པ་ལོ་ཙ། བཅོམ་ལྡན་འདས་འཇམ་པའི་རྡོ་རྗེ་འམ། དགྱེས་པའི་རྡོ་རྗེ་སྐུ་ཚེ་འདི་ཉིད་ཀྱིས་གྲུབ་པར་བསྟན་པ་དེའི་སྤྲུལ་བའི་སྐུ། པཎྜི་ཏ་འབུམ་ཕྲག་གསུམ་པ་ལ་མི་གཡོ་བ་དཀར་པོས། སྔོན་གྱི་དགེ་བའི་བཤེས་གཉེན། བླ་མ་ཞང་འགྲོ་བའི་མགོན་པོར་ཡང་ལུང་བསྟན་པ། འབྲུག་པ་རིན་པོ་ཆེ་ཐོག་དེ་ལ་དབུས་གཙང་ན་སྐད་ཆེ་བ་དེ་ལས་གཞན་རིགས་ཀྱི་བདག་པོར་འོས་པ་མེད་ནས། ཞབས་དྲུང་དུ་ཡར་འགྲོ་བའི་དཔྱད་གཞི་ཤར། ཚོ་འཛིན་དུ། རྗེ་སྒྱུ་མའི་གར་མཁན་ཆེན་པོ་ཕེབས། གཞན་ནང་སོ་ཡུར་གོང་བ་སོགས་སྐྱ་སེར་འདྲེས་པ་བརྒྱ་ལྷག་ཙམ་དབྱར་ཀ་གཉལ་ནས་བཏེག་དུས། ཁ་བ་ཆེན་པོ་ཚད་མེད་པ་ཞིག་བྱུང་། ལོ་ཏོག་ཐམས་ཅད་བསྙལ་བས་སྤུ་གྲི་སྐོར་གསུམ་འཁྲེན་པར་འདུག །ཅེས་ཁ་ཚོན་བཅད། རིམ་གྱིས་འཕྱོང་རྒྱས་ནང་དུ་སླེབ། འཕྱོང་ཕུ་གྱད་ན་ཁར་རྒྱལ་བུ་བགྲེས་པ་བསུབ་ལ་བྱོན། དེ་ནས་འཆིང་བར་སྟག་རྩེའི་གཞིས་ཁར་འབྱོར། སྔོན་གྱི་ཡབ་ཡུམ་སྐུ་མཆེད་ཀྱིས་དགའ་སྟོན་བསམ་གྱིས་མི་ཁྱབ་པར་མཛད། 
3-349
དེར་དབུས་སུ་དབང་པོ་དངས་པའི་ཐོག་ཆོད། ཨ་མ་དྲུང་པའི་གཟིམས་ཆུང་བཀོད་མཛེས་སུ་ཞལ་ངོ་ཚང་མ་ཕེབས་ནས། བཀའ་ལུང་ལ་འདི་ན་སྐུ་ཆས་ངོ་མཁྱེན་པ་ཨེ་འདུག་གསུང་བ་ལ། རྗེ་མར་བའི་སྐུ་འདྲ་ཕྱག་ནས་མ་ལ་མཛུབ་མོ་བཙུག་ནས། འདི་ངོ་ཤེས་ཞུས་པས། འདི་གསར་པ་ཡིན་གསུང་། མིན་ལགས་སྐུ་འདི་བསྐྱོད་ན་སྐྲོག་སྐྲོག་ཟེར་གྱི་ཡོད་ཞུས་པས་ཐམས་ཅད་བཞད། ཤིན་ཏུ་ཐུགས་ཡིད་ཆེས། དེ་མིན་སྲོང་བཙན་གྱི་ལོ་རྒྱུས་ཐོ་རེ་ཞུས་པས། ཇི་ལྟ་བ་དེ་དཀར་འདུག་གསུང་ནས་མཉེས་མཉེས་ཅི་ཡང་མཛད། རྗེ་གོང་མའི་ཞལ་སློབ། མཁའ་འགྲོ་མ་སུ་ཀ་སིདྡྷིས་རྒྱལ་བ་ལོའི་སྤྲུལ་པས། ཉིད་ཀྱིས་བསྟན་པ་རྒྱས་པར་བྱེད་དོ་ཞེས་ལུང་བསྟན་པའི་ཆོས་རྗེ་ཌཱ་ཀི་རས་ཆེན་གྱིས་བརྒྱ་འབུལ་མང་པོ་བྱས། དེ་དུས་སྟག་རྩེའི་གཞིས་ཁའི་རྩེ་ནས་ཁྲོམ་ཆེན་པོ་ལ་ཚོགས་ཆོས་ལན་ཅིག་བཤད། ཐང་པོ་ཆེའི་རྩ་རྒྱད་གོང་དུ་ཡང་། ཁོང་གིས་ཞབས་བཏེག་མི་བསམ་གྱིས་མི་ཁྱབ་པ་འདུས་པ་ལ་ཆོས་འབྲེལ་བྱས། དེ་དུས་མེ་ཏོག་སིལ་མའི་ཆར་འབབ་པ་གཟིགས་པས། ཐུགས་དད་པ་ཡིན་ཞེས་བཟོད་པ་བྲག་ནས་ཟུར་ཁང་ཤར་པའི་ཇ་ཞུས་གཟབས་མ་བྱུང་། གཞན་ཆོས་རྗེ་རྒོད་ཚང་པ་དང་། བྱེ་མིན་རྩེ་པ་སོགས་གྲྭ་རིགས་མང་པོ་འདུག་པ་སོ་སོས་འབུལ་བ་སོགས་ལམ་མི་ཤོགས་པ་ཙམ་རིམ་པས་བྱུང་། 
3-350
ཡར་ཀླུང་གད་པ་སྟེངས་སུ་ཚོགས་ཆེན་གྱི་དགེ་འདུན་པ་ཐམས་ཅད་བྱོན། འབུལ་བ་ཞབས་ཏོག་བྱེད་སྣང་ཞིང་། གཙོ་བོར་སྡེ་སྲིད་རིན་པོ་ཆེ་ཕག་མོ་གྲུ་པ་ངག་གི་དབང་ཕྱུག་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ། བྱ་པ་དང་དཔོན་གཡོག་ཉེ་ཆགས་པ་དང་། འཕྱོང་རྒྱས་ནས་ཞུ་སྦྱོར་གནང་བའི་སྟབས་ཀྱིས་གནང་སྦྱིན་བདག་རྐྱེན་བཟང་པོ་མཛད། ལྷུན་གྲུབ་གླིང་། དོལ་ལྷུན་གྲུབ་ལྷ་རྩེ། ཆུ་ཤུལ་ལྷུན་བོ་རྩེ། གཞིས་ཁ་སྣའུ་རྣམས་ནས་སོ་སོར་ཞག་མལ་འཕོག་ས་དང་། ཆོས་འཁོར་ལྷ་སར་སྡོད་རིན་གྱི་ཐབ་འཛིན་ཚང་མ་མཛད་དེ་རེས་གོང་དཀར་དུ་ཕྱིན། ཆེ་ས་འགྲོ་བའི་མགོན་པོ་མཇལ་ཏེ་མཐོང་བཀུར་དེ་ཙམ་མ་མཛད། འདིས་རྟེན་འབྲེལ་འཕྱུགས་པ་སྐད་བྱས། གོང་དཀར་དུ་ཞབས་ཏོག་བསྒྲུབ་དགོས་བསམ་པ་གཞན་དབང་གིས་གཡེལ་བ་ཅིག་ཀ་བྱུང་། སྡེ་སྲིད་མ་ཆེན་དང་རྟེན་འབྲེལ་ཡེ་འགྲིག་ཏུ་བྱུང་བས། ཕྱིས་ཞབས་ཏོག་ཆེན་པོ་བསྒྲུབ་ཐུབ་པ་ཡིན་ནོ། ། དེ་ནས་གྲུབ་པ་ཐོབ་པ་བྱེ་བ་སྙེད་ཀྱིས་ཞབས་ཀྱིས་བཅགས་པ། གདན་ས་འབྲུག་སེ་བ་བྱང་ཆུབ་གླིང་དུ་སླེབ། རགས་མའི་གདོང་དུ་སྤོས་བསུ་བ་འདུག་པའི་ཁྲོད་ན་སྔགས་པ་ཆོས་མགོན་པ་ཡིན་འདུག་ཅེས་ངོ་ཤེས། རིམ་པས་རྒྱལ་སྲས་གཅུང་རིན་པོ་ཆེ་དཔོན་སློབ་སོགས་ཀྱིས། སེར་སྦྲེང་རྒྱས་པ་ཇ་བསུ་དང་བཅས་འདུག་པར་མཇལ། 
3-351
དེ་ནས་གཙུག་ལག་ཁང་གི་སྟེང་དག་པ་རབ་འབྱམས་ཀྱི་སྒོའི་ཕྱི་ཁྱམས་ན། རྗེ་ཕེབས་འདུག་པས། སྐུ་ཆེ་ལ་ཆུ་ཞིང་གབ་བ་མཚན་དཔེས་སྤྲས་པ། ཟིལ་མཚུངས་པ་མེད་པ་དེ་མཐོང་བས་ལུས་ཞིག་འགྲོ་བ་ཙམ་གྱི་དད་པ་དང་། སྔོན་མེད་པའི་དགའ་བ་ཆེན་པོ་སྐྱེས། རྗེ་རང་གིས་རྒྱལ་དབང་ཆོས་རྗེ་དངོས་སུ་གཟིགས་གསུང་། སྤྱན་ཆབ་དང་བཅས་ཏེ་ཕྱག་གནང་འདུག །གཟའ་སྐར་བཟང་པོ་ལ་བྱང་ཆུབ་ཆེན་པོའི་སྐུ་མདུན་དུ་གཙུག་ཕུད་བཅད། ནཱ་རོ་ཏ་པའི་རྒྱལ་ཚབ་འགྱུར་མེད་ངག་དབང་ནོར་བུ་དབང་པོའི་སྡེར་མིང་བཏགས། དགེ་བསྙེན་དང་བྱང་ཆུབ་ཏུ་སེམས་བསྐྱེད་པ་ཞུས། རྗེའི་ཕྱགས་ཕྱིར་རིམ་པས་རྟེན་འཇལ་བྱེད་སར། ངེད་ཀྱིས། སྔ་ཐོག་འདི་ན་མགོན་པོའི་སྐུ་གཅིག་ཡོད་བྱས་པས། རྗེའི་བཀའ་ལས། དང་པོ་འདི་ན་ཅིས་ཀྱང་ཡོད་དེ་ད་ལྟ་མགོན་ཁང་སྟེང་ན་བཞུགས་སོ། །ཞེས་གསུང་། རྟེན་འདིའི་ཐུགས་ཀར་ཆོས་རྗེ་རས་པའི་ལྗགས་བཞུགས། དེར་སྐྲ་བཅད་པའི་རྟེན་འབྱུང་གིས། ཁོ་བོ་གྲགས་པ་ཆེ་བར་བྱུང་ཞིང་། སྙིང་རྗེ་ཆེན་པོའི་རང་གཟུགས་སུ་སོང་བས། གཞན་གྱི་དོན་དུ་འགྱུར་ན་ཅི་ལ་ཡང་། པདྨའི་མཚོ་ལ་ངང་པ་འཇུག་པ་ལྟ་བུར་དེ་དུས་ནས་སྤྲོ་བ་གཅིག་ཡིན་ནོ། །སྔོར་དཀར་ཞིག་བྱེད་བསམ་པ། རྗེེ་བླ་མའི་བཀའ་ལུང་ལ། ད་ལྟ་སྐུ་ན་ཕྲ་བས་སྐུ་གཟུགས་གཉའ་འཆག་ན་མི་རུང་། 
3-352
རེ་ཞིག་མ་བྱེད་གསུང་། ཉེས་པའི་རྩ་བ་ཆང་དེ་མཐོང་ནས་ལོ་དགུ་པ་ནས་སྤངས་ཏེ་དེ་ནས་སིང་པོ་དང་གླུམ་ཀླད་ཀྱང་འཐུང་མ་མྱོང་། རྗེའི་ཞལ་སྔར། འཁོར་ལོ་སྡོམ་པ་བཅུ་གསུམ། བདེན་གཉིས་ཞལ་མ། བཅོམ་ལྡན་འདས་རྡོ་རྗེ་གཏུམ་པོ་སོགས་ཀྱི་དབང་བྱིན་རླབས་མང་པོ་དང་། མགོན་པོའི་བཀའ་སྩལ་དུས། བདག་གཅིག་པུ་མིན་པ་གཞན་སུ་ཡང་མེད་པར་མཛད་ནས། ཆོས་སྐྱོང་ཐམས་ཅད་ཁོ་བོ་ལ་བསྟིམ། སྔགས་ཐམས་ཅད་ཀྱི་བཟླས་ལུང་། དབང་བཞི། ལྷག་པར་བཀའ་བསྒོ་ཚད་མེད་གནང་བས་སྲུང་མས་ཅི་བསྒོ་བ་སྒྲུབ་པ་དེར་འདུག་གོ །ཕྱིས་བསྟན་སྲུང་ཡོངས་སུ་རྫོགས་པ་འདི་འབྱུང་བའི་ཁུངས་ཆེན་པོར་སོང་། ཕྱག་ཆེན་དང་། བསྲེ་འཕོ། རྟེན་འབྲེལ་ཁྲིད་དུ་སྩལ། སྒྲ་བསྒྱུར་མར་པ་དང་། ཆོས་རྗེ་རྒྱལ་བའི་དབང་པོ། ཉིད་ཀྱི་བཀའ་འབུམ་རྣམས་ལྗགས་སྟེང་ནས་གནང་། གཞན་དཀར་བརྒྱུད་གསེར་འཕྲེང་ནས་སེང་གེ་དགུ་ཚར་གྱི་བར་ཐམས་ཅད། རྒྱལ་བའི་སྲས་པོ་གཅུང་རིན་པོ་ཆེས་སྩལ་ཏེ། ཟླ་བ་གསུམ་གྱི་རིང་ཉིན་ཐལ་གསུང་ཆོས་ཀྱིས་དུས་འདའ་བར་མཛད། དེ་དུས་འབྲུག་གི་ཆུ་གཞུང་ན་སྦྱར་པ་ཐོ་རེ་བ་ཡོད་པ་ལ་ད་མི་འདུག་བྱས་པས། གཞན་རྒྱུས་ཡོད་པ་ནི་མི་འདུག །ཆོས་རྗེ་གསེར་ཏོག་པས། རྗེའི་སྤྱན་སྔར་ཞུས་པས། ཅིས་ཀྱང་ཐུགས་བདེན། རྒྱལ་དབང་རྗེ་རང་གིས་འདེབས་པ་གནང་བ་ཁ་ཡར་ཞིག་འདུག་པ་ཡིན་ཏེ། 
3-353
ཀུན་ལེགས་པ་དང་གདུང་པ་ཐུགས་དུས་བཅད་འདུག་གསུང་ངོ་། ། དེ་ནས་སྙེ་ཐང་འོར་དུ། ཇོ་བོ་ཨ་ཏི་ཤའི་རྟེན་གསུམ་རྣམས་མཇལ། རིམ་པས་ཆོས་འཁོར་ལྷ་སར་ཕྱིན། བཅོམ་ལྡན་འདས་ཤཱཀྱ་མུ་ནི་དང་། ཇོ་བོ་བཅུ་གཅིག་ཞལ་ལ་སོགས་པ་མཇལ། དེ་དུས་ལོ་བཅུ་གཅིག་ལས་མ་ལོན་ཡང་། ཇོ་བོ་རིན་པོ་ཆེ་མཆེད་འཁོར་མཐོང་བ་ཙམ་གྱིས་དད་པ་བསམ་གྱིས་མི་ཁྱབ་པ་བྱུང་། སྨོན་ལམ་ལ་ཤེས་བྱ་རིག་པའི་གནས་ཐམས་ཅད་ལ་མཁས་པར་གྱུར་ཏེ། ཕས་ཀྱི་རྒོལ་བ་མ་ལུས་པ་བཅོམ་ནས། སངས་རྒྱས་ཀྱི་བསྟན་པ་དར་བར་བྱེད་ནུས་པ་ཞིག་ཏུ་གྱུར་ཅིག །ཅེས་པ་ཁོ་ན་ལན་མང་དུ་བཏབ་པས་དེའི་ཐུགས་ཀར་བསམ་འཕེལ་གྱི་ནོར་བུ་བཞུགས་པས་སྨོན་ལམ་ཅི་བཏབ་པ་འགྲུབ་ཟེར་བ་བཞིན། ད་ལྟ་སྨོན་ལམ་དེ་ལེགས་པར་གྲུབ་པས་ཡིད་ཆེས། དེར་སྐྱེ་བོའི་འདུས་པ་དང་ཟང་ཟིང་གི་འབུལ་བ་མཐའ་ཡས་པ་ཡང་བྱུང་། དེ་ལོ་སྐྱེ་ཆུ་ཆེ་ནས་གུང་ཐང་དུ་བགྲོད་མ་ཐུབ། ཕྱིར་རྗེ་མགར་གྲོང་ན་ཕེབས་འདུག་པ་མཇལ། ཟླ་བ་གཅིག་ལྷག་ཙམ་བསྡད། དེ་དུས་རས་ཆུང་སྙན་རྒྱུད་བཀའ་དྲིན་གྱིས་སྩལ་ནས། ཆོས་འདིའི་བདག་པོ་ཁྱོད་ཡིན་གསུང་པ་དང་། འབྱུང་བ་རོ་སྙོམས་ཀྱི་ཁྲིད་ཞབས་ཅུང་ཟད་འཇོག་པ་གནང་། གཞན་རྣམས་སྩལ། ལྷག་མ་ཕྱིས་ར་ལུང་དུ་མཇལ་བའི་དུས་རྫོགས་པར་གནང་། 
3-354
རྒྱལ་བའི་བཀའ་འགྱུར་ནས་རྒྱུད་འབུམ་མ་གཏོགས་པ་བྱིན་པོ་ཏིའི་ལུང་དབང་སྩལ། རང་གི་འདོད་པ་དང་། རྗེ་ཡང་བསྡད་པ་ཁོ་ན་ལ་ཐུགས་མཉེས་པ་འདུག་ཀྱང་། འཁྲིས་ཀྱི་མི་རྣམས་ཀྱིས་བསྐྱོད་པས། བྱ་ཡུལ་ནས་འབོད་མི་བྱུང་སྟེ་ལོག་འགྲོ་བ་ཤར། རིམ་པས། འཕྱོང་རྒྱས་སྡེ་སྲིད་ཀྱི་བཀའ་ལས་བསམ་བདེ་བས་གཞི་ལན། དེར་རྗེ་གོང་མའི་ཞལ་སློབ་མཚུངས་མེད་འབྱོར་ལྡན་པ། གདུང་བརྒྱུད་རིན་པོ་ཆེའི་སློབ་དཔོན་ལ་བཞུགས་འདུག་པ་མཇལ་དུ་བྱུང་། ཐུགས་ཆེས་པ་མཛད་འདུག ། དེ་ནས་བཀྲ་ཤིས་མཐོང་སྨོན་གྱི་བར་དུ་སླེབ། སྔར་སྲོལ་ལས་དེ་ལོ་ཆོས་སྐྱོང་གི་གཏོར་སྒྲུབ་འཆམས་རྒྱས་པ་འདུག །གནམ་འཕྱང་ཞེས་པ་ས་ཕོ་ཁྱི་ལོ། རྗེ་བཙུན་མི་ཏྲ་ཛོ་ཀིའི་སྤྲུལ་པའོ་ཞེས་སུ་ཁ་སིདྡྷིས་ལུང་བསྟན་རྗེ་གོང་མ་ཉིད་ཀྱིས་སྒྲུབ་བརྒྱུད་ཀྱི་བསྟན་པ་གཏད་པ་ནང་གི་རིགས་ལྡན་མ་མཉེས་པ་ནས། ཨ་བ་དྷུ་ཏི་པ་བཙུན་མོ་ཅན་ཞེས་མཚན་གསོལ་བ། ཤེས་རབ་རྒྱ་མཚོའི་ཞལ་སྔ་ནས། གཞིས་ཁ་རྩེ་མོ་རིར་སྤྱན་དྲངས། རྗེ་གོང་མ་ནས་བརྒྱུད་པའི་འབྲུག་ལུགས་ཀྱི་ཁྲིད་གདམས་ངག །མི་ཏྲ་ལུགས་ཀྱི་སྙན་བརྒྱུད་སོགས་ཟབ་ཆོས་ཞུ་བའི་དབུ་ལེགས་པར་བཙུགས། འགྲོ་ཅི་ཆེ་མཛད། བཀའ་ཕེབས་ལ། ད་ལྟ་སྐུ་གཞོན་ནུའི་དུས་སུ་གསན་པས་ཆོག །ཕྱག་ལེན་འབུལ་མི་དགོས། རང་བརྡོལ་དུ་མཁྱེན་པར་འགྱུར་རོ། །
3-355
ཞེས་ལུང་བསྟན་པ་དང་། དེ་ནས་ཞལ་ངོ་ཡང་རྩེར་ཕེབས། རྗེ་གོང་མའི་ཞལ་སློབ། རྒྱང་རྩེ་ཆོས་མཛད་པ་དཔོན་སློབ་ཕྱེད་ཉིས་བརྒྱ་ཙམ་རྐང་གཏད་ཀྱིས་མཇལ་བར་བྱུང་། དྲུང་ནས་ཀུན་རྒྱལ་བས་ཀྱང་བྱོན་འདུག་རུང་ལམ་འགོས་ཡུལ་དུ་གྲོངས་སྣང་། བྲི་ཀློག་གི་ཕུལ་དུ་ཕྱིན་པ་བསྒྲུབ་པའི་ཕྱིར། སློབ་དཔོན་ཤེས་རབ་གོ་ཆས་བྱས། ཞལ་ངོ་གཞན་རྣམས་དུས་ཟིངས་དུམ་བུ་ཞིག་བྱུང་བས་མཉལ་དུ་བྱོན། ངེད་ཀྱི་ཚོ་འཛིན་དུ་དཔོན་ས་བཞུགས། མ་ལྟ་བུར་ཐུགས་བརྩེ་བར་མཛད། ཡང་རྩེར་དབྱར་ཐོག་གཅིག་བསྡད། སྦྱོར་སློག་གིས་རྒྱ་རོལ་ཉིན་གཅིག་ལ་འཁྲིལ་བ་བྱུང་། མདོའི་གཏམ་རྒྱུད་ཐམས་ཅད་ལེགས་པར་ཟིན་ནས་གཞན་ལ་བཤད་པ་མཁས་སོ། །ཡི་གེ་དེའི་དགུན་བསླབས་ཏེ་སྲིན་བུས་ཕྱིན་པའི་རྗེས་ལྟ་བུའོ། །དེ་དུས་མགོན་ཁང་ནས་ཁྱིའུ་ཆུང་ཡི་གར་འོང་བ་བརྒྱད་བརྒྱད་འོངས་ནས་ངེད་དང་རྩེད་མོ་རྩེ། ཐོ་རངས་གཉིད་སད་ཀར་ནང་དུ་རུབ་རུབ་བདོག་པ་རྒྱུན་དུ་རྨི་དེ་དྲང་སྲོང་དགའ་བར་ཕྱིས་ཤེས། འགྱུར་བྱེད་དེ་ས་མོོ་ཕག་གི་ལོའི་དབྱར་ཐོག །བྱ་མི་ཕམ་ཆོས་ཀྱི་བླ་མའི་དྲུང་དུ་བསླབ་སྦྱངས་ལ་རྫོང་དར་མཛད་རྩིས་ལ། ར་ལུང་ནས་བཀའ་ཤོག་ཕེབས་ཤོག་གསུང་ནན་ཆག །གཉལ་པ་བྱིན་གྱིས་སྟོན་སོ་ཚུན་ཐེན་དགོས་བྱས་ནས་བྱར་དུ་འགྲོ་བ་བཤོལ་དབྱར་ཀུན་སྤངས་རྗེ་ལ་ཟབ་ཁྲིད་དང་། 
3-356
དེ་ཡང་། ལྷ་དང་བླ་མས་ལས་ཀྱི་རྡོ་རྗེ་གསུམ་པའོ། །ཞེས་ལུང་བསྟན་པ། རྗེ་གོང་མའི་དུས་ཀྱི་བཤད་བའི་བཀའ་འཛིན་མཁན། རྗེ་བཙུན་མཐུ་སྟོབས་ཞབས། མཚན་གཞན་ཡོན་ཏན་ཡེ་ཤེས་སུ་གྲགས་པ་དེ་མཇལ་བར་འདོད་ནས། རང་བྱོན་རྡོ་རྗེ་སེམས་དཔའ་བཞུཊ་པས་རྡོ་རྗེ་གླིང་དུ་གྲགས་པ་དེར་ཕྱིན། ཐོག་མར་བཅོམ་ལྡན་འདས་དུས་ཀྱི་འཁོར་ལོའི་དབང་བུ་ལུགས་རྒྱས་པ། རྒྱུད་སྙིང་པོར་དྲིལ་བའི་ཐུགས་བཤད། བདེ་མགོན། རྣམ་པར་འཇོམས་པ་མཐིང་ནག་དཔའ་གཅིག །ལྷ་ལྔ། ལྷ་བཅོ་ལྔ། དྲག་པོ་དམར་པ་སོགས་བཀའ་མང་དུ་ཞུས། རྡོར་སེམས་སྙིང་ཏིག་སྡེ་པ་དང་ལྷན་དུ་སྩལ། དེ་ནས། ཞབས་དྲུང་བཀྲ་ཤིས་རྣམ་རྒྱལ་གྱི་དྲུང་དུ་ཕྱག་འབུལ་ལ་འགྲོ་འདོད་པ་ཞིག་བྱུང་རུང་། རང་དབང་མེད་པས་མ་ཤར། སེམས་འཕྲེང་བ་ཕྱིས་མི་མཇལ་པ་ལ་བལྟ་བར་འདུག །དེ་ནས་རྫོང་ཆེན་དུ་ཀུན་སྤངས་རྗེར། ཞལ་ངོ་ཚང་མས་རོ་སྙོམས་ཆེན་མོ་གསན་ཏེ། རྫོགས་འཕྲལ་གཙང་ལ་བཏེག །རྗེ་འདིས་བསེ་ཁུན་ཚུན་སྐྱེལ་མ་ལ་བྱོན། དེ་ནས་མ་མཇལ། ཤར་གཞིས་ཁ་ནས་འབྲོག་རྒྱུད། ཆོས་རྫོང་དུ་བྱས། དེ་དུས་གཉལ་ནམ། ར་ལུང་གི་བར་དུ་བྱ་རོག་ཤིན་ཏུ་ཆེ་བ་གཉིས། གཅིག་འགྲུལ་གྱི་སྔོན་དང་། ཕྱི་ལ་གཅིག་རྟག་ཏུ་འོང་བས། གནམ་མཐོར། ངེད་ཀྱིས་ཟ་མའི་ཕུད་བྱིན། འདི་མགོན་པོ་འདི་ལྷ་མོ་ཞེས་གྱི་ན་སྨྲས་པ། 
3-357
ཕྱིས་མགོན་པོ་སྒྲུབ་མཆོད་ཐོན་པའི་དགོངས། སྔར་གྱི་ལྷ་མོ་བབ་མཁན་དེ་ལ་བརླམས་ནས། ཁྱོས་འདི་སྐད་བྱས་བྱུང་ཟེར་རོ། །དེ་ནས་སྒོ་མོར་བསྡད་པའི་དགོངས། རྨི་ལམ་དུ། མི་ནག་པོ་ཆེན་པོ་ལུས་པོ་ལ་མིག་འཆོལ་ལེ་ཡོད་པ་ཞིག་གིས། བདག་ཁང་པ་མུན་གནག་སྒོ་ན་མངོས་ཐོ་རེ་ལོང་ངེ་ཡོད་པ་ཞིག་ཏུ་འཁྲིད། དེའི་སྦུག་ཏུ་ཕྱིན་པས། དཔལ་ཡེ་ཤེས་ཀྱི་མགོན་པོ་ཡབ་ཡུམ། ལས་མགོན་བྱ་རོག་གདོང་གསུམ་ལ། ལྷ་མོ་བརྒྱད་ཀྱིས་བསྐོར་བ་མངོན་སུམ་ལྟ་བུ་མཐོང་བ་ཅིག་རྨིས། སང་ཉིན་ཀུན་ནས་གྲུབ་པའི་གཙུག་ལག་ཁང་ཆེན་པོ། རྣལ་འབྱོར་གྱི་དབང་ཕྱུག་དཔག་ཏུ་མེད་པ་མངོན་པར་སངས་རྒྱས་པའི་ས། དཔལ་ར་ལུང་ཐེལ་ཞེས་ངོ་མཚར་བའི་དཔལ་བཅུ་གསུམ་གྱིས་ཁྱད་པར་འཕགས་པ། བོད་ཡུལ་གྱི་ལྟེ་བ་གྲུབ་པའི་ཞིང་ཁམས་ཆེན་པོར་བསུ་བ་རྒྱས་པ་དང་བཅས་འདུག །སྔར་འདི་འདྲས་ཡོད་དོ་སྙམ་པ་ཇི་ལྟ་བར་སྣང་། ལྷག་པར་སྤོས་སྐྱའི་གཙུག་ལག་ཁང་གི་སྒོ་དང་པོ་འདི་ན་ཡོད་ཅེས་གསལ་པོར་དྲན། གཞལ་ཡས་ཁང་དུ་རྗེ་བླ་མ་མཇལ། དར་ཁ་དོག་དམར་པོ་ཞིག་གནང་སྟེ། ཁམས་གསུམ་དབང་དུ་འདུ་བར་གྱུར་ཅིག །སེར་པོ་ཞིག་སྩལ་ནས་འཕྲིན་ལས་ཕྱོགས་བཅུར་རྒྱས་པར་གྱུར་ཅིག །ཚེ་དཔག་ཏུ་མེད་པའི་སྐུ་མཚར་པོ་ཞིག་སྩལ། སྐུ་ཚེའི་རྒྱལ་མཚན་བརྟན་པར་གྱུར་ཅིག །
3-358
ཅེས་རྟེན་འབྲེལ་བསྒྲིག་པ་གནང་བ་ཕྱིས་དེ་ཁོ་ན་བཞིན་དུ་བྱུང་ངོ་། །དེ་དུས་སྔགས་པ་ཆོས་མགོན་པར་བླ་མ་བྱ་པ་ཟེར། ཁོང་སློབ་དཔོན་དང་སྲུང་འཁོར་བ་སྦྲགས་མར་བཀའ་བསྒོས་མཛད་། གསོལ་དཔོན་སོགས་ལ་ལ་རྫས་པ་ཆོས་རྒྱལ་ཕུན་ཚོགས་བཀོད། འདི་མ་བགྲེས་ཀྱི་བར་ལག་གཡོག་རྐྱང་པ་བྱས་པས་རྒོད་ཚང་པའི་ཨ་བོ་བྱང་དཔལ་ལྟ་བུ་བྱུང་། རྗེའི་ཞལ་སྔ་ནས། རྒྱུད་འབུམ་གྱི་པོད་དབང་དང་། ལྷོ་སྒྲུབ་སྡེ་པ་དང་། ཆོས་རྗེ་ཌཱ་ཀི་རས་ཆེན་པ། ཙ་རིའི་བརྗེ་ལེན་ལ་རྫོང་མཐར་གནང་དུས་ཀྱི། བཀའ་ཆོས་ཀྱི་ཚོགས་ར་ཐམས་ཅད་དུ། བདག་གི་སྙིང་གར་ཕྱག་མཛུབ་བཙུགས་ནས། ད་ལྟ་སློབ་གཉེར་བྱ་མི་དགོས། མ་འོངས་པར་འདི་ནས་ཆོས་ཐམས་ཅད་རང་བརྡོལ་དུ་ཤེས་པ་ཞིག་འོང་། ཞེས་ལུང་བསྟན་པ་དང་། དེར་གཅུང་རིན་པོ་ཆེ་མེ་ཏོག་ནས་ཕྱིར་ཕེབས། བདེ་མཆོག་བུ་ཊཱི་ཀ་དང་ཕྱག་རྡོར་འགྲེལ་པ། འཕགས་ལུགས་ཀྱི་རིམ་ལྔ་དཀར་ཁྲིད། དམར་ཁྲིད། ནག་ཁྲིད་ཀྱི་གླེགས་བམ་ཀུན་གསན་པའི་ཕྱགས་ཕྱིར་དང་། བདག་དཔོན་སློབ་ལ་ཚེ་ཁྲིད་གནང་བཞིན་པའི་སྐབས་བྱིན་ལ་ཐུན་མོང་བ་རྣམས་སྩལ། ཞབས་དྲུང་དང་། བདག་གཉིས་ལ་ཐུན་མོང་མ་ཡིན་པ་གནང་དུས། བཀའ་ལས། ལོ་སུམ་ཅུ་པ་ལ་ཚེའི་བར་ཆད་ཆེན་པོ་ཞིག་འོང་། དེ་ལ་མཚམས་དམ་པོ་གྱིས། དེ་ནས་ང་བདུན་ཚུན་ལ་བར་ཆད་མེད། 
3-359
འཆི་མེད་བསྒྲུབ་པའི་ཆོ་ག་ལ་བརྩོན་ན། ཚེ་ཉི་ཟླ་དང་མཉམ་ཡང་སྲིད། གཞན་ཚེ་ཚད་དེ་ཙམ་མོ། །ཞེས་ལུང་བསྟན། བཀའ་ཆོས་ཀ་དཔེ་མ་མ་ཡིན་པར་ཞིབ་བཤད། ཉིན་གྱི་རིང་ཚ་རྟིང་མའི་སྟེང་ནས། གྲོ་ཚད་མ་ཚུན་བདག་གཅིག་པུ་སྐུ་གཞོགས་སུ་གཞག་ནས་གནང་བ་ཟླ་བ་བཞིའི་རིང་སོང་། ཁྲིད་འདི་རྣམས་ལོ་སོ་བདུན་མ་ལོན་གྱི་བར་དམ་པོར་གྱིས། དེ་ནས་ཅི་དགར་ཤོད་ཅེས་གདམས། ཟླ་བ་གཅིག་ལྷག་ཙམ་ལམ་ཟབ་ཀྱི་མཚམས་དམིགས་པ་དང་སྦྲགས་ཀྱིན་ཞུས་པའི་མཐའ་མ་འཕྲིན་ལས་བཞི་སྒྲུབ་བོ། ཀུན་ལྡན་ཏེ་ལྕགས་ཕོ་བྱི་བའི་ལོ་ཟླ་བ་དང་པོའི་ཉེར་དགུའི་ཉིན། བསྐང་གསོ་ལ་ཕྱིན་དུས། བདག་གི་ལག་པ་རྗེའི་ཕྱག་གིས་འཕྱངས་ནས་སྐུ་མདུན་དང་མ་ཧཱ་ཀཱ་ལ་ལ་བསྟན་པའི་ཁུར་ཆེན་པོ་བབས་ཡོང་པས། འཕྲིན་ལས་ལེགས་པར་འཆོལ་བ་ཞུ་གསུང་བའི་བཀའ་ཕེབས། གནམ་གང་གི་ཉིན་ཚ་རྟིང་མའི་ཁར། སྐུ་གཞོགས་སུ་ཕྱིན་པས། བཀའ་ལས་སྟེར་འོག་ཕྱོགས་བཞི་མཚམས་བརྒྱད་དུ། བསྟན་པ་དར་ཞིང་རྒྱས་པའི་རྒྱུར། སྐུ་མདུན་ཉིད་གྱུར་ཅིག་གསུང་། སྨོན་ལམ་ལེགས་པར་སྩལ། མང་པོ་ལབ་ཀྱང་ལྷག་མ་ལས་པ་ལས་མེད་པས་གང་ན་དྲོངས་གསུང་། བདག་གི་ལོག །དགོངས་ཇ་ཕྱི་ཟུར་ལ། ཐུགས་དམ་གཏོར་ཁ་གསོས་པས་སུ་ཡིན་གསུང་། བདག་ལགས་ཞུས་པས། ཆོས་མགོན་པ་ཨེ་ཨིན་གསུང་ཡིན་ལགས་ཞུས་དུས། 
3-360
ཁྱོད་ཀྱིས་སྤྲུལ་སྐུ་རིན་པོ་ཆེའི་ཕྱགས་ཕྱིར་ཅར་སྡོད་གྱིས་ཤིག་གསུངས་ནས། དེ་ཁའི་མོད་ལ་ས་གཡོས་ཆེན་པོ་ཞིག་བྱུང་བ་དང་དུས་མཉམ་པར་ཞི་བར་གཤེགས་སོ། །རྗེས་བདག་ལ་གཅེས་སྤྲས་སུ་མཛད་པ་ཙམ་སྲས་དང་། དཔལ་སྟག་ལུང་ཐང་པ་ལ་ཡང་མ་མཛད་ཅེས་གྲགས། དེ་ནས་འཇའ་འོད་མེ་ཏོག་གི་ཆར་བསམ་གྱིས་མི་ཁྱབ་པ་ཟླ་བ་བཞིའི་རིང་དང་། སྟོན་ཟླ་དགུ་པ་ཚུན་གྱི་དུས་ཆེན་ལ། མེ་ཏོག་གི་ཆར་རྟག་ཏུ་བབས། དེ་ཉིན་དམ་ཚིག་མི་གཙང་བ་ཞིག་སླེབ་ནས་ཐལ་རླུང་ཆེན་པོ་རང་ཞིག་བྱུང་། དེ་མན་རྒྱུན་ཆད་དོ། །ཟླ་བ་ལྷག་ཙམ་གསངས། དེ་ནས་མཆོད་འབུལ་ཟླ་གཅིག་བྱས་པའི་གཙོ་བོར་ཕྱིན། དེ་ནས་སྟོན་ལ་ཐུག་ཉིན་གྱི་རིས། སྐུ་གདུང་དྲུང་དུ་ཇ་འདེབས་རེའི་བར་དུ་བརྟག་གཉིས་ཀྱི་རྒྱུད་ལ་བྱང་བས་ཁ་ཏོན་བྱས། སྐུ་གདུང་གི་ཕྱོགས་སུ་རྒྱ་སྤོས་ཀྱི་དྲིས་གནོན་པར་མི་ནུས་པའི་དྲི་ཞིམ་པ་ཡིད་དང་སིངས་སིང་གཏོང་ནུས་པ་རྒྱུན་དུ་ལྡང་གི་འདུག །དེ་དུས་བདག་ལ་རྗེའི་ཚིམས་ཤིག་ཡོད་པ་མཆོད་གྲལ་དུ་བཞག །སྐུ་ཁྲུས་གསོལ་བས་མདངས་འགྱུར་ནས་སྨུག་པོ་མཆོང་འདྲ་བ་ཅིག་ཏུ་སོང་ནས་སུ་ལ་བསྟན་ཀྱང་མཆོང་ཡིན་པ་འདུག་ཟེར་བ་བྱུང་ནས། ཕྱིས་བཀྲ་ཤིས་མཐོང་སྨོན་ཀྱི་རྟེན་ཆེན་ཐུགས་ཀར་བཙུག །དེར་སྐུ་གདུང་ལས་ཞུན་ཐིགས་བབས་པ་བདག་གིས་ཚོར། 
3-361
ན་ཚོད་ཀྱིས་མཆོད་ཤོམ་འོག་ཏུ་འཛུལ་ཏེ་ཐམས་ཅད་ལྕེས་བལྡགས་པས། བླ་མའི་བཀའ་དྲིན་སྙིང་ལ་ཞུགས་པའི་གསལ་སྣང་ཐོ་རེ་འོང་བ་ཞིག་བྱུང་། དེ་ནས་དགོངས་རྫོགས་ཆེན་མོ་སྒྲུབས་པའི་དུས། ཆོས་རྗེ་བདེ་ཆེན་པ། གངས་ཅན་པ། རྟོགས་ལྡན་བཟང་བཀྲས་སོགས་གཙང་གཞུང་གི་དབུ་ཆེ་གཏོས་ཆེ་བ། འབྲུག་པ་རང་གི་གླ་རིགས་ཉིས་སྟོང་ཙམ་ཚོགས་འདུག་པའི་གཙོ་བོར་ཕྱིན། རྗེ་འཇམ་པའི་དབྱངས་ཆོས་ཀྱི་གྲགས་བའི་དབུ་ཞ་རྒྱུ་དང་བཟོ་ཁྱད་དུ་འཐོན་པའི་པྲོག་ཞུ་ལ་སོགས་པ་ངེད་ལ་གནང་སྦྱིན། དགེ་འདུན་རྣམས་ལ་འབུལ་འགྱེད་བསམ་གྱིས་མི་ཁྱབ་པ་འདུག །ངག་གསལ་བས་ཡས་གཏམ་ལ་ཁྲོམ་པ་ཀུན་མགུ། དེ་ནས་ནང་རྟེན་གསེར་སྐུ་ཁྲུ་ཚད་མ་བཞེངས་པའི་རབ་གནས་བགྱིས། རྒྱལ་ཚབ་དམ་པའི་བཀའ་བཀོད་ལ་འཁྲི་བར་བྱས། ཐུགས་བྲེལ་གྱི་བར་རྣམས་སུ་རྔོག་ལུགས་ཀྱི་ཟབ་ཆོས། རྒྱུད་དྲུག་འགྲེལ་པ་དང་བཅས་པ། འབྲུག་ལུགས་ཀྱི་སྒྲུབ་སྐོར་། དགྱེས་རྡོར། ཕྱག་རྡོར་སོགས་ཀྱི་བཀའ་ལུང་ཅི་ཡང་ཐོབ། སྤྱན་ལྟར་གཅེས་པོ་མཛད། སློབ་གཉེར་ལེགས་པར་བྱེད་འདོད་པས། དགོངས་རྫོགས་དུས། དབུ་ཆེ་རྣམས་བཀའ་གྲོས་སྤེལ་བར། སློབ་དཔོན་སུ་འོས་ལ་ཞལ་མ་དན། རྗེ་རང་སྐྱོགས་ལོ་བཞེད་པར་འདུག་སྟེ། དཔོན་སློབ་ཐེལ་དུ་དགོངས་རྫོགས་སྒྲུབ་པ་ལ་ཐེགས་པ་ཤར། དེའི་རིང་ལ་ཁོང་གྲོངས་སྣང་དེ་ལོ་བླ་མ་བྱ་པ་ཁྲིད་ཕྱག་ལེན་ལ་ངེས་པར་ཡོད་པས། 
3-362
འབྲུག་ལུགས་ཀྱི་ཁྲིད་ལག་ལེན་ཀུན་ལ་སྦྱངས། འོན་ཀྱང་རྩ་རླུང་གི་སྐོར་ཅི་བྱ་དེར་བཞུགས་སུ་གསོལ། འཕར་བ་ཅེས་པ་ལྕགས་མོ་གླང་གི་ལོ་གསར་མཚམས། རྒྱལ་ཚབ་དམ་པའི་དགུང་སྐེག་གཤིས་ཀྱིས། རོང་རྩིབས་ཀྱི་གྲ་མ་སྡུག་པོར་གྲགས་པ། སངས་རྒྱས་དབོན་རས་ཀྱི་སྒྲུབ་ཕུག་ཡོད་ས་དེར་ཕེབས། ལམ་དུ་གངས་མཚོའི་སྒྲུབ་གནས་མཇལ། རྗེས་ཟླ་རེ་ལ་གསུང་ངག་ཤིན་ཏུ་དམ་པ་དང་། ཞག་བཅུ་བར་ལྷོད་ཙམ་སྤེལ་མར་མཛད་རིན་གསུང་ཆོས་ཞུས། དེ་དུས་རྔོག་ཆོས་རྒྱལ་བས་མཛད་པའི་བརྟག་གཉིས་ཀྱི་ཟིན་བྲིས་ཆེན་མོ་ཁོང་དུ་ཚུད་པར་བྱས། རྗེ་ཆོས་སྐྱོང་གི་བསྙེན་པ་མཛད་དུས་སྒྲུབ་ཁང་ཐོག་ན། ངེད་རྣམས་ཀྱིས་མཐོང་བར་བྱ་རོག་སྟོང་ཚོ་ཙམ་བབས་འདུག །དེ་དུས་མགོན་པོ་དངོས་སུ་ཞལ་གཟིགས་པར་སྣང་ངོ་། །སྐུ་མཚམས་གྲོལ་ནས། རྗེ་དཔོན་སློབ་གཙང་གཞུང་ལ་ཐེགས་རྒྱུ། ངེད་རྣམས་རོང་ལ་མེ་ཏོག་ལ་སོང་གསུང་། ཆས་ཏེ་སྐེ་ཆག་སྐོང་བུར་སླེབ་སྐབས་ཆོས་རྗེ་ཀློ་བོ་ཕེབས་པ་དང་འགྲིག །ཕྱག་གཡོག་བྱིན་འཇོག་པ་གནང་། ཛུ་ཀི་གཅིག་ཁྲིད་ནས་བླ་མ་བྱ་པ་དང་། སྔར་རྗེའི་སྤྱན་སྔར་གཤིབ་པ་གནང་བས་ཐུགས་མཐོང་ཆེ་བ་འདུག་པ་ཁོང་སྦྲན་ཏེ། ངེད་ཡོང་སར་ཕེབས་ནས། རྗེ་རང་གིས་ཆོས་རྗེ་ཀརྨ་པ་དང་མཇལ་བར་ཀརྨ་པའི་གསུང་ནས། ཁྱེད་ནག་པོ་སྤྱོད་པའི་སྐྱེ་བ་ཡིན་ཟེར་བ་དཔང་པོར་སུ་ཡོད་གསུང་། 
3-363
ཁྱེད་ཐམས་ཅད་མཁྱེན་པ་ཡིན་པས་ཁྱེད་ལགས་མོད་ཞུས་པ་སོགས་ཀྱིས་ཞལ་འཕྲོས་ཤིན་ཏུ་སྨར་བ་གཅིག་མཛད། ངེད་ལ་བླ་མའི་རྣལ་འབྱོར་ཞིག་གསན་པ་གནང་། དེ་ཙམ་གྱིས་ཁོ་བོ་བླ་མའི་གྲངས་སུ་འཇུག་པ་མཛད་འདུག་པས། ཆོས་འདི་ཤེས་པ་ལ་ཐུག་སྣང་། གཞན་ཆོས་མང་པོ་ཞུས་པ་ཚོ་ཡང་། ཆོས་དེ་དགོས་དུས་བླ་མ་དེ་མི་ཤོད་ཁ་མེད་རང་ལ་མ་ཐོབ་པ་འདུག་ཟེར་བའི་མི་ཁ་བྱུང་དོགས། གཞན་གོ་འཕང་འདྲ་རེ་བྱུང་ཙ་ན་ཤི་གསང་ཀོ་གསངས་བྱེད་མཁན་མང་། དམ་ཚིག་ཉམས་པ་དེ་འདྲའི་རིགས་ལ་ཟེར་བ་ཡིན། དེ་དུས་རིན་པོ་ཆེ་དེ་པའང་སྟག་ལུང་ཐང་བའི་བླ་མར་གྱུར་བྱང་པོ་བདག་པོ་དང་ཡར་རྒྱབ་ནང་སོ་ནས་གཉི་ག་ལ་ཐུགས་འབྲེལ་ཆུག་པ་ཙམ་ཡིན་པར་སྣང་། སང་རོང་ལ་ཐེགས་གྲ་སྨུག་ཏུ། རྗེ་དང་མཇལ། གསུང་ཆོས་ཕར་གསན་ཚུར་གསན་གནང་འདུག །ངེད་ལ་ད་རེས་གཡུང་དར་རྒྱས་སུ་དཔོན་དྲུང་ཚང་གི་ཇོ་མོ་མཁར་རྩེ་པ་ཨ་ཆེ་དྲུང་པས་གཞི་ལན་ཚད་མེད་མཛད། རོང་བ་རྒ་ལོ་རྣམ་རྒྱལ་རྡོ་རྗེའི་དགོན་གནས་གཡེ་དམར་གྱི་རྟེན་མཇལ་བྱས། སྣར་ནས་ནང་རོལ་ཚུན་ཕྱིན། ལ་སྔོན་འཇིགས་སྐྱོབ་ཏུ་ཆོས་རྗེ་གངས་ཅན་པས་བཏེག ། དེ་ནས་ར་ལུང་དུ་འབྱོར། དགའ་བྱེད་ཅེས་པ་ཆུ་ཕོ་རྟ་ལོ་ལ། རྒྱུད་ལ་སློབ་གཉེར་བྱེད་པའི་སློབ་དཔོན་གྱི་འོས་སུ། 
3-364
ངེད་རང་སྙེ་མོ་རུ་མཚོ་ཁ་ན། དེ་དུས་ཀྱི་དུས་འཁོར་བ་ཆེན་པོ་གཉན་གྲོང་ཆོས་མཛད་དོན་གྲུབ་དཔལ་བ། བུ་ལུགས་ཀྱི་རྒྱུད་སྡེ་མཐའ་དག་གི་བཤད་བཀའ་བཞུགས་ལ་སྦྱངས་པ་མཐར་སོན་ཅིང་། རྗེ་གོང་མའི་དུས་ཀྱི་ཞལ་སློབ་ཀྱི་དངས་མར་ཡང་སྣང་བས་ཁོང་འདོད། དེ་མ་བྱུང་ན། རྔོག་ལ་དང་པོ་ནས་གསན་པའི་འཁྱུད་འདུག་ནས། ཆོས་རྗེ་ལོ་མོ་བར་གྲགས་པའི་རྔོག་གི་ཞལ་ངོ་དེ་དགོས་ཞུས་ཀྱང་། རྗེའི་དགོངས་པ་མ་གྲོལ། དཔོན་སློབ་ཐེལ་དུ་ཕེབས་དུས། ཆོས་རྗེ་ལྷུན་བདེ་བའི་དབོན་པོ། གདན་ས་ཆེན་པོ་དེའི་སློབ་དཔོན་དུ་བཞུགས་པ་དེས། སྔར་འཁྱུད་ཀྱི་བཀུར་སྟི་ལེགས་པར་ཞུས་འདུག་པས་དགྱེས་པ་འདྲ་ཞིག་གིས་ཁོང་བྱུང་ན་མ་བྱུང་ན་མཛད། གདན་འདྲེན་ཤར། ཁོང་གིས་སྔར་མ་གསན། འདི་ནས་སྙན་གསན་བྱུང་དུས་ཆོས་རྗེ་ལོ་མོ་བར་གསན་འདུག །ཆོས་རྗེ་ལེ་མོ་བ་འབྲེག་སྒང་དུ་ཕེབས་དུས་འབྲུག་ནས་སྤྲུལ་སྐུ་གསན་སྦྱོང་མཇད་པ་ལ། རྔོག་པ་ལ་ཞལ་ངོ་མཁས་པ་ཅིག་མེད་པ་འདུག །ཐེལ་ནས་བྲག་ལེ་བ་འོས་གསུང་བོས་སོང་། ཁོང་ངེད་ཀྱི་འཕྲིན་སྐྱེལ་པའི་ལུགས་བྱེད་སྣང་སྟེ། འཕྲིན་ཁྱོལ་འདོགས་ཁ་པོ་མི་འདུག་གསུང་བ་མད། ཕྱིས་རྒྱལ་ཆེན་གླིང་དུ་སླེབ་དུས་རྩོལ་པ་བྱས་ཏེ། རྗེ་གློ་བོས་ཁོང་ལ་རྔོག་དཀྱིལ་གསན་དུས། དཔོན་སློབ་གཉིས་ཀ་ཐུགས་སྤྲོ་ཐུང་བས་སྡེ་པ་ལ་གནང་དཀའ་པོ་བྱུང་འདུག་པས་མི་ལེགས་རིན་པོ་ཆེ་ཀློ་བོ་ལ་གསན་པ་དགའ་གསུང་གནང་བས་རྟེན་འབྲེལ་མ་འགྲིག །
3-365
དེར་ངེད་ཚོས་ཉིན་གཅིག་བཤད་པ་ཞུ་བར་བརྩམས་པས། ཡིད་མ་ཆེས་ནས་འཐེན། རྗེས་འབོད་པ་གནང་བས་དེ་ཁར་ཐེགས་བཅུག་པས་ནི་མ་བྱུང་། འོན་ཀྱང་བཀའ་ལུང་ནཱ་རོ་འགྲེལ་ཆེན་སོགས་ཁོང་ལ་རྒྱུད་པ་ཁུངས་བཙུན་པར་འདུག་པས་དབྱར་ཚུན་ཞུས། ཕྱིས་ཇོ་བོ་བཟང་། ཐུགས་དམ་སྨར་བར་འདུག་པས་གུས་པར་བྱས། དེ་ནས་རྗེ་ཕེབས། ཁོང་ཕྱིར་བྱོན། དེ་དུས་རྗེ་དྲུང་མི་བསྐྱོད་རྡོ་རྗེ་ཁ་རོར་ཕེབས། བྱ་ཡུལ་ནས་ངེད་ལ་བསྙེན་པར་རྫོགས་པ་ལོང་གསུང་བ་བྱུང་སྟེ། ལོ་བཅུ་དྲུག་པ་ཡིན་པས་ལོ་ཚོད་མ་ལོན་པའི་གཤིས་ཀྱི་ཞུ་བ་མ་ཤར། དབྱར་སྤོས་སྐྱ་ཞིག་གསོས་མཛད་པའི་ལས་ཆོས་བཤད། དེའི་སྟོན་ནས། བལ་པོ་དཔོན་མོ་ཆེ་ལོངས་སྐུ་ཤིང་སོགས་བཅུ་གཉིས་འབོད་པ་གནང་། རྗེ་བླ་མའི་ཕྱི་རྟེན་གསེར་འབུམ་ཆེན་མོའི་བཟོ་གྲྭ་གཙུགས། རང་གི་རྒྱུ་གང་སྣང་དེ་ལ་ཕུལ། མཛེས་བྱེད་དེ་ཆུ་མོ་ཡོས་ལོ། བྱ་ཡུལ་ནས་མི་དབང་མཚོ་སྐྱེས་རྡོ་རྗེས་ནན་ཆེན་པོས། ངེད་མཚན་ཉིད་ཀྱི་སློབ་གཉེར་བྱེད་འཇུག་པའི་སྙན་བསྐུལ་ཕུལ་བས། ཆོས་རྗེ་ཏིང་ཏིང་པ་མ་གཏོགས་པ། རྗེ་དཔོན་སློབ་ཐམས་ཅད་ཐུགས་ལ་འཐད་རྒྱུ་མེད་ཙམ་འདུག་རུང་། མ་གི་ནས་ཞུ་ནན་ཆེས་པས་བཀའ་བགྲོས་དཔྱད་གཞིར་བཅུག །དེ་ཡང་མས་ནས་གསེར་མདོག་ཅན་པ་འོས་གསུང་། ར་ལུང་ནས་སྐྱེད་ཚལ་བ་དང་ཐུགས་ཉེ་བས་དེ་འོས་དགོངས། 
3-366
ཞབས་དྲུང་རང་ནས་ཐུགས་འདོད་ཐུན་མོང་མ་ཡིན་པ། རིན་པོ་ཆེ་ཀློ་བོ་སྤྱན་དྲང་ནས་ཐོས་པ་སྦྱོང་དུ་འཇུག་བཞེད་ནས་ཐེན་ཁྱེར་ཡོད་ཙམ་བྱུང་། སྐུ་གདུང་རིན་པོ་ཆེའི་དྲུང་དུ་ཟན་རིལ་ཕུལ་བས་གསེར་མདོག་ཅན་པ་ལ་བབས། དེ་དུས་ར་ལུང་པ་དང་འབྲེལ་ཆེར་མི་སྣང་ནའང་། ཕྱག་ཐམ་གནང་སོང་བ། མཁས་པ་ལྕང་ར་བ་བློ་གྲོས་བཟང་པོ་དབུས་གཙང་ན་གྲགས་པ་ཅན་དེ་གདན་སར་བཞུགས་འདུག་པས་ཤིན་ཏུ་མཉེས། དེ་ལོ་ར་ལུང་དུ་སྤོས་སྐྱའི་ཞིག་གསེས། གསེར་འབུམ་ཆེན་མོ་ཁད་ཉེར་རབ་ཏུ་གནས་པ་མཛད་རྒྱུར་ཡོད་པས། དེ་དག་གྲུབ་འཕྲལ་གསེར་མདོག་ཅན་དུ་ཁོང་གི་སྤྱན་སྔར་འགྲོ་རྒྱུ། དེ་བར་ལ་མཁན་ཆེན་ནས་བསྡུས་པ་བརྩི་རོགས་དང་། དེར་སླེབ་དུས་ཀྱི་དགེ་རྒན་དུ་མྱང་རམ་པ་རྫོང་དར་མཛད་བྱུང་། ཁོང་སྐུ་ཡོན་འབྲིང་ཙམ། ཐུགས་གཤེས་ཤིན་ཏུ་ལེགས་པར་རྩི་བ། ཁོང་འབྱོར་ནས་བསྡུས་པ་བརྩི་ཉིན། ངེད་ཀྱི་ཟླར། ལྷོ་འོབས་མཚོ་བའི་བླ་མ་གྲགས་པ་ཡོད་པས། ཁོས་འོས་ལེ་ཟིན་སོང་། ངེད་ཀྱིས་གོ་རྒྱུ་མ་རྙེད་ནས་ཆེན་པོ་ཞིག་མ་ཟིན། སང་དེ་ཡང་དེ་ཁ་བྱུང་བས་ཁོང་གི་ཐུགས་ལ། ཤེས་རབ་ཆེན་པོ་མི་ཡོང་བ་འདྲ་དགོངས་བྱུང་ཟེར། གནངས་ནས་གནད་གོ་ནས་དེ་ཉིན་ནས་ཅི་དཔོད་དཔོད་ཟིན། ཁོང་ནི་ཁ་རྩང་ལས་ཞེལ་དུ་འགྲོ་ལ་ཁད་སྣང་། 
3-367
རིགས་ལུང་འཐབ་མཁན་ཁོང་རང་གི་གྲྭ་པ་གཅིག་པུ་ལས་མེད་རུང་། ཞག་བཞི་ལྔ་ནས་རྟགས་གསལ་ཁ་ལེགས་པར་ཕྱེད། དེ་ནས་དྲོད་ཀ་ལེགས་པར་རྙེད། ཡོངས་དྲིལ་ཟླ་བ་གསུམ་ན་བསྡུས་པ་ཁོ་ལས་ཆེས་དགའ་བ་བྱུང་། སློབ་དཔོན་པ་རང་དང་རྩོད་ཀྱང་བགྲོ་གླེང་ངེད་བཟང་བ་རྐྱང་ཡོང་འདུག །དེ་དུས་བསྡུས་དཔེའང་བྱུང་ན་བསམ་སྟེ། ཁོང་གིས་ནི་མ་བསྣམས། ཕྱོགས་དེ་ནི་སྒོམ་གྲྭར་སོང་མ་རྙེད། དབྱར་སྟོན་གཉིས་པོ་དེ་མཁར་ལན་གྱི་ལས་ཆོས། གཟུངས་གཞུག་གི་ཕྱག་གཡོག་སོགས་ཀྱིས་གཡེལ། སློབ་དཔོན་པ་རང་ཡང་ཆོས་རྗེ་ལྕང་ར་བ་གཤེགས་པའི་དགོངས་རྫོགས་སྒྲུབ་པ་ལ་བྱོན་སོང་། དེ་ནས་རབ་སྟོན་ཆེན་མོ་འཚོགས་དབུ་བགྱིས། ཉིན་ཞག་མང་པོར་སྒྲུབ་མཆོད་དང་རབ་གནས་སྦྲེལ། དངོས་གཞིའི་དུས་དབུ་ཆེ་བུ་སློབ་རགས་ལ་མང་བ་དང་། ཁྲོམ་ཆེན་པོ་འཚོགས། ལྟས་བཟང་པོ་བྱུང་། དགའ་སྟོན་ཀྱང་ལེགས་པར་མཛད། སྟོན་གཞུག་སློབ་དཔོན་པའི་ཟླར་དཀའ་བཅུ་བ་བརྩོན་འགྲུས་རྒྱལ་མཚན་ཡང་བྱུང་། ཁོང་དཔོན་སློབ་ནས་བསྡུས་པ་དེས་ཆོག །བསྒྲིགས་སོགས་ཟེར། ཞོགས་ཀ་རྣམ་འགྲེལ་གྱི་གཞུང་དང་། སྔ་དྲོ་རྟགས་རིགས། ཕྱི་དྲོ་བློ་རིགས་ཀྱི་སྤྱི་དོན་འདྲ་བཏང་དུས། དཀའ་བཅུ་བ་ན་རེ། སློབ་དཔོན་པའི་ངག་རྒྱུན་བཟུང་ཞན་འདྲ། ངེད་ཀྱིས་གསེར་མདོག་ཅན་དུ་ཕྱིན། སློབ་དཔོན་དཔལ་མཆོག་པའི་དྲུང་ལ་ཚད་མའི་ཐུགས་རྩོམ་ཞུས་ཡོང་གི་ཟེར་སོང་། 
3-368
ཟླ་བ་གསུམ་ན་འཁོར། དེས་སྒྱིད་ལུག་པ་སྐད་བྱས་ནས་འཛིན་སྙིང་ཆེར་མ་འདོད། དེ་ལོ་བྱ་ཡུལ་དུ་ཤོག་ཟེར་བས། བསྙེན་རྫོགས་སྒྲུབ་རིངས། རྔོག་ལོ་ཆེན་པོས་ཀྱང་དགུང་ལོ་བཅུ་བདུན་པ་ལ་བསྒྲུབས་པར་འདུག །དེ་ལ་བྱ་ཡུལ་ནས། རྗེ་ཀརྨ་པ་ལ་མཁན་པོ་གྱིས་ཕེབས། རྗེ་དྲུང་དཔོན་སློབ་ཀྱིས་ལྷོ་བྲག་ཁྲར་གྲྭ་ཁྲལ་ཞིག་བསྡུས། འབྲུག་པའི་དགོན་སྙིང་གི་སྟེང་དུ་ཕབ་པས་དེ་བསྡུ་མེད་དུ་སོང་བ་འདྲ་ཞིག་གིས། ར་ལུང་ནས་དཔོན་སློབ་ཐུགས་འཁང་ར་སྐྱེས། དེར་སྒྲུབ་པ་ལ་དགོངས་པར་ཤིན་ཏུ་མི་བདེ། བདག་ཆེན་དག་པ་ལ་འོས་རང་གསུང་། དེ་བྱ་པ་ལ་བཏུབ་རྒྱ་མི་འདུག་འོས་འཐད་ཚོགས་ཆེན་པར་འདུག་སྟེ། དེ་དུས་མཁན་ཆེན་འཁྲུལ་ཞིག་ཆེན་པོ་ཞིག་བཞུགས་སྣང་ནས་སྤྱིའི་བློར་མ་ཤོང་བས། གཉིས་གར་མ་ལྷུང་བ་ལ་བློ་རྩེ་གཏད། ཚོགས་ཆོས་ལུང་པའི་མཁན་པོ་ཀུན་སྤངས། ཆོས་སྡེ་དཔལ་འཁོར་བདེ་ཆེན་དང་། རྩེ་ཆེན་གཉིས་ཀྱི་གོ་སར་བཞུགས་པ། པཎ་ཆེན་ཤཱཀ་མཆོག་པའི་དངོས་སློབ། བཀྲ་ཤིས་རྣམ་པར་རྒྱལ་བ་འོས་པར་བསམ། སློབ་དཔོན་ངེད་རྣམས་ཀྱིས། སྐྱེད་ཚལ་ནས་ཀུན་མཁྱེན་འབུམ་རམ་པ་དགོས་ཞུས་པ། མཁན་པོའི་ཐུགས་ལ་མ་འཚལ། གསེར་གླིང་མཁན་པོ་རབ་འབྱམས་པ་དཀོན་མཆོག་རིན་ཆེན། ཕྱིས་ཚོགས་པ་རང་གི་མཁན་པོར་བྱོན་པ་དེ་དང་། གསང་སྟེ་སྟོན་པ་ཁང་གསར་པའི་སློབ་དཔོན་སངས་རྒྱས་ཡེ་ཤེས། 
3-369
ཕྱིས་རྩེ་ཆེན་མཁན་པོ་ཐོབ་པ། གྲིབ་ཚོད་མྱང་རམ་པ། དད་པའི་དགེ་འདུན་རྒྱལ་རྩེ་རྩེ་ཆེན་གྱི་བཞི་སྡེབ་བགྲེས་པོ་ཀྱང་བྱོན། བཅུ་ཚོགས་ཀྱི་དབུས་སུ་ཆིག་རྫོགས་སུ། ཆོས་སྡེ་ཆེན་པོ་དཔལ་འཁོར་བདེ་ཆེན་གྱི་བླ་བྲང་དུ་ལེགས་པར་བསྒྲུབས། འབུལ་འགྱེད་ཀྱང་དགོངས་པར་འབྱོར་པ་བྱས། དེ་ནས་དམ་པའི་ཆོས་འདུལ་བ་སྙིང་པོར་བྱེད་བསམ། མཁན་ཆེན་པར་སོ་ཐར་མདོ་ཞུས། གཞན་བཀའ་ལུང་འཐོར་བུ་ཐོབ། དེ་ནས་སྔོར་དཀར་གདན་གཅིག་རྒྱུན་དུ་བྱས། ཁྲོ་མོ་སྟེ་ཤིང་ཕོ་འབྲུག་གི་ལོའི་སོས་བྱ་ཡུལ་དུ་བཏེག །ཆོས་རྗེ་ཏིང་ཏིང་པས་སྒར་དཔོན་བྱས། དགེ་བཤེས་བསམ་གཏན་པས་སྒར་གྱི་དབུ་མཛད་བྱས་ཏེ། སྒར་པ་བརྒྱ་ཉི་ཤུ་ཙམ་རྗེས་ནན་གྱིས་རྫོང་བ་གནང་བྱུང་། སློབ་གཉེར་ལ་གནོད་བསམ་དགོངས་པ་ཞུས་པར། རྗེ་བླ་མས། ཕྱོགས་བྲལ་གྱི་བསྟན་པ་སྐྱོང་མཁན་ཁྱེད་ལ་ཐུགས་རྩེ་གཏད་པ་ཡིན་གསུང་ནས་མ་གསན་འཁྲིད་དགོས་པ་ཤར། འགྲོ་གདོང་བཀའ་ལ། ད་རེས་བྱ་པའི་སྐྱོད་དབང་དུ་བཏང་ནས། ཀརྨ་པ་མཇལ་བྱུང་ན། འབྲུག་པའི་ཁྱུ་ནས་འདོན་ནོ་གསུང་། ངེད་ཅག་གི་ཆོས་ལུགས་ལ་འདི་བྱས་ན་ད་ལྟ་རང་འཚང་རྒྱ་བ་འདུག་ཟེར་ཀྱང་། བླ་མ་མི་དགྱེས་ན་དེ་འདོར་བ་གཅིག་འདུག་པས། བཀའ་བཀོད་བཞིར་བཞག་བྱེད་ཞུས། ལར་རྗེ་བླ་མ་གཤེགས། རྒྱལ་ཚབ་ཁོང་ཡིན་སྙམ་ནས་དངོས་ཀྱི་བཀའ་ལུང་ལ་རལ་གཅོད་ཅི་ཡང་བྱེད་མ་མྱོང་ངོ་། །
3-370
མཚན་ཉིད་རབ་རྫོགས་བླ་མའི་ཟླ་ཤེལ་གྱིས། །གུས་ལྡན་འདི་ཉིད་དབྱངས་ཅན་ལང་ཚོ་ལ། །སྦྱོར་ཕྱིར་བདུད་རྩི་ཕབ་པའི་རྣམ་གྲངས་དེར། །བལྟོས་ཚེ་གངྒའི་རྡུལ་ཡང་ཉུང་དུ་ལོ། །དེ་དེར་ཐུབ་དབང་ཉི་མའི་དཀྱིལ་འཁོར་ལས། །རབ་འཕོས་བསླབ་པའི་དུར་སྨྲིག་ཚོན་བཟང་པོས། །པད་དཀར་འཁྱུད་ཚེ་དཔལ་ལྡན་ཡོན་གཏན་ཀྱི། །སྦྲང་རྩིའི་དོག་པ་ཐམས་ཅད་དེ་ལ་ཆགས། ། དེ་ནས། འབྲུག་ལོ་སོས་བཏག་འཕྱོང་རྒྱས་སྟག་རྩེར་སླེབ་དུས། བྱ་ཡུལ་ནས་གོང་མ་བསྟན་འཛིན་ནོར་བུས། ཀརྨ་པ་མཇལ་ན་འདིར་ཕེབས་ན་མ་ཕེབས་ན། དེ་མིན་ད་རེས་གཞན་དུ་བྱོལ་ཐབས་ཤིག་མཛོད་གསུང་བྱུང་བས། ཁྱི་བོས་བརྡུང་བྱས་ཟེར་ཞེན་ཆེ་བ་རྣམས་མཆི་མ་འདོན་པ་ལ་ཐུག་སྣང་། བྱ་པ་རང་དེ་སྐད་གཙུན་ན་མཇལ་ཟེར་བ་ཞིག་ཡོད་རེ་བ་འདུག་སྟེ། དེས་སྡུག་ཏུ་སོང་། ཁོང་ཚོ་ཐམས་ཅད། རྗེ་དྲུང་ཀརྨ་པ་ལ་ཞེ་སུན་བྱེད་པའི་ཕྱིར་མིན་འདུག་སྟེ་གོང་མའི་གནང་ལུགས་མ་མཁྱེན་པ་དེས། ད་མཇལ་ཞན་འདྲ། འདི་ནས་ཀོང་ཕྱོགས་སུ་སྒར་འགྲིམ་པ་ཞེ་ཐག་བཅད་། འཕྱོང་རྒྱས་སུ་ཨ་མ་དྲུང་པར་བཀའ་བགྲོས་ཞུས་འདུག་པར། དེ་འདྲ་མི་འཐད། གོང་མ་དགོངས་པ་དམའ་བ་ཡིན། ངེད་ཀྱིས་ཀྱང་ཞུ་འཕྲོད་འབུལ། དཔོན་སློབ་ནས་སྐོར་ཡང་གནང་བ་དྲག །དེ་བར་འདིར་བཞུག་གསུང་བ་ལྟར་ཉན་དུས། བྱ་ཡུལ་ནས། 
3-371
སྡེ་པ་སྐུ་གཞོན་པའི་དྲུང་གིས། དེ་སྐད་གཏན་མི་ལེགས་གསུང་ནས་འབོད་མི་བྱུང་། ཚུར་ཡོངས། སྡེ་པ་ཡབ་ཡུམ་རྣམས་དང་མཇལ་རིམ་པས་རྩེ་མོ་རིར་སླེབ། ཀླུ་སྡིངས་སུ་བསྡད་དུས། གོང་མ་ཐུགས་ཐག་མ་ཆོད་བར་ད་དུང་སྐོར་བྱང་མཛད་ཀྱི་འདུག །ངེད་ཀྱི་ཟླ་བོ་ཚོ་ནི་སྣ་བསྲེགས་དེས་ཉན་པའི་རྩིས་མི་སྣང་། ཁོ་བོ་ལ་ནི་ཁོང་ཚོ་གང་བྱེད་ཡིན། དེ་དུས་གོང་མས། དཔལ་རི་འབྲུག་པ་རང་གིས་ས་དྲས། བླ་མ་བསྐོས་བྱས་པ་ཞིག་ཡིན་རུང་། ཀརྨ་པའི་ཆོས་སྡེ་འཛུགས་པར་ཞལ་ཐལ། དེ་གཞི་པའི་གྲྭ་པ་རྣམས་ཀྱིས་བརྩིས་ཁར་མ་བཏང་བས། གོང་མ་རང་ལ་ཡང་ཐུགས་ཤིན་ཏུ་སུན་པ་ཞིག་བྱུང་སོང་། དེ་ནས་ཁྲོ་བེ་པ་ཅིག་དབྱར་སྟོན། གསལ་རྗེ་གངས་ཀྱི་ར་བ་པདྨ་དཀར་པོའི་སྒྲུབ་སྡེར་བསྡད །དེ་དུས་འབྲུག་པ་ལོ་ཙཱ་བ་ངག་དབང་གྲགས་པ་ལ། སྙན་དངགས་དང་མངོན་བརྗོད་བཞིན་དང་།ཕལ་སྐད་དང་། ལེགས་སྦྱར་གྱི་སྐད་དོད་འདྲ་ལ་དོགས་པ་བཅད། སྙན་དངགས་རྩོམ་རྩོམ་འདྲ་བྱས་ཚད་མ་ནི་སློབ་རུང་བའི་ལུགས། ཆོས་འདྲ་ཡང་བཤད། དེ་ནས་རྡོ་རྗེ་གླིང་ནས་བླ་མ་རིན་པོ་ཆེའི་བཀའ་ཤོག་ཕེབས། སྐུ་མདུན་འབྱོར། སྐུ་ན་མཐོན་པོར་ཕེབས་འདུག་ཅིང་། དག་པའི་གཟིགས་སྣང་ཅི་ཡང་བཀའ་སྩལ་བ་ནི་བདག་ཅག་གིས་མ་མཐོང་བས་ཅུང་ཟད་མི་མོས་པ་ཞིག་བྱུང་། 
3-372
ད་ནི་ཨ་ཁུ་མཚན་ཉིད་པའི་ཁྲོད་དུ་ཕྱིན་པས་ལན་པར་འདུག །དེར་ལྷ་མོའི་རྗེས་གནང་ཞིག་ཞུས་པར། ལན་དགུའི་བར་དུ་གཏོར་མ་བདག་གི་སྤྱི་བོར་བཞག་སྟེ། རྒྱལ་པོའི་བར་ཆད་འདི་ཤིན་ཏུ་ཐུ་བ་ཡིན། དེ་ལས་སྲུངས་ཤིག་གསུང་བ་རྐྱང་མཛད། འཁྲིས་སུ་ཡོད་པའི་ཞུ་རོགས་པ་རྣམས་ལ་ནི་ཅི་ཡང་མ་གནང་། དེར་གཟིམས་ཁང་རྩེ་ནས། ངེད་ཚོའི་ཟླ་བོ་ཅོག་པུ་པ་ཚོ་ཡོད་པས། སུ་ཡིན་པ་འདུག་གསུངས། འདི་ལྟ་བུ་ལགས་ཞེས་ཉེ་གནས་པས་ཞུས་པས། ཆོས་རྗེ་འབྲུག་པ་ཟེར་བ་གཅིག་ཡོད་ཡོང་། ཁོང་མི་ཆེན་པོ་ཡིན། ཁྱེད་ཚོས་གཟབས་པ་དྲག་གསུང་བ་ལས་ངོ་མཁྱེན་པ་སྐད་མི་མཛད། དེ་ནི་ཁོ་བོ་རང་ལ་ཁུ་འཁྲིག་ཅུང་ཟད་བྱུང་བ་དེ་དགོངས་པར་འདུག །དེ་རེས་ཞབས་ཀྱི་པདྨོ་ལ་མ་གཏུགས་ན་བར་ཆད་ཀྱིས་ཚུགས་རྒྱུ། དེར་རང་གིས་མཁན་པོ་བྱས། སྒར་དུ་དགེ་ཚུལ་མང་པོ་བསྒྲུབས། དེ་དུས་རྨི་ལམ་དུ། ལས་ཆོག་གི་དཔེ་ཆ་ལྟ་བའི་མོད་ལ་དཔེ་ཆ་ཡུངས་ཀར་སེར་མོར་སོང་འཕེལ་འདུག་པས་མདུན་ཁྲིག་གང་བ་ཙམ་བྱུང་། ཕྱིས་རབ་བྱུང་བསྙེན་རྫོགས་མང་དུ་བསྒྲུབས་པ་ལ་བལྟ་བར་འདུག །དགེ་སློང་གི་གསོ་སྦྱོང་གི་ལག་ལེན་བཙུགས། དེ་ནས་གྲོང་སྟོད་མཁར་དུ་སླེབ་དུས། རྨི་ལམ་ན། བཀྲ་ཤིས་ཚེ་རིང་མ་ཕྱག་ན་རྨ་བྱའི་སྒྲོའི་ཕོན་ཆེན་པོ་བསྣམས་པ་ཞིག་བྱུང་། 
3-373
ཅི་ལ་བྱོན་བྱས་པས་བླ་མ་བྱ་པས་གཏོར་མ་བཅག་བྱུང་བ་སྙིག་པར་འོངས་པ་ཡིན་ཟེར་བ་རྨིས། དོལ་པའི་གྲྭ་ཡོན་རྣམས་ཀྱིས་ཞབས་ཏོག་ཆེ་བར་བསྒྲུབས། ལྷ་རྩེར་སྒོམ་ཆེན་བདུན་ཅུ་ཙམ་ལ་རོ་སྙོམས་སང་འཛུགས་རྒྱུའི་དོ་ནུབ་སྒྲ་འོད་བསམ་གྱིས་མི་ཁྱབ་པ་བྱུང་། སྣ་ཚོགས་དབྱིག་སྟེ་ཤིང་མོ་སྦྲུལ་གྱི་ལོ་ཟླ་བ་བཅུ་གཉིས་པར། བཀྲ་ཤིས་མཐོང་སྨོན་པའི་གྲྭ་བཙུན་རེ་རེས་ཀྱང་ཁུར་ཆེན་པོ་བླངས། ཟླ་བ་དྲུག་ཙམ་བསྡད། བླ་མ་ཚེན་པ་ཆོས་སྒོར་བསྐོས། རྗེ་དྲུང་ཀརྨ་པ་དོལ་ཆུ་ཚན་ཁར་ཕེབས། དེ་ནས་ཡང་སྤྱང་མོ་མདའ་ཚུན་ཕེབས་ཀྱང་ཇ་ཞུས་མ་བདེ། འབྲུམ་ནག་སླེབ། ཐོག་མར་གཙུག་ལག་ཁང་རྩེ་ལ་མཚམས་བྱས། ཤིན་ཏུ་འགོལ་བ་ཟླ་བ་གཅིག་གི་རིང་ཚད་མའི་སློབ་གཉེར་བྱེད་ལ་མི་བྱེད་འདིས་འཐུས་པར་མི་འདུག་བསམ་གཞུངས་པས། སྤྱི་མ་ཐལ་དུ་མྱུར་བར་ཟིན། པཎ་ཆེན་ཤཱཀ་མཆོག་པའི་ཊཱིཀ་ཆེན་དང་། རྟོག་གེ་སྙིང་པོར་གྲགས་པའི་སྤྱི་དོན་ལས། སྒོས་གལ་ཆེ་ཆེ་བཟུང་བས། ཟླ་བ་གཅིག་པོ་དེ་ལ་ཚད་མའི་ཡོན་ཏན་བགྲོ་གླེང་སྤྱི་མཐུན་གྱི་གོ་བ་མགོ་མཇུག་ཚང་མ་ལ་ཡོད་ཙམ་ཞིག་བྱུང་། དེ་དུས་སྔོན་དུ་ཉི་མ་གཟས་འཛིན་བྱུང་དེ་ལ་བསྙེན་པ་ཁྲི་ཙམ་བྱས། ལྷག་པར་དེ་དགོངས་འཇམ་དཀར་གྱི་གཞུང་ནས་བཤད་པའི་དར་འཕྱར་དུང་འབུད་པ། 
3-374
གོས་དཀར་གྱོན་པ། ཆུ་བརྒལ་བ། མར་མེ་བལྟམས་པ། མེ་ཏོག་བཟང་པོ་འཐུ་བ། ཆེད་དུ་གྲི་ཆུང་ཞིག་འདུག་པ་ནར་གྱིས་འཐེན་པས་མཐིང་འདྲའི་རལ་གྲི་ལྟ་བུ་ཞིག་ཏུ་སོང་བ་ཀུན་བྱུང་། ཟླ་བ་ངོ་དཀར་གྱི་ཟླ་བ་ཟིན་དུས་ལས་སྦྱོར་བརྩམས་པས་སྲན་མ་ལ་མྱུ་གུ་སོར་གང་ལྷག་པ་འཐོན་འདུག །སློབ་སྦྱང་སྨར་པོ་ཡོང་རྒྱུ་ལ་འབྲུམ་ནག་མཆེད་དྲག །མཐའ་སྐོར་དུ་མི་མང་པོ་ཤི་བས་བྲོས་ནས་ཡང་རྩེར་སླེབ། དེ་ན་སྡེ་པ་ཞལ་ངོ་ཚོ། རྗེ་དྲུང་ཀརྨ་པ་ཡར་སྟོད་ཕྱོགས་སུ་ཐེགས་པའི་སྐྱེལ་ཐུང་གྲུབ་ནས་བཞུགས་པ་དང་འགྲིག །ཞག་ཉི་ཤུ་ཙམ་བསྡད། ངེད་རྣམས་ཀྱིས་ཙ་རི་བསྐོར་བ་ལ་ཕྱིན། འཁོར་ལོ་སྡོམ་པའི་རྒྱུད་ལས། ས་སྤྱོད་ཀྱི་གནས་ཧི་མ་ལ་ཡའམ། བོད་ཅེས་བཤད་པ་རང་བྱུང་གི་སྐྱེ་གནས་ཡོད་པ། དཔལ་འཇིགས་བྱེད་ཧེ་རུ་ཀའི་ཕོ་བྲང་ཆེན་པོའི་རྩྭ་མཆོག་གམ་རྩ་གོང་ངམ། ཅིག་ཅར་དུ་ཟླ་གཅིག་གདན་ཕབ། རྡོར་འཛིན་རི་ཇོ་བཟང་ཡོན་བདག་ཐམས་ཅད་ཀྱིས་ཞབས་ཏོག་ཚད་མེད་འདུག །དེ་དུས་ཆོས་རྗེ་ཌཱ་ཀི་རས་ཆེན་ལས་ཐོག་ན་ཡོད་པས་འཕྲལ་ཉམས་དགའ་བ་གཅིག་པུས་ཆོག་པ་བྱུང་། དེ་ནས་གཡུ་མཚོ་ལ་འགྲོ་བར་བརྩམས། ཏིང་ཏིང་ནས་ཕྱག་ཆེན་གྱི་མ་མོ་མཛད། གཞན་ཆོས་ཡེས་ཀྱིས་བགྱིས། དབུ་ཆེ་རགས་ལ་མང་བས་བསྐོར་མི་བདུན་ཅུ་རྩ་དགུ་ཙམ་བྱུང་། 
3-375
ཞིག་མོ་ཁྲག་ཁྲིག་ཏུ་སླེབ་པའི་དགོངས་གཉིད་སྲབ་མོ་ཞིག་ལ། གཞོན་ནུ་མ་གཡུའི་རྡོ་རྗེ་རྒྱ་གྲམ་ག་ཤར་བྱས་པ། མེ་ཏོག་སྣ་ཚོགས་པའི་ཐོད་བཅིངས་པ། དར་གྱི་སྟོད་གཡོགས་དང་སྨད་གཡོགས་བྱས་པ། མཛེས་སྡུག་རི་མོར་བྲིས་པ་ལྟ་བུ་ཞིག་གིས་གླེགས་བམ་ཆེན་པོ་ཞིག་གཏད་ནས། འདི་གསང་སྔགས་བླ་མེད་ཀྱི་རྒྱུད་སྡེ་ཡིན། འདིའི་བདག་པོ་ཁྱོད་ཀྱིས་གྱིས་ཟེར་བ་ཅིག་བྱུང་མཚམས། གཉིད་སད་པ་ན་རོལ་མོའི་སྒྲ་ཆེན་པོ་དང་། ག་བུར་གྱི་དྲི་བཟང་ཆིལ་ཆིལ་འདུག་པ་དེར་ཡོད་ཐམས་ཅད་ཀྱིས་ཚོར་འདུག་ཅིང་། ནམ་ལངས་འཕྲལ། ཌཱ་ཀི་རས་ཆེན་པས་བརྟག་གཉིས་ཀྱི་གཞུང་བསྣམས། འདིའི་ལུང་དགོས་ཟེར། རྟེན་འབྲེལ་ལེགས་སྙམ་ནས་བཤད། ཕྱིས་བླ་མེད་ཀྱི་རྒྱུད་སྡེ་ཀུན་དཔྱིས་ཕྱིན་པར་གོ་བ་དེ་ལ་བལྟ་བར་འདུག །དམར་ནག་གི་མཚོ་མཇལ་དུས་ཐམས་ཅད་ཀྱིས་མཐོང་བར་ནམ་མཁའ་ཤིན་ཏུ་དངས་པའི་མཚོའི་སྟེང་ཙམ་ནས་འཇའ་དཀར་པོས་རི་མོར་བཅད་པའི་ཆོས་འབྱུང་མཚོའི་གཏིང་ནའང་སྣང་བ། ཁ་ཡར་ལ་ཡུད་ཙམ་དཔལ་ལྷ་མོའི་སྣང་བའང་ཝལ་ཙམ་བྱུང་། དབུ་མའི་རི་རྩེར། ངེད་སྔོན་རང་ལ་སླེབ་དུས་རྣམ་པར་མི་རྟོག་པ་རང་བབས་སུ་ཤར། ཕོ་བྲང་ཆེན་མོར་འཇའ་འོད་སྣ་ལྔའི་གུར་ཟླུམ་པོ་ཕུབ་པའི་ནང་དུ་གཡུ་མཚོ་གཡུའི་མེ་ལོང་ཕྱིས་པ་ལྟ་བུ། བདུད་མགོན་བླ་མཚོ་ཐོད་པའི་མཁར་གྲུ་གསུམ། 
3-376
དེ་ནང་དུ་ཧཱུཾ་ནག་པ་གཅིག་མཐོང་། ཅིག་ཅར་དུ་སླེབ་དུས་ཐོ་རངས། ཙ་རི་ཏྲ་དང་བུ་ཆུ་རུ། སྒྲུབ་པའི་སྐྱེས་བུ་མང་བཙུགས་ན། །འདི་ཕྱིའི་རྟེན་འབྲེལ་ཐམས་ཅད་འགྲིག །ཟེར་བའི་ལུང་བསྟན་བྱུང་ནས། དེ་ནས་ཕྱི་ལོ་སྒྲུབ་སྡེའང་ཚུགས། དབུ་མཛད་ཆོས་རྒྱལ་མཚན་གྱིས་གཙོས་པའི་སྒྲུབ་པ་བ་བཅུ་བཞི་བརྫང་། དེ་ནས་རི་བ་ལ་ལ་བྱས། མེ་ཏོག་སྟེངས་ཁར་ལས་མཚན་བཅུ་གསུམ་གྱིས་བསུ་བ་གཟབས་པའི་ལུགས་དང་། ཡུལ་སྟོད་སྨད་བསྐོར་ནས། སླར་བྱར་དུ་ཆོས་རྗེ་ནང་སོ་བས་ཞབས་ཏོག་མཛད། སྟོན་ནས་དགུན་གྱི་བར་བསྡད། དཔེ་ཆ་གང་བལྟས་ཀྱང་སྔར་དང་ཡེ་མི་འདྲ་བའི་གོ་བབས་ཆེན་པོ་ཞིག་བྱུང་བས། ཙ་རི་འཁོར་བ་དེས་མངལ་སྒྲིབ་དག་པར་འདུག་གོ་ཞེས་ཀུན་གླེང་། དེ་ནས་ཟིལ་གནོན་ཏེ་མེ་ཕོ་རྟའི་ལོར། སྐྱིད་ཕུག་ཟབ་ཡངས་ཐེག་ཆེན་རྩེ་དང་། སྟག་རྩེ་སྒྲུབ་སྡེ་གཉིས་སུ་ཟླ་རེ་བསྡད་དེ། ཞལ་ངོ་རྣམས་བྱར་སྟོད་ཚལ་པོར་བཞུགས་པས་དེར་ཤོག་གསུང་ཕྱིན། དེ་དུས་འདུལ་པ་ལ་ཤེས་འདོད་ཅི་ཆེ་ཆེ་ཡོད་ནས་དཔེ་བལྟས། ཤེས་པའི་ལུགས་བྱེད་པ་སུ་ཕྲད་ལ་དོགས་པ་དཔྱད་ཀྱང་བློ་ཁ་རྫོགས་པ་མ་བྱུང་། དེར་ཉིན་སྡེ་པ་ཡབ་ཡུམ་ལ་སྒྲུབ་ཐབས་རྒྱ་མཚོ་ཕུལ། མཚན་ཐལ་ལུང་སྡེ་བཞི་འཚར་ཕྱིན་པ་གཅིག་བལྟས་པས། འདུལ་བ་གླེང་གཞིས་བཤད་ཟེར་བ་ལྟར་། 
3-377
དཀའ་ས་གླེང་གཞི་ལ་བརྟགས་པས་འདུལ་བ་མཁས་སྙམ་པ་བྱུང་། འོན་ཀྱང་། མདོ་རྩ་ལ་དེ་ཙམ་དགའ་བསམ་པ་མ་བྱུང་། དེ་ནི་བོད་ཀྱི་ཊཱི་ཀ་བལྟས་པའི་སྐྱོན་དུ་ཕྱིས་རྒྱ་ཆེ་འགྲེལ་སོགས་མཐོང་བས་གོ །དབྱར་གང་བསྡད། དེ་དུས་ངེད་ཀྱི་རྨི་ལམ་དུ། བླ་མ་རིན་པོ་ཆེ་ཕེབས་ནས་ངེད་ཟླ་བ་ཕྱི་མའི་ཚེས་བརྒྱད་ལ་ལྕང་ལོ་ཅན་ལ་འགྲོ་བ་ཡིན། ཁྱེད་ཕྲད་འདོད་ནས་ཡོངས་པ་ཡིན་གསུང་བ་ཅིག་བྱུང་། དེ་དུས་གཉལ་ལོར་ཐམས་ཅད་འབྲུམ་བུ་མ་མོ་བསངས་ཏེ། རེ་ཙམ་འདུག་ཟེར་སྐབས་ཡིན་པས། རྨི་ལམ་ཀྱི་རྐྱེན་དེས་བླ་མ་དྲན་པའི་གདུང་ཤུགས་དྲག་པོས་རྒྱུད་བསྐུལ་ནས་འགྲོ་སྙིང་འདོད། འགྲོ་བར་བརྩམས་ཚེ། སྡེ་པའི་བཀའ་ལུང་ལ། ཁ་སིང་དེ་ནས་འབྲུམ་བུ་ལ་འཛེམ། ད་ཁྲོམ་ཐོག་ཆོད་ཀར་རྟ་ཁ་འཐེན་ཟེར་བ་ཡིན་པས། མ་བྱོན་པ་རང་དྲག་གསུང་སྒོར་བྱུང་རུང་། བློ་བླ་མ་ལ་བཀལ་བས་སྐྱོན་ཡོང་བསམ་པ་མེད་ཞུས། མ་ཉན་པར་ཚལ་པོ་ནས། ཡང་རྩེའི་བསྐྲུན་ཤིང་གསེབ་ཏུ་བྱས། སྔགས་ར་བསྐྱོད། སང་རྡོ་རྗེ་གླིང་དུ་ཚ་ཁ་ལ་འབྱོར། འབྲུམ་བུ་དྲག་འཕྲལ་གྱི་གདོང་དམར་ཚལ་ལི་བ་མང་པོ་དང་ཕྲང་རུང་སྐྱོན་མ་བྱུང་། དེར་ཕྱག་འབུལ་ལ་ཕྱིན། བརྟན་བཞུགས་ཕུལ་བས་ཟླ་བ་གཉིས་བཤོལ་ཐེགས། ཤིན་ཏུ་མཉེས་མཉེས་མཛད། དཔེ་སྒྲོམ་ནས་ཕྱག་དཔེ་ཐམས་ཅད་ཁྱེར་ཤོག་གསུངས་སོ། །
3-378
ཆོས་ཐམས་ཅད་ཀྱི་བདག་པོ་ཡིན་པས། ཁོ་བོས་ཐོས་པའི་ཆོས་ཐམས་ཅད་ཁྱོད་ལ་འཕྲོད་དོ་གསུང་། ལྷ་མོའི་དབང་བཞི་སྩལ། དཔལ་ལྡན་ལྷ་མོ་འདི་ན་འདུག་གཟིགས་སམ་གསུང་དུས། ཟིལ་ཤིན་ཏུ་ཆེ་ནས་ཅི་ཡང་ཞུ་མ་སྤོབས། ལྷ་མོ་ལ་ཁྱོད་རང་དང་པོ་ནས་ཁོང་གི་སྲུང་མ་ཡིན། ད་ནི་ང་ལ་མི་དགོས་སོ། །ཁོང་གི་ཕྱི་ལ་རྒྱུག་ལ་ལུས་དང་གྲིབ་མ་བཞིན་དུ་འགྲོགས། ཅི་བཅོལ་བའི་ལས་ཐམས་ཅད་གྱིས་གསུངས། ཞག་ཁ་ཡར་བསྡད། འགྲོ་ཁར་ཞབས་ལ་གཏུགས། སྨོམ་ལམ་བཏབ་པས་མཐར། ལྷ་མོའི་ཐང་ཁ་ཁྱེར་ཤོག་གསུངས། གདན་ས་པས་གཞན་ཞིག་ཁྱེར་བྱུང་བས། དེ་མིན་གོས་ཐང་ཆུང་ངུ་དེ་ཁྱེར་ཤོག་གསུང་ནས། དེ་བླངས་བྱུང་བ་དང་བདག་ལ་གནང་། རེ་ཞིག་ལུས་དང་འབྲལ་མེད་གྱིས་གསུང་ངོ་། །ཐང་ག་འདི་ཡང་། རྗེ་རང་ལ་དཔལ་ལྷ་མོ་དངོས་སུ་བྱོན་ནས། སང་རི་མོ་ཤེས་པ་ཞིག་ཡོང་། དེ་ལ་ངའི་གཟུགས་བྲིར་ཆུག །དེས་འཕྲིན་ལས་ཀྱི་རྟེན་འབྲེལ་འགྲིག་པར་འོང་ངོ་། །ཞེས་ལུང་བསྟན་པ་བཞིན། སང་ཉིན་ཤངས་བདེ་ཆེན་པའི་དབོན་པོ། བཀྲ་ཤིས་མཐོང་སྨོན་ནས་མཇལ་བར་རྐང་གཏད་བྱོན་པ་གུང་བོར་བའི་ཕྱིར་ཕུ་ཏོག་ཡུལ་གྱི་སྦྱར་སྡོང་ཆེན་པོ་ཞིག་གི་གྲིབ་བསིལ་ལ་ཉལ་བསྡད་སྐབས། རྨི་ལམ་ན། སྦྱར་སྡོང་དེ་དང་མཉམ་པའི་དཔལ་ལྡན་ལྷ་མོ་དུད་པའི་གསོལ་བ་མ་ཤིན་ཏུ་ཁྲོ་བ་བོང་བུ་ལ་ཞོན་པ་ཅིག་གཟིགས་ནས། 
3-379
འདི་ལྟ་བུ་ཞིག་བྲིས་ཟེར་ཏེ་ཡལ། གཉིད་སད་པ་ན་ཅི་ཡིན་སྙམ་པ་བྱུང་། དེ་ནས་སྐུ་མདུན་དུ་འབྱོར་འཕྲལ། ཁྱོད་ཀྱིས་ལྷ་བྲི་མཁྱེན་ཡོད་འདུག་པས། ངེད་ཀྱི་ཐང་ག་ཅིག་འབྲི་རོགས། གྱིས་གསུང་། སྔར་ཞལ་འདྲིས་ནི་མེད། སྔོན་ལ་རྒྱུས་ཡོད་སུ་ཡང་མ་སོང་། མངོན་པར་མཁྱེན་པ་འདུག་སྙམ། ངེད་ཀྱིས་རི་མོ་མཁས་པོ་མི་ཤེས་ཞུས་པས། གང་མཁྱེན་དྲིས་པས་ཡོང་གསུང་། བཀའ་བཀོད་བཞིན་ཁོང་གིས་བྲིས། རབ་གནས་མཛད་དུས་གཏོར་མ་ནམ་མཁའ་ལ་འཕགས་ཏེ་ཞག་ཉི་ཤུ་རྩ་གཅིག་བསྡད་པ་བྱུང་། ཁོ་བོས་རྐྱང་།སྐུའི་རྣམ་འགྱུར་ལས་དགེ་མི་དགེ་གསལ། ཁམས་དངས་དུས་ཀྱི་རྨི་ལམ་ལ། དེ་གར་བཞུགས་པ་ལྷ་མོ་ཉིད་དམ། བུད་མེད་བཟང་མོའི་སྣང་བ་ངེས་པར་ཡོང་འདུག །ཕྱིས་པད་དཀར་གྲྭ་ཚང་འདི་ཚུགས་ཕྲལ་རྒྱ་འདྲེའི་བར་ཆད་ཀྱི་ནད་ཀྱིས་གྲྭ་པ་ཤི་ཆད་ཆེས་ནས་སྲུང་འཁོར་དུ་བཞག་པ་ནས་རྒྱུན་ཆད་དོ། །རྗེ་འདི་ལ་སྔར་ལོག་ལྟ་ཅུང་ཟད་བྱུང་བ་དེས་དག །དེ་མིན་རྗེ་བླ་མ་དང་། གྲུབ་ཐོབ་ཞལ་གཉིས། རྗེ་བཀྲ་ཤིས་རྣམ་རྒྱལ་བཞི་ལ་ཅུང་ཟད་ཀྱང་མ་མོས་པ་འོང་མ་མྱོང་། མིས་ངག་ཀྱལ་ལ་སྐུར་པ་ཞུ་འདུག་ཀྱང་ཞོར་འདེགས་མ་བྱས། དེ་དུས་ཕར་དབུ་སོགས་ལ་དཔེ་བལྟས་པ་རང་གིས་སྤྱི་མཐུན་རམ་ཙམ་ཤེས། རང་བློ་ཁ་གང་བ་ནི་མེད། 
3-380
དེ་ནས་མེ་རག་མདོ་ནས་ཆོས་རྗེ་བསམ་གཏན་པའི་དབོན་པོ་ཆོས་ཀྱི་གཏེར་མཛོད། དཔོན་སློབ་རྣམས་ཀྱིས་ཀོང་ཕྱོགས་སུ་སླེབ་དགོས་པའི་ནན་ཞུས་བྱུང་། དེ་ཡང་། སྔར་བརྗེ་ལེན་འདི་པ་ཚང་གི་རིང་ལ། རྗེ་གོང་མས་ཀྱང་ཀོང་ཕྱོགས་སུ་ཞབས་ཀྱི་པདྨོ་བཀོད་པར་གནང་། དེ་ཡང་ཆོས་རྗེ་བསམ་གཏན་པ་དེ་རྒྱལ་དབང་རྗེ་ལ་མོས་གུས་མཐར་ཕྱིན་པའི་རྟེན་འབྲེལ་ཡིན་ཞེས་གླེང་སྣང་བས་འགྲོ་བའི་དཔྱད་གཞི་བྱས། མིའི་དབང་པོ་མཚོ་སྐྱེས་རྡོ་རྗེས་སྒར་གྱི་བཅའ་བསྒྲིགས། ངེད་རྣམས་ཀོང་པོར་འགྲོ་གདོང་དགེ་བཤེས་བསམ་གཏན་པ་ཆོས་རྫོང་མཁན་པོའི་འོས་སུ་བྱུང་ནས་ཡར་བརྫངས། སྒར་དཔོན་ཆོས་རྗེ་ནང་སོ་རང་གིས་བྱས། གཞན་བླ་མ་བྱ་པ། མྱང་རམ་པ། ལོ་ཙ་བ་སོགས་ཡོན་ཏན་ཅན་འགའ་རེར་བཅས་ནས་བཏེག །ལ་བར་དུ། ལྕམ་དྲུང་པ་ཕེབས། སྐུ་རབ་ནས་དཔོན་གཡོག་གིས། གཞི་ལེན་གཟབས་མ་ཞག་བཅུའི་རིང་མཛད། དྲུང་ནས་རྒྱ་མཚོ་བསུ་བར་བྱོན། ཀོང་པོ་ང་ལ་བརྒྱུད། ཆོས་རྗེ་ཌཱ་ཀི་རས་ཆེན་པ་སོགས། ཙ་རི་པ་རྣམས་ཀྱིས་མདུན་བསུས། དེ་དུས་མི་མ་ཡིན་གྱི་ཚུབ་ཤིན་ཏུ་ཆེ་སྟེ། སྔགས་འཆང་མང་བས་བར་ཆད་ཆེར་མ་བྱུང་། རྟ་སྡིང་དུ་ཆོས་རྗེ་ཡེ་ཤེས་རྒྱལ་མཚན་པས་ཤོག་གསུང་རྟ་སྡིང་དུ་བསྡད། བནྡེ་རྣམས་ཀྱིས་འབུལ་བ་གཏོས་ཆེ། དགུན་སྤྲིན་ཐོག་ཏུ་ཆོས་ར་བཙུགས། 
3-381
ཡར་འབྲོག་པ་ཆོས་ཞུ་བ་ཞིག་གསང་སྤྱོད་ལ་བརྫངས་པས། ཕྱིས་རྫ་སྒོར། སྒྲུབ་གྲྭ་ལེགས་པར་སྤེལ་ནུས་པ་ཞིག་བྱུང་། ལྡིང་ཚོའི་ནས་ཚང་མ། ཙ་རིར་སྒྲུབ་སྡེ་བཙུགས་པའི་རྐྱེན་ལ་སྦྱར། ལྷོ་རྒྱུད་དུ་སླེབ་ནས། དེའི་བར་དུ་གཡག་བྱུང་ཚད་ཙ་རི་ལ་ཕུལ། མེ་མོ་ལུག་ལོ་ཤར་ནས་བཏེག །རིམ་པས་ཟིང་པོར་སླེབ། འབུམ་པ་སྒང་དུ་སྤྲུལ་སྐུ་རིན་པོ་ཆེེ་ཞྭ་དམར་བ་དཀོན་མཆོག་ཡན་ལག་ཚུར་ཕེབས་པ་ལ། ཆོས་རྗེ་ནང་སོ་བྱོན་ཇ་ཞུས་བཏང་། ངེད་རྣམས་སུམ་མཁར་དུ་སླེབ་དུས། དཔོན་པོ་ཚེ་བརྟན་དཔོན་འོག་མར་འདུག་པ་ཚུར་གནང་། ཇ་ལན་ཀྱང་གཟབས་མ་མཛད་འདུག །དེ་དུས་ལྗངས་ཐམ་སྟེང་ནས། རྒྱལ་པོ་པདྨ་དཀར་པོ་དང་། རྒྱལ་ཚབ་སྟག་ཤུ་དཔོན་བློན་གྱིས་ཇ་ཞུས། བླ་མ་རྫོང་དར་དགོས་པའི་ཞུ་བ་བྱུང་། རིམ་པས་ཕྲག་ཏུ་སླེབ། ན་ཐང་སྤང་དུ། ཁྲོམ་ཆེན་པོ་ལ་སྒྲུབ་ཐབས་རྒྱ་མཚོ་བྱས། ཕྲག་ཡུལ་དུ་ཟང་ཟིང་གི་འབུལ་བ་གཏོས་ཆེ། སྒར་པ་ལྔ་རྒྱ་ཙམ་མོད་དེ། ཉིན་གྱི་རིགས་མང་ཇ་འདེབས་བཅོ་ལྔ་མ་ཙམ་བྱུང་། དབྱར་དེ་གྲུབ་ཐོབ་ཐང་སྟོང་རྒྱལ་པོའི་གནས། རྩ་གོང་གི་ཡང་དགོན་དུ་དབྱར་གནས་བཙུགས། དེ་དུས་འབྲོང་སྨྱོན་གསང་སྤྱོད་ལ་བརྫངས། སྟོད་དུ་འབྲོང་རས་ཟེར་སྙིང་རུས་ཆེ་བར་གྲགས། དེ་སྒར་པ་གསང་སྤྱོད་ལ་འགྲོ་མཁན་སྔ་མ་ཡིན་པས་ཕལ་ཆེར་ལེགས་པར་བྱུང་། 
3-382
གྲོལ་ནས་སྒར་བཏེག །གྲ་མ་སྟེང་དཀར་རྒྱུད་ཆོས་སྡིངས་སུ་བླ་མ་ཀུན་དགའ་དཔལ་ལྡན་པའི་གྲྭ་པ་རྣམས་ཀྱིས་ཤོག་ཟེར་ཕྱིན། རིམ་པས་བུ་ཆུ་ཇོ་བོ་མཇལ་འོ་ཐང་ཚུན་ཕྱིན། འབྲུག་ཆོས་སྡིངས་སུ་གདན་ཆགས། ཆོས་རྗེ་རང་དང་། སློབ་དཔོན་ནམ་མཁའི་མཚན་ཅན་ལ་སོགས་པའི་བཞེད་པ་བཞིན་ཧས་སྐྱ་སྤང་དུ་སྒྲུབས་ཐབས་རྒྱ་མཚོ་བྱས། ཀོང་པོ་རལ་གསུམ་གྱི་མི་འཚོགས། གཞི་པ་རྣམས་ཀྱིས་རྟ་བཅུ་གཉིས་ཀྱིས་ཐོག་དྲངས་པའི་སྤྱི་སྒོས་ཀྱི་འབུལ་བ། མི་ནག་པའི་ཁྲོད་ནས་ཀྱང་ཞབས་ཏོག་ཚོད་མེད་འདུག ། དེ་ནས་མེ་རག་མདོར་རྟེན་འབྲེལ་གྱི་དགུན་བཞུགས་བྱས། ར་ལུང་ནས་རྗེ་བླ་མའི་གྲྭ་པ་རབ་འབྱམས་པ་ཐོག་བསྡུགས་པ་དཔོན་སློབ་ཀྱང་འབྱོར། ཟླ་བ་གཅིག་ཙམ་དུ་གཞི་བྱས་ཀྱི་དགེ་འདུན་རྣམས་ལ་གསུང་ཆོས་བཤད། དེ་དུས་འབྲུག་པ་ལོ་ཙ་བར། སློབ་ཕན་གྱི་སྟེང་ནས་སྒྲ་ཀ་ལཱ་པའི་ས་རིས་གཏོང་བའི་འགོ་ཚུགས། ཕུར་བུ་སྟེ་ས་ཕོ་སྤྲེའུའི་ལོ་གསར་གྱི་དུས་བཟང་གང་པོ་ལ་མཚམས་བྱས། བདེ་མཆོག་གི་སྙིང་པོ་ཡི་གེ་བདུན་པའི་བསྙེན་པ་བཏང་། ཞག་བཅུ་བཞི་ཚུན་རྟགས་ཅི་ཡང་མ་བྱུང་། དེའི་ཐོ་རངས་ཀྱི་རྨི་ལམ་ལ་བདེ་མཆོག་འཁོར་ལོ་བྱོན་འདུག་ལྟོས་དང་ཟེར། ཟིལ་ནི་སྡོད་ཆགས་ཚད་འདུག །བལྟས་པས་གཞན་ནི་མ་མཐོང་། གནམ་ཐམས་ཅད་ཞུ་ནས་ནུ་མ་ལྟ་བུར་ཐིགས་པ། 
3-383
རང་གི་སྤྱི་བོ་ནས་སོང་བས་ལུས་རིམ་རིམ་ཨིནྡྲ་ནཱི་ལ་བཅག་པའི་འཕྲོ་ལྟར་སྔོ་བར་གྱུར་མཚམས། མཆན་གཡོན་པ་ནས་དངངས་ཐབས་སུ་ཐལ་རླུང་གི་འཚུབས་མ་ནམ་མཁའ་ལ་སྙེག་བཞིག་འཐོན་པའི་དཀྱིལ་ན། པཎྜི་ཏའི་གཟུགས་ཐལ་སྐྱ་ཧཾ་པ་ཞིག་འདུག་བར་ཆོད་ལས་རྒྱལ་ལོ་ཞེས་པའི་སྒྲ་བྱུང་། གཉིད་སད། དེ་ཡན་ཕྱི་དྲོར་སོང་བ་དང་། ལུས་རྔུལ་སྐྱོ་ཆོད་ཆོད་བྱེད་པ་དང་རྒྱུན་དུ་འཕོ་བའི་ལྷན་ལ་རེག་མི་བཟོད་པ་ཞིག་ཡོད་པ་དེ་ནས་མ་བྱུང་། སྒར་བཏེག །གྲོང་སུམ་པའི་ཚལ་དུ་སླེབ་དགོངས། སྲོད་ཀྱི་ཐུན་རྗེས་གཉིད་ཐུམ་སོང་བར་ཕོ་ཉ་འདྲ་པ་གཉིས་འདུག་པའི་གཅིག་གིས་ངེད་ཁུར་བའི་གྲབས་བྱེད་འདུག་པས་མི་ཐེག་པར་འདུག་ནས། དེ་ན་རེ། འདི་ལ་སྐྱོབ་མཁན་ཞིག་འདུག་ཟེར། ཅིག་ཤོས་དེ་ནས། ད་རིས་ལྟ་བསྐྱབས་པས་ཐུབ་ཏུ་ཆུག །ཟླ་བ་གཅིག་ན་སྒར་པ་འདི་གཏོར་གཏོང་། དེ་ནས་ལོ་ཉི་ཤུ་རྩ་བཞི་ལ་སྒུག་སྡོད་ཟེར་ལོག་སོང་བ་རྨི། ཟླ་བ་གཅིག་ལ་སྒར་དུ་མི་བསད་ཅིག་བྱུང་། དེ་ཀ་ཙམ་ལས་གླགས་མ་རྙེད། དེ་དུས་ཞལ་སྔ་འཕགས་པའི་ལྷའི་སྐུ་སྐྱེས་ཇ་ཞུས་དང་། དང་པོ་རྒྱལ་དབང་རྗེའི་གྲྭ་པ། ད་ལྟ་གཅོད་པ་སངས་རྒྱས་དཔལ་བའི་དབོན་རྒྱུད་དུ་འཁྲུངས་པས་འཇལ། གསུང་ཆོས་ཞུ་གསུང་བ་བྱུང་སྟེ་ཐག་རིང་བས་མཇལ་མ་ཐུབ་དེ་ནས་རྟ་བ་བརྒྱུད། 
3-384
ཀོང་པོ་གསང་དུ་སླེབ། གསང་པ་རྣམས་ལ་གཙང་ཆུའི་གནོད་པ་ཆེ་བར་འདུག་པ། བཞུགས་ཁྲི་གཅིག་རྒྱབ། ཕྱག་ནས་བྱས་པས་ཐུབ། ཁྲི་དེ་ཕྱིས་ཀར་འབྲུག་འཁྲུག་པ་བྱུང་ནས་ཀརྨ་པའི་གྲྭ་རིགས་འགས་བཤིག ། དེ་ནས་ཆུའི་གནོད་པ་སླར་བྱུང་། དེ་རེས་ཟླ་སྟེངས་སུ་ཕྱིན། ཁོང་ཚོའི་ཆུ་དེ་ཡུར་ཐག་རིང་པས་ཕྱག་ནས་དགོས་ཞུ། དེ་ཀ་ནས་འཐོར་བས་ཡུར་བ་ཐམས་ཅད་དུ་ནས་སླེབ་འདུག་ཟེར་ཁོང་རང་དཔོན་སློབ་ཡིད་ཚིམ་མཆིས། དེ་ནས་རྡོ་ཞོང་དུ་འདེགས་ཀའི་ནུབ། རྒྱལ་པོ་ཆེན་པོའི་ཕོ་བྲང་ཡིན་ཟེར་བའི་ནང་ཀ་བ་བཞིས་བཏེག་པ། ཀུན་ནས་གྲུ་བཞི་པ། སྒོ་རྟ་བབས་སོགས་དང་། རྒྱ་ཕུབས་འཕར་མ་བློས་བསླང་ཇི་ལྟ་བའི་ནང་གི་གཞི་མཐིང་མདོག་ལ། གསེར་གྱིས་མིག་མངས་རིས་བྲིས་པའི་ལོགས་ཐམས་ཅད་སྡོ་པོད་ཀྱིས་ལྟེམ་ལྟེམ་ཁྱབ་པ། རྒྱལ་བའི་བཀའ་ཐམས་ཅད་ཡོད་དོ་སྙམ་པའི་དབུས་ན། འཇམ་དཔལ་རྩ་བའི་རྟོག་པ་ལས་གསུངས་པའི་བྲིས་སྐུ་མཐོང་བ་དོན་ལྡན་རི་མོར་བྲིས་པ་ལ། དེ་ལས་གོང་དུ་ཕྱིན་པ་མེད་པ་ཞིག་བཀྲམ། དེའི་མདུན་ན་ཞི་དུལ་ཅན་གྱི་དགེ་སློང་བགྲེས་པོ་ཆོས་གོས་རྣམ་པ་གསུམ་གསོལ་བ་ཅིག་བཞུགས། བརྒྱད་སྟོང་པ་གསེར་མ་ཞིག་ཁ་ཕྱེ་ནས། བཀུར་སྟི་བྱ། རི་མོར་བྱ་ཟེར་བའི་མོད་ལ་འདི་ཐམས་ཅད་ཀྱི་བདག་པོ་ཁྱོད་ཀྱིས་གྱིས་ཟེར་བ་ཞིག་རྨིས། 
3-385
ལྟས་འདི་དཀོན་མཆོག་རིན་པོ་ཆེ་གསུམ་ལ་སྐྱེ་བ་འདི་ཁར་སྲི་ཞུ་ལེགས་པར་འགྲུབ་པའི་བརྡར་མངོན། དེ་རེས་གྲི་གུག་བཀར་ནས་བཏང་རྩ་ཚུན་ཕྱིན། དེར་འབྲི་ཁུང་ནས་རིན་པོ་ཆེ་ཟུར་པའི་གྲྭ་པ་གཡའ་བཟང་ཆོས་མཛད་རིན་ཉི་སོགས་གཏོས་ཆེ་བ་བྱུང་། རེེ་ཞིག་སྒར་དུ་བསྡད་ཆོས་ཞུས། དེ་ཙ་ན་འབྲི་འབྲུག་ཉེ་བར་སྣང་། ཕྱིར་རྟ་བ་ཚལ་གུང་དུ་ལོག །དེར་ཁྲོམ་ཚོགས་པ་ལ་ཆེ་ཟེར་བ་ལ་སྒྲུབ་ཐབས་རྒྱ་མཚོ་བྱས། དེ་དུས་མི་མ་ཡིན་གྱིས་དངོས་སུ། ངེད་སྡོད་པའི་སྤང་ཁྱིམ་གྱི་སྨྱུག་རགས་ཀྱི་ཕྱིར་གསོ་སྒྲ་ཁྲོམ་བྱིན་གྱེས་ཙམ་ལ་བྱུང་ནས་འཁྲུག་པ་བྱུང་བསམ་པ་ལྟར་བཏང་ཙ་ན་སུ་ཡང་མི་སྣང་ཟེར། ཕྱི་དྲོ་ཆར་པས་སྐྱོན་ནས་ངེད་རང་རྣམས་ཡོང་ཐོག་རང་ལ་སྤང་དེ་སྡིབ་སོང་སྟེ་སྐྱོན་ཅི་ཡང་མ་བྱུང་ངོ་། །དེ་ནས་དབྱར་གནས་བཙུགས། གྲོལ་ནས་རོང་ལུང་ཐང་དུ་ཕྱིན་པའི་སྐབས་དེ་མོ་ལ་ཚུར་ནང་དུ་ཞག་གཅིག་ཕོག་པའི་དགོངས། ཀོང་ལྷ་དེ་མོ་བུད་མེད་བཟང་མོ་ཡར་རྒན་སོང་བ་འཁོར་བསམ་གྱིས་མི་ཁྱབ་པས་བསྐོར་ནས་མཇལ་བར་བྱུང་། ཚོགས་ཀྱི་འཁོར་ལོ་བསྐོར་ནས་ལོག་སོང་བ་ཅིག་རྨིས། ཞག་བཅུ་བཞི་ཙམ་འགོར། རྟ་སྤུས་གཙང་བཅུ་བཞི་ཙམ་དང་མར་ལ་སོགས་པ་བསམ་གྱིས་མི་ཁྱབ་པ་བྱུང་། གཡག་མང་པོ་བྱུང་བ་མེ་རག་མདོར་སྦྱར་ཞིང་རི་པ་བཙུགས་པའི་རྒྱགས་གཏད་ཀྱི་གཞི། 
3-386
ཚོང་དཔོན་འབྲུག་རྒྱལ་གྱིས་ཇ་མང་པོ་ཕུལ་བ་ལ་བྱས་སོ། ། དེ་ནས་ཁམས་ལ་འགྲོ་བ་དང་དབུས་གཙང་ལ་ལོག་པ་བརྟག་པ་བྱས་པས་དབུས་གཙང་བབས། ལམ་གཏོར་བཏང་བའི་དགོངས། ཏལ་འབར་ཤི་ནས་ཡུད་ཙམ་སོང་བ་ན། ནམ་མཁའ་ནས་སྐར་མདའ་འདྲ་བ་ཞིག་བབས་ཏེ་དེ་ལ་ཕོག །མེར་འབར་བ་མཚན་རིལ་འཁྱོངས་པ་བྱུང་བ་ཅོག་པུ་པ་ཀུན་མཐུན་གྲུབ། རྟ་པ་རྣམས་ཀྱིས་ཞབས་ཏོག་ཆེན་པོ་བསྒྲུབས། ད་དུང་སྡོད་ཟེར་ཤིན་ཏུ་འཕྲེང་བར་བྱེད་སྣང་། ཀོང་སྨད་ལ་དགེ་འདུན་སྡེབས་ལ་དེ་ལས་མང་བ་སྔར་ཡོང་མ་མྱོང་ཟེར། ཐབ་ཟན་རང་ཡང་ལྔ་བརྒྱ་ཙམ་གཞན་ཆོས་ཞུ་དང་བཅས་བདུན་བརྒྱ་ཁོར་མར་བྱུང་། ཐམས་ཅད་རབ་བྱུང་རྐྱང་དུ་སོང་། གྲ་འགྲིག །ཅོག་བུ་རང་ཡང་ཕྱེད་དང་བཞི་བརྒྱ་ལྷག་ཙམ་སྣང་བས། ཀོང་པོ་རྣམས་སྦྲ་ཆུང་འདི་རྣམས་རང་རང་གི་ཡིན་པ་ངོ་ཤེས་ཨེ་ཡོད་ཟེར། ཀོང་པོར་སྤོར་སྟེངས་བཀའ་བཅུ་པ་ཤཱཀྱ་རིན་ཆེན་རང་མཁས་པར་སྣང་། དེ་ལ་སོགས་པ་ས་དགེ་དཀར་རྙིང་ཐམས་ཅད་ཀྱིས་དད་པའི་གནས་སུ་བྱས། ཐོག་ཆོད། གདུལ་བྱ་ཆེ་བར་གྲགས། ཆོལ་གུང་དུ། རྒྱལ་དབང་རྗེས་སེ་བ་ཆུང་ཆུང་ཞིག་འདེབས་པ་གནང་། འདི་སྡོང་པོར་ལོངས་དུས་ཁོ་བོ་འདིར་སླེབ་འོང་གསུང་བ་དེ་ངེད་སླེབ་དུས་སྡོང་པོར་ལོངས་པས་ཐམས་ཅད་ཡིད་ཆེས་པར་བྱེད་སྣང་། 
3-387
ཕྱིར་མྱང་ཁ་བརྒྱུད་རྩིས། བྱ་ཡུལ་ནས་གོང་མ་རིན་པོ་ཆེས་ཤོག་ཟེར་ཡང་ཡང་བྱུང་། དཔལ་རིར་ཆོས་གྲ་འཛུགས་ན་ཡོང་བྱས་ཁས་བླངས། དེ་དུས་མདོ་ལྡིང་གསུམ་ལ་གྲྭ་ཁྲལ་བདུན་ཅུ་ཙམ་བསྡུས་ནས་ཆོས་སྡེ་འཛུགས་པ་ལ་ཐག་བཅད་འདུག་པས་ཡར་འོངས། སྐྱེན་དུ་སླེབ་དུས། ཆོས་རྗེ་ཌཱ་ཀི་རས་ཆེན་པ་སྐུ་བགྲེས། རྡོར་འཛིན་འཇོག་པ་ཤར། འོས་འཐད་དུ་ཤེས་ནས་བླ་མ་བྱ་པ་ཅིག་ཅར་གྱི་རྡོ་རྗེ་འཛིན་པར་བསྐོས། ཕུ་ལུང་གསུམ་གྱི་འབུལ་བ་རྡོར་འཛིན་པའི་ཐབ་ཀའི་རྐྱེན་དང་། སྒྲུབ་པ་པའི་རྒྱགས་ལ་བགོས་ཏེ། བྱ་ཡུལ་དུ་སླེབ། གཉལ་ཡངས་པ་ཅན་གྱི་ལྟེ་བ་ཆོས་ཀྱི་རྒྱལ་པོའི་ཁབ་དང་ཉེ་བ། དཔལ་གྱི་རི་བོའི་ངོགས་སུ་དགེ་འདུན་གྱི་སྡེ་བཙུགས། རྗེ་གོང་མས་མཚན་ཉིད་ཀྱི་གྲུ་འཛུགས་པའི་རྩིས་མཛད་འདུག་པས། མྱང་རམ་པ་ལ་བཞུགས་བྱས་ཀྱང་། མྱང་སྟོད་པའི་མི་འདི་ཡུལ་སྐྱེ་ལངས་དང་ཁ་བཞུགས་མ་ཉན། གླིང་སྟོད་ནས་ཆོས་རྗེ་གྲགས་པ་བཤེས་གཉེན་མཁན་ཚབ་ཏུ་སྤར། ཆེན་པོ་ཆོས་རྗེ་ནོར་བུ་རིན་ཆེན་ལ་བསྐོས་ནས་གླིང་སྟོད་དང་དེ་གཉིས་བརྒྱངས་བྱས་སོ། །གླིང་སྨད་ཀྱི་ཆེན་པོར་ཆོས་རྗེ་གྱེ་ལ་རབ་འབྱམས་པ་དང་། སྟག་རྩེ་སློབ་དཔོན་པ་ཡང་རྩེའི་ཆེན་པོར་བསྐོ་བཞག་ཀྱང་བྱས། དགུན་དེ་ཤར་གཞིས་ཀ་བརྒྱུད་ར་ལུང་དུ་ཕྱིན་རྗེ་དཔོན་སློབ་གོང་དཀར་དུ། 
3-388
ཆེ་ས་འགྲོ་བའི་མགོན་པོའི་དགོངས་རྫོགས་གྲལ་དབུར་ཐེགས་ནས་ཕྱིར་ཕེབས་པ་དང་རྩེ་འགྲིག །འབུལ་བ་ལེགས་པར་བྱས། ཨུ་རྒྱན་པའི་བསྙེན་སྒྲུབ་སོགས་ཞུས། རྩ་རླུང་གི་ལག་ལེན་རྗེ་གོང་མའི་ཕྱག་ལེན་ལ་ངེས་པས། དགེ་སློང་ཆོས་ལེགས་པས་འཁྲིད། ཤེས་ལོ་ཙམ་མིན་པར་བྱས། རྗེ་ལ་དགོངས་པ་ཞུས། བྱ་བྲལ་རང་ཞིག་བྱེད་བསམ་སྒར་བསྐྱུར། ཞི་བ་སྟེ་ས་མོ་བྱ་ལོ་གསར་མཚམས། འཕྱོང་རྒྱས་ནས་སྡེ་པ་དཔལ་འབྱོར་ལྷུན་པོ་པ་གཤེགས་པའི་ལྡད་ཀྱི་གྲལ་དབུར་འགྲོ་དགོས་པ་ཤར། དེའི་དུས་རྨི་ལམ་དུ། སྡེ་པ་དེ་ལྷོ་བྲག་ནས་ཕྱིར་ཁྱེད་ཕེབས་འདུག་ཟེར་ནས་འོངས་པ་ཡིན་གསུང་། ཕྱག་གསུམ་མཛད་ནས་དབང་ལྡན་དུ་ཐེགས་སོང་པ། སྐུ་སྐྱེ་འདི་ཁ་རང་དུ་འཁྲུངས་དེ་ཡང་རྒྱལ་བུར་འོང་ངེ་ཞེས་གསོལ་བ། ད་ལྟའི་སྐུ་འབྲིང་པོའོ། །དགོངས་རྫོགས་དུས་འབུལ་བ་གཏོས་ཆེ་བ་གནང་། གྲོལ་ཉིན་འོད་གསལ་གླིང་དུ་ཕྱིན། སླར་འཕྱོང་རྒྱས་སུ་ཞལ་ངོ་རྣམས་ལ་དབང་ཆོས་འཕུལ་ཟླ་བ་གཉིས་ཙམ་བསྡད་། དེ་ནས་བསམ་ཡས་བསྐོར། དེ་དུས་དབུ་རྩེ་ཕོ་བྲང་དུ་བསྡད་པའི་ནུབ་བར་མའི་རྨི་ལམ་དུ། ངེད་རྩ་གོང་ཡིན་སྙམ་པའི་ནགས་འཐུག་པོའི་ཚལ་གསེབ་གཅིག་ན་སྣང་། ལག་པ་ན་འཇམ་པའི་དབྱངས་ཀྱི་ཕྱག་མཚན་ངོས་མའོ་སྙམ་པའི་རལ་གྲི་ཞིང་ལ་འདོམ་གསུམ་ཙམ་ཡོད་པ། ཉི་མའི་སྙིང་པོ་ལྟ་བུར་ལྷིང་བ་འོད་བསམ་གྱིས་མི་ཁྱབ་པ་ཞིག་འདུག་པ་གཡུགས་པས། 
3-389
ནགས་ཐམས་ཅད་དུམ་བུ་དུམ་བུར་བཅད་པ་ཞིག་རྨིས། ཕྱིས་དྲག་པོའི་འཕྲིན་ལས་ཆེར་འོང་བའི་བརྡར་མཐོང་། དེ་ནས་རྡོ་རྗེ་ར་བའི་ལྕང་གསེབ་ཏུ་སླེབ་དུས། གསང་ཕུ་བ་སློབ་དཔོན་སྟོན་ཚག་པ་འཇལ་དུ་བྱུང་། ཕར་ཚད་སྡོམ་གསུམ་རབ་དབྱེ་འདུལ་བ་སོགས་ལ་འབེལ་གཏམ་རྒྱས་པ་བྱས། ཁོང་གསང་ནེའུ་ཐོག་པའི་དུས་ཕྱིས་ཀྱི་དགེ་བཤེས་ཙམ་ལ་གྲགས་པ་ཆེ། ཇོ་བོ་བཟང་པོ་འདུག་པས་ཡིན་ནམ། ཁོ་བོའི་ཡོན་ཏན་ལ་ཐུགས་མགུ་མགུ་མཛད་ཀྱི་འདུག །ངེད་རང་ལ་འདུལ་བ་མ་གཏོགས་པ་ལ་ཐག་ཆོད་པ་རང་ནི་མེད། དེ་ནས་སྙེ་ཕུར་བུ་ཚལ་ནས་སྡེ་པ་སྐུ་མཆེད་དང་འཇལ། དབང་ཆོས་འདྲ་ཕུལ། གསུང་གླེང་ལ་སྟག་མོ་གླིང་ཁ་པ་ཆོས་རྗེ་ནམ་མཁའ་དབང་ཕྱུག་པའི་ཞལ་འཕྲོས་བྱུང་བསྔགས་བསྔགས་མཛད་ཀྱི་འདུག །ངས་རྔོག་གཉི་ཀའི་དགྱེས་རྡོར་སོགས་རྒྱུད་ལ་སྦྱངས་པ་ཅན། ཕྱིས་མདོ་ཡང་མཐར་ཕྱིན་མཛད་པ་ཞིག་ཡིན་པས་སློབ་དཔོན་གྱི་བོས་ཡིན་པར་སྣང་སྟེ་མཇལ་བ་ཞིག་མ་བྱུང་། མགར་གྲོང་དུ་སླེབ། ལྷ་སར་འགྲོ་དགོས་སྙམ་པ་ལ། རླུང་སྦྱངས་འཕྲོས་ཟླ་གཅིག་འགྱངས། དེ་ནས་གྲྭ་ཕུག་པ་བརྩིས་པ་ཆེན་པོ་སྲིད་སྒྲུབ་པ་ལ་འགྲན་བཟོད་པ། དཔལ་མགོན་འཕྲིན་ལས་པ་ཡར་རྒྱབ་ནས་རྫོང་གྲུ་མཛད་བྱུང་བས། དགུ་མཐའ་ནས་བརྩམས་ཏེ་དུས་འཁོར་གྱི་ལག་རྩིས་ཐམས་ཅད་ཟླ་བ་གཅིག་ལ་ཁོང་དུ་ཆུད་པར་བགྱིས། 
3-390
ཁོང་ནས། ངེད་ཀྱིས་རྩིས་བསླབ་པ་སྟོང་ཐལ་ཏེ། ད་རེས་ལས་མཚར་བ་མ་བྱུང་། ད་ཞལ་ལུང་གི་རྒྱུ་མཚན་རྩིས་དབྱངས་འཆར་སོགས་ཟླ་བ་གཅིག་སྡོད་རྒྱུ་ཡོད་ན་ཀུན་ལོབས་པར་འདུག་གསུང་རུང་། ཁོང་རང་ཡང་ཕྱིར་འབྱོན་རིངས་པ་དང་། ངེད་ལ་ཡང་། ཞབས་དྲུང་ནས་གཙང་ཕྱོགས་སུ་འབོད་མི་འཕྲལ་འཕྲལ་སླེབ་པས་མ་ཐུབ། ཕྱིས་དུས་འཛོམ་བྱས་ཏེ་བྲེལ་བས་མ་ཤར། ཁོང་སྡེ་དཔོན་ཀུན་དང་འབྲེལ་ཆེ་བས་ཐམས་ཅད་ཀྱི་གོ་ཁར་དེ་ལྟ་བུའི་ཤེས་རབ་འདུག་པ་ཞེས། ངེད་ལ་བསྔགས་པས་དབུས་ན་དེ་ནས་ཤེས་རབ་ཅན་དུ་གྲགས་སོ། །དེ་དུས་སོས་སུ་སོང་། མར་གསར་དཀོན་ནས་ཁོང་ཚོས། བྱང་ཆུབ་ཆེན་པོའི་དཀར་མེ་དང་མར་གསར་རྙིང་བརྗེས་པར་འདུག །དགོངས་གཅིག་མགྲིན་པའི་ཕུག་ན་མར་མེ་དམར་ཏ་ལ་ལ་འབར་གྱི་འདུག་པ་རྨིས་ནས། སང་དྲིས་པས་བཤད་བྱུང་། དཀོན་མཆོག་ལ་དམིགས་པའི་རྫས་ལོངས་སྤྱོད་པ་ཤིན་ཏུ་ཞེད་པར་མཐོང་ནས། དེ་དག་ལ་དམིགས་ཟིན་ནས་ལེགས་པས་བརྗེ་བ་ལ་ཡང་འཛངས་པར་བྱས་སོ། ། དེ་ནས་ར་ལུང་དུ་རྗེའི་སྤྱན་སྔར་བཀའ་འགྱུར་གྱི་ལུང་ཞུས། དེ་དུས། ཀར་འབྲུག་གི་བར་དུ་ལེགས་ཚོགས་ཡོང་དུ་རེ། རྗེ་ལ་དགོངས་པ་ཐབས་མཁས་ཀྱིས་ཞུས། རྗེ་ཀརྨ་པ་མི་བསྐྱོད་རྡོ་རྗེ་ཤངས་ལྷ་ཕུན་བཞུགས་འདུག་པར་ཇ་ཞུས་བཏང་། ཕུགས་མཇལ་བ་ལེགས་པ་ཞིག་ཡོད་རེ་ནའང་། 
3-391
དེ་བཏང་བས་ཀརྨ་པས་གཟིགས་པར། ཀོང་ཕྱོགས་ཀྱི་གྲྭ་རིགས་རགས་པ་དང་། སྐུ་རབ་པ་སོགས་ཀྱིས་ངེད་འཆུན་འདུག་དགོངས་པ་ཞིག་ཤར་བ་འདྲས་ལེགས་སུ་མ་སོང་། དབོན་རིན་པོ་ཆེ་དང་། སྐྱེད་ཚལ་ནས། ཀུན་མཁྱེན་དབོན་པོ་ཆོས་རྗེ་ཡེ་ཤེས་རྒྱལ་མཚན་པ་སོགས་ལ་མཻ་ཏྲི་སྙན་རྒྱུད། བླ་སྒྲུབ་རྟེན་འབྲེལ་རོ་སྙོམས་སོགས་བཤད་པས། དབོན་ཆེན་པ་སྐྱེད་ཚལ་དུ་ལོག །སྐུ་མཚམས་མཛད་དུས་ཐུགས་དམ་ཚད་མེད་པ་འཁྲུངས་ཏེ། སྔར་ངོར་པ་ཡིན་པ། དེ་ནས་འབྲུག་པར་སིངས་སོང་ལོ། །དེ་དུས་བློ་ལ། སློབ་གཉེར་མཐར་ཕྱིན་ཞིག་བྱས། དེ་ནས་བྱ་བཏང་གི་བརྟུལ་བཞུགས་བཟུང་ལ་བལ་པོ། །ཁ་ཆེ་ཚུན་བསྐོར་འགྲོ་བསམ་པ་ཞིག་ཡོད་པས། སྒར་པར་ལུང་དུ་བཞག །བྱས་ཆོས་གཏོར། ཀོང་བཙུན་ཁ་ཡར་གྲོགས་སུ་བསྟེན། སློབ་གཉེར་བྱེད་པ་ལ། སྔར་རང་ལོ་གཞོན། བླ་མ་རྣམས་བགྲེས། རྒྱུད་བཤད་རྣ་བར་ཐོས་པ་ཙམ་ལས་མཐིལ་ཕྱིན་པ་ཞིག་མ་ལོབས། ད་ལྟ་བསྟན་པ་གཙང་དར་པར་གྲགས་འདུག་པས་གཙང་གཞུང་དུ་འགྲོ། སློབ་དཔོན་མ་འབྱོར་ཡང་། ཞ་ལུར་བུ་སྟོན་བཀའ་འབུམ་ལྟ་རྟོག་བྱེད་དགོས་བསམ་ཡོད་པ་ལ། རི་བོ་བྲག་ཏུ་ཁོང་གི་ཡབ་གྲོངས་པའི་ཡར་འདྲེན་དུ་འོང་དགོས་ཞེས་ནན་ཆེ་དྲགས་ཕྱིན། བཅུ་གསུམ་མའི་གཤིན་པོ་རྗེས་འཛིན་བྱས་པས། ལམ་སྟོན་གྱི་སྐབས་ཤར་རོང་པོ་རྫ་སྟེང་ཕྱོགས་ནས་འཇའ་དཀར་ཐལ་གྱི་འོངས་ནས་ཕུང་པོའི་ཁར་ཟུག །
3-392
ཆོ་ག་གྲུབ་འཕྲལ་ཤར་དུ་རམ་པས་བསྡུས་སོང་། དེའི་ཉིན་ཁོང་རང་གི་མངའ་ཞབས་ཐམས་ཅད་ཚོགས། སྤུར་སྟོན་བྱེད་འདུག་པ་ཀུན་གྱིས་མཐོང་བས་ལྷག་པར་མགུ་འདུག ། དེ་ནས་གཙང་གཞུང་དུ་ཕྱིན། ཁ་བ་ཆེན་པོ་བབས་པ་དང་ཐུག །དཔལ་འཁོར་བདེ་ཆེན་དུ། མཁན་རིན་པོ་ཆེར་ཕྱག་འབུལ། མདོ་རྩ་སོགས་མཚན་ཉིད་ཀྱི་གཞུང་ཁ་ཡར་ཞུས། སེ་བྲག་གཡའ་ལུང་གི་རི་བོ། ཤར་ཁ་རས་ཆེན་པ་བདེ་ཆེན་དཔལ་འབར་གྱིས་བཏབ་པའི་དགོན་གནས་སུ། ཆོས་རྫོང་མཁན་པོ་ཆོས་རྗེ་བསམ་གཏན་དབང་ཕྱུག་པས་བོས་ཡུལ་མི་རྣམས་ལ་ཚེ་དབང་དགོས་ཟེར་བ་བཞིན་བྱས་པས། ནས་ཁལ་སྟོང་ཕྲག་ཕྱེད་གཉིས་ཙམ་དང་། འབུལ་བ་ཞབས་ཏོག་ལེགས་པར་བྱུང་། རྣལ་འབྱོར་པ་རལ་པའི་ཐོར་ཚུགས་ཡོད་པ། པུས་ཁྱུད་དང་ཕྱམ་སྨུག་ཙམ་གྱོན་པ་ཞིག་བྱུང་ནས། ང་རི་འདི་ལ་རྟག་ཏུ་སྡོད་པའི་སྒོམ་ཆེན་ཡིན། ཁྱོད་སླེབ་པས། སྔོན་གྱི་གྲོགས་དང་ཕྲད་བསམ་དགའ་བ་ཡིན་ཟེར། སྔོན་གྱི་གྲོགས་གང་ཡིན་ངས་མ་དྲན་བྱས་པས། འཁོན་ཀླུའི་དབང་པོའོ་ཞེས་དགའ་དགའི་འབེལ་གཏམ་བྱས་ལོག་སོང་བ་རྨིས། སང་ཉིན་རྩད་བཅད་པས། རི་དེ་ལ་མྱང་ཏིང་ངེ་འཛིན་བཟང་པོ་འཇའ་ལུས་བརྙེས་ནས་ད་ལྟ་འང་བཞུགས་པར་གྲགས་སོ་ཟེར། རཏྣ་གླིང་པའི་གཏེར་ཡིག་ཏུ། ལོ་ཙ་ཀླུ་ཡི་དབང་པོ་ཁྱོད། །ཀུན་དགའི་མིང་ཅན་བློ་གྲོས་ཅན། །
3-393
ཞེས་རྒྱལ་དབང་རྗེ་ལུང་བསྟན་པ་དང་མཐུན་འདུག །ཡ་མཚན་བསམ་པ་བྱུང་། དེ་དུས་མྱང་གཙང་དམངས་མ་རྣམས། ར་ལུང་པའི་ཞལ་ངོ་ལ་སྤྱན་རས་གཟིགས་རང་ཡིན་བསམ་མོས་པ་ལ། དྲག་པ་དཔོན་རིགས་སུ་མིང་བཏགས་པ་ཐམས་ཅད་དང་འབྲེལ་ཆུང་བ། དེ་བཞིན་རྒྱལ་དབང་རྗེའི་ཞལ་སློབ། རྟོགས་ལྡན་ལྷ་བཙུན་པ་དང་། ཤར་ཁ་བ། དགེ་སློང་རྣམས་གཉིས། འབའ་ར་བ་སྔ་ཕྱི་སོགས་ཀྱི་འབྲུག་པའི་གྲྭ་པ་མང་པོ་གཏོས་ཆེ་བ་འདུག་ཀྱང་། དཀར་རྒྱུད་པ་ཟེར། མན་ངག་ཟབ་མོ་ཐང་ཐུང་ཤེས་ལ། གཞན་བསྐྱེད་རྫོགས་ཀྱི་ལྷུ་སྒྲིག་རྒྱུ་མེད་པ་འདྲ་ཞིག་བྱེད་པས། ས་དགེ་ཁ་རྒྱལ་དུ་འདུག་གོ །དེར་ངེད་ཚོ་ལ་འབྲོང་རྩེ་པ་སྡེ་པ་ཚེ་དབང་མགོན་པོས་ཇ་ཞུས་སྐྱེལ་བར་ཁང་དམར་བསླེབ་བྱུང་། དེ་ནས་པ་སྣམ་པའི་གྲྭ་རིགས་རྣམས་ཀྱིས་ཤོག་ཟེར་བ་དང་ནོར་བུ་ཁྱུང་རྩེར་པོས་བྱུང་བ་ཕྱིན། སྡེ་པ་དཔོན་གཡོག་ལ་ཚེ་དབང་ལ་སོགས་པ་བྱས། དེ་ནས་ཆུ་བཟངས་སུ་སླེབ་སྐབས། པ་སྣམ་སྡེ་པ་དེ། དཔལ་ལྡན་ས་སྐྱ་པའི་དབོན་པོ། སྡེ་སྲིད་ཕག་མོ་གྲུ་པའི་རྫོང་དཔོན། དེ་དུས་རིན་སྤུངས་པ་དཔོན་སློབ་ནང་ཟིངས་ནས། ཁོང་གིས་གཞིས་ཁ་བ་དང་། རྒྱལ་རྩེ་པ་གཉིས་ཀའི་ཚོ་འཛིན་པར་མཛད་པའི་ཤིན་ཏུ་ང་རྒྱལ་ཆེ་བའི་སྒང་ལ་སྣང་། སྤྱན་སྔ་ཆོས་ཀྱི་གྲགས་པ་ནས་བཟུང་། 
3-394
དེ་ཚུན་གྱི་བར་གྱི་བླ་མ་དགེ་བའི་བཤེས་གཉེན་ཐམས་ཅད་ལ་དྲི་བ་མཛད་པས་སུས་ཀྱང་ཐུགས་མ་ཚིམ་རྒྱུ། སྐུ་ཡོན་སྡེ་དཔོན་ཙམ་ལ་ཆེ་ཡང་དགོངས། མིས་ཀྱང་གླེང་བ་ཅིག་སྣང་བ་ལ། གཞན་རྣམས་ཀྱང་མཇལ་ཕྲད་ལ་འཚེར་པོ་མཛད་པ་ཞིག་ཡོད་འདུག །ངེད་ལ། དཔལ་འབྱོར་ལྷུན་སྡིངས་པའི་བླ་མ་བཟོད་པ་བ་གནང་བྱུང་ནས། པ་སྣམ་དུ་ཕེབས་ན་མཇལ་ཕྲད་དགོས། མི་ཆོས་ཇི་ལྟར་མཛད་ཟེར་བསྐོར་བྱུང་ནས། མི་ཆོས་ནི་ཁྱེད་རང་གང་མཛད་སྙིང་འདོད་པ་མཛོད། ངེད་རྩེག་དགོས་མི་འདུག །མཇལ་ཆོག་བྱས། སླེབ་ཉི་ན་ཞོལ་ན་དགོན་ཕན་ཚུན་གྱི་ཞབས་ཏོག་འདུག་པ་ལྟར་བསྡད། སང་ཚེས་བཅོ་ལྔ་ཞིག་དང་ཐུག །རྩེར་ཕྱིན་མཚམས་དཔོན་སློབ་བཅུ་ཕེབས་ཟེར། ངེད་འགྲོ་མཁན་ཉི་ཤུ་ལྷག་ཙམ་བྱུང་སྟེ། སྡེ་པ་རང་གིས་གཞི་ལེན་མི་བཅུ་པོ་དེ་ལ་གཟབས་པར་འདུག །མི་ཆོས་ཀྱང་སྒོ་གདོང་དུ་བསུ་བ་ཙམ་མཛད། ས་གདན་གཅིག་ལ། ངེད་ལ་གདན་སུམ་སྟན་སྙེ་འབོལ་གཟབ་པ་ཞིག་དང་། ཁོང་རང་ལ་འབོལ་དཀར་གི་སྟེང་དུ། ཀྲྀཥྞ་ས་རའི་པགས་པ་བཏིངས་པ། ཁ་སྤྲོད་ཤིན་ཏུ་ཉེ་བ་མཆོད་ཁང་ནང་ན་འདུག །མཆོང་ཁང་གི་ཕྱི་ཚོམས་ན་བཞུགས་གྲལ་པ་རྣམས་འཛོམ། ཇ་སོང་འཕྲལ་ལོ་པཎ་སྤྱི་བསྟོད་འདྲ་འདོན་གྱི་འདུག །དེ་སོང་ནས་འཕྲལ་གྱི་རྩད་གཅོད། དེ་ནས་ཆོས་ཀྱི་དྲི་བ་ཤིན་ཏུ་མང་བ་ཞིག་མཛད་འདུག་པ། 
3-395
ལན་ཇི་ལྟ་བ་བཏབ། བཞུགས་བྲལ་གྲོལ་འཚམས་ངེད་རྣམས་གསོ་སྦྱོང་གཏན་དུ་བྱེད་ཡོད་པས་གསོ་སྦྱོང་བྱས། སྡེ་པ་རང་གུང་ཚིགས་ལ་བཞུད། དེ་གཉིས་གྲོལ་ནས། ངེད་རང་མཆོད་ཡོན་རང་ལས་མེད་པ་ལ་དྲི་བ་དྲི་ལན་གྱིས་མཚན་ཡང་རྒྱང་བ་ཐུག་སོང་། སང་ཁྲོམ་ལ་དབང་ཞིག་དགོས་ཟེར་བ་བྱས། དེ་དུས་ང་རང་གིས་རི་མ་བ་བྱས། བདེ་མཆོག་འཁོར་ལོའི་རིགས་བསྡུས་པའི་དཀྱིལ་འཁོར་ཁྱམས་ལ་གཟུངས་སྔགས་ལཱཉྪ་ཤིན་ཏུ་ལེགས་པ་ཞིག་བསྒྲུབས་པ་རྨིས། ཕྱིས་རྒྱལ་བྱེད་ཚལ་གྱི་སྔགས་གྲྭ་འདི་དེར་བཙུགས་པ་ལ་བལྟ་བ་འདྲ། གནངས་འཕགས་རྒྱལ་དུལ་གྱི་རྟོགས་ལྡན་པས་ཤོག་ཟེར་བས་འགྲོ་དགོས་ཡོད་པ་ལ། རྩེར་ཤོག་ཟེར་ཕྱིན། སྡེ་པ་རང་གིས་ཐིག་བཏབ་པའི་ཀུན་རིག་བུ་ངོར་གྱི་ལུགས་མཆོད་རྟེན་ལཱཉྪ་སོགས་ལ་ཞུས་དག་བྱས་པས་ཉི་མ་ནུབ་ནུབ་སྡོད་དགོས་པ་བྱུང་། སྡེ་པ་རང་ཤིན་ཏུ་དགྱེས་པ་མཛད། རྟོགས་ལྡན་གྱི་བླ་མ་འཕངས་པ་འདུག་གསུང་། དེ་ནས་གཞི་ལེན་ཡང་གཟབས་མ་མཛད་ཀྱི་འདུག །ངེད་རྣམས་འཕགས་རྒྱལ་དུ་སྡོད་རིང་སྡེ་པ་རང་གི་དྲུང་འཁོར་ཕལ་ཆེར་མཇལ་དུ་བརྫངས། འདི་འདྲ་སྐྱེས་བུ་དམ་པ་ཡིན་འདུག་པས་ཆེ་རེག་ཆེར་འཚེངས། ཆུང་རེག་ཆུང་དུ་འཚེངས་པ་ཡིན། ཞེས་བསྐུལ་བས་འུར་ལངས་པ་སྐད་བྱས་ནས། འབུལ་བ་ནས་རང་ཡང་ཁྲི་ཚོ་གཉིས་ལ་སྣ་བསྟད་ཙམ་བྱུང་བའི་འཕྲལ་དགོས་དང་། 
3-396
སྤོས་སྐྱར་སྒྲུབ་སྡེ་འཛུགས་པའི་ཐེས་ཙམ་མིན་པ། གཞན་ཐམས་ཅད་ར་ལུང་དུ་རྗེ་ལ་ཕུལ། དེ་ནས་ལྷ་ལྔ་བརྒྱུད། གསེར་མདོག་ཅན་བལྟས། དེ་དུས་མཁན་པོ། རྗེ་བླ་མའི་ཞལ་སློབ་ཡང་ཡིན་པ། མཁས་པ་འབུམ་རབ་འབྱམས་པས་མཛད། སློབ་དཔོན་དཔལ་མཆོག་པ་དང་། གྲགས་པ་ཐོགས་མེད་པ་དང་། རྡོ་རིངས་དབོན་པོ་བ་སོགས་སྐུ་ཡོན་ཅན་རྐྱང་འདུག །འབེལ་གཏམ་ཤིན་ཏུ་སྨར་བ་དང་། ཆོས་ཀྱི་སྦྱིན་པ་ཡང་བྱས། སློབ་དཔོན་དཔལ་མཆོག་པར་དེ་དུས་མཆོད་གཞིས་སོགས་ཅི་ཡང་མི་འདུག་པས་གཡུ་ལེགས་པོ་གཅིག་བྱིན་ནས་ས་ཆ་ཉོས་བྱས་པས། མཁར་རྩེ་བས་ཁལ་བརྒྱ་ཁུངས་ཀྱི་ཞིང་བྱུང་བ་ལྕང་ར་གྲྭ་ཚང་བའི་སློབ་གཞིས་སུ་སོང་འདུག །བསམ་འགྲུབ་ལྷ་རྩེར་སླེབ་དུས། ཉུག་རྒྱལ་ཁང་ན་རྩིབས་གནས་གསར་པའི་སྡེ་པ་ཞལ་ངོ་བཞུགས་འདུག་པས་ཤོག་ཟེར་ཕྱིན། ཡབ་སྲས་ལ་ཚེ་དབང་བྱས་ཞག་གཅིག་བསྡད། ཧ་བོ་དགོན་དང་། ལ་ཁ་བས་བཏེག །བྱ་བཟང་གི་བར་བསྐོར་ནས་ཉ་མོ་བརྒྱུད་དེ་དུས་གནས་གསར་པའི་ཞལ་ངོ་ཆོས་རྗེ་མཁྱེན་བརྩེ་པ་ཕྱིར་བསྙེགས་མཛད་ཕེབས། ཕྱགས་ཕྱིར་ད་ལྟའི་ཐུབ་བསྟན་རྣམ་རྒྱལ་གྱི་མཁན་པོ་འདི་པའང་སྣང་། དཔོན་སློབ་ལ་རྒྱལ་དབང་རྗེའི་གསུང་ཁྲིད་ཆེན་བརྒྱད། མགོན་པོའི་རྗེས་གནང་སོགས་ཕུལ། ཕྱི་ལོ་ར་ལུང་དུ་ཕེབས་པ་ལ་ཡང་། བདེ་མཆོག་ལྷན་སྐྱེས། ཕག་མོ། 
3-397
རྟེན་འབྲེལ་བླ་བསྒྲུབ་སོགས་ཕུལ། ཁོང་གིས་ཀྱིས་ཞ་ལུའི་གདན་ས་མཛད། བོ་གདོང་ཨེའི་མཁན་པོར་ངེད་ཀྱིས་བསྐོས། སྔགས་འཆང་བ་གཅིག་ལ་མཁྱེན་རབས་ཀྱི་གྲགས་པ་ཆེའོ། ། དེ་ནས་ཕྱིས་ས་བྲག་སྒྲུབ་སྡེ་སླེབ། ཐུན་མོང་སྟེ་ལྕགས་ཕོ་ཁྱི་ལོ་གསར་མཚམས་ལ་མཚམས་ཞིག་བྱས་ཡོད་ཀྱང་པ་སྣམ་ནས་འབོད་མི་ནན་ཆེས་ཕྱིན། གཞིས་ཁ་རྩེར་བསྡད། ཉི་མ་འགའ་ཤས་ཀྱི་རིང་ལ་ཆོས་ཀྱི་དྲི་བ་ཐུགས་ཁེངས་པ་མཛད། གཉིས་གསུམ་ཙམ་སྡེ་པ་རང་གིས་འཆིང་ལུགས་མཛད་པའི་ཡིག་རིས་སྟོན་པ་དང་རྗེ་དྲུང་མི་བསྐྱོད་རྡོ་རྗེའི་ཕྱག་ཐམ། ངེད་ལྷ་སར་སླེབ་གང་ཐུབ་ཀྱི་རྩོལ་འདོན་ཁྱད་ཀྱིས་བྱེད་དགོས་གསུང་པ་སོགས་མང་པོ་ཞིག་སྩལ་འདུག་པ་བསྟན། དགེ་འཕེལ་ནས་བརྒྱུད་པར། ཞ་ལུར་སྐུ་མཚམས་མཛད་འདོད་འདུག་པ་འདི། ཕྱི་དྲོར་སོང་ཙ་ན་བཙུན་པ་ཆང་ཟི་མང་མི་སྤྱོད་རྩུབ་པ། ཐ་ན་མེ་ཤིང་ཚུན་ཆད་ཀྱི་དཀའ་ལས་ཡོང་། དགའ་བ་གདོང་འདི་བདག་ཆེན་རིན་པོ་ཆེ་ངག་པའི་གདན་ས་དྲོན་མོར་ཡོད་པས་འདིང་མཛད་པ་ལེགས་པར་འདུག་གསུང་། ཁོ་བོ་དགོན་གོག་རྙང་རྙིང་ལ་ཤིན་ཏུ་མི་དད་པས། བཀའ་དྲིན་བསྐྱངས་ཏེ། སློབ་གཉེར་གྱི་མཇུག་འདྲ་བསྐྱངས། དེ་ནས་གནས་ངེས་མེད་ཅིག་ཀ་འདོད་པས་མི་ཞུ་བྱས་པས། སླར་སྐོར་ཡུག་གནང་བར། དེ་མི་མཛད་རྟིང་བསམ་འཕེལ་འདི་བཞུགས་སྤྲོ་བར་ཡོད་པས། 
3-398
འདིར་ལོ་གཅིག་ཙམ་བཞུགས། དཔོན་སློབ་ལ་གསོལ་ཕོགས་ངེད་ཀྱིས་འབུལ་བས། དཔེ་ཆ་གང་དགོས་ཡང་གསུང་བ། ཁས་བླངས་ཀྱང་བཏུབ་བསམ་ཙ་ན། ར་ལུང་ནས་བང་ཆེན་བྱུང་ནས། ངེད་ལ་ལྟས་ལེགས་པོ་མ་བྱུང་། དེ་ཚོར་མ་སྡོད་ཡར་མྱུར་བར་ཤོག་གསུང་པ་བྱུང་བས་འཐེན། འདིའི་ཕྱི་ལོ་པ་སྣམས་ནང་འཛིངས་གཏོས་ཆེ་བ་བྱུང་བ་མངོན་པར་མཁྱེན་པ་འདུག །མ་བསྡད་པས་འཚེངས་བསམ་པ་བྱུང་། སེམས་བསྐྱེད་དང་ཞི་གནས་སྐྱོང་ཁྱེར་འདྲ་དགོས་གསུང་ཕུལ། དེ་དུས་ངེད་རྒྱུད་ལ། མཚན་ཉིད་པ་ཊཱི་ཀ་གཏོང་གཏོང་མཛད་ཐུབ་པའི་སློབ་དཔོན་ཅིག་སྙིང་ལ་དུངས་པར་ཡོད་པས། མྱང་སྟོད་རྩེ་ཆེན་ན་ཀུན་སྤྱོད་སྤེལ་པ་བགྲེས་པོ་གྲགས་ཆེ་བར་འདུག་པས། ལོ་ཙ་བ་བལྟ་རུ་བཏང་བས་ཐུགས་དམ་སྨར་པོ་འདུག་ཟེར། །ཞན་ཞ་ལུ་ན། བླ་ཆེན་བསམ་གྲུབ་རྒྱལ་མཚན། བྱང་གླིང་པ་གཉིས། དཀྱིལ་འཁོར་གྱི་ཆོ་ག་ལ་མཁས་ཐག་ཆོད་དུ་འདུག་རུང་། རྒྱུད་ལ་མ་འདྲིས་པར་འདུག །ཁོང་གཉིས་ངེད་ཀྱི་ཟླ་ལ་བྱོན། སྔར་མ་གསན་པའི་བུ་ལུགས་ཀྱི་དབང་རྒྱུན་ཐམས་ཅད་། ངེད་ཀྱིས་ཆ་རྐྱེན་བསྐུར་འཚོལ་དུ་བཅུག་པས་བུ་ལུགས་ལ་ཕན་ཐོགས་པར་བྱུང་། ངོར་པ་ཆོས་ཀྱི་རྗེ་དཀོན་མཆོག་ལྷུན་གྲུབ་པ་དེ་མཁས་པའི་གྲགས་པ་ཆེན་པོ་འདུག་ཅིང་། པ་སྣམ་སྡེ་པ་དང་མཆོད་ཡོན་དཔེ་མེད་དུ་འདུག་ནས། 
3-399
ཞལ་འཕྲོས་སུ་དྲི་བརྩད་བྱས་དུས། སྡེ་པ་ནས། ཁོང་གིས་ཐུགས་ཀ་རྫོགས་པའི་བཤད་པ་ཐོན་པ་མེད། གཞན་སྐུ་ཡོན་ལེགས་པོ་ཡོད། ཁྱད་པར་དཀར་བརྒྱུད་པ་ལ་སྡང་པོ་རང་ཞིག་ཡིན་པས་མི་འོས་གསུང་། དེ་ཀས་ཐག་ཆོད། ངོར་པ་ཆོས་རྗེ་པ་སྣམ་དུ་ཕེབས་པ་ཞིག་ལ། སྡེ་པས་འབྲུག་ནས་སྤྲུལ་སྐུ་དེ་སྐུ་ནས་ཕྲ་ལ་མཁྱེན་རབ་ཆེ་བ། འཕྲལ་གྱི་སྣང་ཚུལ་གང་ལ་བརྟགས་ཀྱང་ངེད་རང་གི་བདག་ཆེན་ཐམས་ཅད་མཁྱེན་པའི་སྐུ་སྐྱེ་ཡིན་པ་འདུག །གཞན་སུ་ལའང་འདི་ལྟ་བུ་འདུག་པ་མ་མཐོང་གསུངས་འདུག །དེ་བཞིན་སྐུ་མདུན་དུ་མི་ཆེན་སུ་བྱུང་དང་། དེའི་སྟོན་ལོ་ཁོང་དང་རིན་སྤུངས་པ་གཙང་གཞུང་དུ་མཇལ། རྒྱལ་རྩེ་པ་མཆོད་ཡོན་དང་ཤོལ་པོར་མཇལ་དུས་དང་། བྱང་བདག་པོ་དང་ཁོང་མི་གཉིས་སྙིང་གཅིག་ཏུ་འདུག་པས། དེར་ཞུ་ཐོར་ཕུལ་བ་སོགས་ཀྱིས། གཙང་དུ་ཁོང་ངེད་ཀྱིས་གྲགས་པའི་རྔ་བོ་ཆེ་རང་དུ་བྱུང་ངོ་། །དེ་དུས་སྲུང་རིར། དགེ་སློང་དཔལ་ལེགས་པས་མགོ་བྱས་ཀོང་བཙུན་སུམ་ཅུ་བྲིན་པ་བརྫངས། ཁོང་ཚོས་གཡེ་བརྒྱུད་ཕྱིན་པ། རྗེ་དྲུང་མི་བསྐྱོད་རྡོ་རྗེ་ལྷ་ཁོངསུ་བཞུགས་པ་མཇལ། ཕྲག་ཟུར་གདོང་པའི་སློབ་དཔོན་སྐུ་གཞོགས་ན་འདུག་པ་ལ། འདི་པའི་སྒྲུབ་སྡེ་ཁྱེད་ཚོས་མི་ཁེགས་པ་ཨེ་ཡིན་གསུང་། བཀག་ན་ཁེགས་ཞུས་པས། འོ་ན་ཁོག་གསུང་པ་ཕེབས་སོང་ཟེར། 
3-400
ངེད་ལ་བྱ་ཞིག་བྱུང་ནས། མགྲོན་གཉེར་རྗེའི་དྲུང་དུ་བཏང་། ཀོང་པོའི་དགོན་པ་འདི་ཀར་སྲིད་ལ་གནོད་པ་ནི་མེད། ཐུགས་ལ་མི་བདེན་དེ་ཀ་ནས་མི་སྣ་ཞིག་ཀྱང་གནང་། འཇམས་བྱས་བསྡུ། དྲག་ལས་ཀྱིས་དམག་གནང་ན་ཆགས་སྡང་གི་རྒྱུར་འགྲོ་ཞུ་བ་ཕུལ་བ་ཡར་སྟོད་དུ་འབྱོར་འདུག་པར། སྐུ་དངོས་ཀྱི་བཀའ་བཀོད་ལ། ཁོང་རང་དེར་མཇལ་དུ་ཡོང་ན་དེ་ཀར་བཞག་ཡོང་། གཞན་ཀར་སྲིད་གཏོས་ཆེ་རྩིང་པོ། ངེད་ཀྱི་དབོན་པོ་མཚོ་སྐྱེས་དེ། གོས་ནག་པོ་གྱོན། དཔའ་ཤག་འདི་ཙམ་ཐོགས་ལ། འཇིགས་སུ་ངར་བ་ཡིན། ཁོ་ཉན་མི་ཡོང་། དམག་བྱས་དགོན་པ་བསྲེགས་འོང་ཐག་ཆོད་གསུང་། དེ་དུས་སྐུ་གཞོགས་ན་སློབ་དཔོན་ཕྱོགས་གླང་པ་འདུག་ཟེར་རོ། ། དེ་ནས་སོས་ཀ་འབྲོང་རྩེར་སྐོར་ཅིག་ཕྱིན། རྒྱལ་བྱེད་ཚལ་དུ་ཞག་བདུན་ཙམ་བསྡད་པའི་ཞག་ལྔ་པའི་དགོངས་རྨི་ལམ་ལ། དེ་ན་མཚོ་ཆེན་པོ་ཞིག་འདུག །རི་ངོས་ཁ་ལྷོར་བསྟན་ཞིག་ལ། དེར་བསྡད་འདུག་པར། མཚོ་དེའི་དབུས་ལྦུ་བ་རུག་རུག་ཁོལ་བྱུང་བའི་ནང་ནས། ཨཱ་ཙ་ར་སྔོ་སིང་སིང་པ་ཅིག་འབུར་ཏེ་འཐོན་ངེས་ཀྱི་གམ་དུ་སླེབ། ཕྱག་བཙལ། ཞབས་སྤྱི་བོར་བླངས་ནས། ངའི་ས་ཆ་འདི་ཁྱེད་ལ་འབུལ། འདིར་སྒྲུབ་སྡེ་ཞིག་འདེབས་རོག་མཛོད། ཟེར་ནས་སླར་མཚོ་དེ་ལ་ཐིམ་སོང་། དེ་ནས་སང་ཉིན། སྡེ་པ་ལ་མགོན་པོའི་རྗེས་གནང་གི་གྲབས་ཡུལ་ཚུགས་ནས། 
3-401
མ་གྲོལ་རིང་། བྱ་རོག་ཅི་ལས་ཆེ་ལ་སྣུམ་པ། ཀུན་གྱི་འདི་འདྲའི་བྱ་རོག་ཟེར་བ་གཅིག །བདེ་བ་ཅན་གྱི་གཡབས་ཟུར་དེར་སྐད་སྙན་པར་གྲག་འདུག །རྒོད་བྲོ་བའི་མཐོང་སྣང་ཞིག་ཀྱང་བྱུང་། རྗེས་གནང་གི་དུས་ཟིལ་གཞན་ལས་ཆེ་ནས། སྡེ་པ་ཡབ་སྲས། དྲུང་ཆེན་གཡབས་རིང་པ་གསུམ་ཡོད་པ། གསུམ་ག་སྐུ་འདར་ཞུམ་ཞུམ་འདུག །གྲོལ་ནས་མགྲོན་གཉེར་གཏོར་རྫས་སོགས་ཁྱེར་ནས་ཕྱག་ཕྱིར་སོང་། སྡེ་པ་ནས། བདག་ཆེན་ཐམས་ཅད་མཁྱེན་པ་དང་། རིན་པོ་ཆེ་སེམས་དཔའ་ཆེན་པོ་བྲག་དཀར་པ། རྡོ་རིངས་ཀུན་སྤངས་པ་སོགས་དགེ་བའི་བཤེས་གཉེན་མང་པོ་ལ་བཀའ་ཞུས་ཏེ། དོ་ནུབ་ལས་ཟིལ་ཆེ་བ་ཡོང་མ་མྱོང་གསུང་། དེས་ཐུགས་ཆེས་ནས་གསོལ་ཇའི་ཐོག །དྲུང་ཆེན་ཕྱག་ཕྱིར་ཡོད་པ་བྱས་ནས། རྒྱལ་བྱེད་ཚལ་འདི་ལ་སྒྲུབ་སྡེ་ཞིག་འདེབས་པ་ཡིན་པས། དེ་ཀའི་ཞལ་བདག་གནང་དགོས་གསུང་ཕུལ། དེ་ཡང་སྔོན་གྲུབ་ཆེན་ཀུན་དགའ་བློ་གྲོས་ཞེས་པ། ཤར་ཁ་པའི་ཞལ་ངོ་། བུ་སྟོན་རིན་པོ་ཆེའི་སྐུའི་སྤྲུལ་པ་དེ་མ་ཐག་པ་མཁས་གྲུབ་གཉིས་འཛོམ་དེས་ས་བྱིན་གྱིས་བརླབས་པ། གཙང་རང་གི་ཀླུ་སྡིངས་ལ་སྐྱིད་པར་གྲགས་པ། སེ་བ་དང་བསྐྲུན་ཤིང་གི་ནགས་ཡིད་དུ་མཆིས་པ། མྱང་ལུང་པའི་ལྟེ་བ། རི་བོ་ཆེན་པོ་ལྷ་ངོ་ཆེན་གྱི་ཞོལ། བཀྲ་ཤིས་ཤིང་གཡང་ཆགས་པའོ། །
3-402
སང་ཉིན་བཟའ་སྐར་བཟང་བས་ས་དྲས་སོ། །ངེད་འཕགས་རྒྱལ་དུ་ཡོད་དུས། ལ་ཕྱི་རྟོགས་ལྡན་པ་ནས། རྒྱལ་བྱེད་ཚལ་འདི་ཤིང་སྣ་འཛོམ་པོ། །གངས་ནས་ཁྱེད་ཀྱི་བཞུགས་སའི་འོས་སུ་ཡོད་གསུང་འདུག་པ་ལ། ངེད་ལ་མིས་མ་ཕུལ་བ་ལ་དེ་སྐད་གསུང་ཞན་འདྲ་བསམ་པ་བྱུང་། ཕུལ་བྱུང་དུས་ཁོང་གི་མངོན་པར་ཤེས་པའོ་སྙམ་མོ། །དེ་ཁའི་དབྱར་དེར་ཕྱིན་དུས། ངེད་ལ་བསྡིགས་པར་འདུག་སྟེ། ངེད་ཐལ་ནས་ཡུད་ཙམ་ལ་ཐོག་བབས་པ་འདྲོང་རྩེའི་ཟམ་གདོང་དུ་བྱུང་། དེ་དུས་མཁས་པ་དཔལ་མཆོག་པ། དགའ་གདོང་འབུམ་རམ་པ་དགེ་ལེགས་འབྱུང་གནས། ཞ་ལུ་རབ་འབྱམས་པ་ཤེས་རབ་བཟང་པོ་ལ་སོགས་པའི་དཀའ་བཅུ་རབ་འབྱམས་པ་བླ་ཆེན་པ་དང་། སློབ་དཔོན་བྱང་གླིང་པ་སོགས་སྔགས་དགེ །ལོ་ཙ་བ་སོགས་ཐ་སྙད་ལ་སྦྱངས་པ་ཅན་མང་བས་རྒྱུན་དུ་གསུང་རབ་ཀྱི་དོགས་དཔྱོད་བྱེད་པས་བློ་སྐྱིད་འཕྲལ་འཕྲལ་འཐོན། དེ་ལོ་བླ་བྲང་དང་སྤྱིལ་པོ་ཉི་ཤུ་ཙམ་གྲུབ། འཛིམས་དཀར་ཉི་མ་རབ་འབྱམས་པས་མགོ་བགྱིས་པའི་སྒྲུབ་པ་བ་བརྫངས་སོ། །ལེགས་གསུངས་འབྲུག་སྒྲ་འབུམ་གྱིས་འབད་པའི་ཤུགས། །མོས་པའི་རིམ་པ་གཡས་སུ་འཁྱིལ་བ་ནས། །དབྱངས་ཅན་མ་ཡི་སྐད་གསང་མཐོན་པོ་ཡིས། །ཕ་རོལ་ཉི་མའི་སྤུན་ལ་ཞུམ་པ་སྦྱིན། །དེ་ཡིས་མཐའ་བཞིའི་དགེ་འདུན་ཀུན་བསྡུས་པའི། །ངུར་སྨྲྀག་ཚོན་གྱིས་མཐོ་རིས་ས་དང་འོག །
3-403
འཇིག་རྟེན་གྲོ་གར་གྲགས་པའི་ཡིག་འཕྲེང་ངག །གསལ་པོར་བྲིས་འདི་རྟག་ཏུ་ཉམས་པ་མིན། ། དབྱར་ར་ལུང་སྤོས་སྐྱའི་སྟེང་ཙམ་དུ་སྒྲུབ་ཁང་བཟོས་པས། ད་ལྟ་དབྱར་ཁ་ཡིན། དགུན་འདི་འདྲར་སུས་ཚུགས། མར་ཁུ་གཞོང་གང་གི་སྟོད་དྲོས་འདིར་ཡང་། སྒྲུབ་ཆེན་ཤཱཀ་འཕེལ་བའི་ཤངས་ཐག་ལ་ཤོར་བ་ཡིན་གླེང་ནའང་མ་ཉན། གཞི་བདག་གིས་གཉའ་ཙམ་དེ་ནས་ཆུ་མིག་ཅིག་ཀྱང་སྡོད་རིན་བྱིན། དེ་དུས་གཙུག་ལག་ཁང་གི་རྩེར་བསྡད་པའི་དགོངས་ཤིག །སྤྲེའུ་གདོང་ལ་ལུས་མིར་སྣང་བ་ཞིག་ནང་དུ་འཚངས་བྱུང་། ཡིད་ལ་འདི་རྒྱལ་པོའི་བར་ཆད་དུ་སྣང་བས་དེའི་གཉེན་པོ་ལ། གུ་རུ་དྲག་པོ་བསྔགས་པ་ཡིན་བསམ་པའི་མོད། རང་ཉིད་བྱིས་པ་ལོ་བརྒྱད་ཙམ་སོང་བའི་བོང་ཚོད་ལ། །དྲག་པོ་རྩལ་ཁྲོ་བོའི་ཆས་ཐམས་ཅད་ཀྱིས་བརྒྱན་པ་ཡིད་ཀྱི་བསྒོམ་པ་ལས་ལྷག་པ་ཅིག་ཏུ་སོང་སྐབས། དེ་སྐད་ངན་འདོན་པ་དང་། དེའི་གྲོགས་ལྷ་འདྲེ་མང་པོ་སྣང་བ་རྣམས་ན་རེ། །ངེད་ཁྱེད་ལ་བར་གཅོད་མིན། གཙུག་ལག་ཁང་ལ་བསྐོར་བ་བྱེད་དུ་འོངས་པ་ཡིན། ཕྱིན་ཆད་ཁྱེད་རང་གང་གསུང་ཉན་ཟེར་དམ་བཅས་ཏེ་སོང་། ཕྱག་གཡས་ན་གནམ་ལྕག་ཀྱི་རྡོ་རྗེ་རྩེ་ལྔ་པ་ཞིག་ཡོང་རྒྱུ་ཡིན་པ་ལ། འདི་ན་གསེར་གྱི་རྡོ་རྗེ་རྩེ་དགུ་པ་ཅིག་འདུག་བསམ་ཡིད་མ་བདེ་བ་ཙམ་སྣང་། 
3-404
དེ་དུས་རྙིང་མ་ལ་དེ་ཙམ་དོ་གལ་མེད་པས་དབང་དང་དེའི་སྒྲུབ་ཐབས་ལུང་ཐོབ་སྟེ་དོགས་པ་མ་ཞུགས་བའི་སྐྱོན་དུ་འདུག །དེར་ཟླ་བ་དགུ་པ་ནས་བུག་སྒོ་འདག་སྦྱར་བྱས། འཕྲལ་གྱི་ཡོ་བྱད་བུག་སྒོ་ནས་བཏང་། ནང་དུ་སྤྱིལ་པོ་གསར་པར་སོང་། ཐག་ཆེ་བས། འབོལ་ལ་སོགས་པ་མེད་པར་བྱས། སྤེན་གདན་ལ་ཁ་གཡོགས་འཇག་སྟན་ཞིག་དང་། སྐུ་སྙེའི་དོད་ཀྲྀཥྞ་ས་རའི་པགས་པ་ཞིག་ལ་བྱས། གོས་གོང་ཕྲུགས་ལ་དབུས་སྣམ་སྲབ་མོ་ཞིག་གིས་རྒྱབ་བྱས་པའི་སྦྱར་མ་གཅིག་དང་རིང་འགག །ཐང་ཤམ། བླ་གོས་ཙམ་མིན་པ་གཞན་མེད་པར་བྱས། མཚམས་དོ་ནུབ་བསྡམས་པའི་སང་ཐོ་རངས་རྨི་ལམ་ལ། མདུན་དུ་ཐང་ག་ཆེན་པོ་ཞིག་བཀྲམ་བྱུང་། བལྟས་པས་དྲག་དམར་ཡང་དེའི་སྟེང་དུ་ཅིག་རྐྱང་བྱུང་། དེ་བལྟས་པས་གུ་རུ་ཞི་བ་པཎྜི་ཏའི་ཆས་སུ་མཛད་པ་ཞིག་སྣང་། ད་ལམ་དྲག་དམར་གྱི་བསྙེན་པ་ལེགས་པར་འདུག་བསམ། དཔེ་བཙལ་བས་མ་རྙེད། དེ་བྱས་ན་ཀར་འབྲུག་གི་འཁྲུག་པ་ཡོང་རྒྱུ་མིན་ངེས་པར་འདུག །རྒྱ་འདྲེས་ཁ་པོ་ཐོན་ལ་ཁད་བྱུང་། འོན་ཀྱང་ཁོ་ངེད་ཀྱི་ཚེ་ལ་བར་ཆད་བྱེད་པའི་ལུགས་སུ་འདུག་སྟེ་མ་ཚུགས་སོ། ། གཞན་དེར་དགུན་ཁ་བ་མི་ཕེབས་པར་འདུག་ནའང་། དེ་ལ་ཤིན་ཏུ་བབས་བུལ་ཆེ་ཡང་གྲང་སྣང་ཡེ་མ་བྱུང་། རླུང་རྩོལ་ཡང་ལེགས་པར་བྱས། 
3-405
ཐུན་མཚམས་སུ་དབུ་མའི་གཞུང་འཛིན་པ་དང་། འགྲེལ་པ་ལྟ་བ། ཐོག་མར་ཡི་དམ་གྱི་བསྙེན་པ་ཟླ་བ་གཅིག །དེ་ནས་མགོན་པོ་ལ་བསྙེན་པ་ཟླ་གཅིག །དེའི་ཟླ་ཕྱེད་ཙམ་ནས་རྨི་ལམ་དུ་རྦབ་ཐོ་རེ་བ་འོང་བ་བྱུང་ནས། ཞག་རེར་ཤུགས་ཇེ་ཆེར་ཐལ་ཏེ། ཉི་ཤུ་ཙམ་ན། རྫ་རི་ཕན་ཚུན་ཉི་ལ་བ། སེ་ར་དྲག་པོ་འབབ་པའི་སེར་བ་འཐབ་པ་ལྟ་བུའི་བར་དུ་འགྲོ་དགོས་པ་ཉག་གཅིག་བྱུང་ནས། གཉིད་ཉལ་བ་ལ་འཚེར་ཉེར་ལྔ་ནས་ཞག་ལྔའི་རིང་། འོང་དོན་མེད་པ་ལ་ཤིག་ནད། ཉི་མ་རེ་ལ་ཙམ་འཕེལ་འདི་འཕེལ་མེད་པ་ཤ་འབུས་གཡེངས་པ་ལྟ་བུ་ཞིག་བྱུང་། སྙིང་རྗེའི་རྟེན་ཡིན་སྙམ། དེ་དག་སོལ་སོལ་མ་བྱས། ཕལ་ཆེར་གཉིད་མི་ཡོང་། འོང་བ་ཡང་སྔར་བཞིན་འོང་འདུག་པས་འཛངས། ལྷག་པར་ཤིག་དྲིས་ཐོ་རངས་སྟོང་སྐྱུག་བྱེད་པ་ཞིག་བྱུང་། དེ་ལ་སུན་དྲག་ཟླ་བ་སོང་བ་དང་བསྙེན་པ་འཕྲོ་བཞག །འཇམ་དཀར་བཙུགས་པའི་སང་ཐོ་རངས་ཚུན་ཤིག་རྣམས་ཡོད་པ་ལ། ནམ་སང་ཙམ་ལ་གཉིད་ཐམ་ཐུམ་ཞིག་བྱུང་བའི་རིང་ལ་ཤིག་ཅི་ཡང་མི་འདུག །དྲི་ཞག་གསུམ་བསྡད་བྱུང་། དེ་དུས་ཀྱི་ཚེས་གསུམ་ལ་ཀོང་པོར་སྲུང་རི་ལ་དཀར་སྲིད་རྣམས་ཀྱིས་དམག་བརྒྱབ། ཁོང་ཚོ་ཡུལ་བཏོན་པར་འདུག །ཆོས་པའི་བཀག་པོ་རྣམས་བྱ་ཡུལ་དུ་འབྱོར། 
3-406
དེ་ལན་རྗེ་དྲུང་གི་མཛོ་ཁལ་རྣམས་ལྷོ་རྒྱུད་ཀྱི་གྲྭ་རིགས་རྣམས་ཀྱིས་འཕྱགས། བྱ་པས་བར་བྱས། སེམས་ཅན་རྣམས་འཕྲལ་མར་གཏད་འདུག་ཀྱང་ལབ་དན་ཇི་བཞིན་མ་བྱུང་། ཀར་འབྲུག་སྔར་དུད་པ་གདང་འབྲེལ་དེ་ནས་སོ་སོར་བྱས། ཆགས་ཆེ་ཉམ་ང་ཐམས་ཅད། དེར་འགྱུར་བར་འདུག་གོ །སྐྱེག་ཐོག་ཏུ་སླེབ། ངག་ཤིན་ཏུ་དམ། དེའི་རིང་ལ། ར་ལའི་རི་བོ་དེ། ཕོ་བྲང་ཕུན་སུམ་ཚོགས་པ། བལྟ་ན་ཆོག་མི་ཤེས་པ། སྤོས་སྐྱའི་རི། མདུན་གྱི་རྡོ་ཐེམས་ཀྱི་ཟུར་ཅོག་གི་རྣམ་པར་འདུག་པའི་ཁང་སྟེང་ན། ཁོ་བོའི་སྤྱིལ་པོ་འདུག་པར། མི་སྔོན་རྟ་སྔོན་རང་དགའ་རྒྱུ་མེད་ཙམ་སྣང་། དེའི་བུ་ལོ་ཉི་ཤུ་རྩ་གསུམ་ཙམ་འགྲོ་བ་གཅིག་དང་། བཅོ་ལྔ་ཙམ་ལོན་པ་ཡིད་དུ་འོང་བའི་ཚད་གཉིས་འདུག་པའི་རྒན་པ་དེ་གནངས་ཆགས་དང་། གཞོན་པ་དེ་ཐུན་མཚམས་གཉིད་ཟིམ་ཙམ་བྱུང་ཚད་ལ། བཟའ་བཏུང་གྱ་ནོམ་པ་ཁྱེར་ནས་འདྲེན་དུ་འོང་ལ། དགའ་དགའ་དུང་དུང་རང་བྱེད་པ་སྡོད་རིང་ཚང་མ་ལ་བྱུང་། དེ་ནས་རྨི་ལམ། ཁུ་ལེ་ཕྱོགས་མཐོང་བའི་རི་འདབས་དེ་ལ་ཕྱིན་པ་ལ། ལུང་པའི་ལྗོངས་ནོར་བུ་མཐོན་ཀའི་མདངས་ལྟ་བུ་ལ། གྲོང་ཁྱེར་གནམ་ལ་སྐར་མ་ཤར་བ་ལྟ་བུ། རིན་པོ་ཆེའི་རང་བཞིན་ཁྲ་ལྟེམ་ལྟེམ། གང་བཟང་དང་། ནོར་བུ་བཟང་བའི་རི་བོའི་ཐད་གཞལ་མེད་ཁང་གཟི་བརྗིད་མཚུངས་པ་མེད་པར་མཐོང་། 
3-407
དེར་ཟླ་བ་གཅི་གཙམ་ལ་ལྟས་ལེགས་པ་ཅི་ཡང་མེད་པ་ལ། ཐོ་རངས་རྨི་ལམ། ལྕེ་ཁ་ནས་ནར་གྱིས་འཐེན་པ་འདྲ་ཞིག་ལ། རྩ་བ་ཁ་ནང་ན་ཡོད་པ། རྩེ་མོ་ཐང་ཡངས་པ་ཞིག་ཏུ་སོང་ནས། སྐད་ཅིག་ལ་རྨོད་མཁན་མང་པོ་འཚོགས་ནས། ཕར་རྨོད་ཚུར་རྨོད་བྱས་པ་ཡུད་ཙམ་བྱུང་། གཉིད་སད་ཙ་ན་རྟོག་པ་ཤིན་ཏུ་ཟ། ཙིས་ལན་བརྟགས་པས་མྱུར་བས་སྔགས་མ་དག་པར་ཤེས་ནས། བརྗོད་པ་དལ་བ་དང་། གུག་ཀྱེད་རིང་ཆ་ཀུན་ཚུལ་བཞིན་དུ་བསྒྲིམས་སོ། །ནུབ་གཅིག་ལུས་ལ་སྦལ་པ་ནག་པོ་མདོངས་དཀར་འཁྱིལ་ཡོད་པ་ཞིག་རྒྱངས་འཐོན་སོང་བ་རྨིས། དེ་ཕན་ལུས་ལ་ཤ་བཀྲ་ཐུབ་ཅིག་བྱུང་། སྨན་དཔྱད་ནི་བྱས་ཀྱང་མ་ཕན། དེ་ནས་ཞག་གསུམ་ཙམ་ལ་རང་ལ་དྲག་པའི་མགོ་བཙུགས་ནས་བཅུ་ཙམ་ལ་གསོས། དེ་ཡང་སྔོན་གཞན་གྱིས་ཀླུ་ལ་གཏད་པ་ཙམ་གྱི་རྟེན་འབྲེལ་དུ་འདུག་གོ། །དེའི་སྐབས། ས་རུབ་མཚམས་ཞིག་ལ། སྤོས་སྐྱའི་ཚེ་རིང་སྒང་ན་ཁྲོམ་ཆེན་པོ་སྣང་། ལྟ་བའི་མོད་ལ་འུར་ཏིང་སོང་ནས། རི་དགས་ཡིན་པ་འདྲ་བསམ་མཚམས། བྱ་རོག་ཁྲི་ཙམ་དུ་སོང་འདུག་པ་ནམ་མཁའ་ལ་ལྡིང་ནས་ཤར་ཕྱོགས་སོང་། དེ་མཐུན་ནུབ་མོ་རྨི་ལམ་ལ། ར་ལུང་མགོན་ཁང་ནས་དམག་མང་པོ་བཏེག །སྒོ་མོའི་ཐང་ཁྲིག་གང་བ་ཙམ་སྣང་། གོ་རྩེ་བྱས་ནས་བཙོ་ཆེན་པོ་ཞིག་ཏུ་བྱས་ཏེ་ཕྲག་ཡུལ་དུ་སོང་བ་རྨིས། 
3-408
ཆེད་དུ་མ་རྦད། ཟུར་གདོང་སློབ་དཔོན་པ་མགོན་གསར་ལ་དམག་རྒྱག་པའི་ལྟེ་བོར་སྣང་བ། དེ་ནས་ཟླ་བ་བཞི་ཙམ་ལ་ཤི །འཇམ་དཀར་རང་གི་རྟགས་རྨི་ལམ་དུ། །སྣག་ཚ་འཐུང་བ་དང་། འཇམ་དབྱངས་ཀྱི་སྐུ་རི་མོར་བྲི་བ་སོགས་ལྟས་མང་པོ་བྱུང་། ཟླ་བ་གསུམ་སོང་བའི་ནུབ་མོ། རི་ཤིན་ཏུ་མཐོ་བའི་རྩེ་ན་སྒྲུབ་ཁང་ཞིག་བྱས། དེའི་བླ་གཡེའི་མཐའ་ནས་ཕར། བཀའ་བོད་དུ་འགྱུར་རོ་ཅོག་གི་པོ་ཏི་བསྒྲིགས། ངེད་རང་ཁ་ཤར་དུ་བལྟས་ནས་མཐར་ཆགས་ཀྱིས་འཛིན་འདུག །ཀུན་ཁོང་དུ་ཆུད་པའི་ལུགས་བྱས་པའི་མཐར། པོ་ཏི་གཅིག་ལ་གཅིག་ཐིམ་ནས་རྔ་བོ་ཆེ་གཅིག་ཏུ་སོང་བ་བརྡུངས་པས་འབྲུག་ལས་སྐད་ཆེ་བ་རྨིས། དེ་མཁས་པ་དང་མཁས་གྲགས་གཉིས་ག་ཡོང་བའི་བརྡར་གོ། །གཞན་དེར་ནུབ་གཅིག་མི་དཀར་རྟ་དཀར་ཞོན་པ་ཇུ་ཐིག་བསམ་གྱིས་མི་ཁྱབ་པས་བརྒྱན་པ། འོབས་ཞུ་དང་། ཚེ་རིང་བྱའི་རལ་གུ་གྱོན་པ། འཁོར་མང་པོས་བསྐོར་ནས་སླེབ་བྱུང་སྟེ། ཁོ་བོ་ལ་ཕྱག་བཙལ། ངེད་དམར་ཆེན་སྤོམ་ར་ཡིན་ཟེར། སླར་ལོག་སོང་། ཕྱིས་དེ་སྡེ་སྲིད་ཀྱི་ཏི་ཤྲིར་ཁུར་བ་ལ་བལྟ་བ་འདྲ། དེར་ལོ་གྲོ་གཡང་རི་པའི་དཔོན་མོ་ཡིན་ཟེར་བའི་བུ་མོ་བཞིས་དགེ་བསྙེན་ཞུས་པ་ངན་ནེ་མ་མཆེད་བཞིར་སྣང་། དབྱར་ཆོས་དགོས་ཟེར་བ་རྣམས་ལ་བུག་ཆོས་བྱས་སོ། །
3-409
དངོས་པོའི་ནགས་ཀླུང་འཐིབས་པོ་འདིར་ཆགས་པའི། །སྲིད་ཞེན་རི་དགས་རྣམས་ཀྱི་རྒྱུད་གཅོད་པ། །སྒྱུ་འཕྲུལ་རྡོ་རྗེའི་འཕོང་མཁས་འདི་ཡི་མཐུས། །དཔལ་གྱི་བོའི་ཕྲག་པ་བརྡལ་བ་སྙམ། །ཐབས་ཤེས་རི་ཁྲོད་མ་གཉིས་གྲོགས་བསྟེན་ནས། །གནམ་གྱི་ཞེང་སྲིད་རྔོན་ལ་ཆས་གྱུར་པ། །དེ་ཡིས་གཟུང་འཛིན་ཁྲག་རྣམས་འཐུང་པའི་མཐར། །རྣམ་བཅས་ཤ་ཡང་དམིགས་མེད་ཟ་ལ་ཉེ། །ལོ་འཁོར་བ་དང་མཚམས་གྲོལ། གཞན་བྱ་བྲལ་བྱེད་བརྩིས་ལ། ཀར་འབྲུག་དན་མ་ཁྱོལ་བས་མི་བཏུབ་པ་འདུག་བསམ་ནས་འཐན། བྱ་སྐུར་གྱིས་ཀར་འབྲུག་སྒྲིག་ཚོམ་བྱེད་རྒྱུའི་མི་སྣ་བྱུང་། དན་མ་ཁྱོལ། ལྷ་ས། གུང་ཐང་། གསང་ཕུ་སོགས་ལ་གསེར་སྲང་དོའི་ཞལ་གསེར་སྣམ་སྦྱར་སོགས་འབུལ་བར་ཆོས་རྫོང་མཁན་པོ་བརྫངས། གཙང་གཞུང་དུ་སླེབ། རྒྱལ་བྱེད་ཚལ་དུ། སློབ་དཔོན་དཔལ་མཆོག་པ། ཆོས་རྗེ་གྲགས་པ་ཐོགས་མེད་པ་སོགས་དགེ་བཤེས་མཁས་པ་རིམ་པར་བྱོན་པ་ལ། འདུལ་མངོན་གྱི་དོགས་དཔྱོད། ཆོས་བཤད། ཡོངས་འཛིན་ཏེ་ཆུ་ཕོ་བྱི་བའི་ལོ་གསར་མཚམས། བདེ་མཆོག་གི་བསྙེན་ཆེན་བྱས། ལྟས་བཟང་པོ་བྱུང་། དེ་དུས་ཀརྨ་པའི་ཕྱུགས་འཕྱགས་པའི་ལན་དུ། སྐུ་རབ་པས་ཅིག་ཅར་པ་ལ་ནག་ཡིག་བཀྱེ། སྐྱོ་གོ་པ་སླད་ནས་གསང་བཙལ། གདན་ས་སྤང་ཆེན་གྱི་གསེར་འབྲུ་འདྲེག་པ་སོགས་བྱས། དེ་ཁོང་ཚོས་མ་ཐེག་སྦྱིན་བདག་གིས་རོགས་རམ་བྱེད་མ་ནུས་པས། 
3-410
ལྷོ་རྒྱུད་དུ་དོན། ལམ་ཞོར་ཡུལ་སྟོད་ཀྱི་སྤང་མོ་བསྲེགས། སླར་སྐྱོ་གོ་པས་སྤང་ཆེན་བདུན་བསྲེགས། དེའི་ལན། ལྷོ་རྒྱུད་སྤྱི་སྒོས་ཀྱིས་བླན་པས། མ་ཆེན་པ་ལྟོ་ལས་སྒོས་འབྱིད་དགོས་པས་བརྡུང་གཏག་ལན་གཉིས་གསུམ་མ་ཕོག་པ་མ་བྱུང་བས། གཉིས་ཀའོ་བརྒྱལ་བར་གྱུར་ཏོ། །ཅིག་ཅར་པ་རྣམས་ངེད་ཀྱིས་ཡར་བོས། ཆོས་རྗེ་རྡོ་རྗེ་འཛིན་པ་རྒྱལ་བྱེད་ཚུན་བྱོན་ནས། གོང་དཀར་དུ་སྤྱན་དྲངས། དེ་དུས་བདག་མོ་སྐུ་གཞོན་པའི་བླ་མར། ཕྱིས་ཞབས་དྲུང་གདུང་བརྒྱུད་རིན་པོ་ཆེ་ཡུམ་སྲས་ཀྱི་བླ་མར་སོང་བས། སྒྲོག་རུས་ཆག་པ་གྱད་དུ་སོང་། །སྐུ་རབ་མངའ་ཞབས་སུ་ཡང་། གནས་སྲུང་གཉན་པས་མི་དགེ་བའི་མཚན་མ་ཐོ་རེ་བྱུང་འདུག ། དེའི་སོས། སྡེ་སྲིད་ཁུ་དབོན་ནང་གཤགས་ནས། སྐུ་རབ་པ་དབུས་སུ་འགྲོ་དམིགས་ཆེ་བར་བྱུང་དུས། ཐམས་ཅད་ཀྱིས་ལས་རྒྱུ་འབྲས་ལ་བརྡའ་ཆད་མེད་པ་འདྲ། ཙ་རི་ལྟ་བུའི་གནས་ལ་ཞབས་འདྲེན་འདི་འདྲ་བྱས་ནས་སྐུ་རབ་པ་རྒྱལ་བ་ཟེར་གླེང་སྐབས། ནུབ་གཅིག་ངེད་ཀྱི་རྨི་ལམ་ལ། ཀློ་འདྲ་ལ་འདོམས་དཀྲིས་ཤིང་ལོས་བྱས་པ་མགོ་ལ་གཅན་གཟན་གྱི་ལྤགས་ཞྭ་ཁྱ་བ་གྱོན་པ་གཉིས་བྱུང་ནས་ཡི་གེ་སྤྲད་བྱུང་། བཀླགས་པས། ངེད་ཙ་རིའི་རིགས་འཛིན་ཐམས་ད་སྐྱོབ་ཆེན་དུ་འཚོགས། ལོ་གསུམ་ན་སྐུ་རབ་པ་ལ་གནད་སྤྲོད་སྒོ་གང་ཟབ་ལྟ་བ་ཡོད་པས་ངང་མ་ཐུང་ཟེར་བ་བྱུང་། 
3-411
ཐམས་ཅད་ལ་བཤད། གཏོར་མ་རེ་ཙམ་འཕངས་པ་ན་ལྟས་ལེགས་པར་འོང་གི་འདུག །དེར་བྱ་གཤོངས་ནས་གྲངས་ཅན་རབ་འབྱམས་པ་དང་། དཔལ་སྡིངས་རབ་འབྱམས་པ། གསེར་མདོག་ཅན་ནས་རབ་འབྱམས་པ་འཇམ་བློ། ཞ་ལུ་རབ་འབྱམས་པ་སོགས་ཆོས་དང་སློབ་གཉེར་དོན་གཉེར་མང་། ཞ་ལུ་རབ་འབྱམས་པ་ཤེས་རབ་བཟང་པོ་འབུམ་འཛིན་དུ་བཅུག ། ཉིན་མཚན་འབེལ་གཏམ་ཆོས་ཀྱིས་འདས། པ་སྣམ་ནང་ཟིངས་ལ་བརྟེན། མྱང་དམག་མཁར་དགར་ཡོད་པ་ལ། དགོངས་གཅིག་རྨི་ལམ་ན། བཙུན་པ་གཱ་ཡོད་པ་ཆེན་པོ་ཅིག་བྱུང་ནས་ཕྱག་འཚལ་སྣང་། སུ་ཡིན་དྲིས་པས། ལྷན་བ་སོའི་རྒྱལ་པོ་ཡིན་ཟེར་། ཅི་ལ་ཡོངས་དྲིས་པས། ཁྱེད་ཉ་མོ་ལ་ཐོག་ཏུ་ཕེབས་དུས། ངེད་ལྷ་འདྲེ་མང་པོས་དགེ་བསྙེན་ཞུས། སྡིག་པ་སྤངས་པ་ཡིན་ཏེ། ད་རེས་མྱང་སྟོད་པས་བ་སོའི་དགོན་པ་བཅོམས། བཙུག་ལག་ཁང་བསྲེག་པ་ལ་ཐུག་དུས། འབྲོང་རྩེ་བས་བསྐྱབས་བྱུང་། གཞན་རྣམས་མ་རིགས་པས། ལན་བླན་ཆོག་གམ་ཞུར་འོངས་པ་ཡིན་ཟེར། འོ་ན་བཙུག་ལག་ཁང་གི་སྲུང་མ་ཡིན་པས་ཅི་དགའ་བ་བྱས་ཆོག་བྱས་པས་མྱང་སྟོད་པའི་མི་ཉི་ཤུ་ཙམ་དུག་གིས་ཤི་སྣང་། གཞན་ཁོ་རང་ཇི་ལྟར་ཟེར་བ་སང་ཉིན་སྐད་ཆ་བྱུང་། ཡང་ནུབ་གཅིག་རྨི་ལམ་ན། མཐུ་འོང་གི་འདུག་གོ་ཟེར་ཤིན་ཏུ་འཛངས་པ་ན། མོན་མོ་རས་གོས་རམ་ཁ་གྱོན་པ་ཁ་ཆེ་སྣ་ཉག་པ་ཅིག་ནས ། 
3-412
ཁྱེད་ནཱ་རོ་པའི་དུས་ཀྱི་ཆོས་སྐྱོང་ང་ཡིན། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ངའི་སྙིང་པོ་འདི་ཐོན། དམིགས་པ་བྱེད་ལུགས་འདི་ལྟར་གྱིས། །བར་ཆད་བཟློག་པར་ཐེ་ཚོམ་མེད་ཟེར། དེ་སྔ་སེང་གདོང་མ་ཞུ་མྱོང་ཙམ་ལས་ཏིག་ཏིག་མེད། དེ་ཁ་བཞིན་བྱས་པས་བར་ཆད་མ་བྱུང་། དེར་ལྷ་མཐོངས་ལོ་ཙ་བ་བཤེས་གཉེན་རྣམ་རྒྱལ་བལ་པོར་ཕྱིན་པ་འཁོར། ངེད་ཕྲད་པར་བྱུང་དུས། པཎ་ཆེན་ཤཱཀ་མཆོག་པ་དང་། ཇོ་ནང་པའི་གཞན་སྟོང་ལ་ཁྱད་ཡོད་མེད་དྲི་བ་ལ། པཎ་ཆེན་གྱི་བཞེད་པ། སེམས་ཙམ་རྣམ་རྫུན་པའི་ལུགས་གཙང་མ་ཡིན་ཚུལ། ཇོ་ནང་པ་སྔགས་དང་བསྲེས་ནས་འཆད་ཀྱི་འདུག་པའི་ཁྱད་པར་ཞིབ་གསད་ཅིག་བྱས་པས། ལུགས་གཉིས་སིབས་ཕྱེད་ཅེས་ཡིད་ཆེས། ས་གར་ཡང་། ངེད་མཁས་པའི་དཔེར་འདྲེན་པ་ཞིག་བྱུང་། དབྱར་ཀོང་པོ་འཚོ་བྱེད་ཆོས་བསམ་གྲུབ་ཀྱིས་རིལ་ནག་ཆེན་མོ་སྦྱར། དེའི་རབ་གནས་བྱེད་དུས། ཁྱེའུ་ཆུང་ལོ་བརྒྱད་ཙམ་ལོན་པ་ལྔ་སྨན་གྱི་གལ་ཏ་ཕྲག་པར་བཀལ་བ་དང་། བུ་མོ་ལོ་བརྒྱད་ཙམ་ལོན་པ། རྨ་བྱའི་སྒྲོ་ཐུལ་གྱོན་པ། སྨན་གྱི་པར་བུ་ཐོགས་ཏེ་ཁོ་བོ་ལ་དགའ་དགའ་བྱེད་པ་རྨིས། སྨན་གྱི་དྲང་སྲོང་སེར་སྐྱ་སྤུན་ལྔ་སྲིད་མོ་དང་བཅས་པར་ཤེས། ཕྱིས་སྨན་དཔྱད་མཐོང་བ་ཙམ་གྱིས་མཁས་པར་ཤེས་པའི་རྟེན་འབྱུང་དུ་གོ། །སྟོན་འབྲོང་རྩེར། ཚེ་དབང་དང་གཏོར་སྒྲུབ་ཅིག་ལ་ཕྱིན། །
3-413
སང་རྒྱལ་བྱེད་ཚལ་དུ་ལོག་འགྲོ་རྒྱུའི་རྨི་ལམ་ན། ཕྱོགས་ཤར་ནས་བཙོ་ཅིག །ངེད་ཀྱི་ཁར་ཡོང་འདུག་པ་ལ། ངེད་རྒྱལ་བྱེད་ཚལ་དུ། དུས་འཁོར་གྱི་སུང་འཁོར་སྒོམ། དཔལ་གུར་གྱི་མགོན་པོ་རྣམ་འཕྲུལ་གྱི་གཎྜི་ལ། ལཱཉྩ་ཧྲམ་མེར་ཡོད་པ་བསྣམས་པ་ཞིག་ཤར་དུ་ཞལ་གཟིགས་བཞུགས་སྣང་། དེར་མགོན་པོ་དེ་ནས། ང་ཁྱོད་ཀྱི་བར་ཆད་སྲུང་བ་ལ་འོངས་པ་ཡིན་ཟེར་རྨིས། སང་ཚ་རྟིང་མའི་ཁར་འགྲོ་བསམ་མེད་པ་ཞིག་ལ། སྡེ་པ་ནས། མགོན་ཁང་དུ་ཕྱག་ནས་དགོས་ཟེར་ཕྱིན། དབྱིབས་འདྲ་བར་འདུག །རྨི་ལམ་གྱིས་གསལ་བཏབ་པས། མགོན་པོ་ལ་བར་ཆད་བཟློག་བའི་འཕྲིན་ལས་བཅོལ། དེར་ཆོས་སྐྱོང་རང་གིས་བཀུག་པར་འདུག །མགོན་པོ་དེ་ཡང་། འབྲོང་རྩེ་ཆོས་རྗེ་ནུས་པ་ཅན་དེས་བཟོ་བོ་བཀུག །མགོན་པོ་ཕྱག་དྲུག་པ་བཞེངས་བརྩིས་ལ། ལྡེར་བཟོ་བ་ལ་མགོན་པོ་བཞེངས་ཙམ་གསུངས་ཁོང་ཡང་ས་སྐྱ་པ་དང་། འབྲེལ་ཆགས་པ་ཞིག་སྟེ། མགོན་པོ་ཟེར་ན་གུར་ལས་འོས་མེད་སྙམ་བཞེངས་གྲུབ་པ་དང་། བཤིག་པས་ནི་མ་བྱུང་། དེ་དུས། བདག་ཆེན་རིན་པོ་ཆེ་རྒྱ་གར་བྱང་ཆུབ་སེམས་དཔར་གྲགས་པ། ས་སྐྱ་པའི་ཞལ་ངོ་ཕྱིས་བྱོན་པའི་མཐུ་སྟོབས་ཆེ་ཤོས་དེ། རྩེ་ཆེན་དུ་ཕེབས་པའི་གདོང་དང་འགྲིག་ལམ་དུ་སྤྱན་དྲངས་རབ་ཏུ་གནས་པ་མཛད་པ་ཞིག་གོ །ལོ་ཆེན་རཏྣ་བྷ་དྲ་དེ། 
3-414
ཆོས་རྗེ་ལོ་ཆེན་རིན་ཆེན་ཆོས་སྐྱོང་བཟང་པོ། མཁས་གྲུབ་ཨུ་རྒྱན་རྫོང་པ་སོགས་ལ། དུས་གསང་གི་རྒྱུད་ལེགས་པར་གསན་པར་ཐོས། རྒྱལ་བྱེད་ཚལ་དུ་སྤྱན་འདྲེན་དུ་བརྫངས་པས། དེར་སྒྲུབ་སྡེ་འདེབས་ན་ཡོང་གསུང་། ངེད་རང་ཀྱང་བྱ་བྲལ་གཞན་ལ་བརྟེན་པ། དེ་བསྒྲུབ་དཀའ། དེ་ནས་རིང་པོ་མ་ལོན་པར། རྗེ་ཀློ་བོ་འབྲོང་རྩེར་ཕེབས་བྱུང་། དེ་དུས་ངེད་ཀྱིས་ཇ་ཞུས་ལ། ཞ་ལུ་སློབ་དཔོན་བྱང་གླིང་པ་སྐུ་གཞོགས་སུ་བརྫངས་པས། རྗེའི་བཀའ་ལས། ཕ་ལོ་ཆེན་ལ་བར་ཆད་བྱུང་ནས་གྲུབ་མཐའ་འགྱུར་ནས་མེད། ཕུད་ཀྱང་བད་པ་བཞེས། དེ་གཟིགས་ན་ཐུགས་དད་ལོག་ཡོང་། རྒྱུད་བཤད་ཐོན་པའི་ན་མ་མེད། ཕེབས་ན། ངེད་ཀྱིས་བྱང་བདག་པོ་ལ་ཞུས། ཞབས་ཏོག་ཏུ་འགྱུར་བ་བྱེད་དེ། མ་ཕེབས་པ་དྲག །འདིར་ཡང་གདན་མ་འདྲེན་གསུང་འདུག་སོགས་ཞིབ་ལ་རྒྱས་པ་བསྐྱར་བྱུང་། དཔོན་སློབ་ཡིན་པས་ཐུགས་རྒྱུས་ཆེ་བསམ་འཐེན། བརྟགས་ན་གསུང་དེ་དགོངས་པ་ཅན། བཤད་པ་རང་སྙེལ་འདུག་སྟེ། མཛད་ལུགས་དཔེར་འོས་པ་ཞིག་ཡོད་པར་འདུག་སྟེ། དེ་ཁས་རྟེན་འབྲེལ་མ་འགྲིག །སྟོན་གཞུག་འཕྱོང་རྒྱས་སུ་ཤོག་གསུང་ཕྱིན། བདེ་སྐྱིད་གླིང་དུ་སླེབ། སང་སྡེ་པ་ཧོར་བསོད་པ། ཚོང་འདུས་བྲག་ཁར། རྗེ་ཀརྨ་པའི་ཕྱགས་ཕྱི་མཛད། དབུས་དགས་ཀྱི་འཆིངས་སྦྲེལ་ནས་ཕྱིར་བྱོན། དགའ་སྟོན་རྒྱས་པ་མཛད། རིམ་པས་འཕྱོངས་རྒྱས་སུ་ཕེབས། 
3-415
སྡེ་པ་སྐུ་འཁོར་བྱ་ཡུལ་བའི་སྟེང་དུ་དམག་ལ་བྱོན་སོང་། མཚན་ཇུས་ཚར་ཅིག་ལ་ལེགས་རབ་སོང་། རྒྱང་པ་ན། ཉེས་པ་སྐྱོར་བའི་དམག་དགུ་བསྡུས་སུ་བསགས། དེ་དུས་བྱ་པའི་དམག་བསེ་ཁུན་དུ་འབྱོར། གཉིས་ཀ་ནས་འཆིངས་ལ་ཤོག་ཟེར་སྐབས། སྣེ་གདོང་རྩེ་ནས་མིའི་དབང་ཕྱུག་ཆེན་པོས་ཆོས་བཞིན་དུ་སྐྱོང་བ། ངག་གི་དབང་ཕྱུག་བཀྲ་ཤིས་གྲགས་པ་རྒྱལ་མཚན་དཔལ་བཟང་པོས་ཤོག་གསུང་། འོད་གསལ་གླིང་དུ་ཞག་གསུམ་བསྡད་། ཆོས་རྗེ་ལུང་བསྟན་རྡོ་རྗེ་ཆེ་འདོན་བྱས། དེ་དགོངས་རྨི་ལམ་དུ། འཕགས་པའི་གནས་བརྟན་བཅུ་དྲུག་གི་ནང་ན་བཅུ་བཞི་དངོས་ཡིན་སྙམ་པ་ཞིག་ལ། མཐར་སི་ཐང་ལེགས་པོ་བཅུ་བཞིར་སོང་བ་བྱིན་བྱུང་བ་རྨིས། སང་ཁྲ་འབྲུག་ཏུ་སྨོན་ལམ་འདེབས་དུས། ལྷ་ཐམས་ཅད་གཟུགས་བརྙན་ལས་འདས་པ་མངོན་སུམ་པར་ཡུད་ཙམ་པ་ཞིག་མཐོང་། དེ་ནས་རྩེར་སླེབ། རྟེན་འབྲེལ་གྱིས་སང་གསོལ་ཐོག་ཏུ་མཇལ། ཚ་རྟིང་མའི་ཁར། ཚེ་དབང་ཕུལ་བ་བརྒྱ་རྩ་དང་། སྒྲོལ་དཀར། འབྲུག་ལུགས་ཀྱི་རྟེན་འབྲེལ། རོ་སྙོམས་སྒང་དྲིལ་སོགས་བཀའ་ལུང་འགྲོ་གང་ཆེ་བྱས། ཞག་བཞི་བསྡད། རྒྱུན་རིང་པོར་བསྡད་ན་དགོངས་པ་འདུག་སྟེ། འཆིངས་དགོས་པས་འབོད་མི་ཡང་ཡང་སླེབ། དེར་སྡེ་སྲིད་ནས། ཡར་ཤར་ནུབ་པའི་མི་རིགས་འདི་ཡུས་པ་རང་ཞིག་ཡོད་པས། ཐུགས་སུན་ཙམ་འོང་སྟེ། འཆིངས་ལུགས་འཐོན་རྟིང་དགེ་བ་ཆེན་པོ་ཡོང་བར་འདུག་གསུངས། 
3-416
སོས་ཆོས་རྗེ་ཀརྨ་པ་ལ། སྡེ་སྲིད་ཀྱིས་གསུང་ཆོས་གསན་འདུག་པ་ལ། ཕྱགས་ཕྱི་བ་འགས་ལེགས་ཚོགས་བྱུང་ཞེས་དུས། རྗེའི་ཞལ་ནས་བྱ་པ་སྤྲུལ་སྐུ་ལ་ཆོས་ཞུས་རྗེས། ངེད་ལ་ཞུས་པ་ལ་དགའ་ཚོར་མེད་གསུང་ལོ་ཞེས་གྲགས། ཡར་སླེབ་འཕྲལ་ལ་བཏེག །གཡའ་བཟང་ཆོས་མཛད་འཇམ་དཔལ་བཟང་པོས་གྲི་གུ་པ་སྦྱོར་གཏོད་བྱས། གྲི་གུར་ཞག་གསུམ་བསྡད། དགུ་བསྡུས་སུ་སླེབ། སོ་སོའི་དམག་གྱེས། འཕྱོང་རྒྱས་སུ་བས་བུད་སྙིའི་བུ་གཏེ་གཏོས་ཆེ་བ་འདུག་པ་སླར་སློག །ཞང་དབོན་ལྷད་མེད་མཛད་བརྩིས་ཀྱི་མཇལ་འཛོམ་དབུ་མནའ་ཞུས། ཕྱིས་དེ་རང་གི་ཁར་གཉིས་ཀས་མ་གནས་ཏེ། དེ་ནས་ཕན་ཚུན་སྒེར་གྱི་དཔུང་ཁྱེར་ཁྲིད་མ་བྱུང་ཕྱི་ལེ་སྣ་མོར་འཕྱོང་ཡར་གྱི་དམག་བུབ། དེ་ནས་སྐུ་རབ་པ་དང་རྒྱ་རི་པས་འཕྱོང་རྒྱས་སུ་དམག་འཇུག་ཟེར། བྱ་ཡུལ་དུ་དམག་བསྐུལ་སླེབ། འབྱོན་སྤྲོ་བར་འདུག་ཀྱང་ངེད་ཀྱིས་བཀག་པས་སྔ་མ་བྱ་པ་དང་། ཕྱི་མ་འཕྱོང་རྒྱས་པ་ལ་ཞབས་ཏོག་ཏུ་སོང་། དེ་དུས་རྒྱ་རི་ནས་སྡེ་པ་དང་། སྒོ་པ་སོགས་བྱ་པའི་ཕྱགས་ཕྱིར་འདུག་པ་ལ་མཆོད་ཡོན་ཉེ་བར་བྱུང་། དེ་ནས་བཀྲ་ཤིས་མཐོང་སྨོན་དུ་སླེབ། ཆུ་མོ་གླང་ལོ་དེའི་སོས། བཀྲ་ཤིས་མཐོང་སྨོན་གྱི་གཙུག་ལག་ཁང་། རྗེ་གོང་མས་འདེབས་པ་གནང་དུས། སྡེ་གཟར་སྟབས་ཀྱིས་རྨང་གཏན་པོའི་མེད་པ་ལ་བརྩེགས་མ་མང་བས་ཀ་འཆོལ་གྱིས་གང་འདུག་པ་མི་ལེགས་པར་བསམ་ནས་ཞིག་སོས་བྱེེད་པར་ཐག་བཅད། 
3-417
ཤིང་ཆ་རོང་རི་ནས་དྲངས་ན་མི་སེར་སྦྱོར་བ་ལས་མི་འདུག་བསམ། ཉེ་ཀོར་གྱི་བསྐྲུན་ཤིང་ཐམས་ཅད་བལྟར་བཏང་ཞིང་། སྤུས་གཙང་བ་ཐམས་ཅད་ལ་ཁ་དམར་བཏགས། དེ་ནས་བདག་པོ་ཚོ་ལ་ཚོང་མི་ཚོང་གི་དབང་མེད་རིན་གཞན་ལས་ཆེ་བ་བྱས། ཉི་མ་གཅིག་རང་ལ་གསེར་རྐྱང་རྩིས་ཞོ་བརྒྱ་དྲུག་ཅུ། བྱི་རུ་རྡོག་པོ་དཀྲུགས་མ་ཆེ་ལེགས་དྲུག་ཅུ། སྤོས་ཤེལ་སྲུབས་མ་སྤུས་གཙང་བ་བརྒྱ་ཙམ། གོས་སྣམ་སོགས་གང་ལ་གང་མཁོ། ཀ་ཆེན་རེ་ཉན་པ་ལ་གསེར་ཞོ་གསུམ་མའི་བརྩིས། གཞན་དེས་ཤེས་པས་ཤིང་རིན་དེ་ལོ་རང་ལ་འགོང་རྒྱབ་ཀྱིས་གསེར་ཞོ་སྟོང་གི་བརྩིས་ཙམ་སོང་། དེ་ནས་ཀྱང་མ་ལྡངས་པར་ལོ་ཕྱི་མ་དང་ཡང་ཕྱི་མ་ལ་ཞོ་ཉིས་བརྒྱ་ཙམ་རེ་སྤྲད་ནས་ཉོས། གཞན་ལོ་ཙ་པ། ཏིང་ཏིང་ནས་བགྲེས་པོ། ཞེ་བོ་པ་སོགས་ཀྱིས་འབུལ་མཁན་ཡང་མང་དུ་བྱུང་། ཆོས་སྡེ་རང་ན་འདུག་པ་རྣམས་ཀྱང་བཅད། ཤིང་ཀ་གདུང་རྣམས་དྲངས། དེ་ནས་ཡང་རྩེར་དཔོན་ས་སྐུ་བགྲེས་པས་ཕོགས་ཕུལ། དེར་ཕྱིན་རྗེ་གོང་མའི་དུས་སུ་ཕུབས་ཙམ་མཛད་པའི་འདུ་ཁང་ཀ་བ་སུམ་ཅུ། གཙང་ཁང་ཀ་གཉིས་གཡས་གཡོན་དུ་མགོན་ཁང་སྤྱི་མཛོད་ཡོད་པའི་གཙུག་ལག་ཁང་སྤུས་ཤིན་ཏུ་གཙང་བ་ཞིག་འདུག་ཀྱང་། བར་དུ་བདག་རྐྱེན་མེད་པས་ཆུས་ཟོས་འདུག་པ་གསོས། 
3-418
ཞལ་བ་སྤེན་བད་ལེགས་པར་གཟོས། སྐུ་རབ་གནས་ཀྱི་དམག་ཀོང་པོར་ཕྱིན་པ་བུབ་པ། སྔ་རེས་ངེད་ཚང་དང་ལབ་བྱས་ན་ལེགས་པར་དགོངས་ནས་དྲུང་ནས་ནོར་བཟང་པ་ལབ་མིར་འབྱོར། སྡེ་པ་ཡབ་ཡུམ་གཉིས་ཀྱིས་ནས་མོར་ཕེབས་ནས་གཅོད་རྒྱ་མཛད་པ་ལ་གནས་གསར་རྙིང་དེ་ཁར་དན། སྐུ་རབ་ནས། སྔར་བཤིག་པའི་སྤང་མོ་ཐམས་ཅད་སྔར་བཞིན་བཟོ་དགོས་རྒྱུ་ལ། དེར་འུ་ལག་པ་སླེབ། སྤང་ཆེན་རམ་པ་གྲུབ་དུས། རྗེ་དྲུང་མི་བསྐྱོད་རྡོ་རྗེ་མཚོ་དཀར་དུ་འཕྲིན་ལས་མཐའ་མར་ཕེབས་པའི་གཟིམས་ཁང་སྒྲུབ་པ་ལ་ཁ་བསྒྱུར་བས་མཆོད་ཡོན་མ་དན་པས། དྲགས་སྔགས་ཀྱི་ལས་རེ་ཙམ་ཡང་བསྟན་པའི་ཕྱིར་དུ་འདུག་ནས་བྱེད་དུ་བཅུག །སྐུ་རབ་པའི་དམག་སོས་ཆོས་རྒྱལ་ཕོ་བྲང་དུ་ཚབས་ཆེན་པོ་བུབ། ཕྱི་ལོའི་སོས་ཀོང་པོས་ལ་བར་ཡན་ཕྲོགས་པ། སྡེ་པ་བུ་གཏེར་གཏོང་དགོས་བྱུང་བས། ཙ་རིའི་རིག་འཛིན་རྣམས་ཀྱིས་ཞལ་བཞེས་ལ་ཡིད་ཆེས་སོ། །དཔལ་རིར་རྗེ་གོང་མས་ས་དྲ་བ་གནང་སར་གཙུག་ལག་ཁང་གི་རྨང་བཏིངས། གཉལ་ས་ལེགས་པས་གྱང་ལ་ཐག་བཅད། འདུ་ཁར་ཀ་བ་ཉི་ཤུ། གཙང་ཁང་འོག་ཀ་གཉིས། སྟེང་ཀ་བཞི། ཤར་དུ་མགོན་ཁང་ཀ་གཉིས། སྒོ་ཁྱམས་རུང་ཁང་དང་བཅས་པ་ཐོག་སོར་བསྐྱལ། གྱང་བསྐམས་མགོར་བས་དེ་ལོ་རང་ལ་ཐོག་འགེལ་རྩིས་མ་བྱས། 
3-419
རྡོ་རྗེ་གླིང་དུ་དྲག་དམར་གྱི་བསྙེན་པ་ཞག་བདུན་མ་ཞིག་བྱས། དེ་དུས་ཚོམས་དང་ཕུབས་ཀྱི་སྒོ་ཤག་ཕྱེ་བྱུང་། བལྟས་པས་ཞིང་སྐྱོང་སེང་གའི་གདོད་པ་ཅན་ཡབ་ཡུམ། བམ་རོ་ཕོ་མོ། སྡེ་བརྒྱད་དང་བཅས་པ་མངོན་རྟོགས་ཇི་ལྟ་བ་ཤར་ར་ར་བྱུང་། རྡོ་ལེགས་ཀྱི་ཞོན་ར་དཔང་དམའ་བས། ངེད་ཀྱི་གདན་དང་ཁོའི་པུས་མོ་ཐུག་པ་བྱུང་བས། ངེད་ལ་བལྟས། ཁ་འཛུམ་པ་བྱས་ཞིག་བྱས་སོང་། གཙོ་བོ་ཡབ་ཡུམ་དབུས་སུ་ངེད་ལ་ཞལ་གཟིགས། གདོད་ན་བམ་རོ་གཉིས། མཐའ་སྐོར་སྡེ་བརྒྱད་གྲལ་ཁྲིག་འགྲིག་པ་དང་ཡལ་བ་གཅིག་རྨིས། བླ་མ་རིན་པོ་ཆེས་སྒྲུབ་པ་མཛད་པ་དང་རྟེན་འཛུགས་གནང་པའི་རྟེན་འབྲེལ་ཡིན་པ་འདྲ། ཞག་བདུན་པའི་དགོངས། སྲོད་ལ་ཁྱི་ཐམས་ཅད་ཀྱང་གཟིམས་ཁང་ལ་བསྐོར་ཞིང་ཟུག །ཉམས་ལ་རྒྱལ་འགོང་ཐམས་ཅད་འདུས་ནས་འཚང་ཁ་བྱེད་ཡོང་སྙམ་ཤིན་ཏུ་ཞུང་པ་སྲོད་རིལ་པོར་བྱུང་བ། འབུངས་ནས་བཟླས་བརྗོད་བྱས་པས་གུང་ཙམ་ལ་གཉིད་དུ་སོང་བའི་ཐོ་རངས། གནམ་ལྕགས་ཀྱི་སྡིག་པ་མགོ་དགུ་རྭ་བཅོ་བརྒྱད་ཡོད་པ་ཞིག་ཁོ་བོའི་མདུན་དུ་བྱུང་བ་རྨིས། བསྙེན་རྟགས་བཟང་བསམ་པ་ཤར། དེ་ནས་གྲོན་རོང་དམག་སྡེར་མེ་ཏོག་བསྡུས། དེ་དུས་གྲི་གུ་པའི་སྲས་པོ་སྐུ་རབ་ན་བཙོན་དུ་འདུག་པ། ངེད་ཀྱིས་བྱ་པ་བརྒྱུད་བཏོན་པ། སྡེ་སྲིད་རིན་པོ་ཆེས་བེར་ཐུལ་བཟང་པོ་དང་བཅས་རྫོང་དར་མཛད་པ་སྒོམ་ལྷར་འབྱོར། 
3-420
ངེད་ཀྱི་ཟླར་སྡོད་པའི་ཆེད་བཞིན་བྱས་སོ། །རློན་དུ་སླེབ། དེ་དགོངས་བྱས་འགོལ་གཟིམས་ཕུག་ཏུ་ཚོགས་འཁོར་བྱས་པས། ངེད་མི་བཅོ་ལྔ་ཙམ་ལ་ཡངས་པོ་བྱུང་། ཕྱིས་མི་ལྔ་དྲུག་ཙམ་ཡང་མི་ཤོང་སྣང་། རྨི་ལམ་ན། རྗེ་བཙུན་རས་ཆུང་པ་དབུ་སྐྲ་གསིལ་བུ། རས་དྲི་མ་མེད་པའི་བླ་གོས་དང་ཤམ་ཐབས་ཅན། གཡས་གཡོན་དུ་བུ་མོ་ལོ་བཅུ་དྲུག་ཙམ་ལོན་པ་གསུམ་ག་མཛེས་སྡུག་གི་ཕུལ་དུ་ཕྱིན་པ་ཞིག་མདུན་དུ་ཕེབས། ཞལ་འཛུམ་པ་ཞིག་དང་། བརྡས་བྱིན་གྱིས་བརླབས་ཏེ་ཐེགས་སོང་བ་རྨིས། དེ་ནས་དོལ་དུ་ཕྱིན། ལྷ་རྩེ་མཁའ་སྤྱོད་ཕུག་ཏུ་ཞག་བདུན་མཚམས་བྱས། དེའི་དགོངས་ཤིག །སྡེ་སྲིད་རིན་པོ་ཆེས་གནང་བ་ཡིན་སྐད་པའི་ཕོ་ཉས། དཔལ་ཕག་མོ་གྲུ་པའི་དབང་རྫས་ཡིན་ཟེར། ཡེ་ཤེས་ཀྱི་མགོན་པོ་ཕྱག་བཞི་པའི་ཕྱག་མཚན་བཞི་གསེར་ཚགས་ཤིན་ཏུ་ལེགས་པ་སྤྲད་པ་དང་། ཡང་མཚོ་ཆུང་ཞིག་ནས་སྦལ་ལྕོང་མང་པོ་རིལ་འཐུངས་ཟོས་པ་གཉིས་རྨིས། འཕྲིན་ལས་དང་ཀླུ་འཐུལ་བའི་རྟགས་སུ་འདུག །དེ་ནས་བཀྲ་ཤིས་མཐོང་སྨོན་དུ་སླེབ་སྐབས། འཕྱོང་རྒྱས་དང་། ལར་རྒྱབ་ནས་འབོད་མི་སླེབ། འགྲོ་བ་ཤར། གྲི་གུ་བས་གསེར་ཚགས་ཀྱི་རྟ་ཆས་དངོས་གཙང་བ་དང་། གསེར་སྲང་དུ་མས་བྱང་དྲངས་པའི་འབུལ་བ་ཕུལ། འཕྱོང་རྒྱས་སུ་ཀུན་དགའ་སྟེ་ཤིང་ཕོ་སྟག་གི་ལོ་གསར་ལ་སླེབ། 
3-421
རིམ་པས་རྒྱ་ཆེན་གླིང་དུ་ཕྱིན། དེ་དུས་དབུས་པ་རྣམས་ལུང་པ་བརླག་ཏུ་འཇུག་པའི་ཐབས་ལ་གང་ཟབ་ཀྱི་བཀའ་བགྲོས་འཚུབ་པར་སྣང་ངོ་། །སྡེ་པ་ཞལ་ངོ་། ཟུར་མཁར་པ་བློ་གྲོས་རྒྱལ་པོ། བདེ་པ་གླིང་པ་སོགས་ལ་པཎ་ཆེན་སྦྱོར་དྲུག་ལ་སོགས་པའི་ཆོས་དང་། ཆོས་རྗེ་འབྲུག་རྡོ་རྗེ་པ་ཞེས་པ། རྟོགས་ལྡན་ཟིལ་གནོན་རྡོ་རྗེ་བ་དང་། རྗེ་གོང་མའི་ཞལ་སློབ་ཏུ་གྱུར་པ་དེ་དང་། སྔགས་འཆང་མཁྱེན་རབ་རྒྱ་མཚོ་ལ་སོགས་པ་དང་། ལྷག་པར་པདྨ་གླིང་པའི་ཞལ་སློབ་ཆོས་རྗེ་སྣ་ཚོགས་རང་གྲོལ་པ་སོགས་ཀྱིས་བརྒྱ་འབུལ་གཟབ་པར་འདུག །གོང་དཀར་ནས་ཇ་འདྲེན་གཟབ་མ་བྱུང་། དེར་བསྡད་ཐོག །བསམ་ཡས། ཁྲ་འབྲུག་སོགས་ལ་གསེར་ཞོ་བཅུ་གཉིས་ཀྱིས་ཞལ་གསེར་ཞུས། རྩེར་ཤོག་ཕེབས་ཏེ། འཕྱོང་རྒྱས། རྒྱལ་ཆེན་གླིང་པ་སོགས་ཀྱིས་ད་ལམ་འཐེན་པ་འཐད་གསུང་འདུག་པས་འགྲོ་བ་མ་བདེ། དེ་དུས་ཡར་འབྲོག་གི་ལྷུན་པོ་རྫོང་སོགས་རྒྱལ་ཆེན་གླིང་པའི་ཕྱག་ཏུ་ཡོད་པས། སྙེ་མོ་བྱ་མཁར་པའི་མཆོད་གཞིས་དེར་ཡོད་ཤོར་འདུག་པ། ངེད་ཀྱི་ཁྲིད་ན་རབ་འབྱམས་བ་ཀུན་དགའ་རྒྱ་མཚོ་ཡོད་པའི་འཕྲོས་པས་ཤོར་བ་ཐོས་ནས། ངེད་ཀྱིས་སྡེ་པ་ལ་ཞུས་ཁོང་རང་རྣམས་ལ་སྦྱར། དེས་ཆོས་རྗེ་འཛམ་གླིང་རབ་འབྱམས་པ་མཉེས་ནས་ཇ་ཞུས་སུ་རབ་འབྱམས་ཆོས་ཀྱི་དཔལ་བཟང་བྱུང་། 
3-422
ཚུར་སླེབ་སྐབས། དཔལ་རིར། ཆོས་རྗེ་གྲགས་པ་བཤེས་གཉེན་གྱི་ནང་རྟེན། ངེད་རང་གིས་རོགས་རམ་བཀོད་པ་བྱས། ཆེན་པོ་ནོར་བུ་རིན་ཆེན་བཙུན་ཆུང་གི་དུས། རྗེ་གོང་མས་བརྒྱ་ལས་དགའ་བར་བཀའ་ཕེབས་པ་ལྟར། ཁོ་བོ་ལ་ཕན་ཐོགས་པ། ཁོང་གིས་བསྒྲུབས་པས་ཐུབ་པའི་སྐུ། རྒྱབ་མཐོ་བཅོ་ལྔ་ཙམ་ཡོད་པའི་གཟུངས་གཞུག་རབ་གནས་ལེགས་པར་བྱས། ལྟས་དགེ་བར་བྱུང་། ཆོས་སྡེ་འདི་བཏབ་མན་ཆད་མདོ་ལྡིང་གསུམ་བཀྲ་ཤིས་པར་གྱུར་པས། ཕན་བདེའི་རྩ་བ་སངས་རྒྱས་ཀྱི་བསྟན་པ་ཡིན་པ་ལ་ཀུན་ཡིད་ཆེས། དེ་ནས་བཀྲ་ཤིས་མཐོང་སྨོན་གྱི་གཙུག་ལག་ཁང་རྙིང་པ་བཤིག་རལ་ཧྲམ་པ་བྱས། རྨང་སྤོ་བ་ལེགས་པར་མཐོང་། དཔོན་བླ་མ་སོགས་རྡོ་བཟོ་བ་དང་། གཉལ་ནས་དཔོན་དར་རྒྱས་སོགས་ཤིང་བཟོ་བ། རྐོས་མཁན་འཕྲལ་གྱི་ལག་ཆ་བཟོ་བ་ལ་དགོས་པའི་མགར་བའི་བར་གྱི་གཟོ་རིགས་པ་གཏོས་ཆེ་བ་བསགས་ཚར་ཙམ་ལ། ར་ལུང་དུ་རྗེ་གཤེགས་ཟེར་ནས་འབོད་མཁན་བྱུང་། བླ་མའི་ཞབས་ཏོག་ཡིན་པས་འགྲོ་བ་ཤར། ཆོས་རྗེ་ནང་སོ་དང་། ཕྱག་མཛོད་པ་མི་ཕམ་ཆོས་ཀྱི་བླ་མ་ཁ་ཏ་ལ་བཞག །ཕྱག་མཛོད་པ་འདི་ཡང་། ཁོ་བོའི་བྱ་བ་ལས་ཀྱི་འཁོར་ལོའི་འགན་འཁུར་ཆེན་པོ་རྒྱུན་དུ་བྱས་སོ། །གཙུག་ལག་ཁང་གི་ས་དྲས་ཙམ་བྱས། གསང་སྟབས་ཕྱིན། དགོངས་རྫོགས་ལ་དགོས་པའི་ཆས་རྣམས་རྟིང་ལ་འོང་བ་བྱས། 
3-423
ཚན་གསུམ་དུ། ཆོས་དབང་རྒྱ་མཚོ་མི་སྣར་བཏང་བ་འཁོར། སྡེ་སྲིད་ནས། དངུལ་དྲིལ་ངེད་རང་གི་དངོས་སྤྱད་གཅིག་ལ་ཡིད་འཛིན་པ་ཡིན་གསུང་དེ་སོགས་ཀྱི་གནང་སྦྱིན། འཕྱོང་རྒྱས་ནས། ཁུ་དབོན་བར་གྱི་ལེགས་སྤེལ་ལ་ཤོག་གསུང་འདུག་སྟེ། བླ་མར་བསམས་མ་ཕྱིན། འཇིག་རྟེན་ཕྱོགས་ནས་ཤོར་ཐལ་རེ་ཆེར་སོང་། ར་ལུང་དུ་འབྱོར། དེ་གོང་གཤེགས་ཉིན་འཇའ་སྣ་ལྔ་རྩ་བ་གཅིག་རྩེ་མོ་གཉིས་སུ་གྱེས་པ། སྤུར་ལ་ཐལ་མར་ཟུག་པ་ཙམ་མིན་པ་ཅི་ཡང་མ་བྱུང་སྣང་། ངེད་སླེབ། མཆོད་འབུལ་བཙུགས་པའི་གནམ་གང་གི་ཞོགས། ཆར་མུན་འཐིབས་འདུག །ངེད་ཀྱིས་ཚོགས་དབུས་ནས་བལྟས་པས། མཐོང་ཀའི་ནང་དུ་སྐྱ་ཆེ་ལི་ལི་འབབ་ཀྱི་འདུག་པ་ཁ་བ་ཡིན་བསམ། ཚ་བཞེས་ཀྱི་རིང་གནས་སུ་ལོག །ཛུ་གི་མང་པོ་ཡོད་པ་ཀུན་འཚོལ་འཚོལ་བྱེད་ཀྱི་འདུག་པ་ཅི་ཡིན་དྲིས་པས། མེ་ཏོག་གི་ཆར་བབས་པ་སྒྲུག་པར་འདུག་ཟེར། ས་ལ་སྐྱ་ཡམ་ཙམ་ཆགས་འདུག །གཞན་སྒྲོ་འདོགས་ན་བོལ་ནུབ་ཙམ་བབས་བྱས་ཆོག་པར་སྣང་། མེ་ཏོག་དེ་དག་ཀྱང་། སྡོང་པོ་སྦུབས་ཡོད་པ། ཡལ་གའི་རྣམ་པ་འབའ་ཞིག་ཡོད་པ་ལ་འདབ་མ་ལྔ་པ། ཁ་དོག་ཤས་ཆེ་དཀར་བ། སྣ་ལྔ་པ་ཡང་མང་པོ་འདུག ། དེ་ནས་ཉིན་གྱི་རིས་འབབ། སྐུ་གདུང་གཞུ་པའི་ནུབ་མོ་ཆར་ཆེན་པོ་རང་ཞིག་བྱུང་སྟེ། 
3-424
མེ་ཏོག་གི་ཆར་གྱིས་གཡབས་ཐམས་ཅད་ཁེངས་འདུག །གོང་དཀར། འཕྱོང་རྒྱས། །བྱ་ཡུལ་ནས་སོགས་འབྲེལ་ཅན་ཐམས་ཅད་ཀྱིས་གདུང་འབུལ་ལེགས་པར་འདུག་པས། དགོངས་རྫོགས་སྔར་སྲོལ་ལས་མི་ཆུང་བར་བསྒྲུབས། ནང་རྟེན་གསེར་སྐུ་མི་ཚད་མ་དང་། སྤོས་སྐྱའི་གཉྫིར་བསྒྲུབ་པའི་བཅའ་བཀོད་བསྒྲིགས། དབོན་རིན་པོ་ཆེའི་ཚོ་འཛིན་ཆོས་རྫོང་མཁན་པོས་བྱས། ར་ལུང་གི་ཐུགས་ཁུར་ཡུམ་རང་བཞེས་སུ་བཅུག །སྒྲུབ་སྡེ་ཕན་ཚུན་གྱི་སྐྱོང་བསྟར་ཁམ་ཆེ་ཆུང་ཅི་དགོས་པ་ངེད་ཀྱིས་བྱས། དེར་འབུལ་པ་བྱུང་ཚད་དགོངས་རྫོགས་སུ་བཏང་། སླར་ཡང་བཤར་ཐབས་ཀྱིས་གྲི་གུར་སླེབ་སྐབས། སྐུ་ཚིགས་ཞིག་དང་འགྲིག །མེ་ཏོག་གི་ཆར་ཆེན་པོ་བྱུང་དུས། སྡེ་པ་དཔལ་ཆེན་པ་ནས། འདི་ལ་བལྟས་ན་བསམ་བདེར་ཡང་། རྗེའི་དྲུང་མི་བསྐྱོད་རྡོ་རྗེ་མ་གཤེགས་པ་ཐག་ཆོད་དུ་འདུག །ལྟས་ངོ་ཚར་བ་ཅི་ཡང་མ་བྱུང་པས་ཟེར་རོ། །སྡེ་སྲིད་བྱང་ཁར་ཐགས་བཅུག་པས་དབུས་བྱིན་འཁྲིལ་རྒྱུ་བ་དང་། གྲི་གུ་པ་ལ་སྒེར་གྱི་སེལ་འདོན་བྱེད་རྒྱུ། གཞན་སུ་ཡང་རོག་མི་འདུག །ངེད་ཀྱིས་རེ་ཞིག་སྒར་པ་ཐོགས་ཤིག་སྲུང་ཆར་བཞག །དམག་སླེབ་གདོང་བྱ་ཡུལ་ནས་མཛད་ཁྲ་པ་བཅུག །སྒར་པ་རྣམས་ལོག །དམག་གིས་ནུས་མ་ཐོན། ལབ་བྱ་པ་དང་རྒྱ་རི་བ་གཉིས་ཀྱིས་མཛད་པས་གྲི་གུ་བ་མགོ་འཐོན། དེ་དུས་ཐམས་ཅད་ཀྱིས། གོང་དཀར་ནས་དཔོན་བློན་ལ་ཇ་ཞུས་གཟབ་མ་བྱེད་འདུག་སྟེ། 
3-425
གནང་སྒོ་ལེགས་བསམ་པ་མ་ཤར་བས། ཇ་ཞུས་མ་བཏང་། དེས་བྱ་རྒྱ་ཞང་དབོན་ནས་ཀྱང་དེ་བཞིན་མཛད་པས་གཞན་གྱིས་གླགས་རྙེད་དོ། །བཀྲ་ཤིས་མཐོང་སྨོན་དུ། གཙུག་ལག་ཁང་ཀ་ཆེན་བདུན་ཅུ་རྩ་བརྒྱད་ཀྱིས་ཁུངས། རྩིག་ཞེང་གི་རྒྱ་ལ་མཐོ་བཅུ་གཉིས་མ་ཡོད་པ། འདུ་ཁང་ཀ་བ་སོ་དྲུག །གློ་འབུར་ཆེན་པོ་བཞི། གཙང་ཁང་ཆེན་པོ་ཀ་རིང་བཞིས་བཏེག་པ། ཁོར་ཡུག་ཏུ་བསྐོར་ལམ་ཡོད་པ། ཀ་ཆེན་ཐམས་ཅད་ཕོ་འདོམ་གང་གིས་འཁྱུད་ཙམ་གྲུ་བཞི་པ། ཤིང་བརྩེགས་བཅུ་གསུམ་ཚང་མར་ཡོད་པ། སྟེང་དུ་ཁོར་ཕིབས། གློ་འབུར་གཉིས་ཀྱི་ཡང་སྟེང་དུ་ཀ་བཞི་མ་རེ་དང་། གཟིམ་ཆུང་ཀ་གཉིས་མ། ལས་མི་དྲུག་བརྒྱ་ཙམ་གྱིས་དབྱར་ཟླ་བ་ལྔ་པ་རེ། ལོ་གསུམ་ལ་གྲུབ། ལོ་གསུམ་ཁར། བཟོ་རིགས་པ་བདུན་ཅུ་ཙམ་ལ། བརྒྱགས་ཡོན། སྟོན་མོ། སྟོན་རྒྱབ་མི་མགུ་ལྷ་མགུ་བཏང་། ཕྱི་ལོ་མགོན་ཁང་ལོགས་བྲིས་དུས། ལི་ཁྲི་དཀོན་ཙམ་བྱུང་བ་ལ། ནུབ་གཅིག་རྨི་ལམ་ན། སོག་པོ་རྒྱ་ནག་གི་རྒྱལ་པོའི་ཆ་བྱད་ལྟ་བུ། རས་ཀྱི་ཐོད་བཟང་པོ་ཅན་ལྔས་ལི་ཁྲི་སྤྲད། མགོན་ཁང་དུ་སོང་ནས་རི་མོར་ཐིམ་པ་རྨིས། སང་ཉིན་ཚོན་ལི་ཁྲིའི་འཐུམས་ཆེན་པོ་ཞིག ཕྱི་རོལ་ནས་རྙེད་པ་བྱུང་། དཔལ་ལྷའི་མངོན་རྟོགས་བསྲེ་ལྷད་ཅན་མིན་པ་མ་རྙེད་པས། དམོད་བོར་བརྟག་པ་བྱས་པས། 
3-426
དེ་ཉིད་ཞི་བ་དང་དྲག་མོར་བཞེངས་པའི་སྐུ། ང་ནི་ཤཱནྟི་རོ་གཟན་མའོ། །ཞེས་དང་། གཙུག་ལག་ཁང་གི་སྲུང་མ་བྱེད་པར་དམ་བཅས། གནས་ཙ་རི་ལ་འཕོས་བསྐྱས་བྱུང་རེས་ཀྱིས། དྭགས་ཀོང་གི་འཚམས་འདི་ལུང་པ་ཆགས་འཇིགས་ལ་རྒྱ་པ་རེ་ཡོང་བ་རྟེན་འབྲེལ་གྱི་ཆོས་ཉིད་དུ་འདུག །དེ་དུས། སྐྱེན་པ་རྒྱལ་པོ་ལྷོ་སྒོ་བ་དང་། བླ་གཡེ་བ་འཐོན་པ་ལ་བདག་རྐྱེན་ལེགས་པར་བྱས། ཀོང་པོ་ནས་རྡོ་རྗེ་གཡུ་སྒྲོན་མ་བབས་པ་དེ་བོས་དེས་རྟེན་འབྲེལ་དུ། མཚོ་རྒྱལ་གྱི་སྐུ་གཅིག་ལུང་བསྟན་གྱི་རྒྱབ་ནས་བཏོན། ཛྷཻ་ཀྵིམ་གྱི་རྡོ་རྗེ་ཞིག་ངེད་ལ་གཏད། ས་བྱིན་གྱིས་རློབ་པའི་རྟེན་འབྲེལ་འགྲིག །ལྷག་པར་གསང་སྔགས་ཆོས་གླིང་འདིར་ཆོས་རྫོང་རྒྱག་པ་དང་། བྱ་པ་ལ་ཞལ་ངོ་ཤིན་ཏུ་དཀོན་པ་ལ། ར་ལུང་ནས་ལྕམ་བསུས། སྡེ་པ་སྐུ་གཞོན་པ་གཤེགས་གདོང་། རྒྱལ་བུ་བསོད་ནམས་ཆེན་པོའི་བྱིན་དང་ལྡན་པ་ཞིག་འོང་། དེས་བྱ་འབྲུག་གཉིས་འདྲེས་ཀྱི་བསྟན་པ་ལེགས་པར་འཁྱོངས་ཟེར་བ། ཕྱིས་ཇི་ལྟ་བ་བྱུང་སྟེ། ད་ལྟའི་རྒྱལ་བུ་འདིའོ། ། དེ་ཕན་མི་གྲིབ་ཅན་གྱི་ཞུད་ཤིན་ཏུ་སྡང་བ་ཞིག་ཡོད་པ་ངེས་ལབས་པ་ཉན་པས་གསོས། ཕྱག་རྒྱ་ཆེན་པོའི་ཡི་གེ་འགའ་ཞིག་བྲིས། དབྱར་གཞུག་དེ་བྱས་འགོལ་དུ་མཚམས་ལ་ཕྱིན། དེ་དུས་རྨི་ལམ་དུ་ཐང་རྩྭ་དམར་ཡམ་མེ་བ་ཅིག་གི་དབུས། 
3-427
ནགས་ཚལ་ཕུན་སུམ་ཚོགས་པ་ཞིག་ན། ཤིང་ཏོག་ཚེ་རིལ་ལྟ་བུ་དམར་ལ་རོ་བཅུད་བསམ་གྱིས་མི་ཁྱབ་པ་མང་པོ་ཟོས་པ་དང་། གྲུབ་རྒྱལ་མའི་ཕྱག་ཐོད་ཀྱི་བདུད་རྩི་ལུད་པ་རྨིས། སང་དངོས་སུ་ཕྱག་ཐོད་ཀྱི་བདུད་རྩི་ལུད། ཞག་བདུན་གྱི་བར་དུ་མ་ཡལ་བའི་ཁར་རོ་ཕུན་སུམ་ཚོགས་པར་གྱུར། དེ་ནས་བརླག་ཚང་དུ་དཔེ་ཆ་ལྟ་བ་ལ་ཕྱིན་པས། འཇའ་འོད་ལ་སོགས་པའི་སྣང་བ་ངོ་མཚར་བ་མཐུན་གྲུབ་ཏུ་བྱུང་ངོ་། །དགུན་ལྷོ་བྲག་ཏུ་སྡེ་པ་དྲུང་གིས་ཤོག་ཟེར་ཕྱིན། དེ་དུས། སྒོ་ཐར་ཁྲོམ་ལ་དབང་བྱེད་བསམ་པ་ནས། དབང་ཚིག་རྫོགས་པའི་བར་དེར། བུ་མོ་ཕྱི་དཔྱད་པདྨ་ཅན་གྱི་མཚན་ཉིད་ཚང་བ། ལོ་བཅུ་དྲུག་ཙམ་པ་གཉིས་ངེད་ཀྱི་མདུན་དང་པོར་བརྟག་གཉིས་ནས་གསུངས་པའི་བརྡ་བསྟན་བྱུང་། །མིག་ཡུད་ཅིག་ཡེངས་པ་དང་གར་སོང་མི་སྣང་། གནས་ཆེན་མཁར་ཆུའི་མཁའ་འགྲོའི་བསུ་བ་ཡིན་ནམ་བསམ་པ་ལས་གཞན་མ་རིག །དེ་ནས་བན་པར། གཏེར་བཏོན་མཆོག་ལྡན་མགོན་པོས་བཞེངས་པའི་ཨུ་རྒྱན་གྱི་སྐུ་དེ། སྒྲོས་པ་མང་བར་འདུག་པས་ལྟ་བ་ལ་རྐང་གཏད་ཕྱིན་པས། སྐུ་དེ་ཆེ་ཆུང་བཟོ་རྒྱུ་རྣམས་ལ་བསྔགས་པར་འོས་པ་ཞིག་ལ། འོན་ཀྱང་རབ་ཏུ་གནས་པ་མ་གྲུབ་པའི་སྐྱོན་ཞིག་ནི་འདུག །ལར་ལུང་པ་དེ་རྒྱ་འདྲེའི་ཚང་ལྟ་བུར་མཐོང་། 
3-428
ཐིག་ཕྱིར་མཁན་ཆེན་ཕྱག་རྡོར་བ་ནམ་མཁའ་རྒྱལ་མཚན་གྱི་སྤུར་མཇལ་དགོས་བསམ་པ་ལ་སྒོ་ནས་ནད་ཅན་མང་ནས་རྟོག་པ་ཟ་མ་ཕྱིན། གདང་དུ་ཁྲ་བས་གཞི་ལེན། རིམ་པས་ལྷ་གྲོར་འགུ་རུ་ཆོས་དབང་གི་བྱིན་རླབས་རྟེན་མཇལ། གཡུལ་རྒྱལ་རྫོང་དུ་སླེབ། མཁར་ཆུ་ལྷ་ཁང་གི་གཞི་བདག་ཀུན་བསུ་བ་ལ་བྱུང་བ་རྨིས། སྡེ་པ་དང་། སྒྲུབ་སྡེ་པ་བརྒྱ་བྱིན་སྐུ་སྐྱེ་ཚང་གིས་ཞབས་ཏོག་རྒྱ་ཆེ་བ་འདུག །དེ་ནས་ལྷ་ཁང་དུ་སླེབ། རྣམ་སྣང་ལྷ་ཁང་བསྐོར་བར་ཕྱིན་པས། ལྷ་དེ་མཐོང་བ་དང་ཡིད་མི་རྟོག་པར་ཕྱམ་གྱིས་སོང་སེམས་བསྐྱེད་བླངས། གཞན་རྟེན་མཇལ་སོགས་བགྱིས། སྡེ་པ་མ་ཆེན་འདི་འགུ་རུ་ཇོ་རྩེའི་གཏེར་ཡིག་ཏུ། འདན་མ་རྩེ་མང་དུ་བསྔགས་པ་ལྟར་ཡིད་ཆེས། དེར་སྤེལ་བྱུང་ནས་སྡེ་བ་ཡབ་ཡུམ་གཉིས་ཀྱང་ཕྱག་འབུལ་ལ་འབྱོར། རིམ་པས། རྒྱུད་སྡེ་རིན་པོ་ཆེ་རྣམས་ནས་དེ་ཝི་ཀོ་ཊར་བཤད་པ། དེ་ལ། གནས་གཉིས་ཡོད་པའི་མིག་གཡོན་པ་དང་སྦྱར་རྒྱུ། སློབ་དཔོན་ཆེན་པོ་པདྨ་དང་། གནུབ་ནམ་མཁའི་སྙིང་པོ། སྦ་ཡེ་ཤེས་དབང་པོ་སོགས། སྔོན་བསམ་ཡས་སུ་བསྟན་པ་དར་དུས་ཀྱི་སྙིང་པོའི་དོན་བསྒོམ་པ་རྣམས་ཀྱི་སྒྲུབ་གནས། རྗེ་བཙུན་རས་ཆུང་པས་ཞབས་ཀྱིས་བཅགས་ཤིང་། ཆོས་ཀྱི་རྗེ་གཙང་རྒྱ་རས་ཀྱིས་ཆོས་ཉིད་ཀྱི་བདེན་པ་གཟིགས་ས། 
3-429
ལྷོ་བྲག་མཁར་ཆུ་ཞེས་གྲགས་པ་དེར་ཕྱིན། དགེ་བསྙེན་སྙོན་ཁ་དང་། དུར་ཁྲོད་བདག་མོ། །རྒྱུད་ནས་གསུངས་པའི་ཞིང་སྐྱོང་ཕོ་མོར་ངེས་ཤེས་འདྲོངས་ཤིང་། དེ་དག་གིས་གུས་བཏུད་ལ་ཡ་མཚན། དེ་དུས་ལྷ་ཁང་པའི་ཨ་ཆེ་བསོད་ནམས་དཔལ་འདྲེན་སྐྲ་བཅད། འབུལ་བ་གཡུ་མུ་ཏིག་བྱི་རུ་སྤོས་ཤེལ་སོགས་སྟོང་ཕྲག་གསུམ་གྱི་བརྩིས་ཡིན་ཟེར་བ་ཕུལ། ཕྱིར་སྡེ་པ་ཞལ་ངོ་སྤྱིད་སྒོས་ཀྱིས། མཛོ་ཕོ་སུམ་ཅུ་ཙམ་གྱིས་གཙོས་པའི་འབུལ་བ་གཏོས་ཆེན་པོ་སྣང་། དེ་ནས་སྤེལ་བྱུང་དུ་ཕྱིན། དེ་རེས་གྲོ་པོ་ལུང་དུ་འགྲོ་བསམ་པ་ལ་མ་ཐོན། ཁྲ་ཤར་གཞིས་ཀ་བརྒྱུད། སྨྲ་བོ་ཅོག་ལ་སོགས་པའི་རྟེན་མཇལ། ཆོས་རྗེ་ཀུན་དགའ་ལྷུན་གྲུབ་པ་སོགས་གཏེར་ཁ་གོང་འོག་གི་དབོན་པོ་རྣམས་ལ་ཆོས་སྦྱིན། ལྷོ་རྒྱུད་དུ་སླེབ། སླར་བཟོ་རིག་པ་བསགས། དེ་དུས་དབུས་སུ་སྡེ་གཟར་ལངས། རྒྱལ་ཆེན་གླིང་པ་དཔོན་གཡོག་ངོ་ལོག །གྲྭ་ཕྱི་དམག་གི་སྐོར། སྡེ་པ་རྒྱལ་གླིང་པ་དང་། ངེད་མཆོད་ཡོན་འདྲིས་སྔར་བྱ་པ་དང་སྐུ་ཉེ་ཡིན་རུང་ཐུགས་འབྲེལ་ཆེར་མི་སྣང་། སྐྱོར་མོ་ལུང་ནས་གདུང་བརྒྱད་བྱ་ཡུལ་དུ་ཕེབས། དམག་བསྐུལ་མཛད་རྒྱུ་ལ་བྱ་པ་དང་དན་ཁེལ་བ་ཞིག་མ་བྱུང་། གྲྭ་ཕྱི་ཤོར་ལ་ཁད། སྡེ་ཕ་དཔོན་ཆེན་པས་ངེད་ར་མདར་སྦྲན་བྱུང་བས། མི་དབང་མཚོ་སྐྱེས་རྡོ་རྗེ་དཔོན་གཡོག་ཁྲི་དམག་གཏོས་ཆེ་བ་ཕེབས་སུ་བཅུག་པས། 
3-430
རྒྱལ་ཆེན་གླིང་པ་དབུགས་དང་པོར་དབྱུང་། དེ་ནས། སྡེ་སྲིད་བྲག་ཁར་ཕེབས་པ། བྱ་པས་བྱས། ཕྱིས་རྩེར་ཕེབས་ཆོག་པ་བྱུང་། སྡེ་སྲིད་རིན་པོ་ཆེ་དེ་ལས་བྱས་པ་བཟོ་བ་སུ་ཡང་མཐོང་། ངེད་ལའང་ཐུགས་གཏིང་ནས་གུས་པའི་ཚུལ་མཛད་པ་དེར་གདའོ། །དབྱར་ར་ལུང་ནས། དབོན་རིན་པོ་ཆེ་དཔོན་སློབ་ཕེབས། གསུང་ཆོས་སྨར་བར་བྱུང་། རྡོར་གླིང་གདན་ས་པ་ཡང་རྩེའི་ཆེན་པོར་བསྐོས། སྟོན་རྒྱབ་ལོ་གྲོ་སྟོད་ཀོར་དུ་མེ་ཏོག་ཕུན་སུམ་ཚོགས་པ་བྱུང་། རྟོགས་ལྡན་ཆེན་པོ་གར་ཤ་བ་ཐོགས་མེད་རྡོ་རྗེས། མཚོ་སྣར་ཤོག་ཟེར་ཕྱིན། དེའི་བཞི་བདག་ཐམས་ཅད་ཀྱིས་དགེ་བསྙེན་བྱས་པ་རྨིས། དེར་ཞག་བཅོ་ལྔ་ཙམ་བསྡད། དགྱེར་རོང་ཐམས་ཅད་ཀྱིས་ལེགས་པར་ཞབས་ཏོག་བྱས། ཆོས་རྗེ་རང་དཔོན་སློབ་ཀྱིས་གསེར་ཞོ་རྐྱང་ཉིས་བརྒྱ་ཙམ་གྱིས་གཙོས་པའི་འབུལ་བ་ཆེན་པོ་བྱུང་། ཚུར་ལོག་བཀྲ་ཤིས་མཐོང་སྨོན་དུ་ནུབ་གཅིག །རྗེ་མི་ལ། མངོན་པར་དགའ་བའི་ཞིང་དུ། མི་བསྐྱོད་པའི་སྲས་ཀྱི་ཐུ་བོར་གཤེགས་ཟེར་སྣང་བས། དེ་ན་སྤོས་ཀྱི་གླང་པོ་ཆེ་དང་། བལ་གླང་སྤོས་ཀྱི་གླང་པོར་གཉིས་འདུག་པ་སུ་ཡིན་སྙམ་དད་པ་ཐུན་མོང་མ་ཡིན་པ་ཞིག་སྐྱེས། གསོལ་བ་བཏབ་སྟེ་ཉལ་བ་ན། རྨི་ལམ་དུ། ས་གཞི་ཉམས་དགའ་བ་ཞིག་གི་དབུས་ན། རིན་པོ་ཆེའི་རང་བཞིན་གྱི་ཁང་བརྩེགས། ཤིར་འབྲས་བུ་ཅན་གྱིས་བསྐོར་བའི་ཚལ་གྱིས་བརྒྱན་པ་ཞིག་འདུག །
3-431
ངེད་ཀྱི་མདུན་ན་ལྷའི་བུ་གཞོན་ནུ་ཞིག་འདུག་པ་ནས། རྗེ་བཙུན་མི་ལ་བྱང་ཆུབ་སེམས་དཔའ་ཆེན་པོ་བལ་གླང་སྤོས་ཀྱི་གླང་པོར་འཁྲུངས་པ། ད་ལྟ་མངོན་པར་དགའ་བའི་ནང་ཚན། གཞལ་མེད་ཁང་འདི་ན་བཞུགས་མཇལ་ལམ་ཟེར། མཇལ་བྱས་དེས་འཁྲིད་དེ་ཁང་བརྩེགས་དེའི་ནང་དུ་སླེབ་པ་ན། བྱང་ཆུབ་སེམས་དཔའ་བཻ་ཌཱུརྱའི་མདོག་ཏུ་སྣང་བ་ཞིག་མཇལ་ཏེ་བྱིན་བརླབས་ཞུས་པས། ཞལ་འཛུམ་འཛུམ་ལས་ཅང་མི་གསུང་བ་ཞིག་རྨིས། ཡོས་ལོ་དགུན། རྗེ་བླ་མའི་ལུང་བསྟན་བཞིན། མཚམས་བྱེད་བསམ་པ་དང་། ཙ་རི་ཅིག་ཅར་བ་ཚང་འཇུག་དང་སྦྲགས། གཉལ་དུ་མེ་ཏོག་གི་རྣམ་པ་ཞིག་བྱས་ནས་བཏེག །བྱར་དུ་ཆོས་རྗེ་ནང་སོས། དབོན་པོ་དོན་དབང་གི་རྗེས་འཇུག་ལ་དམིགས་ཕོགས་ཟླ་རེ་མ་ཕུལ། གཞན་ཆོས་རྗེ་ཡེ་ཤེས་རྒྱལ་མཚན་པ་སྐུ་མཆེད་ཕེབས་པ་སྔོན་ལ་ཐེགས་ཏེ་ཀོང་པོ་ནས་འཚོ་བའི་སྟ་གོན་བྱས། སྒར་པ་བྱིན་བྱར་ནང་དུ་བཞག །ངེད་རགས་པ་ཉི་ཤུ་རྩ་ལྔས་ཕྱིན། སླེབ་པའི་ནུབ་རང་ནས་ཁ་བ་ཆེན་པོ་ཞིག་བབས། གློ་བོ་རྣམས་ཤོག་བྱས། མེ་ཤིང་ལ་སོགས་པ་ཉེར་མཁོ་རྣམས་བསྡུས། མཚམས་ཤིན་ཏུ་དམ་པ་ལ་ཞུགས། དེ་དུས་རླུང་རྩོལ་དང་། བདེ་མཆོག་གི་བཟླས་བརྗོད་ཁོ་ན་བགྱིས། རྗེའི་ཞལ་ནས། སྲོག་ལ་བར་ཆད་ཆེན་པོ་ཡོང་གསུང་བ་ལྟར། ཟས་ངན་པ་ཞིག་ཁོང་དུ་ཆུད། 
3-432
དེ་ངོ་མ་ཤེས་པར་རླུང་རྩོལ་གྱིས་རང་བཤལ་མང་པོ་བྱུང་། མཚམས་དེ་མ་བྱས་ན་སྦྱོར་ངན་དེ་ཐུ་བས། སྲོག་གི་བར་ཆད་དུ་འགྲོ་ངེས་པའོ། །དེ་དུས་རྨི་ལམ་དུ། བུད་མེད་རྒྱན་བཟང་པོ་ལྟ་བས་མི་ངོམས་པ་འཁོར་མང་པོས་བསྐོར་བས་ཚོགས་ཀྱི་འཁོར་ལོ་སྦྱིན་པ་དང་། ནུབ་གཅིག་ཅིག་ཅར་ཕུ། དཔལ་རི་ཟླུམ་ཅན་ཁང་བཟང་ཕུན་སུམ་ཚོགས་པ་ཞིག་ཏུ་སོང་བའི་ནང་དུ་བོས་བྱུང་། དེ་ན་མི་ཆེན་པོ་སྣ་རྡོག་རང་ཡང་སྙིམ་པ་ཙམ། བཙུན་མོ་འཁོར་བསམ་གྱིས་མི་ཁྱབ་པས་བསྐོར་བ་ཞིག་གིས་བསྙེན་བཀུར་གྱ་ནོམ་པ་བྱས། ཁྱེད་ཙ་རི་ཆགས་འཇུག་ལ་འོངས་པའི་གཞི་ལེན་ཡིན་ཟེར་བ་རྨི། ཞིང་སྐྱོང་ཕོ་མོའི་སྣ་ལེན་དུ་གོ །དེ་དུས་སྐབས་སྐབས་སུ། རྒྱ་རེང་བསྲེག་པ་ལྟ་བུ་དང་། གུར་ཀུམ་དང་། གླུ་རྩི་དང་། ག་བུར་དང་། སིཧླ་ལ་སོགས་པའི་དྲི་བཟང་ཆིལ་ལི་དུས་མིན་དུ་འོང་བ་དང་། ཟླ་བ་གཅིག་གི་ཡར་ཚེས་བཅུ་ལ་བྱུང་ན། རྟིང་མའི་མར་ངོའི་ཚེས་བཅུ་རིམ་པས་འཁོར་བ་ངོས་ཟིན་པར། སྐྱོབ་ཆེན་གྱི་ལར་རྔ་། འཁར་རྔ། དུང་། གླིང་བུ། དྲིལ་བུ་ཌཱ་མ་རུ་སོགས་ཀྱི་སྒྲ་ཐེངས་གསུམ་གསུམ་ངེས་པར་འོང་འདུག །ཟླ་གཅིག་ཕག་མོ་བསྙེན། ཉིན་གུང་རྗེ་བཙུན་གྱི་བཀའ་འབུམ་ལ་ལྟ་རྟོག་བྱས། དེར། རྩ་ཡོན་པོ་ལྔ་པོ་རླུང་གིས་བསྲངས། 
3-433
རླུང་ལོག་པ་ལྔ་པོ་མལ་དུ་སད། ཅེས་པ་ལ་སེམས་འཕྲོས་ནས། རྩ་ཐམས་ཅད་དབུ་མ། རླུང་ཐམས་ཅད་ཡེ་ཤེས་ཀྱི་རླུང་། ཐིག་ལེ་ཐམས་ཅད་དངས་མར་འགྱུར་བ། དེ་ལམ་གྱི་གནད་གང་ལས་རྟོགས་པར་འགྱུར་བ་སྟེ། རྡོ་རྗེ་ཐེག་པའི་ངེས་དོན་ལ། སྔར་རྨོངས། ད་རྨོངས་པ་མེད་པ་ཐག་པས་བསྐྱིགས་པ་བཏང་བ་ལྟ་བུ་ཞིག་བྱུང་། འདི་ལ་སོགས་པ། རྗེ་བཙུན་གྱི་གསུང་རེ་རེས་ཁོ་བོ་ལ་དོགས་པ་ཆོད་པ། དཔེ་ཆ་བརྒྱ་བལྟས་པ་ལས་དགའ་བ་མང་དུ་བྱུང་ངོ་། ། དེ་ནས་རྒྱུད་གང་བལྟས་ཀྱང་ཐོར་མི་འགྲོ་བར་ལམ་རིམ་སོ་སོའི་སྟེང་དུ་འབབ་པ་ཞིག་བྱུང་། རྗེ་བླ་མས། ཆོས་ཐམས་ཅད་རང་གྲོལ་དུ་ཤེས་པར་ལུང་བསྟན་པ་ཐོག་ཏུ་བབ་བོ། །དེ་ནས་ཙྭ་རིའི་སྒྲུབ་མཆོད་ཀྱི་སྐལ་པ་རྒྱུན་དུ་སྐྱལ་བྱུང་བ་རྨིས། ཟླ་གཅིག་འཇམ་དཀར་བསྙེན། ཕྱི་མའི་དུས་གཉིད་ཀྱི་སྒང་ལ། དེའི་སྔགས་སྒྲ་དག་པ་རྒྱུན་དུ་ལྷང་ལྷང་གྲག །ནུབ་གཅིག་རྨི་ལམ་ན་ངེད་རི་ངོས་ནེའུ་གསིང་ལེགས་པོ་ཞིག་ལ་བསྡད་འདུག་པའི་མདུན་དུ་མཚོ་དཀར་པོ་དངས་པ་ཤིན་ཏུ་རྒྱ་ཆེ་བ་ཞིག་འདུག་པའི་དབུས་མཚོ་ལ་མ་རིག་ཙམ་ན། མི་གཡོ་བ་དཀར་པོའི་སྐུ་ཆེ་བ་གངས་རི་ལྟ་བུ། སྐུ་དང་མཚོའི་ཤར་མཐའ་ནས་ཉི་མའི་དཀྱིལ་འཁོར་འོད་མཐའ་ཡས་པ་ཞིག་ཤར་བའི་འོད་ཟེར་གྱིས་ཚུགས་པ་མེད་པ་རྨི། 
3-434
དེ་ནས་སྟོན་པ་བཟང་པོ་སུས་ཀྱང་འགྲན་དུ་མེད་པར་སོང་། མི་གཡོ་བ་རང་ལ་བསྙེན་པ་མ་བྱས་ཀྱང་། ཅིག་ཅར་ཕུ་ན་ལྷ་དེ་རང་བྱུང་དུ་བཞུགས་འདུག་པ་དེས་བྱིན་གྱིས་བརླབས་པའི་རྟེན་འབྲེལ་ཡིན་པ་འདྲ་བསམ། ངེད་ཀྱི་རྨི་ལམ་ན་གྲངས་ཅན་རབ་འབྱམས་པ་སྣམ་སྦྱར་ཕྲག་ལ་བཀལ། ཕྱག་གསུམ་བྱས་ནས། ཐོག་མར་དགའ་ལྡན་ལ་འགྲོ་ཟེར་སོང་བ་རྨིས། དེ་ནས་ཞག་བཞི་ནས་སྔོ་ཞུས་སླེབ་བྱུང་། ཁ་བ་དེ་ལོ་ལས་ཆེ་བ་རྒན་གྱིས་མ་དྲན་ཟེར་བ་བཞིན། ཟླ་བ་བཅུ་གཉིས་པའི་ཚེས་ཉི་ཤུ་ནས། ཧོར་ཟླ་གཉིས་པ་རྫོགས་པའི་བར་ལ་ཉི་མ་གསུམ་མ་གཏོགས་གཞན་འབབ་ཉག་གཅིག་བྱས་སོང་། ངེད་རྣམས་སྤང་མོ་ཞིག་གསོས་སྔ་གསར་བ་ནས་བྱེད་དགོས་བསམ་པ་ལ། ནགས་ཁ་བས་བསྡམས་ནས་ཟླ་བ་བཞི་པའི་གཞུག་ཙམ་ལས་མ་ཐུབ། གདན་ས་སྤང་ཆེན། རྡོར་འཛིན་སྤང་ཆེན་གཉིས་ཕུལ་ཕྱིན་བསྒྲུབས། སྤང་ཕྲན་ཐམས་ཅད་སྡོད་ཉན་དུ་བཅོས། དེར་ལས་མི་རྣམས་ཀྱིས་གཞི་བདག་གི་སྐུ་མཁར་གོང་དུ་ཤིང་འདྲེན་བྱེད་དུས། ཇོ་བཟང་རྙིང་པ་འགས་སྔར་འདིར་འདི་འདྲ་བྱས་ཆོག་མེད་ཟེར་བ་ལ། ངེད་ཀྱི་ཟླ་བོ་ཞིག་གིས། གཞི་བདག་རྒས། ད་ཅང་མི་ཡོང་ལབས་འཕྲལ་རང་ལ་རྐང་པ་ནས་བརྩམས་ཏེ་རེངས། ངེད་འབོད་མི་བྱུང་། གཞི་བདག་ལ་བདེན་བདར་གྱིས་གསོས། 
3-435
གནས་འདི་དེ་ལྟ་བུར་གཉན་པ་བརྗོད་མི་ལང་ངོ་། །མེ་ཏོག་མཆོད་པ་བཏང་རབ་གནས་དང་བདེ་མཆོག་གི་དབང་ཞིག་བྱས། དེ་དུས་ཀོང་དམག་གིས་སྟོང་ཤོང་བསྐོར། ཟིངས་པོ་རྟུལ་མི་ནང་ཞུགས་སུ་འདུག་པ། ཆུ་བགགས་པས་དམར་འབེབས་ལ་འགྲོ་ལ་ཁད། རྒྱལ་པོ་གསེར་ཁང་པ་དང་ཁོང་གཉིས་ཀྱིས་བར་དུ་ཡོང་དགོས་ཟེར། ངོས་མ་ཕྱིན། འབུམ་རམ་པ་ཕོ་ཉར་བཏང་། དེས་ལབ་བྱས། རྟུལ་མི་ཉེན་མེད་དུ་ཕྱིར་བསྒྲལ། རྒྱལ་པོ་རང་ནོར་དང་བཅས་པ་བཏོན། དེ་དུས་རྒྱལ་པོ་དར་རྒྱས་ཀྱིས། རྗེ་བཙུན་གླིང་གི་སྐུ་ཤངས་མཚལ་ལ་མཁའ་འགྲོ་མས་བཟོས་པ། སྔ་སོར་ལྷ་རྩེ་ནས་བརྐུ་ལ་ཤོར་བའི་ཁྱད་ཅན་དེ་ཕུལ། ཁོ་རང་བྱ་ཡུལ་དུ་ཁྲིད། གནས་ཆེན་ཙ་རི་ཡོན་བདག་གི་རྩ་བ་ཡིན་བསམ། ཚགས་སུ་མ་ཆུད་རིན་གྱི་བར་དུ་གྲོགས་དན་ལེགས་པར་བྱས། དེ་དུས་བྱ་ཡུལ་ནས་གོང་མ་བསྙུང་ཡང་། དྭགས་པོ་བྱིན་གྱིས་སྐུ་རབ་པ་བསྡུ་མེད་ལ་གཏོང་ལ་ཁད་པ་བྱུང་བསྐྱོབ་པར། མི་དབང་མཚོ་སྐྱེས་རྡོ་རྗེས་ཕེབས། སླར་ཀོང་དམག་གཏོས་ཆེ་བ་སྐུ་རབ་མདར་སླེབ་བྱས་པའི་གནང་དཀའ་བ་བྱུང་འདུག་རུང་། བྱ་པ་སྡེ་སྲིད་གནངས་ཆེ་བས། སྐུ་རབ་ནས་ལ་འཇགས་སོ་ལེགས་པར་འཐོན། སྐུ་མཆེད་མ་མཇལ་བར་གོང་མ་གཤེགས་འདུག །དེས་ངེད་ལ་ཤོག་ཅེས་ནན་ཆེ་བར་བྱུང་བས། 
3-436
གཡུ་མཚོ་ལ་འགྲོ་མ་ཐུབ། ཕུ་སྐོར་ལ་ཕྱིན་དུས་སྒྲོལ་མ་བླ་མཚོར་སྐོར་མི་ཕྱིན་གསོལ་འདེབས་བགྱིད་པའི་སྒང་ལ། མཚོ་དེ་གནས་འགྱུར་བ་འདྲ་ཞིག་བྱས། དབུས་ན་ལཱཉྪ་ཏཱཾ་ཡིག་འོད་ཀྱི་གོང་བུས་བསྐོར་བ་དང་། རྒྱབ་རི་དེར་སྣང་བ། མགོ་མཇུག་མ་ལོག་པ། གནས་བརྟན་གྱི་བྲག་རི་ལྟ་བུའི་བར་དུ། སྒྲོལ་མ་ཉེར་གཅིག་དབྱིབས་རེ་གསལ་བཞུགས་པ་མཐོང་། འབུམ་རམ་པ་སོགས་འགས་གཟབས་མའི་ཡི་གེ་ཏཱཾ་དང་། འོད་ལ་སོགས་པ་ཐམས་ཅད་ཀྱིས་མཐོང་བས་ལབ་དི་རི་རི་གསོལ་འདེབས་འཕྲོ་ཆད་པ་བྱུང་། དེ་ནས་བདུད་མགོན་བླ་མཚོར་མཚོའི་ནང་གི་མཐའ་ཐམས་ཅད་འོད་ཟེར་སྣ་ལྔ་ཐོག་སོ་བཞི་ཙམ་ཡོང་བས་ཁོར་མོར་བསྐོར་བ་ཀུན་གྱིས་མཐོང་བ་སོགས་བྱུང་། དཀའ་བཅུ་པ་དབང་ཕྱུག་དཔལ་ལྡན་སོགས་སྒྲུབ་པ་བ་དང་། ཇོ་བཟང་གཏོས་ཆེ་བ་བཞག །བུ་རྒོད་ཀྱི་ལས་མཚན་ཀྱང་གསོས། མཆོད་ཐེས་སྒྲུབ་རྒྱགས་སོགས་ལ་གཡུ་ཆེན་གཅིག་གིས་བྱང་དྲངས་པ་གཏོས་ཆེ་བ་སྦྱར། དེ་ནས་གཉལ་དུ་སླེབ་གོང་མ་གཤེགས་པ་རེ་ཞིག་གསངས། ངེད་རྣམས་ལོ་གྲོར་བྱས། སྟོན་གཞུག་དགོངས་རྫོགས་གྲལ་དབུར་ཕྱིན། དེ་དུས་རིག་འཛིན་ཅེན་པོ་པདྨ་གླིང་པ་ཡིན་ཟེར་བ་སྔགས་པ་ལོ་ལྔ་བཅུ་ཙམ་ལོན་པ་ཅིག་གིས། ཁྲོས་ནག་གི་ཤོག་སེང་ཞིག་གཏད། ཁྱེད་ལ་བཀའ་བབས་པ་ཡིན་ཟེར་བྱུང་། སང་དཔལ་རིར་སླེབ་དུས། 
3-437
མངའ་བདག་པ་ཆོས་རྗེ་ཀུན་དགའ་ལྷུན་གྲུབ་པས། མངའ་བདག་གི་གཏེར་མ་ཁྲོས་ནག་གི་ཤོག་སེར་བྱིན་བྱུང་། ཆོས་རྗེ་དེ་ཡང་སྔགས་རྙིང་མ་པའི་བསྟན་འཛིན་དུ་ནི་འདུག །རིག་འཛིན་ཆེན་པོ་དེར་གྲགས་པ་ནི་མི་སྣང་ངོ་། །འབུལ་བ་དང་། ངེད་ཀྱི་ཟླའི་དགེ་འདུན་པ་རྣམས་ལ་གསེར་ཞོར་མའི་ལག་འགྱེད་དང་། གཞན་སྤྱི་འབུལ་བསམ་གྱིས་མི་ཁྱབ་པ་གོང་མ་སྔ་མ་དག་གི་དགོངས་རྫོགས་ལས་མི་ཞན་པ་འདུག །དེར། ངེད་ར་ལུང་ལ་འགྲོ་དགོས་པ་ཡོད་དེ། རེ་ཞིག་འཐེན་དགོས་གསུང་འདུག་པ། དེ་ལྟ་ན། དོན་མེད་དུ་བསྡད་ཞན་འདྲ། མཆོད་ཡོན་སྦྲེལ་ནས་བཀྲ་ཤིས་མཐོང་སྨོན་དུ་རྟེན་ཆེན་བཞེང་པའི་བཀའ་བགྲོས་བྱས། མཆོད་ཡོན་རེ་རེས་འགོད་ཅི་ཆུང་རྒྱབ་པའི་གསེར་ཞོ་ཉིས་བརྒྱ་ཉིས་བརྒྱའི་དངོས་པོ་སྤུས་གཙང་བཏོན། གཡའ་བཟང་ཆོས་མཛད་པ་བསོད་རྣམས་སྙིང་པོ་དང་། དཔལ་སྡིང་རབ་འབྱམས་པ་སོགས་བྱང་ངམས་རིངས་སུ་ཟངས་སྒྲུབ་ལ་བརྫངས། དེ་དང་དུས་མཉམ་དུ། ར་ལུང་དུ། རྗེའི་ཕྱི་རྟེན་རྟེན་ཆེན་ཞིག་བསྒྲུབ་དགོས་བསམ་པ། ར་ལུང་གི་བཀའ་བགྲོས་པ་རྣམས་ལ་མ་བཏུབ། ངེད་རང་བྱ་ཡུལ་དུ་སྡོད་དགོས་བྱུང་ནས་གསེར་ཞོ་བརྒྱ་ཕུལ། དབུ་རྩེར་ཐུབ་དབང་གི་སྐུ་རྒྱབ་མཐོ་བཅུ་གསུམ་མ་ཞིག་བཞེངས། དེ་དུས། ཆོས་རྒྱལ་བྱང་པ་གོང་མ་ནམཁའ་ཚེ་དབང་རྡོ་རྗེ་ཡབ་སྲས་བཞུགས་པས། 
3-438
བདག་རྐྱེན་ཚད་མེད་པ་གནང་། ངམས་རིངས་མཁན་ཆེན་བཟང་པོ་བཀྲ་ཤིས་པ་ཟེར་བའི་བྱང་ཆུབ་སེམས་དཔའ་དེ་མཆོད་ཡོན་གཉིས་ཀས་བྱང་ཕྱོགས་སུ་སླེབ་ཐུབ་པ་བྱུང་ན་གསུང་བ་བྱུང་། ཆོང་ལུགས་ཀྱང་ལེགས་ཐག་ཆོད་པ་བྱུང་འདུག །ཟངས་རྩེས་སྲང་གི་ཁལ་ཕྱེད་སུམ་བརྒྱ་ཙམ་འབྱོར། དེ་དུས་བོ་དོང་གི་རི་ཁྲོད་བྲག་རམ་ཟེར་བ་དེ་ན། རྙིང་མའི་སྔགས་འཆང་ཆེན་པོ། དཔལ་དུས་ཀྱི་འཁོར་ལོའི་རྫོགས་རིམ་ལས་གྲུབ་པ་བརྙེས་པ། བཀའ་བཞི་པ་ཞེས་པ། དགུང་ལོ་དགུ་བཅུ་གོ་བདུན་ཙམ་བཞེས་པ་དེ་ལ། དང་པོ་རྒྱལ་བྱེད་ཚལ་ནས་རབ་འབྱམས་རིག་འཛིན་པ་འགྲོ་དུས་ངེད་རང་ལ་བར་ཆོད་བྱེད་པའི་གདོན་འདི་འདྲ་ཞེས་མིང་བརྗོད་ནས་བྱང་དགྲོལ་ཞུས་པས་ཕན་ཤིན་ཏུ་ཐོགས་པར་བྱུང་། འཕྱོང་རྒྱས་སུ་ཡོད་དུས། ཆོས་རྗེ་དེ་བཞུགས་ཡུལ་དང་བཅས་པ་ཇི་ལྟར་རྨི་ལམ་དུ་ཡང་བྱུང་། དེ་ནས་ཕྱིས་བསྲུང་བ་ཞུས་པས། བག་གདོང་ལྕམ་དྲལ་གྱི་སྒྲུབ་སྐོར་རྣམས་མར་གནང་། དེ་ལ་ཡང་བཀའ་བསྒོས། ཕྱིན་ཆད་ཆོས་སྐྱོང་དུ་བསྟེན། སྒྲུབ་སྐོར་བཤད་ཆོག་པའི་གནང་བ་སྩལ། འདིར་གསང་སྟབས་ཀྱིས་བསྟེན་དུས། བླ་མ་རྡོ་རྗེ་འཛིན་པ་ཕེབས། བསྐང་གསོ་གཏོང་བའི་གྲལ་དུ། དཔོན་སློབ་ལ་ཆོས་སྐྱོང་དམར་པོ་གསར་པ་ཞིག་སླེབ་འདུག་པ། བསྟེན་ན་ལེགས་པར་འོང་གསུང་ཐིངས་བྱུང་། བལ་པོ་བཟོ་བོ་འབོད་པར་མགྲོན་གཉེར་ཀུན་དགའ་བསམ་གྲུབ་མངགས། 
3-439
གསེར་སྲང་གང་གིས། ཆོས་འཁོར་ལྷ་ས་སོགས་ལ་ཞལ་གསེར་ཕུལ། བར་ཆད་མི་འབྱུང་བའི་སྨོན་ལམ་བཏབ། ངེད་ཀྱིས་དགུན་ལྷ་རྩེར་བསྡད། དེ་དུས་ཆོས་རྗེ་ཏིང་ཏིང་པ་སྐུ་བསྙུང་བས། གྲོང་སྟོད་མཁར་དུ་ཕྱིན་དུས། ཏིང་ཏིང་པའི་གཞིས་ཕྱེད་ལྷག་ཙམ། ཆོས་རྗེ་ལ་གཏན་ཁྲས་ཆོད་འདུག་པ་ཀུན་ཕུལ། དཀྱུས་མདོར་ཆོས་སྡེ་འདེབས་དགོས་པའི་ཞུ་བ་ནན་ཆེན་པོ་འདུག་པ་ཁས་བླངས་ནས། ཏིང་ཏིང་པས་གསེར་ཞོ་བརྒྱ་ལ་བསྐོར་བ་ཕུལ་ནས་ས་ཆ་བྱིན་ཕྱིར་སློག །ཕུན་ཚོགས་རབ་བརྟན་ངེད་རང་གིས་བཟུང་། བྲེལ་བས་གཡེངས་ནས་ཆོས་སྡེ་འདེབས་རྒྱུ་ལ་རེ་ཞིག་འགྱངས། སོས་དེ་གྲྭ་ཕྱི་ནས་འབྲུག་སྟོད་པ་དང་། ཤ་མི་བ་སོགས་རི་མོ་བ་གཏོས་ཆེ་བ་བོས། བཀྲ་ཤིས་མཐོང་སྨོན་གྱི་གཙང་ཁང་ལ་འདས་མ་འོངས་ཀྱི་སངས་རྒྱས། མི་འཁྲུགས་པ་དང་། ཚེ་དཔག་མེད། གཞན་བདེ་གཤེགས་སུམ་ཅུ་རྩ་ལྔ་སོགས་རགས་སེ་བ། འདུ་ཁང་གི་གདོང་ཆེན་ལ། དཀར་བརྒྱུད་བླ་མ་དང་། ཐུབ་པ་གནས་བཅུ། བྱམས་འཇམ་དབྱངས་ལ་སེམས་དཔའ་བརྒྱད་ཀྱིས་བསྐོར་བ། གཞན་བྱ་འདུལ་བ་འཛིན་པ་སྐལ་བཟང་ཆོས་ཀྱི་རྒྱ་མཚོས་མཛད་པའི་མཛད་པ་བཅུ་གཉིས་ཇི་ལྟ་བ། སྡེ་པ་ཡབ་ཡུམ། ནང་སོ་རྣམ་པ། དྲུང་འཁོར་གྲྭ་བཙུན་ཡུལ་གྱི་ཕྱུག་པོས་གསེར་གྱི་སྦྱིན་བདག་བྱས་པས། གསེར་ཞོ་བརྒྱ་ཉི་ཤུ་བཏུལ་བ་ཐུབ་པའི་སྐུའི་རིགས་ཐམས་ཅད་ཀྱི་སྐུ་ཤ་གང་ཡིན་གསེར་དང་། 
3-440
ལྷག་གིས། སྒོ་ཁང་སྟེང་དུ་གྲུབ་བརྒྱ་དང་། ཚོན་རྩི་གཞན་ལྟ་བས་མི་ངོམས་པ། དོ་དམ་ཚོན་ལས་ཡར་རྒྱབ་པ་སྤྲུལ་སྐུ་བསོད་ནམས་རྒྱ་མཚོས་བགྱིས། འདིས་ཁོ་བོས་གར་གཙུག་ལག་ཁང་བསྒྲུབས་པ་དེར། མི་དྲུག་དྲུག་གི་གོ་རྒྱུན་དུ་བཅད། ལྷ་མཐོངས་ལོ་ཙ་བས་དོ་དམ་བྱས། བལ་པོ་ཀ་ན་ཛུ། ཨ་བལ་ཤིང་སོགས་འགའ་ཡར་སླེབ། བཟོ་གྲྭ་བཙུགས། ཟངས་བསྐྱར་ནས་བསྒྲུབ་དགོས་པ་བྱུང་དུས། གསེར་དྲིན་པར་སྣང་ཟེར་བས། གསེར་རྐྱང་ཞོ་ཉིས་བརྒྱས་གཙོས་པའི་ཞོ་བཞི་བརྒྱ་ལྷག་ཙམ་གྱི་ཚོང་ཟོག་བརྫངས། དེ་དུས་བྱང་ནས་ཆོས་རྒྱལ་ཆེན་པོ་གཤེགས་པའི་དགོངས་རྫོགས་དང་ཐུག །གོང་མ་ཀུན་དགའ་རིན་ཆེན་མཆེད་བཞུགས་པས། སྔར་སྲོལ་ཇི་ལྟ་བའི་མགོ་འདོན་གནང་འདུག །ཟངས་ཀྱང་སྔར་ལས་མི་ཞན་བ་བྱུང་། སྐུ་གསེར་ལ། བཞུ་ཆད་དྲེགས་པའི་ཞོ་དྲུག་བརྒྱ་ཙམ་སོང་ལ། མ་བཞུས་བའི་བདུན་བརྒྱར་འདུག །འཛུགས་སྟོན། བར་སྟོན། གསེར་སྟོན། བཟོ་གོས་དངོས་པོའི་རྣམ་བཞག་སོགས་ལྷ་མགུ་མི་མགུར་བཏང་། རྟེན་བཞེངས་གྲྭ་ཚུགས་འཕྲལ་སྐུ་རབ་ནས་སྡེ་པ་ཀུན་དགའ་བ་དངོས་སྤྱད་གཏོས་ཆེ་བ་དང་བཅས་བཤགས་པ་འབུལ་བར་འབྱོར། སྐུ་རབ་པ་དང་མཆོད་ཡོན་དན་ཁེལ་བྱས། དེ་ཕན་སྐུ་རབ་པ་དུས་ཁ་དམའ་བར་ཡོད་པ་ལ། དེ་ནས་མཐོར་སོང་ཟེར། བྱ་པ་སྡེ་པ་རྙིང་མ་གསན་འདོད་པར་འདུག་པས། 
3-441
མངའ་རིས་པ་རིག་འཛིན་ཆེན་པོ་ལེགས་བྱས། འབོད་པའི་གྲོགས། གཞན་ཡང་ཁོང་ལ་གཙང་དུའང་འཕྲིན་ལས་གང་ཡོང་གི་གྲོགས་བྱས། དེ་ཡང་གསང་སྔགས་རྙིང་མ་གསན་རྒྱ་ཆེ་བར་སྣང་བས་དེ་དག་དར་ལ་རེ་ཡིན། རང་ཉིད་འཇམ་དཔལ་གཤིན་རྗེ་ཞུ་འདོད་ཡོད་པ་དབུས་གཙང་གར་ཡང་བརྟགས་པས། སྐུ་སྲུང་པ་ཆེན་པོའི་སྲས་པོ། བླ་མའི་དྲུང་ཚེ་བདག་བཀྲ་ཤིས་རང་མཁས་པར་མཐོང་ནས་ལྕགས་སྡིག་ཆོས་སྡེ་རྫོགས་པར་ཞུས། རྟེན་ཆེན་རྫོགས་པའི་སངས་རྒྱས་ཀྱི་སྐུ་མཐོ་ཚད་བཞི་བཅུའི་དཔངས་ཡོད་པ། ལོ་གཅིག་འཁྱུད་འཁོར་ལ་སྤུས་གཙང་བ། རྟེན་ཆེན་འདི་ཟངས་སྲབ་མོ་བྱས་ན་མི་ལེགས་པར་མཐོང་། རྩེས་ཐང་སྲང་གི་ཁལ་རེ་ལ་ལྕགས་ཁྱེམ་གཉིས་གོ་མའི་ཚོད་ཙམ་གྱི་རྒྱ་བྱས་པ། ལུགས་མ་ལེགས་ཚད་དང་མཉམ་པ་བྱུང་། ཟངས་ཁལ་བཞི་བརྒྱ་སོང་། དེ་ལོ་སྔར་བཞིན་འབྲུག་སྟོད་པ་སོགས་བོས་ཤིང་རྩི་བཏང་། རྟེན་བཞེངས་གྲུབ་འཕྲལ། ཉིན་གཟེར་སྡོམས་དང་། མཚན་ཐལ་གཟུངས་འབུལ་བ་ཞག་བཅུ་གཉིས་འགོར། འདིའི་ནང་དུ། རྒྱལ་བའི་བཀའ་འགྱུར་རོ་འཚལ་ཚང་མ་གཅིག །བརྒྱད་སྟོང་པ་ཉི་ཤུ་རྩ་ལྔས་གཙོས་པའི་པོ་ཏི་སུམ་བརྒྱ་ཕྱིན་དང་། དེ་བཞིན་གཤེགས་པའི་སྐུ་ཁྱུད་གང་བ་ཁྲི་ཚོ་གཅིག །བྱིན་རླབས་ཅན་གྱི་ས་སྣའི་ཚ་ཚ་ལྔ་སྟོང་། དཔལ་འཁོར་བདེ་ཆེན་གྱི་གཟུངས་དྲིའུའི་རྒྱབ་གསུམ། གཞན་དེ་བཞིན་གཤེགས་པའི་རིང་བསྲེལ། 
3-442
སྒྲ་བསྒྱུར་མར་དགས་ལ་སོགས་པས་དཀར་བཀའ་གདམས་པའི་སྐྱེས་བུ་དམ་པ་རྣམས་ཀྱི་བྱིན་རླབས་ཁུངས་ཐུབ། ར་ལུང་དང་། སྣེའུ་གདོང་རྩེ། ལས་སྟོད་བྱང་ནས་གནང་བ་སོགས་བགྲང་བར་དཀའ་བ། རྗེ་ཀུན་དགའ་གྲོལ་མཆོག་གིས་རྟེན་འབྲེལ་ཡོད་གསུང་གནང་བའི་གུང་ཐང་ལོ་ཙ་བས་བཞེངས་པའི་ཇོ་བོའི་བྲིས་སྐུ་ཕྱག་ནས་མ། རྗེ་གོང་མའི་ཕྱག་དྲིལ་བར་སྣང་ལ་བཞག་པ་དེ། ཡོན་ཆབ་ཤེལ་དཀར་དུ་སོང་བ། རྗེ་བླ་མའི་ཚེམས་ན་བཟའ་དབུ་ལོ་སོགས་བསམ་གྱིས་མི་ཁྱབ། ལྷག་པར་དབུའི་གཙུག་ན། ཇོ་བོ་ནཱ་རོ་པའི་ཕྱག་བཟོ། ཛྷཻ་ཀྵིམ་ལས་གྲུབ་པའི་ཏིལླི་པའི་སྐུ། རྗེ་བླ་མའི་སྐུ་ཆུང་ཆུང་ཁྲི་ལ་སྙེག་པ་ཙམ་བཞུགས་པ། ཞལ་གསེར་གྱི་གྲང་གསེར་ལ་བཏུལ་མ་ཞོ་ཉི་ཤུ་རྩ་ལྔ་སོང་། གཟུངས་ཕུལ་གྲུབ་པའི་ནུབ་རང་སྟ་གོན་བྱས། དཀྱིལ་འཁོར་ལས་རིམ་ཇི་ལྟ་བས། འཁོར་ལོ་སྡོམ་པའི་སྒྲུབ་མཆོད་ཞག་འགའི་ཉིན་གྱི་རིས་རབ་ཏུ་གནས་པ་བྱས། དགའ་སྟོན་གྱི་དུས་ཁྲོམ་ཚད་མེད་པ་འཚོགས་སོ། །བལ་པོ་རྣམས་ལ་གསེར་རྐྱང་རྩེས་ཞོ་དྲུག་བརྒྱ། གཞན་བཟོ་རིགས་པ་སོ་སོ་ལ་གནང་སྦྱིན་བསམ་གྱིས་མི་ཁྱབ་པ་སོང་ངོ་། །འབད་པ་མ་ག་དྷ་བཟང་སྤྱན་འདྲེན་གྱིས། །ལེགས་བྱས་ཚོགས་ཀྱི་དབང་ཕྱུག་ཆེ་དྲངས་པའི། །ངོ་མཚར་སྣང་བ་མཐོ་རིས་སྙིགས་དུས་ནི། །བུ་རམ་ཤིང་འཕེལ་ཞེས་པའི་གྲོང་གིས་བཟུང་། །
3-443
གང་དུ་སྡིག་པའི་རྡུལ་གྱིས་རིད་བཏང་བ། །ཆོས་ཀྱི་སྣང་བ་ཡངས་པོའི་དགེ་བའི་མིག །དེ་ནི་འགྲོ་ལ་ཅི་དགར་འཁྲུངས་པ་ཡང་། །བསྔགས་འོས་ཐམས་ཅད་སྙིང་པོར་འཁྲིལ་སྙམ་སེམས། །འཕྱོང་རྒྱས་ནས་སྡེ་པ་སྐུ་གཞོན་པ་ཆོས་བྲོས་ལ་བྱོན། དེ་ཡང་ཆོས་རྗེ་ནས། གདན་རབས་མང་པོའི་བར་དུ། མཁན་སློབ་གཉིས་ཀྱིས་འདུལ་བ་ལ་སོགས་པ་ལ་ལག་ལེན་བསླབ་བྱ་དང་། གསང་སྔགས་ཀྱི་སློབ་གཉེར་ཁྲིད་ལུགས་ཡོད་རུང་། ཆོས་རྗེ་བློ་གྲོས་སེང་གེ་སྐུ་ན་ཕྲ་དུས། དཔོན་པོ་ཀུན་སེང་བའི་སྐྱོན་གྱིས། གདན་ས་ལ་གོད་ཀ་ཆེན་པོ་བྱུང་། དེ་ནས་མི་ཐོག་གཉིས་སུ་ཉག་ཇེ་ཕྲར་གྱུར་པས། གནས་ནང་མི་ནག་གླིང་དུ་སོང་། སྲོལ་བཟང་པོ་ནུབ་འདུག་དགོངས། རྒྱལ་དབང་རྗེས། སྙེ་ཐང་བཀྲ་ཤིས་སྒང་པའི་མཁན་པོ་ཆོས་རྗེ་བསམ་གཏན་པ་ཟེར་བ། མདོ་རྒྱུད་སྒྲ་རིག་སོགས་ལ་སྐུ་ཡོན་ཆེ་བ། རྗེ་རང་གི་གསུང་ལ་འདྲིས་ཆེ་བ་ཅིག་ཡོད་འདུག་པ། སློབ་དཔོན་དུ་བསྐོ་རྩིས་མཛད། སྣམ་མདར་ཆོས་སྡེའི་གཞི་བཏིངས། ཙ་རི་སྒམ་པོ་སོགས་སུ་འཕྲིན་ལས་ཀྱིས་གཡེལ། མཐར་མ་ཕྱིན། དེ་ནས་ཡར་ཕེབས་འཕྲལ་ཞིང་བརྗེས། སྣམ་ཤོར་དུས། དེ་ཡང་ཞིག་རལ་དུ་གྱུར་སྣང་། དེ་ནས་རྗེ་གོང་མས། དང་པོ་ལྷ་རྩེར་སྔགས་གྲྭ་བཙུགས། དུས་འཁོར་ཞབས་པ་ཤཱཀྱ་དབང་ཕྱུག་གིས་སློབ་དཔོན་མཛད། ཕྱིས་གདན་སར། 
3-444
རྗེ་མཐུ་སྟོབས་ཞབས་ཡོན་ཏན་ཡེ་ཤེས་བཀོད་པ་གནང་། བཀྲ་ཤིས་མཐོང་སྨོན་དུ་སྤོས། དེའི་ལག་ཡང་རྩེར་སྔགས་གྲྭ་འབུམ་རམ་འབྱམས་པ་མཁས་པའི་དབང་པོར་གྲགས་པ་དེས། ཙ་རི་བསྐོར་བར་ཕེབས། རྗེ་གོང་མའི་དྲུང་དུ། རྒྱལ་དབང་བཀའ་འབུམ་ལ་སོགས་པ་གསན་འདུག་པས། དཔོན་སློབ་ཐུགས་ཡིད་གཅིག་ཏུ་འདྲེས། སློབ་དཔོན་ཁོང་གིས་མཛད་ནས་མཚན་ཉིད་ཀྱི་གྲྭ་ཚང་ཞིག །དཔལ་རིར་འདེབས་པར་ཐུགས་ཐག་བཅད། དེའི་ས་དྲས་མཛད་པར་སྣང་སྟེ། སྐུ་ཚེ་མཐར་མ་ཕྱིན་པས་འཕྲོ་མར་ལུས་པར་འདུག །ངེད་དེ་དག་གི་ཕྱག་རྗེས་ཀྱི་གཞུག་སྐྱོང་བར་འོངས་པ་ཡིན་པས་བསམས། བྱང་དཔལ་སྡིངས་རབ་འབྱམས་པ་སྡེ་སྣོད་ལ་ཡོན་ཏན་ཆེ་བས་དད། དཀར་བརྒྱུད་ལ་རིགས་སད་པའི་མིར་འདུག་བསམ། ཁོང་སློབ་དཔོན་དུ་བསྐོས། གྲྭ་པ་དབང་དངས་བརྒྱད་ཅུ་ལ་སྙེག་པ་ཙམ་བསྡུས། གྲྭ་པའི་མིང་ལས། པད་དཀར་གྲྭ་ཚང་དུ་གྲགས་བའི་མཚན་ཉིད་ཀྱི་བཤད་གྲྭ་འདི་བཙུགས་པ་ཡིན་ནོ། །མཐུན་རྐྱེན་ཆ་འོས་ཙམ་བཞག །སྡེ་པས་ཕོགས་ཁལ་སུམ་བརྒྱ་གནང་བ་མཛད། དེ་ཡང་། ཁོ་བོས་དགེ་བཤེས་ལ་བདག་རྐྱེན་རང་ཉིད་མདོ་རྒྱུད་ཀྱི་ཐོས་པ་ལ་ནན་ཏན་བྱས་པས། འབྲུག་པའི་གྲྭ་རིགས་ཅི་རིགས་པ་རྣམས། ཁོ་བོ་གྲུབ་མཐའ་འགྱུར་བ་ཙམ་དུ་སེམས་མོད། ངེད་བཤད་གྲྭ་ལ་གཙིགས་ཐང་མི་ཆེ་རུ། བསྲེ་འཕོ་ལ་སོགས་པའི་ཟབ་ཁྲིད་རྒྱས་པ་ཐམས་ཅད་མ་གོ་ནས་ཅམ་བཞག །
3-445
ཆོས་དྲུག་ཅེས་པའི་མིང་ཡོད་ཙམ་ལ་གདམ་ངག་མ་ཚང་བ་ཅིག་གི་འཆད་ཉན་འཕེལ། དེའི་དབང་གིས་ཡོད་པའི་སྒོ་བོར་ནས། མེད་པའི་སྲང་མདོར་འཁྱམས་པ་ལྟ་བུ་གདམས་ངག་རྒྱུད་དང་མི་མཐུན་པ་མང་པོ་ཟབ་ཟབ་ཏུ་ལྟ་བ་འདི་ཐོས་པ་ཞན་པའི་སྐྱོན་དུ་ཤེས་ནས། དེ་བཟློག་པའི་ཕྱིར་དང་། རྗེ་གོང་མ་རྣམས་ཀྱི་སྲོལ་མ་ཉམས་པར་བསྐྱངས་འདོད་པའོ། །བཀྲ་ཤིས་མཐོང་སྨོན་གྱི་སྒྲུབ་སྡེ་བདེ་ཆེན་འབྲུག་རྒྱས་ཀྱི་ཆོས་སྒོ་བར། ལོ་ཙ་བ་ངག་དབང་གྲགས་པ་བསྐོས། ཟངས་ལྷག་ཁལ་བཞི་བཅུ་ཞེ་གཅིག་ཡང་རྩེར། གོང་མ་བསྟན་འཛིན་ནོར་བུའི་ནང་རྟེན་གྱི་རྒྱུར་ཕུལ། ཐུབ་པའི་སྐུ་རྒྱབ་མཐོ་བཅུ་གསུམ་མ་བལ་པོ་ཚོས་གཉལ་དུ་བཞེངས། དཔེ་འདྲ་ཁོ་བོས་བཀོད་པ་བྱས་སོ། ། དེ་ནས་ངེད་རྣམས་ར་ལུང་དུ་ཕྱིན། དགུན་རྒྱལ་བྱེད་ཚལ་དུ་བསྡད་དུས་ཆོ་འཕྲུལ་གྱི་དུས་ཆེན་ལ་མཚམས་ཀ་དཔེ་མ་མིན་པའི་ཞོགས་དགོངས་འཇམ་དཀར་གྱི་བསྙེན་པ་རེ་ཙམ་བྱས་པའི་ཚེས་བརྒྱད་ཀྱི་ནམ་སེང་གཉིད་ཐུན་ཕྲད་ཙམ་ཞིག་བྱུང་བར་རྨི་ལམ་ན། རྒྱལ་བྱེད་ཚལ་གྱི་ནུབ་ཕྱོགས་ཀྱི་ནམ་མཁའ་འཇའ་སྤྲིན་གྱིས་ཕུབ་པ། མཐོང་སྒོ་ཅུང་ཟད་བྱེ་བ་ཞིག་ན། འཇམ་པའི་དབྱངས་སྨྲ་བའི་སེང་གེ་ལྷའི་བུ་དང་བུ་མོ་མང་པོ་ལ་ཆོས་འཆད་པ་ཞིག་མཐོང་བ་བྱུང་ངོ་། །དེ་ནས་སོས་པ་སྣམ་འཕགས་རྒྱལ་ཚུན་ཕྱིན། 
3-446
ཉིན་རེ་བཞིན་ཁྲོམ་ཆེན་པོ་དང་འབུལ་བ་རྒྱ་ཆེ་བ་བྱུང་། དེ་དུས་ཆོས་རྗེ་ལྷོ་པ་ཀུན་བཟངས་ཞེས་པ། སྐྱེད་ཚལ་པའི་དགེ་བཤེས་བགྲེས་པོ་སྙེ་མོ་རུའི་མཁན་པོ་མཛད་པ་དེ་བྱོན། ལམ་ན་ཡར་ངེད་ནཱ་རོ་པཎ་ཆེན་ལ་འཁོར་གསུམ་འབུལ་བར་འགྲོ་རྒྱུ་ཡིན་གསུང་། ཕེབས་འཕྲལ་ལ། བྱར་གཤོངས། གསེར་མདོག་ཅན་པ་བཞིན་གྱི་དགེ་བཤེས་མང་པོ་དང་ངེད་རྣམས་རྩོད་པ་བྱས་པས། དཔོན་སློབ་འདི་རྣམས་རིགས་ལུང་རྐྱང་མཛད་པས་ཞལ་བྱང་པོ་སྣང་ཟེར། སང་གནངས་ནས་རྩོད་པ་རེ་ཙམ་མཛད་སྣང་། ཉིན་གཅིག་ངེད་ལ། མཚན་ཉིད་ཀྱི་བཤད་ཉན་ནི་མི་མཛད། འདི་ཙམ་གྱི་སྐུ་ཡོན་བསླབས་ནས་ཅི་མཛད་པ་ཡིན་ཟེར། ཐུགས་དད་པ་ཁ་ཞེ་མིན་པ་མཛད། གསང་ཆོས་འདྲ་གསན་པ་དང་སྦྲགས་རྒྱལ་བྱེད་ཚལ་དུ་ཡང་ཕེབས་སོ། །རྒྱལ་བྱེད་ཚལ་གྱི་སྟེང་དུ་ཆུ་མིག་གསར་པ་ཞིག་བྱུང་ནས་གཟིམས་ཁང་རྩིག་དུས། མུས་པ་ཆོས་མཛད་ངག་དབང་དཔལ་འབྱོར་རྐྱང་འདུར་གྲ་ཚང་གི་སློབ་དཔོན་དུ་འོངས་པ་མཇལ་དུ་བྱུང་། མི་རྣམས་ཀྱིས་སྒྲུབ་ཆུར་གླེང་སྣང་སྟེ། བཞི་བདག་ཆོས་ལ་དཀར། སྔར་དེར་དགུན་ཆུ་ཐག་རིང་ནས་ལེན་དགོས་པ་ལ། སྒྲུབ་སྡེ་བཙུགས་ནས་ཆུ་མིག་མང་པོ་བརྡོལ་བྱུང་བ་ཁོ་ནའི་བྱེ་བྲག་གོ། །དེ་ནས་རྐྱང་འདུར་བའི་སློས་ཆེན་ས་སྐྱ་ཆོས་རྒྱམ་པ་སོགས་བྱོན་པ་ལ། 
3-447
བདེ་མཆོག་གི་དབང་སོགས་བྱས། སློབ་དཔོན་པ་དེ་སྐུ་ཡོན་ཅན་དུ་བརྩི་བ་བདེན་པར་སྣང་། ར་ལུང་དུ། ཆེན་པོའི་རལ་པ་ནོར་བུའི་རྐང་སྟེགས་ཀྱིས་དཀྲིས་མར་བཅིངས་པའི་ཆོས་ཀྱི་སེང་གེའི་ཁྲི་ཆེན་པོ། འཕགས་པ་འཇིག་རྟེན་དབང་ཕྱུག་གི་སྐུའི་སྤྲུལ་པ་རིམ་པ་རིམ་པས་བསྟན་པར་དབོན་རིན་པོ་ཆེ་མི་ཕམ་ཆོས་ཀྱི་རྒྱལ་པོ་དབང་བསྐུར་བའི་སྟ་གོན་ལེགས་པར་གྲུབ། དངོས་གཞིའི་ཉིན། དཔོན་སློབ་རྣམས་སྤོས་སྐྱ་ནས་དབུ་ཆེའི་ཚོགས་ཀྱིས་བསྐོར་བ། རྒྱུ་སྐར་དབུས་ན་ཟླ་བ་ཉ་གང་བ་ལྟ་བུར་བསྐྱོད། སེར་འཕྲེང་སྤོས་སྐྱ་ནས་ཤྭ་རགས་སྤྱི་ཁང་བརྒྱུད། ཡང་དགོན་གྱི་རྒྱལ་སྒོ་བར་མཚན་གཅིག་རག་པས། གདུགས། རྒྱལ་མཚན། བ་དན། ཕྱེ་འཕུར། ལྡ་ལྡི། འཕན། རོལ་མོ་སོགས་བཀོད་པའི་ཁྱད་པར་ཆེན་པོས་བསུས་ཏེ། གདན་ལ་ཕེབས་མ་ཐག་གཙོ་བོར་སྣེ་གདོང་རྩེ། གོང་དཀར། རིན་སྤུངས། རྒྱལ་རྩེ། བྱ་པ། འཕྱོང་རྒྱས་པ་སོགས་སྡེ་སྲིད་ཆེ་བ་རྣམས་ཀྱིས་ཇ་ཞུས། དེ་ནས་ངེད་རང་གིས་ཐོག་དྲངས་གྲྭ་རིགས་ཐམས་ཅད་ཀྱིས་འབུལ་བ་རྣམ་ཐོས་ཀྱི་མཛོད་ལ་འགྲན་པ་བྱུང་། དགེ་འདུན་གྲལ་བཞུགས་ལ་སྟོང་ཕྲག་བཞི་འདུག །གཞན་དབུས་སུ་སྡེ་གཟར་མ་བྱུང་ན། འབྲོག་སྨད་ཀྱི་གྲྭ་བུ་སློབ་ཀུན་ཡོང་བསམ་བྱས་འདུག་ཀྱང་། བཤོལ་དགོས་པ་བྱུང་། དགེ་འདུན་གྱིས། བདེ་ཆེན་ཆོས་འཁོར་ནས། མགོན་ཁང་བར་རྡོག་པ་རྒྱག་མི་ཚུགས་པ་ཆོས་གྲྭ་དོག་པོ་ལྟ་བུར་ཁེངས། 
3-448
སྐྱེ་བོ་ནི། གཙང་། དབུས་འབྲོག །ལྷོ་བྲག་སོགས་ནས་ཁྲི་ཚོ་མང་པོ་ལྷགས། ཉི་མ་གཉིས་གསུམ་དགའ་སྟོན་གྱིས་མངོན་པར་འདའ་བར་བྱས་སོ། །དེ་ནས། ངེད་ཀྱིས་དབང་ཆོས་འདྲ་ཕུལ། ལྷོའི་རྙེད་པར་བརྟེན། ཀ་ཐོག་པ། ལྷ་པ་གནས་རྙིང་པ་སོགས་མ་བཟོད་པའི་འཁྲུག་ལོང་ཡོད་པ་ཞིག་འདུག་པས་བསྲུང་ཟློག་ལ་དམིགས། ཡང་དགོན་གྱི་རྗེའི་སྒྲུབ་ཁང་ཀུན་སྣང་བདེ་ཆེན་ཁོར་ཡུག་ཅེས་པར་མགོན་ཁང་བཅས། ཕྱི་རྟེན། ནང་རྟེན། གསང་རྟེན་སོགས་མན་ངག་བཞིན་བགྱིས། འཇད་དར་སྡིངས་པ། ངེད་རང་གི་སློབ་མའང་ཡིན་པ་དཔལ་ལྡན་རྒྱལ་མཚན། སྐུ་སྲུང་ཀྱང་བགྱིད་པ་དེ་ལ་སོགས་པས་སྐུ་རིམ་མང་པོ་བསྒྲུབས་པས། ཕ་རོལ་གྱི་བྱད་མཁན་རྣམས་ཀྱི་ནུས་པ་རང་གཤེད་དུ་དབབ་ནས། ཀ་ཐོག་པ་འཕྲལ་དུ་གྲོངས། ལྷ་པ་འཕྲུལ་ཞིག །གནས་རྙིང་མཁན་པོ་སྨྱོ་འབོག་ཏུ་གྱུར། ཚེ་བློས་བཏང་གི་སྒྲུབ་པ་ཞིག་བྱེད་བསམ། རང་བྱོན་ཁ་སརྤ་ཎར་བརྟག་པ་ཕུལ་བས་ཅི་ཡང་མ་བབས་ནས། ཕྱིར་གཙང་ལ་ཕྱིན། རྩེ་ཆེན་ནས་དཔོན་དྲུང་མགོན་པོ་རབ་བརྟན་གྱིས་གཞི་ལན་གཟབས་མ་མཛད། ཆོས་འབྲེལ་ཞུས། དེ་ནས་རྒྱལ་བྱེད་ཚལ་དུ་བསྡད། དེ་དུས་མཉན་ཡོད་བྱར་གཤོངས་ནས་མཁན་ཆེན་སངས་རྒྱས་རྒྱལ་མཚན་པ་དཔོན་སློབ་མཇལ་དུ་བྱོན་པ་ལ། འབེལ་གཏམ་དང་། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་ཉིན་གཅིག་མར་བཤད། 
3-449
སྟོན་གཞུག་གཟིམས་སྤྱིལ་གོང་མར་མཚམས་བསྡམས། དེ་དུས་ལྕེ་རྩེ་དཀན་སྦྱར་ལ་ཟིན་བྲིས་བྱེད་སྐབས། ཤ་ཝ་རིའི་བུམ་ཆུ་ཡིན་ཟེར་བ་འཐུངས་ཏེ་སྐྱུགས་པ་རྨིས། དེ་ནས་ཕག་མོ་ལྷ་ཁྲིད་བརྩམས། ཕྱེད་གྲུབ་པ་ན། སྙན་རྒྱུད་ཐམས་ཅད་ཡི་གེར་བྲིས་པ་རང་ལ་སྐྱེ་མེད་པ་འདྲ་བསམ། བཤོལ་རྩིས་ལ། རྨི་ལམ་དུ་རི་མོ་བ་ཞིག་གིས། བདེན་གཉིས་ཞལ་སྐུ་མདོག་དཀར་མོ་ལ་དམར་བའི་མདངས་ཆགས་པ་ཉམས་དོད་པ་ཞིག་རྫོགས་པར་བྲིས་ནས་གཏད་བྱུང་བས་ཚང་མ་བྲིས། དེ་དུས་རྫོགས་རིམ་ཐམས་ཅད་ཐང་མར་བརྡལ་ཏེ་བཤད་པ། རིན་པོ་ཆེ་ཀློ་བོ་རྒྱལ་རྩེ་ན་བཞུགས་པས་གསན་ནས། སྤྲུལ་སྐུ་རིན་པོ་ཆེ་འབྲུག་པའི་སྙན་རྒྱུད་ཟབ་མོ་ཐམས་ཅད་ཚོགས་ལ་བཤད་པ་གནང་གི་ཡོད་འདུག །དེ་འདྲ་བྱས་ན་སྐུ་ཚེ་ལ་གཟན། མ་མཛད་གསུང་བསླབ་སྟོན་བྱུང་། རང་རེ་གདམས་ངག་གསངས་དྲག་ན་ཕུགས་རྩད་མི་ཆེད་ཉམས་འགྲོ་པར་སྣང་བསམ་བཤད་པ་ཡིན་ནོ། །དེར་སྨོན་འགྲོ་པ་ཆེན་མོ་སླེབ། ཤེས་རབ་ཆེ། དུས་འཁོར་སོགས་རྒྱུད་ལ་ཁེངས་པར་སྣང་། ཉི་མ་གསུམ་བཞི་ཙམ་ངེད་ཀྱི་ཁྲིས་ན། སློབ་དཔོན་ཤེར་ལེགས་སོགས་ཀྱིས་དྲི་བ་འདྲ་བྱེད་འདུག་པར། གནངས་ཆུང་བསམ་ནས་ཆང་ཆོད་རེ་བྱེད་སྣང་། དེ་འདྲ་ཞིག་ངེད་ཀྱང་ཟེར་ཡོང་བསམ་ཉི་མ་རེས་ཁེངས་སུ་སོང་། རྒྱུད་ལ་བཤད་པ་རེ་དགའ་སྣང་། 
3-450
ཉི་མ་བཞི་ཙམ་སོང་ནས། ངེད་ཀྱིས་དུས་འཁོར་སོགས་ཀྱི་དཀའ་ས་ལ་དྲི་བ་ཞིག་བརྒལ་བས། བཤད་པ་ཐོག་ཏུ་འབབ་རྒྱུ་ཡེ་མ་བྱུང་། དེས་ཁེངས་པ་ཞི། བླ་མ་མང་པོ་ལ་ཆོས་ཞུས་ཏེ་འདི་ལས་མཁས་པ་མ་མཐོང་ཟེར། ཕྱིས་ཁོ་བོས་ཅི་སྨྲས་བདེ་པའི་དཔེར་ཁྱེར་བ་ཞིག་བྱུང་། དེ་དུས། རང་གི་སློབ་བུ་དགེ་བཤེས་རིག་དབང་ཞེས་པའི་བྱ་བཏང་གི་ངང་ཚུལ་གྱིས་སེམས་ཕྲོགས་ནས། མངའ་རིས་སྟོད། ཟངས་དཀར་ལྷོ་པའི་རྒྱལ་པོ། རྒྱལ་སྲིད་བསྐྱུར་ནས་ཆོས་ལ་བྱུང་བ་རིམ་པས་དེར་འབྱོར། དེ་ཡང་། མི་ཆོས་ཀྱི་དུས་ཤིན་ཏུ་དཔའ་བ་དང་། རྟུལ་ཕོད་པར་ཞིག་ཡིན་འདུག་པས། སྡིག་པ་མང་པོ་བྱས་ཟེར་འགྱོད་པ་ཆེན་པོས། ཆོས་ཕྱི་བཤོལ་ལ་འཇོག་པར་མི་འདུག །སྐྲ་བཅད། དགེ་ཚུལ་བསྒྲུབས། མིིང་གཞན་ཕན་བཟང་པོར་བཏགས། སྙིང་རུས་ཀྱིས་མགོ་སྔས་ལ་མི་འཇོག །བློས་བསླངས་པའི་གཉིད་མི་ཉལ། བག་མེད་པའི་ཁ་ཟས་དང་བཏུང་བ་མི་བསྟེན། འགྲུལ་ཅི་བཤེར་ཀྱང་སླེབ་མ་ཐག་ནས་སྒོམ་ལ་འཇུག་པ་ཞིག་འདུག་པས། དགེ་སྦྱོར་ལེགས་པར་སྐྱེས། དེ་ནས་མི་རིང་བར། གྲུབ་ཐོབ་ཨུ་རྒྱན་པའི་དབོན་རྒྱུད་ཆོས་རྗེ་སྤུ་ཏྲ་པ་འབྱོར། གཞན་ཡང་དགེ་བཤེས་གྱི་ཚོགས་ཤིན་ཏུ་ཆེ་ནས་ཆོས་སྨར་པར་བྱུང་། སྟོན་ལྷོ་བྲག་ཏུ་བཏེག །རྒྱལ་ཚབ་དམ་པའི་སྐུའི་སྤྲུལ་པ་ཞིག །ལྷོ་མོན་ཐང་གནས་པའི་སྲས་སུ་འདུག་པ་ཁོང་གཏོང་འདོད་པར་འདུག་སྟེ། 
3-451
གྲོ་བོ་ལུང་ནས་ཆོས་རྗེ་དཔའ་བོ་སྐུ་སྐྱེ་ཆོས་རྒྱལ་དོན་གྲུབ་པ། ལ་ཡག་པའི་སྦྱིན་བདག་འགྱུར་དོགས་ཀྱིས་ཁ་བཀག་པས་གཏོང་མ་འདོད་པའི་ཟོན་སྐྱོར་གྱི་འདུག་པས། སྐུ་སྐྱེའི་ཞིབ་རྩད་མ་བྱས། དེ་དུས་གནམ་སྐས་ཅན་ནས་གཏེར་གཏོན་ཟེར་གྲགས་པ་བྱུང་། གཏེར་གནས་དེར་གཏེར་མཚན་གསལ་པོ་ཞིག་བསུབས་ནས་མ་མཐོང་། འགུ་རུ་ལྷ་ཁང་མཇལ། རྡོ་རྗེ་གླིང་པ་ཚང་གི་དབོན་པོ་ཞིག་གིས་ཐེག་མཆོག་མཛོད་བསྟན་བྱུང་བ་ཞིབ་མོར་བལྟས་པས། རྫོགས་པ་ཆེན་པོ་སེམས་སྡེ། གློང་སྡེ། མན་ངག་གི་སྡེ་ཐམས་ཅད་བཀྲ་ལམ་གྱིས་ཤེས། དེ་ནས་པདྨ་གླིང་དུ་བྱས། སྤེལ་བྱུང་དུ་སླེབ་སྐབས། ངེད་ཀྱི་ཟླར། སྡེ་པ་འཕྱོང་རྒྱས་ནས། ཟངས་དཀར་རྒྱལ་པོ། ཆོས་རྗེ་སྤུ་ཏྲ་པ། ཆོས་རྗེ་གསེར་ཏོག་ནས་བགྲེས་པོ། བླ་ཆེན་བསམ་རྒྱལ་བ་སོགས་གྲོ་བོ་ལུང་གི་གནས་བསྐོར་བ་མང་པོ་འདུག་པ་ལ། ངེད་ཀྱིས། ད་ལམ་ཆོས་རྗེ་བཞུགས་ཡོད་འདུག་པས་འཐེན་ན་ལེགས་པ་ཨེ་ཡིན། ཅིས་ཀྱང་འབྱོན་ན་ཆོས་རྗེ་དང་མཇལ། ཆོས་འབྲེལ་གསན་མི་གསན་གང་ཡིན་ཀྱང་། ཁོང་ཀརྨ་པའི་བསྟན་འཛིན་དྲག་པར་འདུག་པས། ཕྱག་འབུལ་ལ་སོགས་པ་མཛད་པ་འཐད། ཅེས་ནན་གྱིས་ལབས་པ་ཡིན་རུང་། དེ་དག་གི་ཁྲོད་ན་ཆེ་སྙེམས་ཀྱིས་དགོངས་ལ་མ་དགོངས་ཞུ་དཀའ་བ་འགའ་འདུག་པ་རྣམས་མ་གསན་བྱོན་སོང་། 
3-452
དགེ་འདུན་ཉིས་བརྒྱ་ཙམ་ཡོད་པ་ཉི་མ་གཉིས་སུ་ཁ་ཕྲལ། སྔ་མ་རྣམས་ལ་ཆོས་རྗེས་བདག་རྐྱེན་མཛད་འདུག་སྟེ། དམངས་མ་རྣམས་ལ་མཇལ་ཁ་ཞུས་ཀྱང་མ་གནང་བ་འདུག །དྲག་པ་དག་ལ་གཞི་ལེན་མཛད། མཇལ་འདུག་པར། འཕྱོང་རྒྱས་ནས་ཀྱིས་ཕྱག་འབུལ་མ་མཛད། དེས་གཞན་རྣམས་ཀྱང་དེ་ཀའི་སྟབས་སུ་སོང་བ་འདྲ་ཞིག་གིས་ཕྱག་མ་ཕུལ་བས། ཆོས་རྗེ་ཐུགས་བརྩེངས། ངེད་ཀྱིས་མ་བྱེད་བྱས་པ་འདྲ་ཞིག་དགོངས་ནས། དེ་ནས་གང་དུ་ཕེབས་ཀྱང་ངེད་ལ་རུ་འཛུགས་པར་སྣང་བ་ཞིག་བྱུང་། ཁོ་བོས་ལེན་པ་མེད། ཕྱི་མ་འབྱོན་མི་རྣམས་ལ་གནས་མཇལ་ཡང་གཏོང་ཚད་བྱས་སྣང་ངོ་། །དེ་ནས་གཡུལ་རྒྱལ་རྫོང་དུ། ལྷ་ཁང་གི་རྒྱལ་པོ། ཀླུ་མོ་ལྕོང་མ་སོགས་ཞི་བདག་ཀུན་བསུ་བ་ལ་འོང་བ་རྨིས། དེ་ནས་ལྷ་ཁང་དུ་སླེབ། དེ་དུས་ཞི་བྱེད་ལ་ལྟ་རྟོག་འདྲ་བྱེད་ཡོད་པ། གདམས་ངག་དེ་གཞུང་མང་པོ་ལ། མན་ངག་ལུགས་དང་མཐུན་བསམ་པ་མ་ཤར། དེར་ཐོ་རངས་ཤིག །དིང་རི་གླང་འཁོར་དུ་སླེབ་པོ་བསམ། ཐང་རྒྱ་ཆེ་བ་ཚད་མེད་པའི་དབུས་ན་རི་ཕག་པ་ལངས་པ་ལྟ་བུ། བྲག་སྨུག་གེ་བ་ཅིག་གིས་ཁྱབ་པའི་རྩར་ཕྱིན་པས། དམ་པ་སངས་རྒྱས་སྐུ་མཚོན་གང་བ་ཙམ་ལ་སྐྱེ་མཆེད་དོད་པ། ཉི་ལྡེམ་ལྟ་བུ་ལ། ཕྱག་ཆོས་འཆད་མཛད་པ་ཞིག་དང་མཇལ་ཏེ། 
3-453
དགྱེས་པའི་འཛུམ་གྱིས་བསུས་ནས་བྱིན་གྱིས་བརླབས་པ་ན། ལམ་སྡུག་བསྔལ་ཞི་བར་བྱེད་པའི་དོན་ཡིད་ལ་བཀྲ་ལམ་ཤར་བ་སྙམ་བྱེད་པའི་མོད་ལ། ཆོས་དེའི་བཀའ་བབས་ཁྱོད་ཡིན་ནོ་གསུང་བ་ཞིག་རྨིས། སད་པ་དང་། ཞི་བྱེད་ཀྱི་ལམ་གྱི་གནད་ཐམས་ཅད་རིག་ནས། དེ་རེས་ཡི་གེ་བྲི་བའི་གནང་བ་མ་ཐོབ། དེ་ནས་མཁར་ཆུར་ཆོས་སྨར་བ་དང་། ལྷ་ཁང་ནས་སྡེ་པ་བསྟན་འཛིན་དབང་བསྒྱུར་གྱིས་མཛད། དེའི་རམ་འདེགས་གཞན་རྣམས་ཀྱིས་ཀྱང་བགྱིས་ཏེ། མངའ་ཞབས་གསར་རྙིང་ནས་གྲྭ་ཁྲལ་ཕྱེད་ཉིས་བརྒྱ་ཙམ་བསྡུས་ཏེ་སྔགས་གྲྭ་འཛུགས་པའི་གཞི་བཏིངས། དེར་ལྟས་ལེགས་པ་ཞིག་གིས་རྐྱེན་ནས། རྫོགས་ཆེན་དང་། བདེ་མཆོག་རིམ་གཉིས་ཀྱི་ཟིན་བྲིས་བྱས། དེར་འདབ་རྩིས་བྱས། ཁྲ་གདང་བརྒྱུད། ཤར་གཞིས་ཀ །ཡུགས། དེ་ནས། གྲི་གུ་ནས་སྡེ་པ་དཔལ་ལྡན་བཀྲ་ཤིས་པའི་ངོར་ཟླ་བ་གཅིག་བསྡད། ཆོས་སྨར་བ་དང་། སྟོན་མོ་གྱ་ནོམ་པ་མཆིས། དེ་དུས་ཞལ་ངོ་སྐུ་གཞོན་པ་དབུ་སྐྲ་བཅད། བློ་གྲོས་པད་དཀར་ཞེས་བཏགས། ཕྱིས་འབྲུག་པའི་རུས་ནན་ཏར་ཆེ་པ་ཅིག་བྱུང་། གསེར་ཞོ་བརྒྱས་བཙོས་པའི་དངོས་སྤྱད་དངོས་གཙང་བའི་འབུལ་ཆེན་མཛད། དེ་ནས་བྱ་ཡུལ་དུ་སླེབ། རྫོང་ཆེན་དུ་ཆོས་རྗེ་ཆོས་ཀྱི་གཏེར་མཛོད་པ་སོགས་བྱོན། སྒྲུབ་སྡེའི་བླ་མར་བརྒྱ་བྱིན་སྐུ་སྐྱེ་བཀོད་བརྩིས་མ་ཉན། བླ་མ་ཤེས་རབ་འཕེལ་བསྐོས། 
3-454
འབུལ་བ་དང་གདབ་ལེན་ཀྱང་བཟང་བར་བྱས། ལོ་གྲོ་ཕྱོགས་སུ་ཕྱིན། ནས་འབུལ་གཏོས་ཆེ་བ་བྱུང་བ་གྲྭ་ཚང་པ་ལ་བཞག །གྲྭ་ཚང་གི་གཞི་རྐྱེན་འབོ་ཆེན་གྱི་བོགས་ཁལ་བདུན་བརྒྱ་ལ་ཆ་བཞག་པའི་ས་ཆ་རྣམས་བསྒྲུབས། བཀྲ་ཤིས་མཐོང་སྨོན་དུ་དཔལ་མགོན་པོའི་རྫོགས་རིམ་སྤྱོད་པའི་འཕྲེང་བ་ལ་འགྲེལ་པ་སྨར་ཁྲིད་ཀྱིས་འཐོན་པ་བརྩམས། འདི་གཞན་དག །དུས་འཁོར་གྱི་རྫོགས་རིམ་དུ་འདོད་དེ། བླ་མའི་མན་ངག་གི་རྒྱུན་མེད་པས་རྩད་མ་ཆོད་པར་འདུག །ཕོ་བྲང་ཡང་རྩེར། གོང་མ་རིན་པོ་ཆེ་བསྟན་འཛིན་ནོར་བུའི་ནང་རྟེན་ཐུབ་དབང་གི་སྐུ་བསྒྲུབས་པའི་རབ་གནས་བགྱིས། དགའ་སྟོན་རྒྱ་ཆེར་མཛད། དེ་དུས་གཞན་མའི་བསྐྱོད་སྟབས་སུ་སྡེ་པ་རང་གི་གནང་ལུགས་གྱ་མདོ་འདྲ་འདུག་པས་ཡིད་མ་མགུ་བ་དང་། དབུས་གཙང་ཕྱོགས་སུ་འགྲོ་འདོད་པ་འགྲིག །སྡོད་ཟེར་ཀྱང་མ་བསྡད། ཡང་རྩེའི་འདུ་ཁང་གི་ཤིང་རྩི་ལོགས་བྲིས། རྡོ་རྗེ་གདན་གྱི་འདུ་ཁང་གི་ཐོག་འཕུགས་སོགས་ལ། ཕྱག་མཛོད་པ་ལ་དཀོད་པ་བྱས། སྒར་པ་བྱིན་དེར་བཞག །བཟོ་གླ་ཚོན་སོགས་ཐོགས་པ་མེད་པ་དང་། ཁྱད་པར་དངུལ་དཀར་ལྷད་མེད་རྩེས་སྲང་གིས་ཁལ་བཞི་ཙམ་ལ། ར་ལུང་དུ་གདན་འདྲེན་རྒྱུའི་དཔལ་ཡེ་ཤེས་ཀྱི་མགོན་པོ་ཕྱག་བཞི་པའི་སྐུ། རྒྱན་ཐམས་ཅད་གསེར་ལྗང་བརྡུངས་ལ་གཡུ་སྤྱང་གི་ཕྲ་བཀོད་པ། 
3-455
གསེར་ལ་ཞོ་དགུ་བཅུ་སོང་འདུག་པ། བལ་པོ་དྷརྨ་ཤིང་གྲོགས་མཆེད་ཀྱིས་ཡང་རྩེར་བསྒྲུབས། ངེད་རྣམས་ཀྱིས་རིམ་པས་མཁར་ཆུར་སོང་། མཚམས་ཀྱི་བཅད་རྒྱ་ཟླ་བ་ལྔར་མཚམས་གཡོག་ཀྱང་མེད་པ་བྱས། དེ་དུས་ཆོས་སྐྱོང་ལ་སྙེན་པ་འཐེམས་པར་སོང་། དམིག་པ་སྔགས་ཀྱི་འཕྲེང་བ་མཐིང་ཤུན་གྱིས་བྲིས་པ་ལྟ་བུ་དངོས་སུ་མཐོང་བ་ཙམ་དུ་གསལ། གཉིད་དུ་འགྲོ་ཁར་ཡང་དེའི་སྣང་བ་ལས་གཞན་མི་འབྱུང་ངོ་། །དུག་རོའི་སྐྱོན་གྱིས་གྲིབ་རེ་ཙམ་བྱུང་ཡང་དེའི་ཁར་སླེབ། ཤ་མདངས་ཀྱང་སྔོ་སིང་སིང་བ་རླུང་རྩོལ་གྱིས་ཨེ་ཐོན་བསམ། དེར་ཟླ་བ་བཞིའི་རིང་། ཀུན་རྫོགས་ཐོ་རང་སྟོང་། ཉི་མ་མ་བཞུད་ཙམ་ལ་སྟོང་བཏབ་པས། ལུས་གྱི་མདངས་སྟོད་སྨད་ནས་རིམ་པས་གསོར། ཕོ་བའི་ཐད་དུ་རྒྱུན་རིང་བར་འགོས། རྗེས་སུ་མཐའ་ནས་རིམ་རིམ་གསོས་པ་ཟླ་བ་གཟས་བཏང་བ་ལྟ་བུ་བྱུང་། ནད་རོ་འཐོན། དེ་དུས་རྨི་ལམ་ན། རྗེ་བླ་མའི་རིང་བསྲེལ་སྙིམ་པ་གང་འདུག་པ་ཟོས་པས། ཤིན་ཏུ་འགྲངས་སྐྱུགས་པ་དང་། སྙིམ་པའི་དེ་འཕེལ་བས་ལུང་པ་ཁྲིག་ཁྲིག་གང་པ་རྨི། དེ་བྱིན་རླབས་འཕོ་བ་ཐོབ་པའི་བརྡར་འདུག །ལམ་ཟབ་ཐུན་མོང་མ་ཡིན་པ་ཡེ་གེར་བཏབ་ཆོག་པའི་གནང་བ་འབྱུང་། དེ་ནས་སྐབས་ཞིག་གི་ཚེ། ཐོ་རངས་རྨི་ལམ་ན། ཅིག་གིས་མདུན་དུ་མེ་ལོང་ཆེན་པོ་ཞིག་བཙུགས་བྱུང་། 
3-456
དེ་ལ་བསྟས་པས། ནང་ན་རྡུལ་མེད་པ་སྣ་ཚོགས་པའི་སྐུ། སྒྲ་བསྒྱུར་ཆེན་པོ་མར་པ། ཤིང་སྡོང་ཆེན་པོའི་གྲིབ་བསིལ་ལ་བཞུགས་པ་ཞིག་གིས། བརྗོད་དུ་མེད་པའི་སྒྲ་བརྙན་གསུང་རྡོ་རྗེ། རྩ་རྒྱུད་བརྟག་པ་གཉིས་པའི་རྒྱུད་རྡོ་རྗེ་གུར་གྱིས་ཕྱི་སྡེ་བཤད་པ་མཐར་ཕྱིན་པ། རྣམ་པར་ཤེས་པའི་སྤྱོད་ཡུལ་ལས་འདས་པ། ཡེ་ཤེས་ཀྱི་རོལ་མོར་གྱུར་པས་ཉན། དེ་ཕྱིན་མདོ་རྒྱུད་ཐམས་ཅད་སྐྲ་ཙམ་དུ་ཐ་དད་ལྟར་ཡང་། དོན་ལ་བྱང་ཆུབ་སེམས་དཔའི་འགྲེལ་པ་སྐོར་གསུམ་གྱི་ལུང་དང་མཐུན་པ་ཞིག་ཏུ་ཐམས་ཅད་མཐོང་། བོད་ཀྱི་ལུགས་གཞན་ཐམས་ཅད་ཆུ་ཤིང་གི་ནགས་ལྟ་བུར་ཤེས་ཕྱིར། བོད་ཊཱིཀ་ཕལ་ལ་མི་བརྩི་བ་ཡང་། འདི་ན། རང་ཉིད་དེ་ལ་མི་མཁས་བཞིན་དུ། ཁེངས་དྲགས་ཀྱིས་བཞག་པའི་དཔེ་བསྡུས་ནས་བསྒྲིག་རྩོམ་བྱས་པས། བཤད་པ་སྔ་ཕྱི་འགལ་བ་དང་། མ་འབྲེལ་བ་དང་། ལྷག་པར་དོན་ལ་ཐོབ་མི་ཐོབ་མི་བལྟ་བར། སྡོམ་གསུམ་ཞེས་པ་ལ། སོ་ཐར། བསམ་གཏན། ཟག་མེད་གསུམ་ལ་སོགས་པ་འདུག་ཚད་འདྲེན་པ་ལྟ་བུ་དང་། མཚན་ཉིད་ལའང་། སྒྲུབ་པའི་མཐའ་བཞི་མ་འདྲེས་པ་འཆད་པ་མི་འདུག །དགག་བཞག་མི་འགྲོ་བ་ཞིག་གིས་ལམ་བགགས་པས་སོ། །རྒྱ་འགྲེལ་ལ་ཅི་བཤད་ཀྱང་། གྲུབ་པའི་མཐའ་བཞི་པོ་གང་རུང་ཞིག་མནན། སྔགས་གཞུང་ལྟ་བུའང་རྒྱུད་ཀྱི་དོན་སྐལ་བས་དུ་མར་བཞག་པ་མ་གཏོགས་པ་འགལ་བ་ཆེར་མི་འདུག་པ་ནི། 
3-457
དེ་དག་ཏུ། བསྟན་བཅོས་བྱེེད་པ་ལ་མཁས་པ་མཐར་ཕྱིན་པའམ། ཡི་དམ་ལྷ་ལ་གནང་བ་ཐོབ་པའམ། ཆོས་ཉིད་ཀྱི་བདེན་པ་གཟིགས་པ་ཞིག་གིས་བརྩམ། གཞན་གྱིས་མ་ཡིན་པས་སོ། །དཔེར་ན། རྒྱུད་སྡེ་ཕྱི་མར་བཀྲལ་ན། དེའི་བཤད་པ་གཞན་དང་། བླ་མེད་དུ་བཀྲལ་ན་དེ་ནང་རིགས་མཐུན་པ་ལྟ་བུ་འདུག་པས་སོ། །དེ་དུས་ཁོ་བོས་སྔར་བྱས་པའི་གརྟག་གཉིས་དྲི་བ་ལ། ཆོས་རྗེ་ན་ལནྡ་པ་སོགས་ཀྱིས་ལན་བཏབ་བྱུང་བ་ཚུལ་མཐུན་མ་མཐོང་། འདི་སྡོམ་གསུམ་ལ་ཞེ་སུན་དུ་བརྩམས་པ་འདྲ་ཞིག་ཀུན་གྱིས་མཐོང་སྣང་སྟེ། ཁོ་བོས་ཉམས་དགའ་མ་གཏོགས་དེ་འདྲ་གར་ཡིན། ཕྱིས་ས་སྐྱ་བདག་ཆེན་གྱིས་རིན་སྤུངས་པར། བྱ་པ་སྤྲུལ་སྐུས། ཆོས་ཕྱོགས་ནས་རྗེ་བཙུན་གྲགས་པ་དང་། ས་པཎ་ལ་དགག་པ། འཇིག་རྟེན་ཕྱོགས་ནས་དེར་སྐུ་མཆེད་ལ་མགོ་སྨོད་བྱས་ཞེས་ཤགས་ལ་བྱུང་བས་ཀུན་སློང་ངན་པའི་རྒྱུར་མཐོང་ནས་ཕྱིས་དེ་རིགས་མ་བརྩམས། རང་གི་གྲྭ་རིགས་ལ་མན་ངག་ལེགས་པར་བསླབས་ཀྱང་། རླུང་ཟས་དང་། མདུན་ཐུར་ལ་སོགས་པ་གཞན་ན་ཉན་ནས། དེ་ཟབ་པ་ལྟ་བུར་སེམས་པས། ཉམས་པའི་རྒྱུར་མཐོང་ནས། བླ་མ་གོང་མའི་གསུང་ཇི་ལྟ་བ་རང་གིས་ཉམས་འོག་ཏུ་བཅུག་སྟེ་ཡིད་ཆེས་ནས་ཕྱག་རྒྱ་ལམ་རྫོགས་ཡི་གེར་བཏབ། གཞན་ལ་དེ་དག་གི་ལག་ལེན་མ་སྦས་པས་ཕྱིན་ཆད་ཉམས་པར་མ་གྱུར་ཏོ། །
3-458
དེ་ཡང་། རྒྱལ་ཚབ་རྗེ་དང་། ཆོས་རྗེ་ཐེལ་རུ་བ་དཔོན་སློབ་བཀའ་བགྲོས་ནས། ཏི་སེ་ལ་རི་པ་རྫོང་པ་གནང་འདུག་སྟེ། དེ་དུས་རང་མ་གནང་ན་ལེགས་རྒྱུ། དེར་ཁོང་ཚོ་དང་འབྲི་ཁུང་པའི་ལས་འཛིན་མ་འཆམ། དེའི་དབང་གིས་འབྲི་འབྲུག་ཀྱང་ལབ་ལབ་མང་པོ་དགོས་པ་བྱུང་སོང་། འབྲི་ཁུང་ཟུར་པ་རིན་པོ་ཆེའི་སྲས་མོ་ར་ལུང་དུ་ཕེབས་ན་ཅི་བྱས་བདེ་བར་སྣང་སྟེ། འབྲི་ཁུང་གཞུང་སྒར་ཐུགས་འདོད་ཐ་དད་པས་གནང་བ་མ་ཤར། ར་ལུང་ནས་རྫོང་མཐར་མཛད་དགོས་རྒྱུ་དེའི་རེ་བས་འགྱངས། ཡ་གིར་རི་ཐེབས་ལེན་ཅིག་བསྡུས་པར་བརྟན། བྱ་བྲལ་གནས་བསྐོར་བ་ཚུན་ཡེ་མགོ་ཐོན་དུ་མ་བཅུག་བྱུང་བས། གཅན་གཟན་སྟག་གི་མཇུག་མ་ལ་མ་འཇུས་དགོས། འཇུས་རྟིང་མི་གཏོང་དགོས་ཟེར་བ་བདེན་པར་མཐོང་བ་དང་། སྟོད་ནས་གུ་གེ་བདག་པོ། ཆུ་སྦུག་བླ་མ་སོགས་ནས་རྫོང་གྲུ་དགོས་ཚུལ་ནན་ཆེ་ནས། དབུ་མཛད་རྡོར་བསམ་པ་རྡོར་འཛིན་དུ་བསྐོས་ཏེ་བརྫངས། དེར་ཁོང་ཚོའི་འདོད་པ་སྐང་དགོས་པ་བྱུ་ནས་མཚམས་ཟླ་གཅིག་གྲོལ་དགོས་པ་ཤར་རོ། །ཐོས་པས་ལྕི་ལ་བསམ་པའི་མེ་ཏོག་ནི། །སྒོམ་བྱུང་འབྲས་བུ་མ་གྲུབ་པར་དེ་ཡང་། །སྐྱེ་དགུའི་ཡིད་ཁ་སིམ་པའི་ཙུ་ཏ་འདི། །གྲངས་མེད་ཚད་གདུངས་མནར་བའི་ངལ་སོའི་རྟེན། །འདི་ནི་གནོད་པའི་མེ་ལྕེས་ཙམ་བསྲེགས་ཀྱང་། །
3-459
ཀུན་ཕན་དྲི་ལེན་ཞིམ་པོ་མི་གཏོང་བ། །ཐུབ་བསྟན་འཛིན་མའི་རྩེ་དགའི་ཤིང་རྣམས་ལས། །མཆོག་ཕྱིར་དམ་པའི་བཟའ་ཤིང་ར་བས་བཟུང་། །དེ་དུས་ཆ་གར་བ་ཟེར་བའི་སོག་པོ་ལྷགས་ནས། ཇ་པ་མང་པོ་བརྡུངས། དེའི་སྐྱོན་གྱིས་དབུས། གཙང་དུ་ཇ་སྤུས་དཀོན་པར་བྱུང་བའི་སྐབས། ཚེས་བཅུ་བཞིའི་རྨི་ལམ་ན། སྒྲ་ཞིག་ལས། ལྕགས་ཕུར་ཅན་གྱི་མཆོད་རྟེན་མགོ་ལྔ་མ་འདི། སློབ་དཔོན་ཆེན་པོ་པདྨས། བོད་ཁམ་ལ་མཐའ་དམག་སྐྱོབ་པའི་སླད་དུ་འདེབས་པར་ལུང་བསྟན། འགུ་རུ་ཆོས་དབང་གིས་བཏབ། ཡང་གཏིར་མང་དུ་བཞུགས་པ་ཞིག་ཡིན་ཏེ། ཕྱིས་ཅུང་ཟད་ཉམས་འདུག་པས། སང་སོང་ལ་རབ་གནས་གྱིས། དེས་མཐའ་དམག་ཀྱང་བཟློག །བོད་སྤྱི་ལ་ཕན་ནོ་ཟེར་བ་ཅིག་ཐོས། གཉིས་སད་པ་དང་། སྔར་ཕུག་པའི་ནང་དྲག་ཤོས་འདི་མཆོད་རྟེན་རྫོག་རྫོག་གི་བགགས་ནས་མི་འདུག་བསམ་པ། དེ་ནས་ཁེགས། སང་ཉིན་ཕྱིན། རབ་ཏུ་གནས་པ་ལེགས་པར་བྱས། ཕྱིས་ཁྲར་སླེབ་དུས། ལྷ་བྲོ་བའི་ལག་ནས། ཆོས་དབང་རིན་པོ་ཆེའི་གཏེར་བྱུང་གཡར་བལྟས་པས་རྨི་ལམ་བཞིན་ཐེབས་སྣང་ངོ་། །དེ་ནས་ཟླ་བ་དེ་ཁའི་གཞུག་ལ། ལྷ་ཁང་ནས་སྡེ་པ་བསྟན་འཛིན་དབང་བསྒྱུར་གྲོངས། སྲས་གཅིག་ཏུ་སོང་ནས། སྡེ་པ་མ་ཆེན་ཐུགས་ངལ་པོ་འདུག་པས། གསུང་རིགས་དང་མི་བསྟུན་ཀ་མེད་བྱུང་ནས་མཚམས་ཧོ་ཡན། དེར་སྡེ་པའི་གཤེགས་རྫོང་ལ་ལྷ་ཁང་དུ་ཕྱིན། 
3-460
བོགས་ཁལ་བདུན་བརྒྱའི་རྩིས་ཀྱི་ས་ཆ། ཐེར་ཟངས་ནང་དུ་མི་ཉལ་ཀྱང་ཤོང་བ་ཙམ་དགུས་གཙོས་པའི་སྣོད་སྤྱད། ཤེལ་དཀར་དམར་གཡུ་རྙིང་ལ་སོགས་པ་རྒྱན། འབྲི་གནག་དྲུག་ཅུ་རེ་གསུམ། མཛོ་བཅུ་གཅིག །གཞན་ཡང་གྲུམ་རྩེ། གོས་དར་རས་སོགས་འབུལ་བ་གདན་ཐོག་ཅིག་ལ་བླངས་པ་ལ་ཆེ་བ་ཙམ་བྱུང་། ལྷ་ཁང་དུ་སོས་བསྡད། དེར་རྔོག་ནས་རིན་པོ་ཆེ་གདན་ས་པ་དཔལ་འབྱོར་དོན་གྲུབ་བྱོན། ཁོང་དང་། དབོན་པོ་ངག་དབང་བློ་གྲོས། པཎ་ཆེན་འབུམ་ཕྲག་གསུམ་པའི་དབོན་པོ་རབ་འབྱམས་པ་སོགས་ལ་དགྱེས་རྡོར་གྱི་དབང་། བརྟག་གཉིས་ཀྱི་རྒྱུད་བཤད། གུར་སམ་གྱི་ཊཱིཀ་ལུང་བྱས། ཆོས་དབང་རྒྱ་མཚོས་བླ་མ་དང་། དབོན་པོ་ངག་དབང་བློ་གྲོས་འཆད་ཉན་པར་བསྐོས། གྲྭ་པ་བརྒྱ་ཉི་ཤུ་ཙམ་སྤུས་གཙང་བསྡུས། མཆོད་གཞིས་སེམས་ཅན་མོ་ཁ་རྣམས་ཁོང་ཚོ་ལ་སྦྱར། གཡག་རྣམས་ཙྭ་རི་གསར་རྙིང་ལ་བཀྱེ། གཞན་དངོས་སྤྱད་ཕལ་ཆེར་དགེ་འདུན་འདུ་བའི་རྐྱེན་ལ་སྦྱར། དེ་དུས་སྡེ་སྲིད་རིན་པོ་ཆེས། གསར་བཞེངས་ཀྱི་བཀའ་འགྱུར་རོ་ཅོག །གསེར་གཏུལ་མ་ཞོ་བརྒྱ་ལ་སོགས་པ་གནང་བྱུང་བའི། བཀའ་འགྱུར་བཀྲ་ཤིས་མཐོང་སྨོན་དུ་བཞུགས་སུ་གསོལ། གསེར་མཁོ་མཐིང་ལྷ་ཁང་གི་རྣམ་སྣང་ཆེན་པོའི་སྐུ་ལ་གཏེར་བཏོན་པའི་གཟོང་ཤུལ་མང་བ་དང་། ལྷག་པར་སྔར་དེར་བྱ་དམག་ལྷགས་པའི་སྔོན་ཙམ་དུ་དབུ་བྲུལ་བ་ཕྱིས་བཟོ་མ་ཤེས་པ་ཞིག་འདུག་པ་དང་། 
3-461
མཐའ་འདུལ་ལ་སོགས་པའི་གཙུག་ལག་ཁང་གསོས་ན། ལྷ་ས་ཡུན་རིང་དུ་གནས་ལ། དེ་གནས་ན་བོད་དུ་སངས་རྒྱས་ཀྱི་བསྟན་པ་ཡུན་རིང་དུ་གནས་ཤིང་སེམས་ཅན་ལ་བདེ་སྐྱིད་འབྱུང་ངེས་པར་མཐོང་ནས་ཞིག་གསོས་བྱས། སྐུ་ལ་གསེར་རྐྱང་ཞོ་དྲུག་ཅུ་རེ་གསུམ་གསོལ། ཉེ་བའི་སྲས་རྣམས་ལ་ཞལ་གསེར་ཞུས། དེ་ཕན་རྐང་པ་གཡོན་རྒྱུན་དུ་ན་བ་ཅིག་ཡོད་པ་ལ། ནུབ་གཅིག་རྐང་པ་ནས་རྣག་བསམ་གྱིས་མི་ཁྱབ་པ་ཞིག་འཐོན་པ་རྨིས། དེས་ནད་དྲག །གཞན་ཡང་ལན་ཅིག་དེའི་སྐུ་ནས་གཏེར་ཅིག་འདོན་སྙམ་ནས། ཐུགས་ཀའི་ཐད་དུ་ལག་པ་བཏང་བས། ཚེ་དཔག་ཏུ་མེད་པའི་སྐུ་ཅི་ཡང་བྱུང་ནས་དགའ་བ་བསམ་གྱིས་མི་ཁྱབ་པ་ཞིག་བྱུང་བ་རྨིས། ཚེའི་རྟེན་འབྲེལ་དུ་གོ། དེ་ནས། རྒྱལ་པོ་ཟངས་དཀར་བས་གུར་གུམ་སིལ་མ་བྲེ་མཇལ་གྱིས་ཁལ་གཅིག་ཙམ་དང་། བྱི་རུ་སྤོས་ཤེལ་མུ་ཏིག་གཏོས་ཆེ་བ་ཕུལ། ཕྱག་ཆེན་ཆོས་དྲུག་གི་ཟིན་བྲིས་བྱས། དེ་པ་རྐང་འབམ་གྱི་སྐྱོན་ཞིག་གིས་ན་དུས། ཁོང་རང་གི་ཟེར་ལུགས། ང་སྟོད་དུ་ལོག་ནས་བསྟན་པའི་ཞབས་ཏོག་ཏུ་འགྱུར་བ་ཅིག་བྱེད་བསམ་སྟེ། ནད་འདིས་མི་གཏོང་བ་འདྲ། ད་རང་གི་ཐད་ནས་འཆི་བ་ལ་འཚེར་བ་མེད་ཟེར། དགེ་སྦྱོར་ཀྱང་བར་དོར་ལམ་བགྲོད་པ་ཙམ་ཡིན་པ་འདུག་ཅིང་། ལོ་སུམ་ཅུ་རྩ་བདུན་ལ་གྲོངས། 
3-462
ཕུང་པོར་འཇའ་ཟུག །མེ་ཏོག་ཆར་དང་། ནམ་མཁའ་གཡའ་དག་པ་སོགས་བྱུང་། ཁོ་བོའི་ཟླ་ལ་མི་བརྒྱ་འཚོག་སྟོང་འཚོག་པ། ཁོང་ལས་སྙིང་རུས་ཆེ་བ་མ་བྱུང་། ལོ་གསུམ་གྱི་ངོ་མཐོང་ཙམ་ལས་མ་སོང་སྟེ། སྒོམ་ཆེན་རབ་ལ་ཐེ་བ་བྱུང་ངོ་། །དེ་དུས་ལྕགས་ཕུར་ཅན་དུ་བྲག་ངོས་མེ་ལོང་ལྟ་བུ་ལ་ཆུ་ཕྲམ་ཕྲམ་བྱུང་། ཐམས་ཅད་དགའ་སྣང་། དེའི་ས་ན་རོ་སྙོམས་ཀྱི་དཔེ་རྙིང་མཆིས་པར་ངེས། དཔེ་འདི་ད་དུང་ཡང་བཞུགས་པ་ཞུས་དག་ལ་དགོངས་པར་འདུག །དེ་ནས་འགྲོང་རྩེ་ནས་སྡེ་པ་བགྲེས་པོས་གདན་འདྲེན་ནན་ཆེ་བ་བསླེབས། དགུན་ལྷ་ཁང་དུ་སྡེ་པ་བསྟན་འཛིན་དབང་བསྒྱུར་གྱི་ནང་རྟེན་ལ། ཁོ་བོའི་འདྲ་འབག་མི་ཚད་མ་ཞིག་བལ་པོ་དྷར་མ་ཤིང་གྲོགས་མཆེད་ཀྱིས་བཞེད་པའི་བཀོད་པ་དང་སྦྲགས་བསྡད། འཚལ་ནས་ཆོས་རྗེ་བྱོན་པ་ལ་བདེ་མཆོག་གི་དབང་སོགས་བྱས། གཙང་ལ་འདེགས་གདོང་ལྷོ་རྒྱུད་ནས་སྒར་ཚོགས་བྱིན་སླེབ་སྐབས་ཨ་ཆེ་གཡུ་སྒྲོན་མའི་བབས་ངག་ལས། ད་ལོ་འབྲུམ་བུ་འོང་། དེར་མ་སྡོད། ར་ལུང་དུ་སོང་ཟེར། ཐམས་ཅད་ཀྱིས། འབྲུམ་ནག་བྱུང་ན་སྲུང་བདེ་སར་མ་བསྡད་མི་མངས་སར་སྡོད་ཟེར་བ་ཅི་འདྲ་ཡིན་ཟེར། ཆད་ཆོད་བྱེད་ལ་ཁད་འདུག །དེ་དུས་རིན་སྤུངས་གེར་མཚོ་དང་། ལྷ་ཆེན་མྱང་བཙན་ཀུན་རྟ་རགས་མི་རགས་ཀྱིས་ཕྱག་བཙལ། 
3-463
གདན་འདྲེན་དུ་འོང་ཟེར་བ་རྨིས། གཞིས་རྒྱང་གི་བླ་མར་འཁུར་བ་ལ་བལྟ་བར་འདུག །དེ་ནས་ཁྲ་སྤེལ་བྱུང་བརྒྱུད། རྫ་སྣ་པས་གདན་དྲངས། སྨན་ཐང་དང་། དེ་ནས་གླང་ཁུང་པ། བླ་མ་ཀ་ཐོག་པ་སོགས་ཀྱིས་གདན་དྲངས་པས། བ་འཆོས་སུ་སྒར་བསླེབས། ཞག་བཅོ་ལྔ་ཙམ་བསྡད་། དེ་དུས་འབུལ་བ་བསམ་གྱིས་མི་ཁྱབ། གྲྭ་རིས་པ་ཀྱང་སྟོང་ཚོ་ཙམ་ཁོར་མར། ཆོས་ཞུ་ཉིས་བརྒྱ་ཙམ་འོང་། ཉིས་བརྒྱ་ཙམ་འགྲོ། མི་ནག་གི་འདུ་འཚོག་ནི་བགྲང་བར་དཀའ། དེ་ནས་རིམ་པས་སྟག་ལུང་བུ་མངས་འབྲོག་ཆེན་གྱིས་འབུལ་བ་ནས་རང་ཡང་སྟོང་ཚོ་ཙམ་བྱུང་། གཞན་ཡར་འབྲོག་ཏུ། འབུལ་བ་བསམ་གྱིས་མི་ཁྱབ། ཕལ་ཆེར་མཚན་ཉིད་གྲྭ་ཚང་གི་ས་ཆ་དང་། གྲྭ་ཚང་གཉི་གར་སྣམ་འགྱེད་སོགས་དགེ་བ་འབའ་ཞིག་ཏུ་བཏང་། དེ་དུས་འབྲོག་ན་འབྲུམ་བུ་འདུག་པ་ཐམས་ཅད་འབྲུམ་ཡན་དུ་བརྩི་བས་མ་འཛེམས། ར་ལུང་དུ་སླེབ་འཕྲལ་འབྲུམ་བུའི་སྐམ་ནད་ཀྱིས་ན། ཞག་གསུམ་ན་འབྲུམ་བུ་བརྡོལ། དེ་ནས་འབྲུམ་ནག་ཏུ་ངོ་ཤེས། སྐམ་ནད་ཀྱི་བསྐང་ལ། མགོན་པོའི་དངུལ་སྐུའི་གཟུངས་གཞུགས་རབ་གནས་སོགས་བྱས་པ་དང་། འབྲུམ་བུ་དཀར་པོ་བྱོན་ལེགས་སུ་གྲགས་པ་དེར་སྣང་ཡང་། ཤ་ཆང་ལ་མི་སྤྱོད་པའི་གཤིས་ཀྱིས་དྲག་འགོར་བ་ཙམ་བྱུང་། རིམ་གྱིས་གཙང་གཞུང་དུ་ཕྱིན། སློ་བདེར་དབོན་ས་དང་། 
3-464
རྩེ་ཆེན་ཀླུ་སྡིངས་སུ་དཔོན་དྲུང་དཔོན་གཡོག་གིས་གཞི་ལེན། རིམ་པས། རྒྱལ་བྱེད་ཚལ་དུ་མི་དབང་ཧོར་ཚེས་ཞབས་ཏོག་ཕུལ་ཕྱིན་བསྒྲུབས། དེ་དུས་འབྲུམ་གཞུག་དེས་མཁྲིས་ཁ་མཐོན་པོ་སྐྱུག་པ་རང་ཞིག་བྱུང་ནས། རྟག་ཏུ་དུ། བཞོས་འདྲོག་གི་འོ་མས་ཕུལ་བའི་བཅུད་ལེན་ཟླ་བ་དྲུག་བྱས། དེ་ནས་སྡེ་པ་ནན་ཆེས་ནས་ཁ་ཟས་རགས་པ་བརྟེན་པ་ཟླ་བ་བཞི་བགྱིས། ཡང་སྔར་ལུགས་ཀྱི་བཅུད་ལེན། ཚོགས་ཀྱི་འཁོར་ལོ་ལ་སོགས་པ་ལའང་ཡིད་ཀྱིས་རོལ་བ་ཙམ་མིན་པ་ཁར་མཁྱོར་བ་ལོ་གསུམ། དེ་ནས་ཚོགས་ལ་སོགས་པའི་དུས་སུ་དམ་ཚིག་བསྐྱངས་ཕྱིར་ཡོད་ཙམ་ལས། གཞན་ཅི་ཡང་མ་བསྟེན་པ་ད་ལྟའི་བར་རོ། །དེ་དུས་འདུལ་བ་རྒྱ་ཆེ་འགྲེལ་སུམ་བརྒྱ་པ་རྩ་འགྲེལ། ལས་བརྒྱ་སོགས་འདུལ་བ་དང་། ཐོགས་མེད་ཀྱི་ས་སྡེ་ལྔ་དང་། སྤྱོད་འཇུག་བསླབ་བཏུས་སོགས་དང་། སྔགས་གཞུང་ལེགས་པར་ལྟ་རྟོག་བྱས། རྩོམ་ཡིག་རབ་འབྱམས་པ་འཇམ་དབྱངས་བློ་གྲོས་ཀྱིས་བྱས་ནས། སྡོམ་གསུམ་རྒྱན་གྱི་གཞུང་བརྩམས། དེ་དུས་བློ་འཇུར་བས་གཉིད་དུ་འགྲོ་ཁར་ཡི་གེ་རྫབ་མ་ཤིག་ཤིག་དངོས་སུ་ཀློག་ཆོག་པ་དང་། རྨི་ལམ་དུ་ལྟ་རྟོག་བྱེད་དགོས་ཀྱི་དཔེ་ཆ་དངོས་སུ་ཀློག་པ་ཇི་བཞིན་སང་བལྟས་ན་ཁྱད་མེད། དོགས་པ་ཆོད་པ་ལན་ཅིག་ཙམ་མིན་པར་རྩོམ་རིང་ཚང་མ་བྱུང་། དཔེ་མང་པོ་བལྟས་པས་བརྗོད་བྱ་འཁྲུགས་པའི་ཚེ། 
3-465
ཅུང་ཟད་ངལ་གསོས་པ་ན་སོ་སོའི་ལུགས་མ་འདྲེས་པར་བྱེ་འགྲོ། དེ་ནས་དཔེ་དེ་དག་བལྟས་པས་སོ་སོའི་ལུགས་ཇི་ལྟ་བ་གོ་བ་སོགས་བྱུང་ནས། ཕྱིས་ལོ་འགྲེལ་བ་ཡང་ལེགས་པར་བགྱིས། གཞན་ཡང་། མ་ཧཱ་མཱ་ཡཱ། གདན་བཞི་སོགས་ཀྱི་ཟབ་ཁྲིད་ཅི་ཡང་ཡི་གེར་བཏབ། དེ་ཐམས་ཅད་ཡི་དམ་ལ་གནང་བ་མ་ཐོབ་པར་རང་གར་མ་བརྩམས། དེ་ལོ་ནས་གཙང་དུ་སྡོད་རིན་ལ་བྱ་བྲལ་གྲྭ་སར་མིང་ཐོགས་པ་ཐམས་ཅད་ལ་ལོ་བསྟར་གྱིས་མང་ཇ་བཏང་། མཁས་པ་དཔལ་མཆོག་པ་གསེར་མདོག་ཅན་གྱི་མཁན་པོར་ཕེབས་འདུག་པ་ལ་ནས་ཁལ་སུམ་བརྒྱ་ཙམ་ཕུལ། མི་རིང་བར་འཇམ་དབྱངས་བློ་གྲོས་ལྕང་ར་གྲྭ་ཚང་གི་སློབ་དཔོན་དུ་བཀོད་པའི་གྲོགས་བྱས། ཏི་སེར་འགྲོ་མགོན་བསྟན་པ་དབང་ཕྱུག་གིས་བྱང་དྲངས། དགེ་འདུན་ལྔ་བཅུ་ཙམ་འཕྲལ་གྱི་ཆ་རྐྱེན་དང་བཅས་བརྫངས་དེ་སྐབས་བརྒྱ་བྱིན་སྐུ་སྐྱེས་བསམ་པ་ཟས་སུ་མ་ཟས་པར། ལྷོ་བྲག་སྒྲུབ་སྡེ་པ་ཅུང་ཟད་ནང་ཕྲོགས་པའི་ཚོ་འཛིན་ལ་སྒར་པ་བདུན་ཅུ་ཕྲིན་ཞ་ཅོག་འཕྲལ་དགོས་ཀྱི་ཆས་དང་བཅས་བརྫངས། དགུན་རྩེ་ཆེན་དུ་བཏེག །གཙང་ཁང་པ་རྣམ་རྒྱལ་མགོན་པོས་དོ་དམ་བྱས། དཔོན་དྲུང་གིས་གད་སེར་ཕུལ། སྒྲུབ་སྡེ་བཙུགས། ས་དེ་རྩུབ་པར་གྲགས་ཀྱང་མཁར་ལན་སོགས་ལ་གནོད་པ་མ་བྱུང་། ཕྱིས་ལོ་དབྱར། 
3-466
དཔལ་འཁོར་བདེ་ཆེན་གྱི་དབུ་མཛད་ཆེན་མོ་དཔལ་བཀྲས་པ་དགེ་ཤེས་མཐར་ཕྱིན་པ་དེ་བྱོན། དེ་དུས། གོང་དཀར་རྡོ་རྗེ་གདན་ནས་མཁྱེན་བརྩེ་དབོན་པོ་བ་རྒྱུད་ལ་དོགས་དཔྱོད་དུ་རྐང་གཏད་སླེབ་པ་སོག་ཆོས་དང་དོགས་དཔྱོད་ཀྱི་རེ་བ་བསྐང་། རྐྱང་འདུར་བའི་སློབ་དཔོན་འབུམ་ཆེན་འབྱོར། སྟོན་ནོར་བུ་ཁྱུད་རྩེ་བ་དང་། དཔོན་དྲུང་དབང་ལྡན་པས་བཏེག་སྟེ་འབུལ་བ་ལོངས་སྤྱོད་རྒྱ་ཆེན་པོ་བྱུང་། དེའི་ཕྱི་ལོའི་སྟོན་མཁར་ཁར་ཕྱིན། ཞབས་ཏོག་ལེགས་ལ་ནས་མང་བ་ཟུང་། ཚུར་འཁོར། ཤངས་པ་སློབ་དཔོན་འཇམ་གསར་པ་ལ་སོགས་པའི་དགེ་བཤེས་མང་པོ་དང་ཆོས་ཀྱི་སྦྱིན་པ་འཕེལ་བའི་བཀའ་མཆིས་བྱས། དེའི་སྟོན་ལོ་སྡེ་པ་ཧོར་ཆོས་སྲང་ལ་དམག་ལ་བྱོན་དུས། འབྲོང་རྩེའི་མཛོད། ནས་ཁང་གི་ལྡེ་མིག་ཐམས་ཅད་ཕྱག་མཛོད་པ་མི་ཕམ་བླ་མར་སྤྲད། ང་རྒན་པོ་ནམ་འཆི་ལྷུས་ཐིངས། བུ་ཆུང་འདི་ཆུང་བས་ཕན་ཨེ་ཐོགས་ཆ་མེད། ད་ངེད་ཀྱི་ཅི་འདུག་ཐམས་ཅད་དཔོན་སློབ་རང་ཤེས་པ་ཡིན་གསུང་། སྡེ་པ་རང་གི་རྩ་བའི་བླ་མ་བྲག་དཀར་བ་སེམས་དཔའ་ཆེན་པོའི་སྐུ་མི་ཚད་གསེར་ཟངས་ལས་བཞེངས་པའི་བཀོད་པའི་རོག་གྱིས་ཟེར་བྱས། ལེགས་པར་གྲུབ་ནས་གསེར་མདོག་ཅན་དུ་བཞག །བཀའ་བཅུ་པ་དབང་ཕྱུག་དཔལ་ལྡན་སྟོད་དང་། འཕན་པོར་རབ་འབྱམས་པ་ཆོས་སྒྲུབ་དཔལ་བཟང་བྱང་སེ་མོ་དོ་ལ་བརྫངས། 
3-467
གཞན་ཙ་རི། སྤོས་སྐྱ། རྒྱལ་བྱེད་ཚལ། གད་སེར་སོགས་སྒྲུབ་གྲར་ལོ་གསུམ་མ་བཏང་། གྲོལ་བ་དང་ངེས་མེད་ཀྱི་རི་ཁྲོད་རྐྱང་ལ་བཀྱེ། སྡེ་པའི་སྲས་པོ། བྱ་པ། གོང་མ་བསྟན་འཛིན་ནོར་བུའི་སྐུ་སྐྱེ་གསལ་བར་སྣང་། ཕྱིས་ཕག་ལོའི་སོས། ངེད་བསམ་འགྲུབ་ཆོས་སྡིང་པའི་བླ་མ་གྲགས་པ་རིན་ཆེན་གྱིས་ཤོག་ཟེར་ཕྱིན། གཞུང་ལུགས་རབ་འབྱམས་སྨ་བ་རྐྱང་འདུར་གྱི་སློབ་དཔོན་འབུམ་རབ་འབྱམས་པ་སོགས་དགེ་བའི་བཤེས་གཉེན་དོན་མཐུན་རྐྱང་བཞི་བཅུ་ཙམ་ཁོར་མོར་འཚོག །འབེལ་གཏམ་ཡང་ཤིན་ཏུ་སྨར། ཆོས་ཀྱི་སྦྱིན་པ་དང་། སྐྱེ་བོའི་ཚོགས་ཉིན་རེ་བཞིན་བསམ་གྱིས་མི་ཁྱབ་པ་འདུས། བྲག་དམའ་མཁན་པོ་ཆོས་རྗེ་རབ་བརྟན་དཔལ་འབར་བ། སྐྱེད་ཚལ་པའི་ནང་དུ་མཁས་པར་ཀུན་མཐུན་སྣང་གྲུབ་པས་དེ་ལ། ཆོས་སྐྱོང་གི་རྗེས་གནང་སོགས་བཀའ་དབང་འགའ་རེ་བྱས་ཞི་བྱེད་ཀྱི་ཁྲིད་ཡི་གེར་བཏབ། དེ་དུས། གཞིས་ཁ་རི་སྤུངས་པའི་དཔུང་། ས་སྐྱ་བདག་ཆེན་གྱིས་མཛད་ནས་གཡས་རུ་བྱང་པའི་སྟེང་དུ་བརྫངས་དུས། སྡེ་པ་ངག་དབང་འཇིག་རྟེན་དབང་ཕྱུག་གྲགས་པ་དཔོན་གཡོག་དགའ་གདོང་བརྒྱུད། བསམ་གྲུབ་རྩེར་ཕེབས་སྐབས། ཆོས་རྗེ་འཇམ་གསར་པས་མཆོད་ཡོན་སྤྲེལ་མཁན་མཛད། མི་ཚོས་སྔར་འདུག་པའི་ཆོས་རྗེ་དང་མཉམ་མཉམ་ལས་མེད་ཚོད། ད་རེས་གཟེངས་བསྟོད་པ་མཛད་ནས། སྡེ་སྲིད་ཕག་མོ་གྲུ་པའི་བླ་མ་ཡིན་གསུངས་ནས། 
3-468
ཕྱག་ཐམ་དྲུང་ཞུས། ཞྭ་ལུ་མཁན་པོ་ཡང་གདན་བཟོས་སྣེ་གདོང་པའི་བླ་མས་ཆེ་བར་འདུག་པས། དེ་མཐུན་བྱེད་གསུང་། བསམ་གྲུབ་རྩེཪ་མཇལ་ཕྲད་ལ་ཕྱིན། སང་ཉིན་རང་ནས་བཀའ་ཆོས་ཞུ་བ་ཡིན་གསུང་། བཀྲ་ཤིས་ཚེ་རིངས་མའི་རྗེས་སུ་གནང་བ་དང་། གྲུབ་རྒྱལ་ལུགས་ཀྱི་ཚེ་རྟ་ཕུལ། མིའི་དབང་ཕྱུག་དེ་སྒྲ་དང་། ལྷག་པར་སྙན་དངགས་ལ་མཁས་པ་ཞིག་སྣང་ནས། དཔག་བསམ་འཁྲི་ཤིང་ལ་མཆོད་ཡོན། ཆོས་རྗེ་འཇམ་གསར་སོགས་དང་། མགུལ་རེངས་ཤིན་ཏུ་ཆེ་བ་བྱུང་རུང་དག་ངེད་ལ་སྟེར་དགོས་པ་ཤར། དེ་བཞིན་ཆོས་རྗེ་རབ་བརྟན་པ་གཞོན་ཐོག་གི་མཚན་ཉིད་པ་ལ་སྟོན་པ་བཟང་དགོངས། ཁོང་དང་ངེད་གཉིས་འགྲོ་རྩིས་པའི་བགྲོ་གླེང་བྱེད་འཇུག་པ་མཛད་འདུག་པར་ཡང་། ཁོ་བོའི་རིགས་པ་ཆེས་བཟང་བས། དེ་དུས་ཆོས་རྗེ་འཇམ་གསར་པ་རྐང་གཏད་གནང་བྱུང་ནས། བླ་ཆེན་གཞན་འདི་པ་སྤག་སྤུག་ཀ་ཡོད་གི་འདུག་པས། དེ་བཞིན་ཡོད་དོགས་པ་བྱུང་སྟེ། མཁས་པའི་གྲགས་པ་དོན་དང་མཐུན་པར་འདུག་པས་སྐུ་དྲིན་བསྐྱངས་སོ་ཞེས་ལེགས་སོ་མཛད། ལར། མཁས་པ་མཁས་པའི་མདུན་ན་མཛེས། །བླུན་པོས་མཁས་པ་ཇི་ལྟར་གོ །ཟེར་བ་ལྟར་སྣང་ངོ་། ། དེ་ནས་ངེད་རྣམས་ཀྱིས་སླར་བལྡབས། དེ་རེས་གསེར་མདོག་ཅན་དུ་མཁན་ཆེན་མཁས་པ་དཔལ་མཆོག་པ་དང་། སློབ་དཔོན་ཆོས་རྗེ་འཇམ་གསར་དོན་ཡོད་རྡོ་རྗེ། 
3-469
འཇམ་དབྱངས་བློ་གྲོས་ལ་སོགས་པ་རྣམས་ཀྱིས་གཙོས། ཚོགས་པ་ལྔ་བརྒྱ་ཙམ་གྱིས་བསུ་བ་དང་དད་གུས་གུས་སུ་འདུག །གྲ་པ་ཉི་ཤུའི་བར་དུ་གསེར་རྐྱང་ཞོར་བཀྱེ། འདུ་ཁང་དུ་བཞུགས་ཁྲི་ནས་འཇམ་པའི་དབྱངས་དཀར་པོ། ཚེ་ཁྲིད་ཐུན་མོང་པ་རྣམས་ཚོགས་པ་ལ་བཤད། དེ་ནས་སྡེ་པ་འབྲོང་རྩེ་བས། ད་ནི་མི་རྒན་ཡུན་རིང་མི་སྡོད་པ་འདུག་པས་མྱུར་དུ་ཕེབས་དགོས་གསུང་བ་ལྟར་ཡར་ལོག །སྡེ་པ་སྐུ་ཅུང་ཟད་བསྙུན་འདུག་པ་ཚེ་རྟ་འདྲ་བྱས། དེ་ནས་རྒྱལ་བྱེད་ཚལ་དུ་སླེབ། དེ་དུས་རིན་སྤུངས་པའི་དཔུང་གིས་བྱ་རྒོད་གཤོངས་པ་རྣམས་བརྡུངས་འདུག་པ། དགེ་འདུན་རྣམས་འོ་བརྒྱལ་བར་མཐོང་ནས། ངེད་ཀྱིས་མྱང་སྟོད་དུ་བྱོན། ཕོགས་ལ་སོགས་པ་ལོ་གཅིག་ཙམ་ཐུབ་པ་བྱེད་བྱས་པར། དཔོན་སློབ་འབྱོན་བརྩིས་ལ། དེ་ལྟར་བྱས་ན་མི་ལེགས་པསམ་སྒོར་འདུག །མྱང་སྟོད་དུ་མ་ཕེབས་ཀྱང་། མྱང་སྟོད་ནས་ཐུག་ཚུལ་གྱི་ཐེབ་ལ་ནས་ཁལ་བཞི་བརྒྱ་ཙམ་སྦྱིན། མི་རིང་བར་སྡེ་པ་གཤེགས། ཟླ་བ་ཕྱི་མ་ས་ག་ཟླ་བའི་དུས་བཟང་ལ་གཤེགས་རྫོང་ཐང་སྟོན་ལན་མི་ཁྲི་ཁྲག་མང་པོ་ཚོགས། མི་འཕྲེད་གཉིས་ལ་བཤར་ཏེ། རེ་རེ་ལ་འབོའ་བཤར་མཁན་གཉིས་གཉིས་བཙུག །འཕྲལ་འཕྲལ་ལ་གསོར་བ། ནམ་འོག་ནས་ས་རུབ་པའི་བར་འགོར། ཐམས་ཅད་ལ་ནས་ཁལ་རེ། མར་བྲེ་དོ། 
3-470
སྐམ་ཟོག་ཁལ་རེ་བཏང་བ་ལ། ལ་རིས་ལ་རྡ་དཀར་དང་བལ་དོས་ནོར་ནས་ཞོ་གསུམ་གསུམ་བཞི་བཞི་ཐོབ་པ་ཡང་བྱུང་འདུག་ཅིང་། ཁྲོམ་ལ་ཁྲིམས་པས་རྒྱུག་པ་ན་བ་ཅིག་ཀྱང་རྒྱག་མ་དགོས་པར་འཇམ། མྱང་སྟོང་རང་གི་སྲོལ་ལ་དཔལ་འཁོར་བདེ་ཆེན་རང་གི་ཚོགས་ལ་འབུང་གི་འདུག་པར། དངུལ་སྤྱད། སྙན་ཆ། ཤལ་དཀར་དམར། རྩི་གོས་གནང་ཆེན་གྱིས། གྲྭ་པ་ལྔ་སྟོང་ལ་ཁལ་གཉིས་མ་ཐོབ་པ་དང་། འབྲོང་རྩེ་ཆོས་སྡེར་གྲྭ་པ་སུམ་བརྒྱ་ལ་ཁལ་ལྔ་མ་དང་། སྒར་པ་བརྒྱ་དྲུག་ཅུ་ལ་ཁལ་གཉིས་མ། ར་ལུང་། ངོར། གསེར་མདོག་ཅན། སྡེ་པ་རང་གི་བླ་མའི་དགོན་གནས་སུ་སྣང་བར་འགྱེད་ཁལ་རེ་མའི་བརྩིས་བྱས། གཤེགས་རྫོང་མྱང་སྟོད་ལུང་པར་བཏང་བ་ལ་ཆེ་བར་གྲགས་སོ། །ཀོ་ས་ལ་ཡི་མགོན་མེད་ཟས་སྦྱིན་གྱི། །ཀུན་དགའ་ར་བ་དེང་འདིར་འོངས་གྱུར་ཞེས། །འཆད་རྩོད་རྩོམ་པའི་བགྱི་བ་མ་ལུས་པ། །ཆོས་ཀྱི་དབང་ཕྱུག་ཉིད་བསམ་དེ་ངོར་འདུས། །དམན་པའི་འཇིགས་པ་སྐྱོང་པའི་རྒྱལ་བྱེད་ཚལ། །ཕན་བདེའི་གྲིབ་བསིལ་བླ་ན་མེད་པའི་གཏེར། །གྲགས་པའི་པིར་གྱིས་སྙན་པའི་རི་མོ་བརྒྱ། །ཅིག་ཅར་འབྲི་འདི་ཐུགས་རྗེའི་བྱེད་པོས་སྦྱིན། །དེ་ལོ་བྱང་བརྒྱུད་ཀོང་པོ་ལ་འགྲོ་བརྩིས། །འབྲོང་རྩེ་པ་ཚོའི་གཤིས་ཀྱིས་འཐེན་དགོས་པ་ཤར། ཅི་བདེར་སྡེ་དཔོན་གྱི་ཁྲོད་དུ་བསྡད་པ་ལ་དགོས་པ་མི་འདུག་པས། 
3-471
རྒྱལ་བྱེད་ཚལ་དུ་གཙུག་ལག་ཁང་། འདེབས་པའི་ཤིང་གཅོད་བྱས། དགུན་རིན་སྤུངས་སུ་ཕྱིན། སྡེ་པ་དཔོན་བློན་ལ་དབང་ཆོས་དང་། ར་ལྔར་གནམ་སའི་བདག་མོ་ལྕགས་འདམ་ནས་ཡུམ་སྲས་ལ་ཚེ་དབང་སོགས་འབུལ་བར་ཞག་ལྔ་བསྡད། དེ་དུས། དཔལ་སྡིངས་རབ་འབྱམས་པ་ཡང་ཡོད་པས། སྡེ་པ་ཞལ་ངོ་ཐམས་ཅད་དགོངས་པར་བདེ། སྡེ་པ་ནས། འདི་རྣམ་འཇོམས་པར་གཞོག །རྣམ་འཇོམས་པ་འདི་ངེད་རིན་སྤུངས་པའི་བླ་མར་འགྲོ་བ་ཡིན་གསུངས་ཀྱང་། གྲྭ་ཚང་གལ་ཆེ་བསམ་མ་བཞག ། དེ་ནས་དཔོན་ས་ནས་ཀྱི་དགོངས་པ་ཇི་ལྟ་བར་དཀའ་ཆོས་སུ་ཕྱིན། སྒྲུབ་སྡེ་བཙུགས། དེར་འབྲས་ཡུལ་ནོར་བུ་གླིང་དུ་སྡེ་པ་རྒྱལ་བུ་ཡུམ་སྲས་ཀྱིས་ཤོག་གསུང་པ་བྱུང་ནས་ཕྱིན། སྡེ་པ་བསྙུང་པ་གཞི་མེད་དུ་གདངས། དེ་དུས་འབྲས་ཡུལ་པའི་གྲྭ་པ་ཐམས་ཅད་སྤྱིར་གྱིས་འབྲུག་པ་ལ་གུས་ཞབས་ཆེ། ཁྱད་པར་ངེས་རང་དང་འབྲེལ་ཆེ་བས་གུས་གུས་འདུད་འདུད་རང་བྱེད་སྣང་། མཁན་པོར་ཆོས་རྗེ་གུང་པ་བཞུགས་པ་སྐོར་ཡང་མང་པོ་གནང་ཡང་མཇལ་ཕྲད་མ་ཤར། ངེད་སོང་ནས་གྲྭ་པ་རྣམས་ཀྱིས། མཁན་པོ་ལ་འདི་འདྲ་གནང་སྒོ་མ་ལེགས་ཞུས་པས། མང་ཇའི་ཚོགས་གྲལ་དུ། སྤྲུལ་སྐུ་རིན་པོ་ཆེ་འདིར་ཕེབས་ན། གཞུང་ལུགས་གང་ལའང་དྲི་བ་མང་པོ་དང་། འབེལ་གཏམ་འགྲོ་གླེང་མཛད་ངེས། དེ་ལྟ་ན་ལན་ཐེབས་མཁན་སུ་ཡོད། 
3-472
དེ་བས་ན་སྦུག་གེ་བ་འདི་དགའ་བསམ་པ་ཡིན་གསུང་སྣང་བས། ཀུན་གྱིས་མི་མཇལ་བ་དྲི་བ་དང་རྩོད་མ་ནུས་པས་ལན་པ་འདུག་ཟེར་བ་བྱུང་། དེ་དུས་སྡེ་པ་རྒྱལ་བུ་ཆོས་མཛད་པ་ཡིན་གསུང་བ་ཅིག་འདུག་པ། སྐབས་སུ་མི་བབ་པ་འདྲ་བསམ་འཐེན་པ། ཕྱིས་མ་ལེགས་པ་བྱུང་སོང་། ད་སྐྲ་གཅོད་ན་སུ་ཡིན་ཡང་དེ་ཀའི་མོད་ལ་གཅོད་པར་དམ་བཅས་སོ། །དེ་ནས་ར་ལུང་བརྒྱུད། ཙ་རིའི་རི་པ་རྫོང་ཆོས་བཤད། ལྷོ་སྒྲུབ་སྡེ་སྤྱི་བླར་བསོད་ནམས་ཆོས་སྐྱོང་བསྐོས། ལྷོ་ལ་བརྫངས། དེ་དུས་རྒྱལ་རྩེ་བ་དང་། རིན་སྤུངས་པ་འཆིང་ལུགས་བསྒྲིགས། བདེ་མཆོག་གི་བཏགས་ས་རྔམས་ཆེ་བ་དང་། དངུལ་རྟིང་རྟེན་དུ་སྩལ། རྒྱལ་རྩེར་ཡོང་དགོས་གསུང་། མར་ལམ་བློ་བདེག་རྒྱལ་ཚབ་དམ་པའི་སྐུ་སྐྱེ་འཁྲུངས་པ་ལ་བར་ཆད་སེལ་བའི་དབང་བྱས། འདིས་ལྷོ་སྟེད་པའི་ཁ་སྐྱེངས། མི་རྣམས་ཀྱིས་སྒྲོག་རུས་འཆག་པ་གྱང་དུ་སོང་ཟེར། དོན་ར་ལུང་ལ་དེ་ཕན་ཐོགས་པར་གདའ། རྒྱལ་རྩེར་སྲས་ཡུམ་དྲུང་གིས། རྩེ་རྒྱལ་འགག་ཏུ་སླེབ་ཙ་ན་ཕྱག་འབུལ་དུ་བྱོན། སང་ཉིན་ནས་ཆོས་ཞུ་བ་དང་། གཞི་ལེན་ལེགས་པར་སྣང་ངོ་། །རྒྱལ་རྩེ་བ་སྔ་མ་ནས། ར་ལུང་བ་དང་མཆོད་ཡོན་ཉེ་རྒྱུ་མི་འདུག་པའི་གཤིས་ལུགས་ཀྱིས། ངེད་མྱང་སྟོད་དུ་དཔོན་རིགས་ཐམས་ཅད་ཀྱིས་རྩ་བའི་བླ་མར་འཁུར་ཀྱང་། 
3-473
སྡེ་པ་ནས་དང་དེ་ཚུན་འབྲེལ་ཡེ་མ་བྱུང་། དེ་ནས་བྱུང་བས་རིན་སྤུངས་ནས་སྡེ་པའི་བཀའ་ལུང་ལ། མྱང་སྟོད་པ་ཅི་གསུང་ཉན་པ་འདི་ངེད་ཀྱིས་བཅོས་པ་ཡིན་གསུང་ཞལ་པོད་མཛད་འདུག་པ། ཕྱིས་བརྟགས་པས་ཀྱང་ཐུགས་མད་པར་གདའོ། །ཆོས་སྡེའི་རྟེན་མཇལ། གོས་སྐུ་ཀུན་ལེགས་པར་བལྟས། དེ་ནས་རྩེ་ཆེན། རིམ་པས་རྒྱལ་བྱེད་ཚལ་དུ་སླེབ། མིག་དམར་ཞེས་པ་ཤིང་ཕོ་བྱི་བའི་ལོ། །རྒྱལ་བྱེད་ཚལ་གྱི་མཁར་ལས་བཙུགས། །ཕྱོགས་ནས་ཆོས་ཞུ་བ་དང་གཞིའི་སྒར་པ་རྣམས་ཀྱིས་ལག་གི་བླ་བགྱིས། ཀུན་དྲིལ་ལས་བྱེད་བརྒྱད་བརྒྱ་ཙམ་འཚོགས། ཤངས་ནས་རྡོ་བཟོ་བ་སྐུ་ཞང་ཞིང་གིས་རྫོང་མཐར་བྱས་བྱུང་བ་དང་། ཤིང་བཟོ་བ་འབྲོང་རྩེ་ན་མཁས་པོ་འདུག་ཀྱང་། གཉལ་ནས་དཔོན་དར་རྒྱལ་དང་། ཇོ་བོ་གཟུངས་སོགས་དང་། འབྲོང་རྩེ་རང་ནས་སྤྲུལ་སྐུ་འགུ་རུ་སོགས་ཀྱིས་བྱས། སླར་རྒྱལ་རྩེ་བསྐོར་ཅིག་ཕྱིན་པ་ཤིན་ཏུ་ན་བ་ཞིག་བྱུང་། ར་ལུང་པ་དང་དང་པོ་མི་མཐུན་པའི་ཁུ་བཟློག་ཏུ་མཆིས། དཔལ་འཁོར་བདེ་ཆེན། རྩེ་ཆེན་གཉིས་སུ་མང་ཇ། འགྱེད་ཁལ་རེ་མའི་རྩིས་བཏང་། དེ་དུས་ལྷོ་བྲག་སྤེལ་བྱུང་བས་བོས། ངེད་ཉུང་བསྡུས་ཞིག་གིས་ཕྱིན། ཚུར་ཡོངས་དུས། སྟག་ལུང་ནས་སྡེ་པ་ཟིལ་གནོན་པས་ཤོག་གསུང་། གླིང་གྲྭ་ཁྲར་ཕྱིན་ཚེ་རྟ་སོགས་ཕུལ། ཁྲོམ་དང་འབུལ་བ་གཏོས་ཆེ། དེ་ནས་ར་ལུང་དུ་སླེབ་དུས། 
3-474
ངོར་ནས་ཆོས་རྗེ་གདན་ས་པ་ཐར་རྩེ་ནས་སྐྱིང་ཆགས་ཆབ་ཚན་དུ་ཕེབས་འདུག་པས་མཇལ་བ་ཡིན་གསུང་། དེ་ཁ་ལེགས། དཔལ་ལྡན་ས་སྐྱ་པའི་བསྟན་འཛིན་དྲག་ཤོས་སུ་སྣང་བསམ་མི་ཆོས་ལ་མ་བརྩེགས། རྒྱལ་རྩེར་སླེབ་དུས་ཁོང་རང་དཔོན་སློབ་བཀའ་བགྲོས། ཆོས་ཕྱོགས་གྱི་དྲི་བ་ལ་འཛངས་ནས་མཇལ་ཕྲད་མ་ཤར། ཇ་ཞུས་བྱུང་། སུ་ལའང་དྲི་དགག་བྱེད་མ་མྱོང་སྟེ་འདི་རིགས་མང་དུ་བྱུང་། དེ་ནས་སྡེ་པ་སྐུ་མཆེད་ཡབ་ཡུམ་ལ་འབྲུམ་བུ་བྱུང་ནས་སྲུང་འཁོར་དུ་ཕྱིན། དེ་དུས་རྒྱལ་བྱེད་ཚལ་དུ་དགོས་པའི་ཤིང་གཡམ་པ་སོགས་ལ་ཐུགས་ཁུར་ཤིན་ཏུ་ཆེ་བ་དང་། ཕྱིར་འགྲོ་དུས་རྒྱའི་མཆོད་པ་རྣམ་ལྔ་དང་། འཇམ་དབྱངས་ཀྱི་བཏགས་སྐུ་སོགས་སྩལ། སྟོན་ཚུན་ལ་འདུ་ཁང་ལེགས་པར་ཕུབས། ངེད་རྣམས་སྣར་ཐང་ནས་སྡེ་པ་དོན་གྲུབ་རྡོ་རྗེས་ཤོག་གསུང་ནས་བཏེག །ལམ་དུ་ཁྱུང་རྩེ། ཚོང་འདུས་ཁྲི་ཁང་པ་སོགས་ཀྱིས་ཞབས་ཏོག །ཁྲི་ཁང་དུ་ཚེ་དབང་གོང་ཁུག་མ་སོགས་བྱས། དེ་ནས་ཆོས་གྲྭ་སྣར་ཐང་དུ་བསླེབས། ཞབས་ཏོག་དང་དད་མོས། དེའི་ས་དགེའི་སློབ་དཔོན་རྣམ་པས་གཙོས་པའི་དགེ་བཤེས། མཉན་ཡོད་བྱར་གཤོངས་ནས་མཁན་ཆེན་དཔོན་སློབ། ངེད་རང་གི་ཟླར་མུས་པ་ཆེན་པོ་ངག་དབང་དཔལ་འབྱོར་བ་དང་། པཎ་དབོན་པ་སོགས་དགེ་བཤེས་རགས་པ་བགྲོ་གླེང་། དེར་དགེ་འདུན་བརྒྱ་ཙམ་སྣང་བ་ལ་མང་ཇ། 
3-475
མི་རེ་ལ་སེ་རེ་མའི་བརྩིས་ཀྱི་འགྱེད། ཁྲོམ་ཆེན་པོར་དབང་། ཁྲོམ་ཀ་སྦུག་པ། ཕྱིས་གངས་ཅན་ཆོས་འཕེལ་གྱི་སློབ་དཔོན་མཛད་པ་དེ་ནས། དེའི་སྐུ་ཡོན་གཞན་ལྟ་ཞོག །ཀློག་གཅིག་པུ་ལ་ཡང་འགྲན་ཟླ་མི་ཡོང་ཟེར། ཕྱིས་དད་པར་སྣང་ངོ་། །བར་སེང་ལ། དུས་འཁོར་གྱི་རྒྱུད་སོགས་ཆོས་མང་པོས་འདའ་བ་དང་། དེར་ཆུ་མིག་སྒྲོལ་མ་སྤྱན་དྲངས་སྨོན་ལམ་བཏབ། སྣར་ཐང་གཞི་བདག་དེ་མགུ་བའི་མཚན་མ་བཟང་པོ་བྱུང་། དེ་ནས་བསམ་འགྲུབ་རྩེར་སྐུ་མདུན་ཞིང་གིས་འབོད་མི་སྨན་ཐང་པ་འཇམ་དབྱངས་དཔལ་བཀྲས་པ་བརྫངས་བྱུང་། བསམ་རྩེ་ཀླུ་སྡིངས་སུ་གཞི་ལེན་ཕུན་སུམ་ཚོགས་པ་དང་། ཁོང་རང་ཡབ་སྲས་ལ་ཚེ་དབང་དང་། ལྷག་པར་བཀྲ་ཤིས་ལྷུན་པོ། གསེར་མདོག་ཅན་སོགས་ཀྱི་དགེ་བཤེས་མང་དུ་འདུས། འབེལ་གཏམ་རང་གིས་འདའ་བ་བྱུང་། དེ་ནས་ལྕགས་སུ་ཕྱིན་ནས། ཞོགས་ལ་བརྒྱུད་ཞ་ལུར་བསླེབ། གཞི་པ་རྣམས་ཀྱིས་གུས་པ་དང་། རི་ཕུག་དང་བཅས་པའི་བར་གྱི་རྟེན་མཇལ། ཕྱིར་ཚོང་འདུས་སུ་སླེབ་སྐབས། འབྲས་ཡུལ་ནས་སྡེ་པ་རྒྱལ་བུའི་འབོད་མཁན་བྱུང་སྟེ་འགྲོ་མ་ཐུབ། རྒྱལ་བྱེད་ཚལ་དུ་སླེབ་དུས། རིན་སྤུངས་རང་ནས་ནན་ཆེ་བར་བྱུང་སྟེ། གཙུག་ལག་ཁང་གི་ཞབས་མཇུག་གིས་རེ་ཞིག་འཐེན། ལྷོ་པ་གྲོ་ཐེད་ཐིམ་གྱི་དབུ་ཆེ་རྣམས་ཀྱིས་ཤོག་ཟེར་འབོད་མི་དང་། ལྷག་པར་རྒྱ་གར་ཀ་མ་ཏའི་རྒྱལ་པོ་མ་ལ་ཀོ་ཤན་གྱིས། 
3-476
རབ་རྒྱ་གར། འབྲིང་རྒྱ་མཚམས་འོང་དགོས་པའི་ཞུ་བ་བྱུང་རུང་། བརྟག་པ་མ་བབས་བས་མ་ཕྱིན། རིན་སྤུངས་ནས་སྡེ་པ་སྒྲ་སྙན་དངགས་ལ་དགྱེས་པའི་གཤིས་ཀྱིས། ད་ལྟ་བོད་ན་སྒྲ་ཀཱ་ཙན་ལ་འབྲུག་པ་ལོ་ཙ་བ་མཁས་ཐག་ཆོད་དུ་འདུག་པས་འབོད་མི་གནང་། འདིར་སྒྲའི་འཆད་ཉན་འཇུགས་པ་ཡིན་གསུང་བ་ལྟར་བོས། དེ་དུས་རྒྱལ་བྱེད་ཚལ་དུ་མཚན་མ་བཟང་བར་བྱུང་ནས་བསྲེ་འཕོའི་གཞུང་རྙིང་བསྒྲིགས། ཡིག་མཁན་གཙང་པ་ངག་དབང་བསྟན་པ་རྒྱལ་མཚན་གྱིས་བྱས་ཏེ། རྣམ་བཤད་རྡོ་རྗེ་འཆང་གི་དགོངས་པ་གསལ་བར་བྱེད་པ་བརྩམས། ཡིག་མཁན་འདིས་ཁོ་བོའི་རྩོམ་པ་ཕལ་ཆེ་བའི་དོ་དམ་བྱས། དེ་ནས་རིན་སྤུངས་སུ་ཕྱིན། ལོ་ཙ་བ་ཤིན་ཏུ་དགྱེས་པ་བྱུང་། དཔོན་བློན་སྙན་དངགས་ལ་ཐུགས་ཡུས་པར་སྣང་བས། བསྲེ་འཕོ་དང་མཐུན་པའི་བསྟོད་པ་སོགས་གསུམ་བརྩམས་པས། སྙན་དངགས་ལེགས་པ་དང་རྩོམ་པ་མྱུར་བ་ལ་འགྲན་ཟླ་མེད་པའི་བསྔགས་པ་གནང་འདུག །དཔོན་བློན་ལ་བདེ་མཆོག་གི་དབང་དང་། ཆོས་དྲུག་གི་ཁྲིད་སོགས་བྱས། དཀར་ཆོས་སུ་ཕྱིན། ཟླ་བ་ཙམ་སྡོད་བརྩིས། གཙང་དུ་ཡོང་བསམ་མ་ཤར་བའི་དུས་འཁྲུག་གློ་བུར་དུ་ལངས་ནས། ངེད་གཞིས་ཁར་འབོད་མཁན། ནམ་ཕྱེད་ནས་ཞོགས་ཀའི་བར་གསུམ་བསྟུད་བྱུང་། སྤྱི་པ་དང་བར་པ་གྲོས་པ་གསུམ། ཕྱོགས་རིས་ཟུག་རྔུ་ལྡང་བའི་རྒྱུ། 
3-477
ཕྱོགས་མེད་རང་ས་འཛིན་འདོད་ན། གཉེར་མེད་ལྐུགས་པ་མཁྱེན་ལགས་སམ། །གསུང་བ་མཐོང་བའི་ཕྱིར་བར་དུ་མ་ཆུད་པ་ཅིག་འདོད་ནས་བརྒྲད་ཐང་པ་རྒན་པོ་སྐུ་གཞོགས་སུ་བརྫངས། ཁྲོ་མེ་ཞེས་པ་ཤིང་མོ་གླང་ལོ་གསར་གདོང་། བསྐྱར་ནས་འབོད་མཁན་ནན་ཆེ་ནས། སང་སྔ་བར་ཕྱིན། དེ་དུས་སུ་ངོ་ལོག་ཤེས་རྒྱུ་མེད་པའི་ཐུགས་འཚབས་པ་རང་ཞིག་འདུག །དམག་རྣམས་ཐན་སྤྲིན་ལྟར་འདུ་དཀའ་བ་ལ་ཐུགས་བག་བསོས། བདག་ཆེན་གུང་དུ་ཕེབས། བསམ་རྩེར་བཞུགས། ཞིང་ནས་རང་གིས་དམག་དཔོན་བྱས། ཁྲི་སྣར་གནས་པ་སོགས་ཐམས་ཅད་ངོ་ལོག །པ་སྣམ་སྨོན་གྲུབ་ཁྱུང་རྩེ་དང་། རྫོང་གསར་ཕག་པ་རི་ཤོར། མྱང་སྟོད་པ་རྣམས་ཀྱང་སུ་ཕྱོགས་ཐིང་དཀའ། ལྷུན་གྲུབ་རྩེ་སང་ཤོར་གནང་ཤོར་དུ་གྱུར་སྐབས། ངེད་ཀྱིས་མྱང་སྟོད་དུ་ལོག །ཁོང་རྣམས་རིན་སྤུངས་པའི་རོགས་སུ་སྦྲན། བང་ཆེན་བཏང་ཙ་ན་སང་ཐོ་རངས་ལྷུན་གྲུབ་རྩེའི་ནང་ཞུགས་པ་རྣམས་འགྲོ་བར་ཐག་བཅད་འདུག་པ་དེ་ནས་ཕྱི་འཐེན། སྡེ་པ་རང་དཔོན་གཡོག་གི་དམག་ཤིན་ཏུ་ཉམས་ཞན་པ་ཞིག་བྱ་བཟངས་སུ་ཡོད་པའི་ཁར། ཁོང་ཚོས་མཆོང་རྩིས་བྱས། དེར་བཞུགས་པ་སླེབ་མི་ཆེ་བར་དགོངས། ལྷུན་གྲུབ་རྩེར་ཐེགས་རྒྱུ། གཞུང་ལམ་ཁོང་ཚོས་བཀག །མྱང་སྟོད་ལ་ཐུགས་མ་ཁེལ། རི་སེང་ཅིག་ལ་མཚན་མལ་བྱོན་པ་སྔར་གྱིས་རང་དུ་ལོག །
3-478
ཅི་དྲག་མཚང་འཐོར་བའི་སྐབས་སུ་ཡང་། ངེད་ལ་ཤོག་གསུང་། ཕྱག་མཛོད་པ་བཏང་ནས། ད་མྱང་སྟོད་རང་ལ་ཕེབས་། ངེད་ཀྱིས་ཁག་འཁུར་ཞུས་ནས། མཆོད་ཡོན་ཐུགས་ཉེ་བས་གཞི་ལེན་དང་སྦྲགས་ཕྱིན། དཔོན་བློན་དམག་དཔུང་དང་བཅས་པའི་སྐྱེལ་མར་ཕྱག་མཛོད་པའི་ཟླར་མྱང་སྟོད་པའི་རྟ་པ་རྣམས་བཏང་། དེའི་སང་ཉིན། སྣར་ཐང་པའི་ཞུ་སྦྱོར་ངེད་ཀྱིས་བྱས་གྲུབ་པའི་སྟབས་ཀྱིས་ཕར་ཕྱོགས་པའི་དམག་རྣམས་ཞེད་ནས་རྫོང་གསར་ལ་མེ་རྒྱབ་བསམ་རྩེར་བྲོས། དེ་དུས། ཆོས་རྗེ་འཛིས་ཆེན་སོགས་ལ་བསྲེ་འཕོའི་རྣམ་བཤད་ཚོགས་ལ་སོགས་པ་མེད་པར་བྱས་ཏེ་བཙུགས་པས། ཞག་ཤས་ན་ཤེས་པ་གྲིབ་ཀྱིས་ནོན་པ་ལྟ་བུར་ཇེ་ན་ཇེ་ནར་སོང་། ཞག་བདུན་སོང་བ་ན་ལྷ་མོ་ལ་དམོད་དོར་བས་ཁྲིད་བཤད་པ་ལ་ཚོགས་ཀྱི་འཁོར་ལོ་གྱིས། མཁའ་འགྲོའི་ཉམས་ཆགས་བསྐང་བའི་ཕྱིར་ཡིག་བརྒྱ་མང་དུ་འཐོན་ཟེར་བ་བྱུང་། སང་ནས་ཚོགས་ཀྱི་འཁོར་ལོ་ཉི་མ་གསུམ་བཏུད་བཏང་། ཡིག་བརྒྱ་མང་དུ་འདོན་བཅུག་པས་ཞགས་གསུམ་གྱི་དགོངས། རྒྱལ་བྱེད་ཚལ་རང་ཡིན་བསམ་པ་ལ། དེ་བས་ཆེས་ཡངས་པོ་ཐང་ཚད་མེད་པ་ཞིག་གི་དབུས་སུ། མ་ཅིག་གྲུབ་པའི་རྒྱལ་མོ་ན་ཚོད་ལོ་བཞི་བཅུ་ཙམ་སོང་བ་གཅིག་ལ། བུད་མེད་རས་གོས་སྔོན་པོ་གོན་པ་རྐྱང་གིས་བསྐོར་བས་ས་དེ་ཁྲིག་གང་བ་འདུས། ཚོགས་ཀྱི་འཁོར་ལོ་བསྐོར། 
3-479
ཁོ་བོ་ལ་བྱིན་གྱིས་བརླབས་ཏེ་སོ་སོར་གྱེས་སོང་བ་རྨིས། སང་རང་། ཁམས་སིང་གིས་དངས་སོང་ངོ་། །རྩེ་བས་མང་སྟོད་པའི་སྤྱི་རྒྱུགས་མ་བསྙེགས་པར་ཕར་ཕྱོགས་བྱས་པ། ཁྱུང་རྩེ་པ་ཁོང་རང་གི་ཚ་བོ་དེས་སླུས། དམག་འཐོར། ཁོང་རང་བཙོན་དུ་ཟིན། དེའི་ཁར། བློ་བདེ་བ་དང་ཁྱུང་རྩེ་བའི་དམག་གིས་དབང་ལྡན་བསྐོར་དུས་སྲས་པོ་གཅིག་གྲོངས། དེར་གླགས་མ་ཚ་བར་བསྐྱིལ་མཁར་བསྐོར་བ་ཆུ་ཆད་དམར་འབེབས་སུ་འགྲོ་ཁ། དེར་སྲས་པོ་གཉིས་པ་ཚུད། གཞན་སྲས་པོ་ནི་མེད། བྱེད་དཀར་གཏད། སྡེ་གཟར་འགོ་མའི་དུས། ཁོང་འབྲོང་རྩེ་ཟ་དགོས་བསམ་པ་ཐོག་ཏུ་མ་ཁེལ་བས་ཡིན་ནམ། གཞན་མའི་བསྐྱོད་ཐབས་གང་ཡིན་ཀྱང་། རྒྱལ་བྱེད་ཚལ་མེ་ལ་སྲེགས་ཟེར་ཐུགས་ཡུས་པོ་འདུག་སྟེ། རྟིང་མ་ངེད་ལ་སྐྱབས་ཞུས། ཉམས་སུ་ཐག་མ་བསྐྱབས་ན། བྱང་ཆུབ་ཏུ་སེམས་བསྐྱེད་པའི་དགོས་པ་གཏོར་བས་ཕྱག་མཛོད་པ་བཏང་། རྫོང་བློ་བདེ་བ་ལ་གཏད། མི་ནོར་ཚང་མ་ཉེན་མེད་དུ་དབང་ལྡན་ཚུན་བསྒྲལ། དཔོན་དྲུང་རང་བཙོན་ནས་བཏོན། ཁོང་རང་ཡོད་རིན་བྱས་ཤེས་ཀྱང་དགའ་རབ་འདུག །ད་ལྟའི་སྡེ་བ་འདི་ཁའི་སྲོག་འདོན་མཁན་ཀྱང་ཁོ་བོ་ཡིན་ཏེ། ཕྱིས་ནས་ཅི་རིགས་སོ། ། དེ་ནས་རིན་སྤུངས་པའི་དམག་གི་ཟླར་འབྲོང་རྩེ་བ་ཡོད་པ་རྣམས་ཀྱིས་ཟངས་མཁར་ལ་བསྐོར་ཙམ་ཕྱིན། དབུས་པའི་དམག་བྱུང་ཟེར་ནས་ཕྱིར་འཐེན། 
3-480
སྡེ་པ་དཔོན་བློན་རིན་སྤུངས་ཤོར་དགོས་ཕེབས་སུ་འཆའ། ངེད་ཚོ་ལ་པ་སྣམསུ་ཤོག་གསུང་ནན་ཆེ་དྲགས་ཕྱིན། བཀའ་བགྲོས་དཔྱད་གཞི་འགྱུར། དམག་སྨོན་གྲུ་པ་ཁྱུང་རྩེ་ལ་བསྐོར། ཁྲི་ཁང་པར་ངེད་ཀྱིས་ཤ་ཚ་བྱས་ཞུ་དན་བཏོན། དེ་ནས་ཞིང་ནས་དང་དཔོན་གཡོག་དན་ཁེལ་བྱས། སྡེ་གཟར་བསྙལ། རིན་སྤུངས་པ་ལ་ཞབས་ཏོག་མཐར་བཏོན་དང་པོ་བྱས། དེ་དུས་བསྟན་འཛིན་རིན་པོ་ཆེའི་སྤྲུལ་སྐུ་ཕེབས། ཐོག་མར་འཇལ་དུས་ཕྱག་ལེན་གྱི་རྣམ་པ་ཙམ་བྱས། བླ་མའི་རྣལ་འབྱོར་ཞིག་ཕུལ། ཕྱིས་ལོང་ཡོད་ལ་དཀའ་བརྒྱུད་ཀྱི་གདམས་པ་མཐའ་དག་གསན་པ་ཡིན་གསུང་སྣང་། དེ་དུས་ངེད་ཀྱི་ཟླར། ཆོས་འཁོར་གྱི་གདན་ས་པ་འཕགས་ལྷ་ལ་སོགས་པ་དགེ་བཤེས་མང་བར་ཡོད་པས། འབེལ་གཏམ་ཡོང་བསམ་སྐུ་རྩོད་འདྲ་ཞུས་ཏེ། དེ་ཕྱོགས་ལན་མི་གནང་བར་འདུག །ཞིང་ནས་ལ་འཇགས་སོ་ལེགས་པར་བྱས། སྡེ་པ་ནས། མཆོད་ཡོན་བྱས་བྱུང་ཡིན་པས་བསམ་འགྲུབ་རྩེར་ཕེབས་དགོས་གསུང་སྟེ། རྒྱལ་བྱེད་ཚལ་དུ་ལོག །རྩེ་པའི་བཀའ་བགྲོས་ཀྱི་ཕུགས་སུ་རྒྱལ་མཁར་རྩེ་ནས་སྲས་ཡུམ་བཞུགས་སོ་ཞེས་གྲགས་པའི་སྐྱོན་གྱིས། དཔོན་དྲུང་བློ་བདེ་བས། སྲས་ཡུམ་གྱི་ཕྱོགས་གཏོགས་ལ་བརྒྱག་ཚོམས་བྱས། སྡེ་པ་གཞུང་ལྕི་ལུང་ལ་ཕེབས་བཞུད་ལ་གྱ་པ་བྱུང་། དེ་དུས་གཞུང་ནས་ཡོལ་བ་ཨར་ལེགས་སུ་གྲགས་པའི་རྟེན་དང་བཅས་འབོད་མཁན་དུ། 
3-481
དྲུང་ཆེན་བག་ཆགས་པ་བྱུང་ནས། སྡེ་སྲིད་འདི་པ་ཆོས་ལ་གཞོལ་པོ་འདུག་བསམ་ཁུར་བླངས་ཕྱིན། ཡོལ་བརྔན་པ་ལྟ་བུར་སྣང་ནས་ཕྱིར་ཕུལ། དཔོན་བློན་བྱིན་གཤིབ་ཐུབ་པ་བཅོས། བློ་བདེ་བ་སྐྱེངས་ཁ་བསོད་པའི་ཡུམ་དྲུང་ཐུགས་ཁུར་རེ་ཞིག་བཞག་དགོས་པ་བྱུང་བར། ཟླ་བ་གཅིག་ཙམ་རྒྱལ་བྱེད་ཚལ་དུ་ཕེབས། སླར་སྔར་མལ་དུ་ཕེབས་པས་ཆོག་ཡོང་ཞུས་ཏེ། ལྕེ་ལུང་རང་དུ་འགྲོ་གསུང་ཐེགས། ཕྱིས་གཞན་མིའི་བསྐྱོད་ཐབས་ཀྱིས། ངེད་ལ་དེ་རེས་ཐུགས་བདེ་དོགས་ཡོད་ཙམ་གནང་འདུག་པ། ཕྱིས་སུའི་སྐྱོན་དགོངས་མཆིས། དེ་དུས་དཔལ་འཁོར་བདེ་ཆེན་གྱི་ཚོགས་ཆེན་གྱི་དགེ་འདུན་ལྔ་སྟོང་ལ་མང་ཇ་གྲྭ་པ་རེ་ལ་སེ་རེ་མའི་རྩིས་ཀྱི་ནས་འགྱེད་བཏང་། ངེད་རྣམས་ཀྱིས་རི་ཁྲོད་དགའ་ལྡན་དུ་ཕྱིན། དེ་ན་དགེ་བཤེས་རེ་རགས་སྣང་། ཁྱད་པར་ས་རམ་པ་ཟེར་བ། ཆོས་འཁོར་ལྷུན་པོ་དང་རྟ་ནག་པའི་དགེ་བཤེས་ཆེ་ཚད་དུ་བརྩི་བ། སྔོ་གཉེར་མར་གྲགས་པ་ཞིག་འདུག་པ། རྒྱུད་གསུམ་ལ་འབེལ་གཏམ་བྱས་དུས། ཁོང་ལན་ལྡོན་འདོད་པ་ལ་མ་འཐོན་པས། ངེད་ལ་ངག་གནོན་མི་མཛད་པ་ཞུ་ཟེར། ཀུན་བགད་མོ་བྱུང་། ཕྱིས་ཁོང་རང་གཤིབ་རྟག་པས། ད་ལྟ་ས་སྟེང་ན་ཁོ་བོ་ལས་མཁས་པ་མ་མཐོང་ཟེར་གཏིང་ནས་དང་། དེ་ཡང་འཕྲིན་ལས་མ་བྱུང་སྣང་བ་མ་གཏོགས་སྔ་ཐོག་གི་དགེ་བཤེས་སྦྱང་པ་བྱས་ངེས་སུ་འདུག །
3-482
དེ་ནས་རིན་སྤུངས་ནས་ཞིང་ཤག་པར་སེལ་འདོན་ལ་ཐུགས་རྩེ་གཏད་པའི་ཕེབས་སྒོ་རིམ་པར་བྱུང་བས། ཐ་ནའང་ལོ་གཅིག་ཞོ་འཇགས་དགའ་ཚུལ་ཕུལ། ཞིང་ནས་ཀྱིས་འབོད་མི་འཕྲལ་འཕྲལ་དུ་བྱུང་། ངེད་རང་བར་དུ་ཡང་ཡོད། ཁྱད་པར་དཔོན་གཡོག་བར་དུ་ལེགས་པ་ཞིག་ཡོང་རེ་བ་དང་། དེ་མིན་ཀྱང་རི་བོང་གླག་གིས་ཁྱེར་བ་ལ། རེ་ས་ས་དང་གནམ་གྱི་དཔེར་གདའ་ནས། སྙིང་རྗེས་ཤངས་དོན་རབ་ཏུ་ཕྱིན། ཆུ་བྱང་པའི་མཁན་སློབ་གྲྭ་པ་ཐམས་ཅད་བྱོན། ཆོས་འབྲེལ་འབེལ་གཏམ་མཚན་རིལ་བྱུང་ཞིང་། དེ་ནས་ཞིང་ནས་ཀྱི་དོན་ལ་སྡེ་པར་ཞུས་བསྐོར་བྱས། ཁོང་རང་བསམ་འགྲུབ་རྩེར་འཁྲིད་ཤོག་གསུང་ཁྲིད་དོན་རབ་ཕྱག་ཏུ་ཕུལ། གཞི་བུད་མེད་ལ་སྐྱོན་མི་ཡོང་བ་བྱས། ངེད་ཚོ་དང་ལྷན་དུ་བསམ་འགྲུབ་རྩེར་སླེབ། སྡུག་རེས་བྱུང་ན་ལབ་རེས་ཀྱི་དཔེ། ཞིང་ཤག་པར་ཚོ་ནས་དངོས་སུ་ཁ་གཏོང་བ་སོགས་བྱེད་འདུག །དེ་ཉིན་གསེར་མདོག་ཅན་ཐུབ་བསྟུན་པའི་སློབ་དཔོན་པ་སོགས་བྱོན། ངེད་དགའ་ལྡན་ན་གྲལ་ཡོད་ཐོག །ཁོ་རང་ལ་གསོད་ཐག་ཆོད་འདུག་པས་ཅི་འདྲས་མཛད་ཀྱང་རན་འདུག་ཟེར། དྲུང་འཁོར་ནང་ནས་བྱ་ཞིག་བྱུང་འདུག །དེའི་བྲོད་ཀྱིས་གྲལ་འཕྲལ་ལ་བསངས་ནས། སྡེ་པར་ཞིབ་བྱ་ཞུས་དུས། ཞལ་གསལ་པོ་མི་གནང་བ་འདུག་ནས། དེ་ཁའི་ནུབ་མོ་སྒར་པ་རྣམས་བསྲུང་འཁོར་བར་བྱས། 
3-483
ངེད་ཀྱིས་ཁྲ་མ་ནས་བརྒྱུད། དཔོན་གཡོག་ལུགས་མཐུན་མི་ཡོང་བ་གཞིར་བཅས་བསྟེན་ཐུབ་ཙམ་དང་སྲོག་ལ་བར་ཆད་མེད་ཙམ་ཞིག་བསམ་པ་ཡིན་ཏེ། ལུགས་མཐུན་ཡོང་བའི་མདངས་ཀྱང་མ་བྱུང་། སང་གནངས་ཙམ་བསྡད་ན་ལྔ་པར་འགྱུར་ངེས་ནས། སང་སྔ་བའི་ཆ་ལ་འགྲོ་བར་བརྩམས། སྡེ་པ་ཡང་དེ་ཉིན་སྔ་བར་བཞེངས་ཕེབས་ནས། རེ་ཞིག་འཐེན་པ་འཐད་ཕེབས་འདུག་པར། ཞིང་གི་ཐད་དུ་དགོངས་པ་བཟང་བ་ཅིག་ཞུས་པར་ཞལ་གྱིས་མི་བཞེས། ངེད་རང་ལ་མཆོད་གཞིས། མཁའ་རུ་སྟེང་དུ་ཆོས་སྡེ་འདེབས་པ་སོགས་ཀྱི་དྲོད་ཀ །དེ་དུས་གཞན་མའི་ལུགས་བཞིན་རང་དོན་རང་ལ་འབུངས་ན། ཞིང་ནས་བློས་བཏང་བ་གཅིག་པུས་ཆོག་པ་འདུག་སྟེ། སྟོན་པས་སེམས་ཅན་གཅིག་གི་ཕྱིར་ཡང་རང་གི་ཕུན་སུམ་ཚོགས་པ་ཐམས་ཅད་ཡལ་བར་དོར། འོ་སྐོལ་ཁོང་གི་རྗེས་སུ་རབ་ཏུ་བྱུང་། སྡེ་སྣོད་ལེགས་པར་ཤེས་པའི་དགོས་པ་ཡིན་པས། རང་ཉིད་ཀྱི་དོན་ཅི་དགའ་བགྱིས་བསམ་མོད་ལ་ཕྱིན། དེ་དུས་ཁྲི་ཁང་པ་སོགས་ཀྱིས་ཡང་ཞིང་ཤག་པ་ལ་ཁ་བཟང་ཙམ་ཡང་བཤད་མི་ནུས་པ་འདུག །རིམ་པས་ཞིང་ཤག་པ་ཞུས་དག་མཛད་བརྩིས་གྲབས་མ་ཚར་བས། ཁོང་གི་སྲོག་བསྐྱབས། དེ་ནས་ངེད་རིན་སྤུངས་སུ་ཤོག་གསུང་། དཔོན་ས་བདག་མོའི་དྲུང་གིས་ཕེབས་བྱུང་། དེར་ཡང་ཞིང་ནས་ལ་སྔར་རྙིང་པའི་སྟེང་། 
3-484
དུས་ཁ་བཅུ་ལྷག་གཅིག་གནང་། ཁོང་རང་ཆོས་འོས་སམ་དགོངས་པར་གང་བདེ་ཞུས། སྲས་ཡུམ་ཚོ་ཅི་བདེར་བསྡད་ཆོག་པ་དགོངས་ལེན་ཞུ་རོགས་མཛོད། དེ་མིན་ཁོང་འདིར་ཐོན་སོ་སོར་ཡི་གེ་མང་པོ་བཏང་ན་ཅི་འགྲོ་ཐིང་དཀའ་བར་འདུག་ཞུས་པ། སྡེ་པ་ཐུགས་ང་རྒྱལ་ནས། ཞབས་འདྲེན་མི་ཐུབ་དགོངས། ངེད་ལ་ཡང་། དགའ་བ་གདོད་དུ་མ་ཕེབས་རིན་ལན་འཕྲོད་མི་གནང་། རྫོང་ཁར་ངེད་ཤངས་སུ་འགྲོ་དུས་ཀྱི་ཚེར་བྱས་གསུང་རྩད་ཆོད་ས་ཆ་རྩིས་བཞེས། ཞབས་ཏོག་དེ་ཙམ་བསྒྲུབས་ནས་ཟླ་བ་གཅིག་ལས་མ་སོང་བར་བཀའ་བཀོད་འགྲོ་ཚོད་ལ། ངེད་དང་འབྲེལ་བྱེད་ས་མི་ཡོང་བའི་རྩི་ཁ་བགག་པ་སོགས་འོས་མིན་དྲིན་ལན་ལོག་མཇལ་མང་དུ་མཛད་སོང་། དེ་དུས་འབྲོང་རྩེ་བའི་དམག་སྒར་ཕྱིར་འགུགས་ཆེད་དུ། སྡེ་པ་དཔོན་བློན་གྱིས་ཞུ་མཁན་མེད་པར། འབྲོང་རྩེ་བཟང་གི་ས་ཆ་རྙིང་པ་སློག་པའི་ཕྱག་ཐམ་ཞལ་བཞེས་མཛད། མཚན་ཇུས་སོང་ནས་རིན་སྤུངས་འདྲ་ནས་ངོར་པའི་ལག་ནས་ཤོལ་པོ་བཞེས་ས་ཚབ་གནང་འདུག་སྟེ། ཤོལ་པོ་ངེད་ཀྱིས་གཡོར་ཞུས་བྱས་སོ་སྙམ། ངོར་པ་རྣམས་ངེད་ལ་སྙིང་ན་བ་བྱེད་སྣང་སྟེ། ཁོང་རང་རྣམས་ལ་མངོན་ཤེས་མེད་པའི་སྐྱོན་དུ་འདུག །ངེད་ཀྱིས་འབྲོང་རྩེ་བ་རང་ལ་ཡང་འདི་མ་ལེན་བྱས་ཙ་ན། ས་ཆ་འདི་ངོར་པ་ལ་དད་པས་ཕུལ་བ་མིན། 
3-485
གཞིས་རྒྱང་གི་བར་དུ་ས་སྐྱ་བདག་ཆེན། བྱར་པ་ཆོས་རྒྱལ་ཆེན་པོ། ངོར་པ་གསུམ་བར་དུ་ཕེབས་དུས། ངོར་པས་བཙན་ཕྲོགས་བྱས། དེ་ཕན་ངོར་པ་དང་འབྲོང་རྩེ་བ་མཆོད་ཡོན་ཡིན་པ། དེ་ནས་དྲལ་བ་ཡིན་ཟེར། དེ་ངོར་པ་རང་ངེད་ལ་ཕྱིར་འཕུལ་མི་མཛད་པ་འདུག་ན། ངེད་ཀྱིས་ཤ་ཚ་ལ་བླངས་པའི་རོགས་བྱེད་བརྩིས། ཁོང་རང་གི་མཛད་ལུགས་ཀྱིས་བཏང་སྙོམས་སུ་བཞག །ལོག་པའི་འཚོ་བར་མཐོང་ནས་རྒྱལ་བྱེད་ཚལ་དུ་དེ་ནས་ཁལ་གཅིག་ཙམ་ཡང་མ་སྦྱར། ཕྱིས་ངེད་ལ་ངོར་པ་རྣམས་མདོ་སྒྲུབ་གཏོར་བརྒྱགས་སོགས་མཁྱེན་ཚད་སྤུང་སྣང་། ཡེ་ཤེས་ཀྱི་སྤྱན་པ་རྣམས་ཀྱིས་གཟིགས་པས་ཁོང་རང་ཚོ་སྐུ་ཚེ་ཐུང་གྲ་མི་འགྲིག་པའི་རྒྱུར་ཀུན་གྱིས་ཤེས་པ་འདི་ལགས་སོ། །དེ་དུས་སྡེ་པ་ཧོར་ཚེའི་ནང་རྟེན་ལ་བསམས། སྤྱན་རས་གཟིགས་རྒྱལ་པོ་ལུགས་རྩ་ཕྱག་བཅུ་པ་སྐུ་ཚད་མཐོ་ཚད་བཅུ་བདུན་པ་སྤུས་གཙང་བ། དབོན་མ་ཎི་པཱ་ལ་ཚང་གིས་བསྒྲུབས། སྔགས་སྐུར་སོང་བས་ཡུན་རིང་བ་འགོར་སྐུ་ཤ་ལ་རྩེས་སྲང་གི་ཟངས་ཁལ་བརྒྱ་ཙམ་དང་། གསེར་ཞོ་བཞི་བརྒྱ་སོང་། རྒྱལ་རྩེ། གནས་རྙིང་། གར་བཟོ་བྱས་པ་ལས་ཀྱང་འཕྲལ་གྱི་ལྟ་སྟོན་མོ་སོགས་བཟབ་པར་བྱུང་ཟེར། དེ་དུས་ལིང་རྩེ་རྒྱལ་པོའི་བླ་མ་དགོས་ཟེར་ཕོ་ཉ་བྱུང་། ཡོན་ལའང་གསེར་རྐྱང་ཞོ་ཕྱེད་དང་སུམ་བརྒྱ། 
3-486
ལྷག་མ་དངུལ་དཀར་ལྷད་མེད་ལ་དྲུག་བསྐོར་བྱས་པའི་གསེར་ཞོ་ཕྱེད་དང་ཉིས་བརྒྱའི་རྩིས་སྤྲད། སྟོན་མོ་སྟོན་རྒྱབ་སོགས་ཀྱིས་མགུ་བར་བྱས། གཟུངས་གཞུག་ཕུན་སུམ་ཚོགས་པ་ཡོད། རབ་ཏུ་གནས་པ་སྟོན་བསྒྲུབས། ལྷོ་བྲག་ཏུ་སྡེ་པ་དྲུང་གིས་སྒྲུབ་སྡེ་བའི་བརྗེ་ལེན་སྐབས། གཞིས་ཀ་ལ་དམག་གིས་བསྐོར་བརྒྱག་སོགས་མཛད་པར་བརྟེན། ཕྱག་མཛོད་པ་བརྫངས། ལྷོ་རིགས་ཀྱི་དཔོན་རྣམས་ལ་བར་བཞུགས་ཀྱིས། ངེད་ཀྱི་དྲག་ལས་ཀྱིས་ཁོང་མ་འཐོན་པ་མིན། མཆོད་ཡོན་གྱི་ལུགས་ཡིན་པས་འཕམ་འཁུར་བརྩིས་ཡིན་གླེངས་ཏེ། ཅི་རིགས་བར་དུ་ཁྱེ་འདོད་ནས་ལབ་མ་བྱུང་། དེས་བྱ་ཡུལ་ནས་དམག་སོགས་ཤར། ཐམས་ཅད་མ་དགོས། འབོག་ཀོང་པ་འཁྲིད། གཞན་རྣམས་རྒྱལ་ཆེན་གླིང་པ། འབྲོང་ཞོལ་དུ་ཅི་ཁག་ཁག་གི་རོགས་ལ་གནང་བ་དྲག་བྱས་བརྫངས། དེས་དབུས་སུ་ངེད་ཀྱི་མི་སྣ་གཡའ་བཟང་བ་དང་། སྡེ་པ་འཆོས་པ་བསྡེབས་འཆིངས་འཐོན། འབྲོང་ཞོལ་དང་ཤ་རད་འཕྲང་གཉིས་ཀ་བརྒྱལ། ལབ་བཙན་པར་བྱུང་། རྒྱལ་ཆེན་གླིང་པ་དབུགས་གཉིས་པ་ཕྱུང་། ལྷོ་བྲག་ཏུ་ཁོང་རྣམས་ཀྱིས་གཡུལ་རྒྱལ་རྫོང་བླངས་པའི་སྡེ་པ་རང་བུ་གཏེར་འཁྲིད་འདུག །སྡེ་པ་འདི་ཕྱག་གཡོག་ཁོ་ནའི་དབང་དུ་བཏང་བས། བསྡུ་འཇོག་བྱེད་མ་ཐུབ་པའི་ངང་ལ་གྲོངས་སོང་བས། རྒྱུན་དུ་སྙིང་རྗེའི་བསམ་པས་བསྐྱངས། ཁོང་གིས་བསྐྱོད་ཐབས་ཀྱིས་བརྒྱ་བྱིན་སྐུ་སྐྱེ་ཡང་ལད་པ་ཞིག་བྱུང་སྟེ་བྱམས་པས་བསྐྱངས་བསམ་པ་ལམ་དུ་ལས། 
3-487
དེ་ནས་ས་ཆ་སུམ་ཟུར་དུ་བཏང་། དུས་བརྒྱ་ལྷག་པར་སྣང་བ། སྒྲུབ་སྡེ་པ། གྲྭ་ཚང་པ། ལྷ་ཁང་པ་གསུམ་ལ་བགོས་སོ། །དེ་དུས་བཟོ་བོ་རྣམས་ལ་བྱི་རུ། སྤོས་ཤེལ་སོགས་དངོས་སྤྱད་གཏོས་ཆེ་བ་བྱིན། སོ་སོར་བརྫངས། སྤྲུལ་སྐུ་ཀོང་ཕྲུག་ཟེར་བ་གཅིག་པོས། བྲིས་ཀྱི་དཀར་བརྒྱུད་ཕོ་བྲང་བཞེངས། དེ་ནས་ཐོབ་རྒྱལ་བས་ངོ་ལོག །ཞིང་ནས་དང་། བརྒྱ་ཚོ་བས་རྣམ་རྒྱལ་གླིང་གི་རྫོང་རོ་བཟུང་། གོང་དཀར་བྱང་རྒྱལ་སྣ་རྩེ་བ་ཕྱོགས་སུ་གཡབས་ནས། སྡེ་པར་ཤིན་ཏུ་དྲུལ་དྲག་བྱུང་སྟེ། རྒྱབ་རི་རྣམས་ཀྱི་རིང་པོ་ལ་བཞུགས། ཞིང་ཤག་པ་ཚང་ཞག་བཅུ་ཙམ་ན་ཤངས་སུ་ཕན་ཐོགས་མ་བྱུང་ན་འཁྲ་མི་ཐུག །དོན་ཐག་ཆོད་ཀྱི་ནང་ངེད་ལ་བསྟན་བྱུང་བས། རྒྱབ་བཞེངས་པ་གཞན་ཚོ་ནི་ཁྱི་ཆུ་རྒལ་རྐྱང་དུ་འདུག །དེ་བུས་རིན་སྤུངས་ནས་བར་དུ་སླེབ་དགོས་ཚུལ་ས་སྐྱ་བའི་གནྡྷ་ལ་ཡང་ཕུལ་བྱུང་ནས། པ་སྣམ་ལྷུན་གྲུབ་རྩེ་ལབ་གཏེར་བླངས། ཤངས་སུ་མི་སྣ་བཏང་བས་ཚོ་ཟིན་པའི་ཁར་ཤངས་པ་བྱིན་གྱིས་འགྱུར་བ་བསྟན་པས། སྡེ་པ་རང་གི་དམག་ལ་གྱོད་ཀ་མེད་པར་བསྡུ་བའི་གྲོགས་བྱས། སླར་པ་སྣམ་ཤར་པ་བ་ལ་ཞིང་ཤག་པ་སྙིང་ན། སྡེ་པའི་མི་ཁུངས་སུ་འདུག་པ་སྐྱབས་ཞུར་སླེབ་པ་ལའང་མི་སྣ་བཏང་། རྫོང་དམར་འབབས་སུ་འགྲོ་ཁར་དམག་འཐེན། 
3-488
དེ་དུས་སྡེ་པ་རང་བསམ་འགྲུབ་རྩེར་བཞུགས། དཔོན་ས་དང་། ཁྲ་མ་ནས་རིན་སྤུངས་ཀྱི་ཚེ་འཛིན་ལ་ནང་ཁུལ་དུ་མཛེས་རྒྱུ་མེད་ཙམ་ཁྲ་མ་ནས་མཛད། ངེད་ལ་ཡང་། སྡེ་པའི་ཞབས་དྲུང་དུ་སྟན་བསྐུལ་ཅི་ཕུལ་ཀྱང་མ་གསན་པས་འདིར་སོང་། ད་ཆ་ངེད་རང་ཁྲ་མ་པ་བཀའ་གང་གནང་བསྒྲུབ་པས་རྒྱབ་སྐྱོར་དགོས་གསུང་བྱུང་། དེ་རང་ལ་བརྟགས་ན་མི་བྱིན་ཟེར་བ་བཞིན་གཞིས་ཀ་གཟུང་ནས་གཞན་དང་སྒྲིག་ཚོམ་མཛད་རྒྱུ་འདྲ་ཞིག་འདུག །གཞན་ནི་སྡེ་པ་རང་ལ་བློ་ཁེལ་ཆེ་བར་འདུག་པས་སྐྱོན་ཡོད་བསམ་མ་ཤར། མཁའ་རག་སྤྲོད་དགོས་པ་སོགས་ཀྱི་ཐུགས་ཤིན་ཏུ་འཛངས། དེ་ཀར་བཞག་ན་རིན་སྤུངས་པ་མིང་མེད་དུ་འགྲོ་ངེས་ཀྱི་སྐབས། ངེད་ཀྱིས་འཆིང་བཏོན། ཕྱག་མཛོད་པ་འཁོར་པ་སྐུ་མདུན་བརྫངས། དཔོན་གཡོག་ཐམས་ཅད་ཀྱི་བསྐྱེལ་མ་བྱས་གཞིས་ཁ་རིན་སྤུངས་སུ་ཕེབས་བཅུག །དེ་དུས་ཁོ་བོའི་མ་ཤིའོ་ཞེས་ཐོས་ནས་དགེ་བ་ལ་དམིགས། ཀོང་པོ་རང་དུ་ནག་སྟོན། ཙ་རི་ཅིག་ཅར་གྱི་དགུན་བཞུགས་པ་རྣམས་ལ་ཟླ་ཕོགས། གཙང་གི་བྱེ་མཁར་ནས་ས་སྐྱའི་བར་དགོན་གྲགས་པ་ཅན་ཉི་ཤུ་རྩ་བདུན་ལ་མང་ཇ། དགེ་འདུན་ཐམས་ཅད་ལ་ཁལ་རེ་མའི་བརྩིས་ཀྱིས་གོས་དར། དངུལ་སྤྱད་སོགས་གཏོས་ཆེ་བ། གདན་ས་ར་ལུང་དང་། ལྷོ་རྒྱུད་ཀྱི་འབྲུག་པའི་དགོན་པ་ཐམས་ཅད་ལ་དེ་མཐུན། 
3-489
ལྷག་པར་ངམས་རིངས་ཆོས་སྡེར་མང་ཇ་སྤོབས་རྩེ་གསུམ། གསེར་ག་ཕྲ་མངས། སྡེ་པ་སྒར་པའི་སྙན་སོགས་སྡེ་པ་རྒྱལ་བུའི་བསྔོ་ཞུས་སུ་བྱུང་བ། དེ་གཉིས། བཀྱེ་བས་དགེ་འདུན་བཞི་སྟོང་ཙམ་ལ་ཁལ་ཕྱེད་མ་ཐེབ་བྱུང་ཟེར། དེ་ལོ་ད་ལྟའི་ཐུབ་སྟན་རྣམ་རྒྱལ་མཁན་པོ། །དེ་དུས་ཁམས་པ་སློབ་དཔོན་དུ་བཞུགས་པ་བྱམས་པ་རབ་བརྟན་པ་དཔོན་སློབ་བྱོན། འབེལ་གཏམ་ཤིན་ཏུ་སྨར་བར་བྱུང་ཞིང་། སྔར་ཆོས་རྗེ་མཁྱེན་བརྩེ་པའི་ཕྱག་ཕྱིར་བྱོན་དུས་ནས་འབྲེལ་ཡོད་པས་ཆོས་དང་། ལྷག་པར་གསང་ཕུ་དུས་མཆོད་ཀྱི་རྐྱེན་དུ་རྟ་བཟང་བ་གཅིག་བརྫངས། ཆོས་ལུང་མཁན་པོ་ཡུལ་འཐོན་ནས་འཇལ་དུ་བྱུང་བ་ལ་ནས་ཁལ་སུམ་བརྒྱ་ཕུལ། ཤངས་རིན་ཆེན་སྒང་གི་མཁན་པོར་བསྐོས། ཕྱིས་ཞ་ལུའི་གདན་ས་ཐོབ་སྣང་། ཞིང་དང་སྡེ་པ་རང་གི་བར་དུ་ཡང་ལེགས་སྤེལ་བྱས། པ་སྣམ་ཞིང་ནས་འཛིན་འཇུག་བརྩིས་ལ། ཞིང་ཤག་པ་ལའང་སྡེ་པ་རང་ཉེ་ཆེ་བ་བྱུང་ནས། བྱང་རྒྱང་ཐོབ་རྫོང་ལ་སེལ་འདོན་གྱི་དཔྱད་གཞི་འདུག་ནས་པ་སྣམ་མ་སྤྲད། སྡེ་པ་རང་གིས་ཀྱང་མཆོད་གཞིས་སུ་གཙང་ཕུལ་གྱི་ཕྱག་ཐམ་བྱུང་སྟེ། གཞིས་རྒྱང་གི་བར་དུ་ལེགས་ཚོགས་བྱུང་རྟིང་རིན་སྤུངས་པ་རང་ལ་སྤྲོད་བསམ་པ་ཁོ་ན་བྱས། ཅི་རིགས་ཀྱིས་མ་གོ་བར། རྫོང་འཛིན་པ་རང་ལ་བློ་རྩེ་གཏད་པ་འདྲ་ཞིག་བྱེད་སྣང་། 
3-490
རྫོང་འཛིན་འདོད་ན་དེ་ལ་མ་ལྟོས་པ་གང་འཛིན་བྱུང་། དཔོན་གཡོག་ལེགས་སྤེལ་མ་བྱས་པ་རང་གིས་ཆོག་པར་སྣང་། ཟ་བྱེད་ཅེས་པ་མེ་ཕོ་སྟག་གི་ལོ་གསར་མཚམས་རྗེ་བཙུན་དམ་པས་རྒྱལ་བུ་དོན་གྲུབ་ཀྱི་སྐུ་སྩལ། ངེད་ཀྱི་ཤུལ་མི་ལ་རོགས་གྱིས་གསུང་། ཆོས་རྗེ་མཚར་པ་ཆེན་པོས། འདར་པ་ཆོས་རྗེ་ལ་སོགས་པ་འབུལ་བ་མཛད། ས་སྐྱ་བདག་ཆེན་གྱིས་སིནྡྷུའི་ཡུལ་གྱི་ཐུབ་པའི་སྐུ། འཕན་ནག་གི་དུམ་བུ་མི་རྒྱབ་གཅིག་ལ་སོགས་པའི་ཇ་ཞུས་བྱུང་། གཙང་གཞུང་ནས་ས་ཆ་རྒྱབ་གནོན་སོགས་ཞུ་མི། སྡེ་དཔོན་གྱི་གོ་འདྲ་བ་སྣང་། མི་གཞན་ཡིན་ན་དེ་ཀས་བློ་ཀ་རྫོགས་པར་གདའ་སྟེ། བདག་ནི་ཞེ་སུན་བསམ་པ་ཁོ་ནའོ། །འཕྱོང་རྒྱས་ནས་ཆོས་མཛད་དགའ་གདོང་མཁན་པོར་བསྐོ་འཇྭ། གསེར་ཆས་བེར་སོགས་གཏོས་ཆེ་བ་དང་བཅས་བསྐོས། ལར་ཁོ་རང་རྣམ་པ་ལེགས་ན་དགའ་བསམ་པ་རྐྱང་པ་བྱས་པ་ཡིན་ཏེ། མཐོང་བ་གྱ་མན་རེ་གཟུང་གི་འདུག་གོ ། དེ་ལོ་མཁར་ལས་ཀྱི་འཕྲོ། ཕྱག་མཛོད་པ་བྱེད་དུ་བཅུག །བྱ་རྒོད་གཤོངས་སུ་མྱང་བྲེའི་ནས་ཁལ་སྟོང་གི་དགེ་འདུན་ལ་ཕོགས། མྱང་བྲེའི་ཁལ་བཞི་བརྒྱ་བི་ལུང་པའི་དབྱར་གནས་ཀྱི་ཐེས། གཞན་གསེར་མདོག་ཅན་དུ་སུམ་བརྒྱ་ཙམ། ཐུབ་བསྟན་དུ་ཉིས་བརྒྱ་ཙམ་སོགས་དང་། མྱང་སྟོད་ཀྱི་གསེར་སྡིངས། སྲང་བརྒྱུད་པ་སོགས་ལ་བརྒྱ་རེ་བྱིན། 
3-491
གཙང་པོ་ནང་ནས་ལོ་བསྟར་གྱི་བོགས་ཁལ་བརྒྱ་ལྔ་བཅུ་ར་ལུང་དུ་རྗེའི་དུས་མཆོད་ལ་སྦྱར། དེ་དུས་གནས་སྒོ་སློབ་དཔོན་ཀརྨ་རིགས་ལྡན་དུས་མཆོད་སློང་མོ་ལ་བྱུང་བས། སྤྱིར་གསང་ཕུ་བ་འདི་བཤད་གྲྭའི་རྩ་བ་ཡིན་པས་མང་ཇ་འགྱེད་རྒྱས་པ་ཞིག་འདོད་པ་ཡིན་ཏེ། འབབས་ལ་རྩོད་པ་འདུག་པས་མང་ཇ་མ་ཐུབ། དུས་མཆོད་པ་སུ་ལའང་བདག་རྐྱེན་ཆེ་བར་བྱེད་ཡོད་པ་ལས། དེ་ལོ་སློབ་དཔོན་པའི་འདོད་བཞིན་བུ་རམ་བཏོས་ཆེ་བ་བསྐུར། དེ་དུས་མཁར་ཆུ་སྔགས་གྲྭ་པ་བོས། རྒྱལ་བྱེད་ཚལ་དུ་གྲྭ་ཁྲལ་བརྒྱ་ཙམ་བསྡུས་པ་དང་ལྷན་དུ་ཕོགས་རྒྱབ། པ་སྣམ་དུ་བཞག །ངེད་རྣམས་རྩེ་གོང་དཀར་ནས་འབོད་མི་བྱུང་བ་བཞིན་འགྲོ་བ་ཤར། ཡར་ལམ་བློ་བདེར། རྒྱལ་ཚབ་དམ་པའི་སྐུའི་སྤྲུལ་པའི་དབུ་སྐྲ་བཅད། ངག་དབང་པད་དཀར་དབང་པོར་མཚན་གསོལ། ར་ལུང་བརྒྱུད། ར་ལུང་ནས་དབོན་རིན་པོ་ཆེ་ཡང་ཕེབས། ཐོག་མར་སྣ་དཀར་རྩེར་སྡེ་པ་སྐུ་མཆེད་ཡབ་སྲས་ཀྱིས་ཞབས་ཏོག །ཆོས་དྲུག་ལ་སོགས་པའི་ཁྲིད་དབང་འཕྲན་བུ་ཕུལ། དེ་ནས་དཔལ་སྡེར་གཞི་ལེན་དང་། ཡབ་ལར་སྐྱིད་ཤོད་ནས་སྡེ་པ་དགའ་ལྡན་པ་སྐུ་གཞོན་པ་སོགས་བསུ་བར་འབྱོར། ཞབས་དྲུང་རིན་པོ་ཆེ་གཟིམས་ཆུང་ཕྱིར་ཕེབས་ཕྱག་རྩེ་སྤྲོད། གཞུགས་གདན་གུང་གཤིབས་སོགས་མཛད། སྣ་ལེན་དང་། མགོན་པོའི་རྒྱུད་དང་དྭགས་པོ་བཀའ་འབུམ་སོགས་ལུང་དང་། 
3-492
ཚེ་རྟ་སོགས་དབང་དང་། གོང་དཀར་རྡོ་རྗེ་གདན་དང་། ར་བ་སྨད་པར་མང་ཇ། ཁལ་འགྱེད་ཀྱི་རྩིས་བཏང་། དཔོན་ས་མ་ཆེ་བའི་དྲུང་ལ་ཆོས་དྲུག་སོགས་ལེགས་པར་ཕུལ། དེ་དུས་ངེད་རང་གི་ཟླར། སློབ་དཔོན་མུས་པ་དང་། ཤེར་ལེགས་པ། འདྲེ་ཁྲ་ས་གས་དགེ་བཤེས་མང་བ་དང་། ལྷ་མཐོངས་ལོ་ཙ་བ་དང་། ཁྱད་པར་ར་བ་སྨད་པའི་སློབ་དཔོན་པ་སོགས་འབེལ་གཏམ་སྨར་བར་བྱུང་། བཞི་སྡེ་དབུ་མཛད་པ་ལ་སྤྱན་རས་གཟིགས་ཀྱི་སྨར་ཁྲིད་བགྱིས། འདི་ཕྱིས་དགེ་འདུན་སྒང་པའི་མཁན་པོར་གྱུར། དེ་ནས་རྒྱལ་གྲུབ་གླིང་། གཞུང་སྐྱིད་གཤོངས། རྣམ་རྒྱལ་རབ་བརྟན། སྤྲེའུ་ཞིང་དུ། རྗེ་བཙུན་མར་པོའི་གདུང་ཁང་ལ་གསེར་དིང་གསར་གྱི་ན་བཟའ། བཟངས་རས་ཆོལ་བསྒྲིགས་ཀྱི་བླ་རེ་རྒྱས་པ་ཕུལ། གསེར་ཏོག་སོགས་སུ་ཕུན་སུམ་ཚོགས་པའི་གཞི་ལེན། དེ་དུས་རྒྱལ་ཆེན་གླིང་པ་ནང་གཤགས་ནས་དོལ་མདའ་གོང་དཀར་ནས་ཕྱག་ཏུ་བཞེས་སྐབས། ངེད་ལ་ཡོང་དགོས་ཟེར་བྱུང་། བ་རི་བརྒྱུད་གྲ་ཡོན་རྣམས་ཀྱིས་འབུལ་བ་གཏོས་ཆེ་བར་སྣང་། དེ་ནས་བཀྲ་ཤིས་དཔོན་ས་དཔལ་ཆེན་རྒྱལ་མོ་ཕེབས་འདུག་པར་མཇལ། དཔོན་གཡོག་གནང་དཀའ་བར་འདུག་པས་ཞག་ཤས་བསྡད། རིམ་པས་བཏེག །གྲྭ་ཐང་དུ་སྡེ་པ་སྐུ་མཆེད་བསུ་བ་ལ་ཕེབས། གྲྭ་ཕྱི་བརྒྱུད་སྣེ་གདོང་རྩེར་སླེབ། གདུང་བརྒྱུད་རིན་པོ་ཆེ་རྣམ་རྒྱལ་རབ་བརྟན་ནས་ཡུམ་སྲས་གསུམ་སྐས་མགོར་བསུ་བ་ལ་ཕེབས། 
3-493
གོང་དཀར་ནས་དང་མཐོང་བཀུར་འདྲ་བ་བྱས། ཐུགས་རྗེ་གླིང་པ་ཡབ་སྲས་སོགས་ཀྱིས་གཞི་ལེན། ཚོགས་ཆེན་ལ་ཞོ་རེ་མའི་འགྱེད་བཏང་། ལྷག་པར་གདུང་བརྒྱུད་བགྲེས་པའི་དགོངས་རྫོགས་ཀྱི་དུས་ཚོགས་མཁན་པོ་ཕྱག་འབུལ་དུ་བྱོན་པ་ལ་ཕྱག་ལན་གྱི་རྣམ་པ་ཙམ་བྱས། བཻ་ཌཱུརྱའི་གླེགས་བམ་ལ་སོགས་པ་གནང་ཆེན་མང་པོ་བྱུང་། སྣ་ཕུ་ནས་གདུང་བརྒྱུད་དཔོན་སློབ་འབྱོར་བ་སྒར་ཕྱིན་འཁྲིད། དབང་ཁྲིད་འདོད་པ་བཞིན་བྱས། རིམ་པས་རས་ཆུང་ཕུག །འོད་གསལ་གླིང་། དེ་ནས་ཀྲྀཥྞར། འཕྱོང་རྒྱས་ནས་སྡེ་པ་རྒྱལ་བུ་སྐུ་མཆེད་ཕེབས། སྲོང་བཙན་དུ་མ་མ་དྲུང་པ་མཇལ་ཏེ་གདན་ཆགས། འཕགས་སྡེ་རི་བོ་བདེ་ཆེན་པ་དེ་གཉིས་ལ་མང་ཇ་འགྱེད་བཏང་། །རྒྱལ་ཆེན་གླིང་པས་གྲྭ་ཕྱི་ཤོན། དམག་ཐམས་ཅད་གྲྭ་ཆེན་མོར་ལྷུང་། རྒྱལ་ཆེན་གླིང་རི་རང་ལ་བསྐོར་རྒྱག་བྱུང་སྐབས། གཉིས་ཐད་ནས་འཆིངས་ལ་སླེབ་དགོས་ཟེར་མི་འགྲོ་དཀའ་མེད་བྱུང་། ཟངས་མཚོ་བརྒྱུད། ཐོག་མར་དར་ལུང་དུ་བསྡད། འཕྱོང་རྒྱས། སྐྱིད་ཞོད། སྐུ་རབ། རྒྱ་རི་བ། འབངས་བརྩིགས། སྐྱིད་གཤོངས་པ་སོགས་དམག་དཔོན་རྣམས་ཕྱག་འབུལ་དུ་བྱུང་། སྐོར་ཡུག་ལ་ཟླ་བ་གཉིས་ཙམ་འགྱངས། དེ་དུས་དཔལ་འབྲས་སྤུངས་ཀྱི་ཆོས་གྲྭ་ནས། མར་ཡུལ་གླེས་ཀྱི་ལྷ་བཙུན་ཆེན་པོ་བསོད་ནམས་དཔལ་ལྡན་གྱིས་བསྐུལ་ནས། རྗེ་བཙུན་ཆེན་པོའི་དབུ་མའི་གཞུང་། རྩ་འཇུག་གཞི་གསུམ་གྱི་སྙིང་པོར་མཐོང་ནས་རྣམ་བཤད་དང་། 
3-494
རྡོ་རྗེ་ནམ་པར་འཇོམས་པའི་ཆོས་སྐོར་ཚང་མ་བརྩམས། དེ་དུས་སྐོར་ཡང་ལ་སྡེ་པ་སྐྱིད་ཞོད་ནས་ཕེབས། ངེད་རང་མཆོད་ཡོན་ཐུགས་ཉེ་བས། ཀུན་ལ་ཐུགས་རྟོག་ཞིབ་མོར་བཅུག །ཕྱིར་ཕེབས་སྐབས། དཔོན་སློབ་ཡ་གི་ཚོ་འཆིངས་པ་མི་འདྲ། དཔེ་མཚམས་པ་སླེབ་པ་འདྲ་འདུག་གསུང་། དེ་དུས་དགེ་འདུན་སྒང་པ་བྱེ་རྫིང་། གྲྭ་ཐང་བྱམས་པ་གླིང་པ་རྣམས་ལ་མང་ཇ་འགྱེད། དགེ་འདུན་རེ་ལ་ཁལ་རེ་མའི་རྩིས་བཏང་། ཆུ་རྫིང་ཤོར། ལབ་འཐོར་འགྲོ་བ་ལ་ཐག་བཅད་སྐབས། གཞི་བདག་ཅིག་ཅར་དམར་པོ་ཡིན་ཟེར། ལས་ཀྱི་གཤིན་རྗེ་མ་ཧེའི་གདོང་བརྙན་ཅན་མེ་དཔུང་གི་དབུས་ན་བཞུགས་པ་ཞིག་བྱུང་། ཅི་གསུང་མཉན་པར་ངེད་ཀྱིས་བཟོ་ཟེར་བྱུང་། དེ་ཕྱིན་ཆད་ཅིག་ཅར་དམར་པོ་འདི་ལས་ཤིན་ཏུ་ཐག་ཆོད། གང་ཟེར་བ་ལྟར་ཞག་ཤས་ན་ཆར་འབེབས་ཞིག་བྱས་པས་དྲག་ཆར་གྱིས་ཆུ་མོད་པར་བྱུང་། ཆུ་མིག་ཁར་ཕྱིན། དེ་དགོངས་རང་དབུ་མནའ་ཕོག །དམག་སོ་སོར་མ་གྱེས་པར། སྣེ་གདོང་དུ་འགྲོ་ཟེར་བར་འགྲོ་བཅུག་ན་དེ་དག་ལ་བསྡུ་ཚོམ་འབྱུང་དཀའ་བར་མཐོང་ནས། ཁོང་ཚོའི་མགོ་འདོན་དུ་བསམ་སོ་སོར་གྱེས་བཅུག །རྒྱལ་ཆེན་གླིང་པ་དབུགས་དབྱུང་གསུམ་པ་བྱས། སང་སྐོར་ཅིག་རྒྱལ་ཆེན་གླིང་དུ་ཕྱིན། དེ་དུས་བྱ་པ། རྒྱལ་ཆེན་གླིང་པར་ངོ་ལོག་པ་མངས་ཕེབས་པ་ལ་ཤིན་ཏུ་འཛངས་པར་འདུག་པ་ལ། 
3-495
ལབ་ཐོན་རེ་ནས་སྐྱོན་མི་ཡོང་། ཕེབས་དགོས་བྱས་ཁྲི་དམག་མིའི་དབང་པོ་རང་གིས་གཙོས་པ་མཚོ་ཤར་དུ་ཕེབས། དེ་ཤོག་ཟེར་ཕྱིན། སྡེ་པ་དང་མཇལ། དེར་འཕྱོང་རྒྱས། རྒྱ་རི་ནས་སོགས་ཞལ་ངོ་། དབུས་ཀྱི་མི་སྣ་ཀུན་འཚོགས། གཏར་འཆིང་གི་ཁྲམ་བཏང་། བྱ་ཡུལ་ནས་དཔོན་གཡོག་ཕྱིར་ཕེབས། ངེད་རྣམས་གྲི་གུར། སྡེ་པ་ནོར་བུ་པས་ཞབས་ཏོག་རྒྱ་ཆེ་བ་དང་། གསེར་རྐྱང་ཞོ་བརྒྱས་གཙོས་པའི་འབུལ་བ་གཏོས་ཆེ་བ་འདུག །སླར་འཕྱོང་རྒྱས་སུ་ཤོག་གསུང་ནན་ཆེས་འགྲོ་དགོས་པ་བྱུང་། དགུན་དེར་ཐོགས། སྡེ་པ་འཆོས་པ་འཇལ་བར་བྱུང་། ཕྱག་ཆེན་དང་སྨར་ཁྲིད་བསྟན། ཟིན་བྲིས་དགོས་ཟེར་བ་བྱས། གོར་རྫོང་མཁན་པོ་དགེ་བའི་བཤེས་གཉེན་དཔལ་གྲགས་པས་བསྐུལ་ནས་དགེ་སྦྱོར་བདུན་པ་ཡི་གེར་བཏབ། ཐེལ་ནས་མཁན་པོ་བྲག་ལེབ་པ་བསྙེན་རྫོགས་བསྒྲུབ་པར་བྱོན། གདན་ས་ཐེལ་ལ་མང་ཇ། སྦོས་ཤེལ་ཤལ་པ་ཆེ་བ་སྤུས་གཙང་ངེས་པ་དང་། དངུལ་དམ་གྱིས་གཙོས་པའི་འབྱེད་བཏང་། ཐོབ་རྒྱལ་ལྷ་རྩེར་སླེབ། ཐང་པོ་ཆེའི་གཙུག་ལག་ཁང་མཆོད་རྟེན་དང་བཅས་པ་ལ་ལྟ་རྟོག་ལེགས་པར་བྱས། དེ་དུས་ར་བ་སྟོད་པའི་དྲུང་ཆེན་གད་པ་སྟེང་པ་ཡིན་པ་ཁོང་བྱོན། འབེལ་གཏམ་སྨར་བ་དང་། གསང་ཕུ་དུས་མཆོད་པ་སུ་བྱུང་ལ་གནང་སྦྱིན་བཟང་པོ་ལོ་བསྟར་གྱི་བྱེད་ཡོད་པ་ལྟར་ལས་ལྷག་པ་སྦྱིན། 
3-496
ཆོས་ཞུ་བ་སོགས་གུས་གུས་མཛད་དེ་ནས་གཙང་དུ་འགྲོ་རྩིས། བདེ་སྐྱིད་གླིང་དུ་སླེབ་སྐབས། བུ་ཚལ་ནས་སྡེ་པ་སྐུ་གཤེགས་པའི་ལྡད་ཀྱི་གྲྭལ་དབུར་འབོད་མི་སླེབ། འཆོས་རྒྱུད། ཡར་མོ་ཆེ་སྐབས། ངེད་རྣམས་བསམ་ཡས་ཀྱི་རབ་འདོན་རིན། སྟོད་སྨད་གཉིས་ཀ་ཡང་མོས་འཚུབས་པ་ལ། ངེད་རང་རྣམས་ལ་གྱང་བཏང་བ་བཞིན་ཤིན་ཏུ་འཇམ་པ་བྱུང་། དེ་ནས་ཚེས་བཞིའི་ཉིན་ལས་མཁན་ཆེན་པོ་བབས། དཀོར་མཛོད་གླིང་དུ་ཡོང་དགོས་ཟེར། ངེད་རྣམས་བླ་བྲང་ཁྲ་མོར་བསྡད་ཡོད་པ་དེ་ནས་ཕྱིན། ངེད་དཀོར་མཛོད་གླིང་དུ་སླེབ་སྐབས། ལས་མཁན་རང་རིངས་རིངས་ཀྱིས་བཀྲ་ཤིས་ཁ་བཏགས་ཀྱི་ཕྱག་མཇལ་བཏད་ནས་གུས་འདུད་ཆེན་པོ་བྱས། ཀརྨ་པ་ནི་ངེད་ལ་བསུ་བ་ལ་ཤོག་ཟེར་ངས་ཕྱིན། ཁྲག་ཅིག་བསྒོས་སོང་། ཁྱེད་ལ་བསུ་བྱེ་བྱེད་བསམ་སྟེ་རྟབ་རྟོབ་ཕེབས་བྱུང་། བསུ་བ་ལ་ཤོག་མི་ཟེར་བ་ཅི་ཡིན་ཟེར་འདྲི། ལས་མཁན་རང་ཁྲི་བུ་ཁ་ན་བསྡད། ངེད་ལ་འབོལ་སྟེངས་སུ་སྟག་ལྤགས་ཆེན་པོ་ཞིག་བཏིངས། ཁྱེད་ཀྱི་སྤྱན་སྔར་དམར་ཆོལ་ལོ་གསུམ་མི་འཐུང་བའི་དམ་བཅའ་ལེན་གསུང་། དེ་དུས་བུ་ཚལ་ནས་ལ་ཅུང་མ་དགྱེས་པའི། ངེད་དཔོན་བློན་ཁྱོད་ཀྱི་ཟླ་ལ་འགྲོ། བསེ་འབག་སྨུག་ཆུང་། ཤོལ་གྱི་སེང་གེ་ལ་སོགས་པ་ཁྱེད་ཀྱིས་ཁྱེར་སོང་ཟེར་ལག་ཏུ་བསྟབས་བྱུང་བར། དེ་འདྲ་མ་མཛད། 
3-497
ཆོས་གྱི་རྒྱལ་པོ་ཁྲི་སྲོང་ལྡེ་བཙན་དང་། སློབ་དཔོན་ཆེན་པོ་གཉིས་ཀྱིས། བ་ཏ་ཧོར་གྱི་ཡུལ་ནས་དཀའ་ལས་ཀྱིས་སྤྱན་དྲངས། ཆོས་འཁོར་ཆེན་པོ་འདི་ལ་སོགས་པ་ཐམས་ཅད་ཁྱེད་ལ་གཏད། དམ་པ་ཆོས་ཀྱི་སྲུང་མར་མངའ་གསོལ་བས། འདི་རང་དུ་བཞུགས་དགོས་བྱས་པས། འོ་ན་ངེད་ཀྱང་སྡོད། ངའི་ཡུ་འབོག་ཆོས་ཁྲི་འདི་ནས། སྐྱེས་བུ་དམ་པས་ཆོས་འཆད་མཁན་མེད་ནས་རྒྱང་ཙམ་སོང་བས་ཡིད་སྐྱོ། ད་རེས་སྐྱོ་བ་བསང་བ་ལ་ཁྱེད་ངས་སྤྱན་དྲངས་པ་ཡིན་པས། ཚེས་བརྒྱད་ཀྱི་ཉིན་ཁྲོམ་ལ་ཚེ་དབང་ཞིག་བསྐུར། དེ་ཞུ་བ་ལ། ངེད་དཔོན་བློན་སོགས་སྣང་སྲིད་ཀྱི་ལྷ་འདྲེ་ཐམས་ཅད་འོང་། ཁྲོམ་ངེད་རས་སྡུད། འགྲོ་གདོང་། བྱང་ཆུབ་ཆེན་པོ་ལ་སོགས་པའི་རྟེན་ལ་བརྟེན་བཞུགས་ཀྱི་ཤིས་བརྗོད་རྒྱས་པ་གྱིས། དེས་གཙུག་ལག་ཁང་འདི་ཡུན་དུ་གནས། བོད་ཁམས་ལ་ཕན་པ་ཆེན་པོ་འོང་གསུང་། སང་གི་ཉིན། འདི་ལྟ་བུ་འོང་ཞེས་པའང་བྱུང་། དེ་དུས་སྡེ་པ་གཤེགས་འཕྲལ་དུ་སོང་བས། བུ་ཚལ་ནས་དཔོན་གཡོག་ཁྲོམ་དབང་ལ་མི་དགྱེས་པ་འདུག་རུང་ཆོས་སྐྱོང་གིས་བསྐུལ་བས་བྱེད་བསམ། དབུ་རྩེའི་སྨོན་ལམ་སོགས་པ་བྱས། ནམ་མཁའ་ཡང་ཚུབ་ཙམ་འདུག་པས། མི་རང་ཅི་འདྲེ་འདུ་བསམ། ངེད་དབུ་རྩེའི་སྒོར་འཐོན་ཙ་ན་མི་ཐོ་རེ་བ་ལས་མི་འདུག །ཁྲི་ཁར་སླེབ་མཚམས་ཁྲོམ་ཆོས་ཁྲི་ཐང་ཁྲིག་གང་བ་སྐད་ཅིག་ལ་འཛོམ་བྱུང་། 
3-498
གནམ་འཇམ། དེ་དགོངས་སྲོད་དཀོར་མཛོད་གླིང་དུ་སླར་ཕེབས། སངས་རྒྱས་ཀྱི་བསྟན་པ་འཛིན་པར་དམ་བཅས། རྒྱལ་བྱེད་ཚལ་ཡང་ངེད་ཀྱིས་སྐྱོང་། ཁྱེད་ཀྱིས་ཅི་བསྒོ་བ་བྱེད་གསུང་། ངེད་ཀྱིས། ཁྱེད་ཆོས་སྐྱོང་རྣམས་རུ་ང་། ང་བྱ་བྲལ་བ་རྟོག་པ་རྩིང་བས་གཏོར་བསྔོས་སོགས་པ་ལེ་བར་བྱུང་ན་མི་བཏུབ་བྱས་པས། ཁྱེད་ཀྱིས་སངས་རྒྱས་ཀྱི་བསྟན་པའི་བྱ་བ་བྱེད་ཁྱེད་ལ་མགུ་བ་ཡིན་ཟེར། འོ་ན་ལེགས་བྱས། ལམ་དུ་ཡང་དགུན་ཡིན་ཏེ། འགྲུལ་གནམ་འཇམ་པ་སོགས་ཡིད་ཆེས་པར་བྱུང་། དེ་ནས་བུ་ཚལ་གྱི་ཞིག་སོས་བྱེད་པའི་རྩིས་བྱས། བུ་ཚལ་དུ་ཡུམ་དྲུང་པས་འཕྲལ་གྱི་ཁུར་བཞེས་ཞུས། གསེར་ཞོ་སུམ་བརྒྱའི་དངོས་པོ་གཙང་ནས་བརྫངས་ལེགས་པར་གྲུབ་བོ། །དེ་དུས་ངོ་མཚར་བའི་རྟེན་འདྲ་བྱུང་། ཕྱིས་རྒྱལ་བྱེད་ཚལ་གྱི་རྟེན་གྱི་ཐུགས་ཁར་བཅུག །འཕྲང་སྒོར་སླེབ། གཞི་ལེན་གཏེར་བཏོན་དགེ་བཤེས་རིན་པོ་ཆེ་ཕེབས། ཤིན་ཏུ་ཐུགས་ཉེ་བ་དང་། གསང་ཕུ་གཞི་པ། ན་ལནྡ་གཟིམས་ཁང་འོག་མ་སོགས་ཀྱི་སློབ་དཔོན། ལྷག་པར་སློབ་དཔོན་སྟོན་ཚག་པ་བགྲེས་པོ་འདུག་པ་དང་མཇལ། འབེལ་གཏམ་ཆོས་ཀྱི་སྦྱིན་པ་སྨར་བར་བྱུང་། ངེད་ཀྱིས་རྩེད་མོའི་ཁ་བོ་བྱས་པས། སློབ་དཔོན་སྟོན་པ་ནས། ཕྱག་གསུམ་བཙལ། ཐལ་མོ་སྦྱར་མཛད་ནས། སྐུ་ཡོན་ཡང་ཁམ་ཆེ། ཐུགས་རྒྱལ་ཡང་ཆོག་པར་སྣང་ཞེས་གསུང་པས། 
3-499
ཀུན་བཞད་གད་ཐེག་པ་བྱུང་། དེ་ནས་དོལ་མངར་ལྕེ་བདེ་བས་གཞི་ལེན། འབྲོག་བྲག་མདར་དགོན་པ་གསར་འདེབས་སོགས་ཀྱི་དང་ལེན་བྱས། བདུད་འདུལ་ཆོས་གླིང་དུ་མིང་བཏགས། གྲྭ་ཁྲལ་སྔ་བཅུ་ཟིན་ཙམ་བྱུང་། བླ་མར་མི་ཕམ་དབང་པོ་བསྐོས། དོལ་འཕགས་པ་དང་། དུམ་བུ་གྲྭ་ཚང་ལ་མང་ཇ་འགྱེད་ཆས་བཏང་། དེ་ནས་གོང་དཀར་དུ་སླེབ། སྡེ་པ་དགའ་ལྡན་པས་སྐྱིད་ཞོང་དུ་ཡོང་ན་གསུང་བྱུང་ཡང་གཙང་དུ་རྟེན་བཞེངས་ཀྱིས་རིངས་མ་ཕྱིན། རྒྱལ་བྱེད་ཚལ་ལ་དེ་ལོ་ཤིང་རྩི་སྤུས་གཙང་ཐོངས་པ་ཙམ། བདག་ཆེན་རྩེ་གདོང་ནས་ཀྱིས། ཐོབ་རྒྱལ་བར་དཔུང་ཁྱེར་འཁྲིད་གནང་བ་གྲུབ། བདག་ཆེན་རང་བཙོན་ལམ་དུ་ཕེབས་དགོས་པ་དང་། སྟག་ཚང་རྫོང་དང་བཅས་པ་ཤོར་འདུག་པས། ཕྱག་མཛོད་པས་ཁུར་བླངས། རྫོང་མིན་པ་ཕྱག་རྫས་ཕྱིར་འབུལ་བ་དང་། བདག་ཆེན་རང་བཙོན་ལམ་དུ་བཞུགས་མི་དགོས་པ་ཕྱིར་ཐེགས་བསྐྱེལ་དང་བཅས་པ་ཞུས་འདུག་པས། དེ་དུས་ངེད་དཔོན་སློབ་ལ་དགྱེས་དགྱེས་ལ། ཟླ་བ་གསུམ་ནས་དེ་ཐུགས་ཀྱིས་བསྙེལ། ཡང་གཞན་མའི་སྐྱོད་ཐབས་ཀྱིས། ངེད་ལ་མཐུ་སྡིགས་ལ་ཚུགས་ཏེ། བདག་ཆེན་རང་སྐུ་ཚེ་མཐར་མ་ཕྱིན་པའི་རྒྱུར་སོང་། ངེད་ཀྱིས། སངས་རྒྱས་ཀྱི་བསྟན་འཛིན་སུ་ལ་ཡང་གནོད་པའི་མནན་སྲེག་བསད་སོགས་བྱེད་མ་མྱོང་། རང་སྲུང་བའི་བཟློག་པ་འདྲ་ནི་བྱས། དེ་ཁས་གཞན་ལ་ཅིག་ཡོང་གི་ཡོད་པ་འདྲའོ། །
3-500
རྗེ་བཙུན་མར་ལུགས་གཙང་མའི་བཤད་རྒྱུན་གྱི་བརྟག་གཉིས་ཀྱི་སྤྱི་མ་ཊཱིཀ་བརྩམས། དེ་དུས་ས་སྐྱ་བདག་ཆེན་གྱིས་རོགས་དན་དགོས་ཕེབས་པར། གནྡྷོ་ལ་ས་སྐྱ་པ་རང་གི་རྟེན་དྲག་ཤོད་ཡིན་པར་འདུག་པས། འདི་ཀ་གདན་སར་ཕུལ་ན་ཞུས་དུས། གནྡྷོ་ལ་མི་དགོས། ཆོས་གཞིས་གཏོས་ཆེ་བ་ཞིག་དགོས་གསུང་། བྱང་དུ་འཐད་ལེན་ཙམ་ཞུས་པར། བདག་ཆེན་ལས་ཆ་འབུལ་བ་ཐུགས་ལོངས་པར་མི་འདུག་ནས། ཤང་ནས་ལྕང་གསེབ་བེར་ཆེན་དུད་གྲངས་བདུན་ཅུ་ཙམ་བོགས་ཡོང་གཏོས་ཆེ་བ་འདུག་པ། ས་སྐྱའི་མཆོད་གཞིས་ལ་སྦྱར། གཞན་རྟ་ནག་རིན་ཆེན་རྩེ་ཐུབ་བསྟན་རྣམ་རྒྱལ་བ་དང་། སྨན་ཐང་པའི་གཞིས་ས་བརྗེས་བྱས་ནས་གསེར་མདོག་ཅན་པ་ལ་སྐྱར། སྐྱེད་ཚལ་དུ་ཡང་ཁ་རག་གཙང་གི་མཆོད་གཞིས་གཞན་གྱི་ལག་ཏུ་ཐལ་བ་རྣམས་འགུགས་པའི་གྲོགས་བྱས། དོན་སངས་རྒྱས་ཀྱི་བསྟན་པ་འཛིན་པ་བཤད་སྒྲུབ་གཉིས་སུ་འདུག །སུ་དར་ཡང་སེམས་ཅན་གྱི་དོན་དུ་འགྲོ་བར་བསམས། འཕྲལ་གྲྭ་པའི་མཐུན་རྐྱེན་ཚུན་ལ་ཤད་གང་ཚུད་བྱས་སོ། །དབུས་ནས་སྤྲུལ་སྐུ་སྦྱིན་མ་དཔོན་སློབ་འཁྲིད། རྒྱལ་བྱེད་ཚལ་གྱི་ལོགས་བྲིས། གདོང་ཆེན་ལ་ཐུབ་པ་གནས་བཅུ། དཀར་བརྒྱུད་ཕོ་བྲང་། གཞན་སངས་རྒྱས་ཀྱི་མཛད་པ་རགས་པ་བཏབ། དེའི་སྐུ་གསེར་ལ་གསེར་ཞོ་ལྔ་བཅུ་སོང་། ད་དུས་ངམས་རིངས་སུ་ཟངས་སྒྲུབ་གཏོས་ཆེ་བ་བརྫངས། 
3-501
ཟངས་ཁལ་སུམ་བརྒྱ་ལ་ཐུབ་པ་ཆེན་པོའི་སྐུ་བལ་པོ་མ་ཎི་ཕཱ་ལ་སོགས་ཀྱིས་བསྒྲུབ་བཞིན་པ། དེ་ཡང་། རྒྱལ་བྱེད་ཚལ་གྱི་གཙུག་ལག་ཁང་། ཀ་ཆེན་བཞི་བཅུ་རྩ་དགུའི་ས། འདུ་ཁང་ཀ་བ་ཉི་ཤུ། ཤིང་བརྩེགས་བཅུ་གསུམ་མ་ཚང་མ་ལ་ཡོད་པ། ཤིང་ཆ་སྤུས་གཙང་། ཤིང་རྩི་ནི། གཙང་ལུང་པ་ཙམ་ལ་དེ་དང་མཉམ་པ་མེད། གཙང་ཁང་ཀ་བཞི་ཐོག་འཕར་མ་མཐོན་པོ། སྤྱན་རས་གཟིགས་ཀྱི་ལྷ་ཁང་། མགོན་ཁང་གཉིས་ཀ་གཉིས་མ་རེ། ཐོག་འདུ་ཁང་དང་མཉམ་པ་ཉིས་བརྩེགས། སྤྱན་རས་གཟིགས་ཀྱི་ལྷ་ཁང་ལ་སྤྱན་རས་གཟིགས་ཀྱི་བྲིས་དང་། ཚེ་དཔག་མེད་སོགས། སྟེང་དུ་བྱམས་པའི་ལི་མ་མི་ཚད་མ་བཞུགས་པ། ལི་མས་བསྐོར་བའི་ལོགས་བྲིས་ལ། བདེ་བ་ཅན་དང་ཉེ་བའི་སྲས་བཞིའི་རྣམ་ཐར་རགས་པ་ཙམ། མགོན་ཁང་སྟེང་དུ་རྒྱན་ཁང་། གཙང་ཁང་ཆེན་མོ་ཁོར་ཕིབས་ལས་ཐོག་སོ་ཕྱེད་འཕར་གྱི་སྟེང་དུ། བླ་མ་ལྷ་ཁང་། བྲིས་ལ་དབང་བརྒྱུད་ཁྲིད་ཀྱི་བླ་མ་ཀུན་ཚང་པ། འབུར་དུ། སྐུ་ཁྲུ་རེ་ལྷག་པ་སྨན་འདམ་ན་བཟའ་ཚོན་རྩི་གསེར་གྱི་གཟི་འོད་ཆེ་བ། བཟོ་ཁྱད་མའི་དཀར་བརྒྱུད་ཕྱག་མཆོད་ཀྱི་བླ་མ་ཚང་པ། རྟེན་གཙོར་ཆོས་རྗེ་གཙང་པའི་སྐུ་ཕྱག་ནས་མ། ཐམས་ཅད་ལ་རྒྱ་ཁྲི་མཆོད་ཅོག་འཕར་མ་ལ། གསེར་ཐོག་སྤུས་གཙང་རྒྱ་མི་ཆུང་བ་ཟངས་ཁལ་ཕྱེད་དང་ཉིས་བརྒྱ། 
3-502
གསེར་རྐྱང་ཞོ་ལྔ་བརྒྱ་གསོལ་བ། གཙང་ཁང་སྟེང་ཤོད་གོས་ཆེན་གྱི་བླ་རེས་ཀྱིས་ཁྱབ་པ། གཞན་ཤབ་ཡུལ་རེར་གོང་མཚུངས། མགོན་ཁང་། མགོན་པོ། རྟེན་ཆེན་གྱི་ཁྲི་བཟོ་བ་དང་དུས་མཉམ། རློན་པ་ལ་རབ་གནས་བྱས་པས་ཡིན་པ་འདྲ་ཟེར། ངེད་དབུས་འཁོར་ནས་ཀྱང་མ་སྐམས་པར་སྣང་། ལོགས་བྲིས་ཀྱི་དུས་ཀྱང་སྟེང་ནས་ཁྲག་འཛག་པ་དང་། ཞིང་སྐྱོང་གི་ཞལ་ནས་ཁྲག་འཛག་པ་བྱུང་། སྤྱན་གཟིགས་ཕྱི་རབས་ཀྱི་མགོན་ཁང་ལ་གནང་ས་ཆེ་ལ། ཐམས་ཅད་དུ་མཆོད་རྫས་ཀུན་ཧ་འགལ་བ། སྒོ་ཁང་དྲ་མིག་ཅན། སྟེང་དུ་སྒོ་མངས། དེའི་ནང་དུ་སྔགས་སྐུ་མང་པོ་རི་མོར་དོད་པ། ཁྱམས་ཀྱི་རྡོ་གཅལ་མཐའ་ཤག་མིག་རྒྱ་ཆེན་པོས་ཀུན་ནས་བསྐོར་བ་གཙུག་ལག་ཁང་ལ་ལེགས་པའི་དཔེར་འདྲེན་པ་ཞིག་གོ །དེ་དུས་མུས་པ་ཆེན་པོ་དང་། དཀའ་བཅུ་པ་དབང་ཕྱུག་དཔལ་ལྡན་གཉིས་ཀྱིས་བསྐུལ་ནས་བསྲེ་འཕོའི་ཁྲིད་ཡི་གེར་བཏབ། ཁྱད་པར་འཕྲང་སྒྲོལ་གྱི་སྐོར་ལ། ཚེ་རིངས་མའི་ལུང་གིས་མི་ཤེས་པའི་རྨོངས་པ་བསལ། དེ་ནས་ལམ་སྐོར་ལྷག་མ་རིམ་པ་བཞིན་བྲིས། དེ་དུས་བྱར་བཤོངས་མཁན་ཆེན་སངས་རྒྱས་རྒྱལ་མཚན་པ་ལ་ཕྱག་གཡོག་པའི་སྐྱོན་གྱིས་ཐུག་ཚུལ་སོགས་གནང་དཀའ་བ་འདུག་པ་ལ། ཀར་གངས་སོགས་དངོས་སྤྱད་མང་པོ་སྣར་ཐང་པ་དང་འཚོང་བྱས། མྱང་བྲེའི་ནས་ཁུལ་ལྔ་བརྒྱ་བྱར་གཤོངས་ཀྱི་ཐབ་འདེགས་ལ་སྦྱར། 
3-503
སྟོན་བཞངས་གསེར་གསོལ་བྱས་པས། བཞུ་ཆད་བསྐྱུར་བའི་སྐུ་གསེར་ལ་གསེར་ཞོ་ལྔ་བརྒྱ་སོང་། དབུའི་མཛོད་སྤུར་དུང་གཡས་འཁྱིལ་ཆེ་བ་ཕུལ། གཟུངས་གཞུག་བརྒྱད་སྟོང་པའི་རྒྱ་དཔེས་གཙོས་པའི་ཆོས་ཆེན་པོ་ཏི་ཕྱེད་སུམ་བརྒྱ། ཐུབ་པའི་སྐུ་སྟོང་ཕྲག་ལྔ་ཙམ། ཚ་ཚ། རྟེན་ལི་མ། སངས་རྒྱས་ཀྱི་རིང་བསྲེལ་སོགས་བྱིན་རླབས་རྟེན་བསམ་གྱིས་མི་ཁྱབ་པ། གསེར་གར་ལུགས་ཀྱི་སྐུ་ལྔ་དྲུག་ཙམ་པོར་ཟགས་སུ་སོང་ན་མི་རུང་བསམ་ནང་བཞུགས་སུ་ཕུལ། ལེགས་པར་གྲུབ་ནས་རབ་གནས་ཀྱི་དུས་སྐྱེ་བོ་ལུང་པར་མི་གཤོང་བ་འདུས། ལྷོ་བྲག་སྔགས་གྲྭ་པ་དང་། རྒྱལ་བྱེད་ཚལ་རང་གི་སྔགས་གྲྭ་པ་བསྡུས་པ་ལ་དགེ་འདུན་སུམ་བརྒྱ་ཙམ་བྱུང་། དེ་དག་གིས་བདེ་མཆོག་འཁོར་ལོའི་སྒོ་ནས་རབ་གནས་ཉི་མ་བདུན་བྱས་དགའ་སྟོན་གྱི་ཉིན། འབྲུག་པ་རང་གི་ཉེ་ཀོར་གྱི་དགོན་བཅུ་བདུན་ལ་དངུལ་གྱི་དཀར་ཚུགས་ལེགས་པ་རེས་གཙོས་པའི་འགྱེད། བལ་པོ་ལ་གསེར་རྒྱང་ཞོ་ལྔ་བརྒྱ། དངོས་རྒྱབ་སྟོན་མོ་མྱང་སྟོད་པ་རྣམས་ཧ་འགལ་བ་བསྒྲུབས། རྒྱལ་མཁར་རྩེ་ནས་སྡེ་པ་ཕེབས་པའི་དཔོན་གཡོག་རྣམས་ལའང་རྩི་མ་ལ་སོགས་པ་གནང་ཆེ་བ་སོང་། དེ་ཉིན་ཁོ་བོས་པྲོག་ཞུ་གྱོན། འཁོར་ལོས་སྒྱུར་བའི་ཆས་སུ་ཞུགས་ཏེ། ཁྲོམ་གྱི་དབུས་སུ་རྒྱས་པའི་སྦྱིན་སྲེག་བྱས་པའི་ཚེ། བླ་གཡེ་ཆེན་མོར་ཚོགས་པའི་མི་ལ་མཐོང་བ་སྣ་ཚོགས་བྱུང་འདུག །
3-504
སྔགས་གྲྭའི་སློབ་དཔོན་ངག་དབང་བློ་གྲོས། རྒྱུད་ལག་ལེན་ལ་འདྲིས་པ་བག་ཆགས་སད་པ་ལྟ་བུ་ཡོད་པས་ཁོང་བསྐོས། མཁར་ཆུ་བ་རྣམས་བརྫངས། དེ་དུས་རྡོ་རྗེ་ལེགས་པ་བྱུང་ནས། ངེད་འུ་ཡུག་ནས་ཡོང་། གཙུག་ལག་ཁང་འདིའི་གཉེར་བྱེད། ངའི་སྐུ་གཅིག་བྲིས་ཟེར། སྐུ་ཤོང་བ་མེད་བྱས་པས། གཞི་བདག་གི་འཁྲིས་ན། ང་རང་ཤོང་ཙམ་སྣང་ཟེར་བ་སྨིས་པ་ལྟར་བལྟས་པས་བདེན་པར་འདུག་ནས་བྲིས་སོ། །ཕྱིས་ལོ་མཚན་ཉིད་གྲྭ་ཚང་འཛུགས་གདོང་། གསེར་མདོག་ཅན་པ་རྣམས། ངེད་ཀྱི་སློབ་གཉེར་གྱི་འབྲེལ་ལ་བསམས་ནས་སློབ་དཔོན་སོགས་ཁོང་ཚོ་དང་མཐུན་པ་ཞིག་དགོས་ཟེར། ཐོག་མར་མཁན་ཆེན་རིན་པོ་ཆེ་དཔལ་མཆོག་པ་རང་འབྱོན་པར་གསར་ཏེ། གསེར་མདོག་ཅན་གལ་ཆེ་ཟེར་འཐེན། སློབ་དཔོན་ཤེར་ལེགས་པ་འོས་ཟེར་ཁང་གསར་གྲྭ་ཚང་པས་འོས་འཐུས་གྲྭ་རྒྱུན་ལ་བསམས། དེ་ཁའི་སྟེང་དུ་བཏང་ནས་བསྐོས། གྲྭ་ཚང་གཉིས་ཀ་བསྡོམས་པ་གྲྭ་པ་ན་གཞོན་སློབ་གཉེར་བ་ཞབས་གཅིག་སུམ་བརྒྱ་མི་ཆད་ཙམ་འཚོགས། རྒྱུན་དུ་གྲྭ་ས་སྣ་ཚོགས་ཀྱི་དཀའ་བཅུ་རབ་འབྱམས་དོན་མཐུན་སུམ་ཅུ་བཞི་བཅུ་ཙམ་བྱུང་། འབེལ་བའི་བཀའ་མཆིད་ཉིན་གྱི་རིང་རྒྱུན་དུ་འདའ་བས། བྱ་བྲལ་གྲྭ་ས་གང་ལས་ཀྱང་གཞུང་ལུགས་ཀུན་ལ་བློ་བསྐྱེད་འདི་ཆེ་བར་སྣང་ཟེར་རོ། ། གྲྭ་ཚང་གཉིས་ལ་མྱང་ནང་ནས་བོགས་ཁལ་སུམ་སྟོང་ལྷག་པ་ཙམ་སྦྱར། 
3-505
འཕྲལ་གྱི་ཐབ་ཆས་གདན་ཆས་སོགས་ཀྱང་ལེགས་པར་བསྒྲུབས་སོ། །སྡོང་དགོན་དཔོན་པོས་དཀར་མེ་ལ་དམིགས་པའི་འབྲི་ནག་དྲུག་ཅུ་ཙམ་ཕུལ་བ་སོགས་ཕྱུགས་བརྒྱ་ལྷག་གྲྭ་ཚང་ལ་སྦྱར། གཞན་དེ་དུས་སྐྱེད་ཚལ་དུ་ནང་འཛིངས། གྲྭ་པ་ཕལ་ཆེ་བ་ཆོས་རྗེ་རབ་བརྟན་པའི་ཕྱོགས་སུ་སོང་། ཁོང་དཔོན་སློབ་ཆོས་ལུང་དུ་འདུག་པ། སྐྱེད་ཚལ་འདི་ཀུན་མཁྱེན་སངས་རྒྱས་འཕེལ་གྱི་དགོན་པ། དབུས་གཙང་གི་གྲྭ་ས་ཕལ་གྱི་འབྱུང་ཁུངས་སུ་འདུག་པས་མ་རླག་པ་ཞིག་རེ། རང་ངོས་ཀྱིས་འཁྲུག་གཞིར་གྱུར་ན་མི་རུང་བསམ། ཆོས་རྗེ་རབ་བསྟན་པ་ཚང་ཡར་བོས། ཕོགས་ལ་སོགས་པ་དབུ་འདོན་དུ་འགྲོ་བ་དང་། སྐྱེད་ཚལ་དུ་འཕྲལ་ཟོས་མི་བདེ་མི་འབྱུང་བར་བསམ། དགའ་གདོང་མཁན་པོར་བསྐོས། ཞིང་ཤག་པ་དང་སྡེ་པ་བསྒྲིགས་ནས་ཐོབ་རྒྱལ་བ་སོགས་ལ་གནད་སྤྲོད་འདུག་པ། ཐོབ་རྒྱལ་བ་རང་ལབ་འདོད་པ་བཞིན། །བྱ་བཟང་རིན་སྤུངས་པར་སྤྲད། ཐོབ་རྒྱལ་བ་དང་དཔོན་གཡོག་དན་བྱས། ཐོབ་རྒྱལ་བས་དེ་ལོ་ཀརྨ་པའི་དགོན་པ་འདུལ་གྲྭ་གླིང་འབྲུག་པར་བསྒྱུར་ཟེར་སྣང་ཡང་དེ་འདྲ་མི་ལེགས། ཆོས་ལུགས་ཕར་བསྒྱུར་ཚུར་བསྒྱུར་འདི་ཆོས་དང་འགལ་བའི་ལས་ཡིན་པས། སུ་དང་ཡང་འདྲ། དེ་འདྲ་མ་མཛད་བྱས། ཁྱད་པར་རྗེ་ཀརྨ་པ་ཡང་སྲས་ཕེབས་པ་ལ་ཞབས་ཏོག་འཐད་པ་སོགས་ལེགས་པར་བསླབས། ཕྱིས་རིན་སྤུངས་པ་དབོན་ཞང་དཔོན་གཡོག་ཐམས་ཅད་ངེད་རང་ལ་དགྲ་བྱེད་པར་ཚུགས་སོང་། 
3-506
མི་ཟད་ཆུ་གཏེར་ནང་དུ་སྲོག་སྦྱིན་བསམ། །བློ་གསལ་དགེ་དོན་ཅི་བདེར་མནལ་བ་ལ། །གཡོན་ཅན་བྱས་མི་གཟོ་དེའི་གནོད་པའི་དབལ། །ཆེན་པོ་གཙུགས་པའང་སྙིང་རྗེའི་རྐྱེན་བཏང་བ། །བདེན་པ་དམ་ལྡན་རང་གི་བཙུན་མོའི་མདུན། །བརྗོད་པས་གསལ་བ་སྔར་གྱི་གོ་འཕང་རྩེར། །རང་ཉིད་རེག་དང་མ་བསམས་སྡིག་པ་ཅན། །མི་ཟད་སྐྱེ་བ་གཞན་དུ་བསྐྲད་ཅེས་ཐོས། །རབ་སྟོན་གྱི་ཕྱི་ལོ་པ་སྣམ་དུ་སླེབ་སྐབས། བྱང་ནས་དཔོན་ས་ཀུན་དགའ་དཔལ་སྒྲོན་ཆོས་ལ་ཕེབས། འདིས་སྟོད་དུ་འབྲུག་པའི་བསྟན་པ་ལ་ཆེས་ཞབས་ཏོག་ཏུ་འགྱུར་བ་བྱུང་། དེ་དུས་པ་སྣམ་ལ་འགྲོ་གདོང་། དཀའ་བཅུ་པ་དབང་ཕྱུག་དཔལ་ལྡན་གྱིས་རྩོལ་བ་བྱས། གྲོང་ནག་ཆོས་མཛད་ར་བ་སྨད་པའི་སློབ་དཔོན་གྱི་འོས་སུ་བགྲངས་པ་དང་། གྲ་ཕུག་པ་བ་ཆོས་རྗེ་དཔལ་གྱི་སེང་གེ་སོགས་འཕྲལ་མར་ཉི་ཤུ་རྩ་གྲངས་ཙམ་ཆོས་མཐུན་འབའ་ཞིག་གི་ཅོག་གྲ་བཙུགས་པས། སྟོན་ཚུན་ལ་བརྒྱ་འཇོགས་པ་ཙམ་སོང་། རྒྱུད་སྡེ་སྤྱིའི་རྣམ་བཤད་བརྩམས། དེ་ནས་ཡར་སླེབ་སྟོན་ཀར་དགའ་གདོད་པ་རྣམས་ཀྱིས་ཤོག་ཟེར་ཕྱིན། ནས་ཀྱི་འབུལ་བ་གཏོས་ཆེ་བ་བྱུང་བས། སྡེ་པ་ཟིལ་གནོན་པར་ཁལ་བརྒྱ་ཙམ་བྱིན། གཞན་ཚང་མ་གྲྭ་ཚང་པ་གཉིས་ལ་སྦྱར། དེ་དུས་རྒྱལ་བྱེད་ཚལ་དུ་འཇིགས་བྱེད་དུས་མཚན་ནག་པོ་ཞིག་ཀྱང་མཐོང་། པཎ་ཆེན་དབོན་རམ་པ་སོགས་དགེ་འདུན་ལྔ་བཅུ་ཙམ་ཏི་སེར་བརྫངས། 
3-507
ཁུ་པེ་བའི་སློབ་དཔོན་འབུམ་པ་སློང་མོར་བྱུང་བ་ལ་འདོད་བཞིན་སྤོས་ཤལ་གཏོས་ཆེ་བ་བྱིན། གནས་རྙིང་མཁན་པོ་ཕྱག་འབུལ་ལ་བྱོན། ཚེ་རིངས་མ་སོགས་གསུང་ཆོས་མང་བར་ཕུལ། མི་ཆོས་ཕྱག་ལན་ཡོད་ཙམ་ཚོགས་པ་དང་འདྲ་བ་བྱས། དགུན་སྣར་ཐང་པ་ལ་རིན་སྤུངས་པས་དམག་མཛད་དུས། སྣར་ཐང་པའི་རོགས་ལེགས་པར་བྱས། སྣར་ཐང་པ་དད་རིན་སྤུངས་པ་ཞུ་ངན་བཏོན། དེ་དུས་རྒྱལ་བྱེད་ཚལ་དུ་ཆོས་སྐྱོང་གི་མདོས་གཏོར་རྒྱས་པར་བྱས་པས་མྱང་སྟོད་དུ་ཚུབ་ཆེན་པོ་ལངས་རྒྱུ་ཞི། མགོན་ཁང་དུ་སྒྲུབ་པ་ཞག་འདུན་ཙམ་བྱས་པས་གཏོར་མ་ལས་དངོས་སུ་བདུད་རྩི་སྦྲང་རྩིའི་ཉིང་ཁུ་ལྟ་བུ་ལ་རོ་བསམ་གྱིས་མི་ཁྱབ་པ་ཡོད་པ་བབས། ཞག་བདུན་པ་ཅིག་མཚམས་བྱས་དུས་མངོན་པ་ལ་སྦྱངས་པའི་ལག་རྗེས་སུ་བསམ། མངོན་པ་གོང་མའི་གཞུང་ཚིགས་བཅད་ཉུང་ངུར་བསྡུས་པ་མངོན་པ་རྣམ་འབྱེད་བརྩམས། གསེར་ཐོག་གི་རབ་གནས་བྱས། ཚོང་དཔོན་དོན་གྲུབ་ཀྱིས། དྲེའུ་བརྒྱད། རྟ་གཅིག །ཇ་སུམ་ཅུ་ལྷག་གིས་གཙོས་པའི་འབུལ་ཆེན་བྱས། རབ་བྱུང་སྟེ་མེ་མོ་ཡོས་ཀྱི་ལོ་གསར་མཚམས། འབྱུང་བ་རོ་སྙོམས་ཀྱི་གཞུང་གསུམ་ལ་རྣམབཤད་བྱེད་བསམ་ཚེ། ཐོ་རངས་ཤིན་ཏུ་འཇིགས་པའི་ཉམས་ཞིག་ལ། གསང་སྔགས་མ་རྒྱུད་ཚིག་ཏུ་བཤད། །ཕ་རྒྱུད་ལམ་རིམ་ཁྲོམ་རུ་གཏོར། །གཉིས་མེད་རྒྱུད་དོན་ཐང་མར་བརྡལ། །
3-508
མཁའ་འགྲོའི་བཀའ་ཆད་ཅིས་མི་བྱུང་། །ཟེར་བ་ཅིག་རྨིས་ནས་འཕྲོར་ཤོལ་ཉམས་ཆགས་བསྐོང་བའི་བཤགས་པ་བྱས། གསོལ་བ་བཏབ་པའི་ཟླ་བ་གཅིག་ན། རྗེ་སྒྱུ་མའི་གར་མཁན་ཆེན་པོ་བྱོན་ནས། རིང་བསྲེལ་མང་པོ་ཞིག་སྩལ་ནས་འདི་ལ་མཆོད་པ་གྱིས་ཤིག་གསུང་བ་ཅིག་རྨིས། གནང་བ་སྦྱིན་པར་ཤེས་ནས། རྡོ་རྗེའི་གླུ། ཏིལླིའི་གསང་ཚིག །ནཱ་རོའི་སྤྱོད་པ་ཆོས་ཀྱི་གླུའི་འགྲེལ་བ་ལེགས་པར་བརྩམས། མན་ངག་སྔར་སྦས་དྲགས་པའི་སྐྱོན་སྣང་བས་གསལ་པོར་བྲག་དམར་མཁན་ཆེན་གྱིས་བསྐུལ་བ་ལྟར་བརྩམས་སོ། །གད་སེར་གྱི་སྒྲུབ་སྡེར་ཕྱིན། དགེ་འདུན་དྲུག་བརྒྱ་ཐལ་བ་ལ། དཔོན་ས་ཚོང་འདུས་ནས་གཙོ་བོ་མཛད། གཙང་གང་པ་སོགས་ཀྱིས་ཟླ་བ་གསུམ་གྱི་རིང་ཞབས་ཏོག་ལེགས་ལ་ཆོས་སྨར་བའི་ཚད་དུ་བྱུང་། དེ་ནས་རྒྱལ་བྱེད་ཚལ་དུ་སླེབ་ནས། ཕར་ཕྱིན་གྱི་རྒྱ་འགྲེལ་ཐམས་ཅད་ལེགས་པར་བལྟས་ཏེ། ཚིག་དོན་མ་ནོར་བ་དབུ་མ་སྒྱུ་མ་ལྟ་བུའི་སློབ་དཔོན་འཕགས་སེང་གི་ལུགས་བཞིན་མངོན་པར་རྟོགས་པའི་རྒྱན་ལ་རྒྱས་འགྲེལ། རྒྱུད་བླ་མ་ལ་བསྡུས་འགྲེལ། མདོ་སྡེ་རྒྱན་གྱི་དཀའ་འགྲེལ་གཅིག་ལ་ཚང་བ་བྱམས་པའི་ཞལ་ལུང་བརྩམས། བཤད་པའི་ཚིག་འབྲུ་རེ་ལ་ཡང་ལེགས་པར་བརྟག་པས། བོད་ཊཱིཀ་གཞན་ལས་བཤད་པ་ཟུར་ཕྱིན་པ། མཆེ་བའི་སྡེའི་ཡུམ་གསུམ་གྱི་གནོད་འཇོམས་ལ་སོགས་པས་བསྟན་པའི་བཤད་པའི་གནད་ཀྱིས་ཤེར་ཕྱིན་སྔགས་ཀྱི་མདོར་བསྟན་དུ་འགྲོ་བ་ཅིག་འདུག་པ་གཞན་གྱིས་མ་རིག་སྣང་བས་དེར་ལེགས་པར་བཀོད། 
3-509
དེའི་སོས་དཀར་བརྒྱུད་ཕོ་བྲང་བསྒྲུབས་པའི་རབ་གནས་བྱས། དེ་དུས་ཀྱང་ཚོང་དཔོན་དོན་གྲུབ་ཀྱིས། རྟ་བཟང་བ་ཅིག །དྲེའུ་བཞི། ཇ་ཉི་ཤུ་རྩ་ལྔ་ཙམ་གྱིས་གཙོས་པའི་འབུལ་བ་གཏོས་ཆེ་བ་བྱུང་། དབྱར་སོས་བྱ་ཡུལ་ནས་སྡེ་པ་བསྙུང་། འབོད་མི་དོས་དྲག་པར་སླེབ་ཀྱང་། འབྲས་སྤུངས་ནས་སྤྲུལ་སྐུ་རིན་པོ་ཆེ་བཀྲ་ཤིས་ལྷུན་པོར་ཕེབས་པ་ལ། གཙང་བྱིན་ས་དཀར་དར་བས་ཧ་ཅང་འཕྲིན་ལས་ཆེ་བ་མ་བྱུང་བ་དང་། སྒེར་དུ། མྱང་སྟོད་དུ་གྲུབ་ཐའི་ཀུན་སློང་གིས་དགག་པའི་ས་དཔྱད་བྱེད་འདུག་པས་མི་ལེགས་པར་བསམ། དེ་གོང་ནས་འབྲེལ་ཡོད་ཙམ་ལས་མེད་རུང་། ངེད་ཀྱིས་མྱང་སྟོད་པའི་གྲྭ་རིགས་རྣམས་ལ་གདན་འདྲེན་ཞུས་ཆོག་པའི་སྐབས་དབྱེ་གྲོགས་བྱས། ཁྱད་པར་པ་སྣམ། འབྲོང་རྩེ། རྒྱལ་བྱེད་ཚལ་དུ་ཕེབས། བསུ་བ་སོགས་བཀོད་པའི་ཁྱད་པར་རྒྱ་ཆེན་པོ་བྱས། མཇལ་ཕྲད་ཀྱང་ཕེབས་གདོང་རང་ལ་བྱས། ཁོང་དགེ་ལྡན་པ་ཞྭ་སེར་ཐོགས་ཀྱི་གཙུག་གི་ནོར་བུ་སྣང་བས། ངེད་ཀྱིས་གཙུག་ལག་ཁང་སྟེང་དུ་བསུ་བ་ལ་ཕྱིན། ཕྱག་རྩེ་སྤྲོད་ཀྱི་དཔྱད་གཞི་ལ། སྤྲུལ་པའི་སྐུ་དེ་ཇོ་བཟང་བ་དང་། ངེད་ལ་དགེ་བཤེས་བཟང་བོའི་མཐོང་གིས། ཕ་ཚད་ནས་དབུ་ཞུ་ཟུལ་གྱིས་ཕུད། ཕྱག་མཛད་སྣང་། ངེད་ཀྱིས་ཀྱང་རྒྱང་རྒྱོང་སྦག་སྦུག་མེད་པར་འཕྲལ་མར་ལན་ཕུལ་བས་ཤིན་ཏུ་མཛེས་པ་དང་། 
3-510
གཙུག་ལག་ཁང་སྟེང་ཤོད་རྣམས་ལ་གཟིགས་རྟོག་གི་དུས། བཞུགས་སྟན་གཅིག་ལ་གདན་ཆགས་པ་སོགས་ཐུགས་ཀ་ཐུན་མོང་མ་ཡིན་པ་ཉེ་བར་བྱུང་། ཚུར་སྐུ་ཁྱོས། ཕར་འབུལ་ཆས་སོགས་ལེགས་པར་བགྱིས། ཁོ་བོ་ཅག་གི་བཟོ་རྩད་རྒྱ་མཚོ་ལྦུ་བའི་གནས་བརྟན་བཅུ་དྲུག་རྒྱ་ནག་པོའི་བཟོ་ལ་ཁ་སྐྱེངས་གཏོང་ནུས་པར་འདུག་གསུང་དགྱེས་པོ་གནང་འདུག་པས་ཕུལ། གཞི་ལེན་ལ་ཐུགས་མགུ་པོ་བྱུང་། དེས་མྱང་སྟོད་དུ་འཕྲིན་ལས་ཆེན་པོ་དབུ་འདོན་དུ་འགྲོ་བ་བྱུང་ཟེར་དཔོན་སློབ་རྣམས་ལྷག་པར་དགྱེས། བླ་མ་ལྷ་པའི་རིན་ཆེན་སྒང་ཞིག་རལ་དུ་སོང་སྐབས། ཁོང་གི་སྤྲུལ་པའི་སྐུར་ཞུ་རིགས་སྣ་ཚོགས་ཞུས་འདུག་པར། སྤྱིར་ལྷ་པ་རང་གིས་ར་ལུང་ནས་དབོན་རིན་པོ་ཆེ་ལྷོ་ནས་ཕྱིར་ཕེབས་དུས་ལམ་བགགས་པ་སོགས་བྱེད་ལུགས་མ་ལེགས་པ་འདི་བཞིན། ཁྱད་པར་ར་ལུང་ནས་ངེད་གད་སེར་དུ་སྡོད་ཐོག །གཏུག་ཡར་ཅི་ཡང་གནང་འདུག་ཀྱང་། ཞི་འཇགས་རང་དགའ་ཞུས། རྩེ་ཆེན་ནས་དཔོན་གཡོག་གིས་བར་བཞུགས་མཛད་རྒྱུ་ལ། ཁོང་རང་ལང་ཤོར་གྱིས་ལབ་མ་བྱུང་། དེས་རྩེ་ཆེན་ནས་ཐུགས་རྒྱལ་བཞེངས་ར་ལུང་པའི་རྒྱབ་སྐྱོར། ཕག་རི་རིའི་ཆེན་སྒང་སོགས་བརླག་པ་འདིར་བགྱ། ད་དུང་གནས་རྙིང་ལྷ་པ་སོགས་ཀྱིས་སྤྲུལ་པའི་སྐུར་གསན་ལེན་བྱུང་ན། ངེད་འབྲུག་པས་སྔན་ལ་སུ་ལ་ཡང་གནོད་འགལ་བྱས་མི་ཡོང་། 
3-511
བཀའ་གང་གནང་ཞུ། ཚུར་རྒོལ་ན་ལན་མི་བྱེད་པའི་ཁག་ནི་སུས་ཐེག་ཞུས། ཞིབ་རྩད་སོ་སོར་མཛད་འདུག་པས་ཐུགས་བདེན་པར་འདུག་གསུང་། ཁོང་རྣམས་ཀྱིས་ངེད་དང་ཐུགས་ཉེ་བསམ་ཕྱིར་འཕུལ་ཞེས་ནས་ལབ་འཇགས་མཐོན། ལྷ་པ་འདི་དང་པོ་མར་པའི་དཔེ་ཆུ་ལ་བསྒྱུར་མཁན་གྱི་གཉོས་ཀྱི་བརྒྱུད་པ། བར་དུ་རྒྱལ་བ་ལྷ་ནང་པ་ནས་འབྲི་ཁུང་པའི་ཞལ་སློབ་དཀར་བརྒྱུད་པ། ད་ལྟ་རི་བོ་དགེ་ལྡན་པར་འགྱུར། དེ་བཞིན་གནས་རྙིང་པའང་རྩ་བ་ནི་གུ་བ། བར་དུ་སྟོད་འབྲུག །ད་ལྟ་དགའ་ལྡན་པར་སོང་པ་ཁོ་ནར་སྣང་བས། དང་པོ་དཀར་བརྒྱུད་ནང་དུ་སོང་བས་འབྲུག་པས་ཇོ་བཟང་བྱས། ཕྱིས་ཇོ་བཟང་རྒས་པ་ཞེ་སྡང་དུ་སོང་། ར་ལུང་རང་འདི་ལ་དར་རྒུད་ཤིན་ཏུ་ཆེ་ཡང་། གདན་སའི་གོ་སར་སུ་ཕེབས་ཐམས་ཅད་སྤྱན་རས་གཟིགས་སུ་སོང་བས། ཆོས་བརྒྱུད་ལ་འགྱར་འགྱུར་ཅི་ཡང་མ་བྱུང་འདུག་ཅིང་། ཞིབ་མོར་བརྟགས་ན། བཤད་སྒྲུབ་གང་ནས་ཀྱང་མར་པས་བསྒྱུར། མེས་རྔོག་མཚུར་གྱིས་བཤད། མི་ལས་བསྒོམས་པ་གང་ཡིན་པ་དེ་ཁ་སྙིང་པོར་འཛིན་སྣང་བ་དཀར་བརྒྱུད་པ་ངོ་མ་དང་། གཞན་ཉམས་ལེན་གཅོད་ཡུལ་ལ་སོགས་པ་ལ་བྱེད། བཤད་བཤད་ཀྱི་རིགས་གཞན་མའི་ལུགས་ལ་བརྟེན་པ་དཀར་བརྒྱུད་པ་ཟོང་མར་སྣང་ངོ་། །ར་ལུང་པའི་ཕྱག་གཡོག་ཅི་རིགས་པའི་ཁྲོད་ནས། 
3-512
ངེད་གཙང་ལ་མ་བསྡད་ན་ར་ལུང་པ་རང་ལ་འཕྲིན་ལས་ཆེན་པོ་ཡོང་རྒྱུ། དེ་ངེད་ཀྱིས་ཕྲོགས་པ་ལྟ་བུར་གླེང་བའང་སྣང་སྟེ། ངེད་ཀྱིས་གདན་ས་འདི་ལ་མ་ཚོར་རྒྱབ་ནས་དྲོ་བ་ཁོ་ན་བྱས། སྔར་མྱང་གཙང་ལ་མི་མཐོང་ཅི་ཡོད་ཐམས་ཅད་ཀྱི་ཐུགས་ལ་གསལ། ཕྱིས་ངེད་སླེབ་ནས་ཐམས་ཅད་ཀྱིས་ཕུད་དུ་འཁུར་བ་དང་། སྤྱིར་གྱིས་དཀར་བརྒྱུད་པ་ཡིན་ཟེར་ཐམ་ཐོམ་གྱི་མཐོང་བྱེད་སྣང་བ་ལ། ད་ལྟ་ས་དགེའི་ཁྲོད་ན། དཀར་རྒྱུད་པས་མི་ཤེས་ཟེར་བ་ཁེགས་ལ། དེ་ཙམ་མིན་པ་རྒྱུད་མན་ངག་དབང་ཟབ་རྒྱས་གཞན་ལས་ལྷག་པར་བལྟ་བ་འདི། ངའི་དྲིན་ཡིན་པ་ཀུན་གྱི་ཤེས་སོ། ། གཞན་ཡང་། སྔར་རང་ལ་དགྲ་བྱེད་དམ། གཉན་བྱེད་དམ། བཏང་སྙོམས་པ་སུ་ཡིན་ཀྱང་འདྲ། རང་གི་གཉེན་གྱིས་བསྒྱུར། དགྲས་གཙེས་བའི་དུས་ན་རྒྱལ་བྱེད་ཚལ་དུ་འགྲོ་ཟེར་མཁན་ཀྱང་། དེ་ཡང་ཁོ་བོས་མཐོ་ཁ་མ་འགྲིམ། སུ་ཉམ་ཐག་པ་དེ་ལ་ཕན་གང་ཐོགས་བྱས་པས་ཡིན་མོད། མཐོ་ཁ་འགྲིམ་པ་ཚོར་སུ་འགྲོ་སྣང་། ལར་བློ་གཏད་ནས་རྩིབ་མ་རྐུ་བ་འདི་ཆོས་པའི་མཛད་པ་ལྟ་ཅི་སྨོས། མི་ནག་པའི་ནང་ན་ཡང་ལེགས་པར་མ་མཐོང་ནས། སུས་བློ་གཏད་ནའང་ཁོ་རེའི་བློ་ཁ་མ་རྫོགས་རིང་མ་སྐྱུར། དེའི་དབང་གིས་རང་གི་བྱ་བ་ཉེས་འགྲོ། མི་དེ་ལ་ཕན་པར་འདུག་ན་མི་དེའི་དོན་འདུམས་པས། 
3-513
འཕྱོང་རྒྱས་ནས་ཨ་མ་དྲུང་པའི་བཀའ་བཀོད་ལ། ཁྱེད་དཔོན་སློབ་ཀྱིས་འཇིག་རྟེན་མི་མཁྱེན་པ་འདུག །མི་སུ་མཐོ་བ་དེ་དང་འཛིངས། སུ་དམའ་བའི་ཕྱོགས་སྐྱོང་བ་འདི་འདྲ་མ་བྱེད་གསུང་བའང་མད། འཇིག་རྟེན་བྱེད་ན་དེ་ཀ་ཐུགས་བདེན་པར་འདུག །འཇིག་རྟེན་ལ་དགའ་ནས་བྱས་པ་མིན། མི་ཆེན་པོ་ཡིན་བསམ། ཉམ་ཞན་པ་ཚོས་བཏུད། དེ་ལ་སྙིང་རྗེ་བས་བློས་མ་ཐོངས། ཁོང་ཚོ་བཏུད་དགོས་པའང་ཁོང་ཚོ་ལ་མ་འཐུས་པ་ཞིག་བྱུང་བྱང་ནས་བཏུད་པར་འདུག །དེའི་རྒྱབ་བསྐྱོར་ན་གཞན་པ་དེ་དང་མི་འགྲས་དཀའ་མེད། འཇམ་པོས་དེ་ཚོ་ལ་མི་ལོ་བར་འདུག་པ། ཉམ་ཞན་པ་བསྐྱང་དགོས་པ་འདི་ཁས་ཉེས་པར་འདུག །འདིའི་རྩ་བ་ཤཱཀྱ་ཐུབ་པ་ལ་ཐུག །ཁོང་གི་ལུགས་ལ་དམའ་བ་སྐྱོང་བ་དེ་འདུག །ངེད་ཁོང་གི་ཉན་ཐོས་སུ་སོང་། དེ་ལ་བརྩི་དགོས་པ་བྱུང་། གཞན་ཚོ་ཁོང་དང་མཉམ་མཉམ་དུ་སོང་། དེ་ལ་བརྡོག་བརྫིས་བྱས་ཆོག་སྣང་བས་སྟབས་བདེ་པོ་བྱུང་བར་འདུག །གཞན་ཆོས་རྗེ་བྱམས་པ་རབ་བརྟན་ཐུབ་བསྟན་མཁན་པོར་འཁོད་པ་དང་། ཁམས་པ་དབོན་རམ་འབྲས་ཡུལ་གྱི་མཁན་པོར་འཁོད་པ་གཉིས་ཀ་རང་གི་སློབ་མའི་གྲངས་སུ་འདུག་ནས་མངའ་གསོལ་གྱི་མང་ཇ་འགྱེད་བཏང་། རྣམ་རྒྱལ་གྱི་མངའ་རིས་སློབ་དཔོན་ཆོས་རྗེ་སེང་གེ་བ་མཇལ་དུ་བྱུང་བར་བདག་རྐྱེན་ལེགས་པར་བྱས་སོ། །
3-514
དེ་ནས་དབྱར་པ་སྣམ་དུ་བསྡད། ནུབ་གཅིག་བཀྲ་ཤིས་སྒང་གི་རི་བོའི་ཐད་འདིར། རཱ་ཧུ་ལ་སྟོད་སྤྲིན་གྱིས་བསྒྲིབས་པ། ལུས་གཞན་ཆེས་ཆེ་བའི་བྱིན་གསལ་པོར་བསྟན་པ་འོངས་ནས། བྱ་ཡུལ་དུ་གདན་འདྲེན་དུ་འོངས་པ་ཡིན་ཟེར། ངེད་ཀྱིས་མི་འགྲོ། ཞེ་སུན་བྱས་པས། གནོད་བྱེད་བྱུང་ན་ངེད་རས་བསྒྲལ། གཞན་ཁྱེད་ཀྱིས་མ་སླེབ་ན། རྒྱལ་སྲིད་དེ་བརླག་འགྲོ་ཟེར་བ་ཅིག་རྨིས། གདོང་མི་སྟོན་པ་དེ་སྡེ་པ་གཤེགས་པར་འདུག །ཕྱག་མཛོད་པ་སྐོར་ཡང་ལ་བཏང་བ་འཁོར། དེ་དུས་ངམ་རིངས་མཁན་ཆེན་མཁས་པ་བློ་གྲོས་རྣམ་པར་རྒྱལ་བ་དང་རྣམ་རྟོག་ཆོས་སྐུའི་དྲིས་ལན་བྱང་བདག་པོ་ཆེན་པོས་བསྐུལ་ནས་བྱས། རྗེ་རྒྱལ་ཚབ་དམ་པའི་སྤྲུལ་པ་སོགས་ལ་རོ་སྙོམས་ཞིག་འཆད་ཀྱིས་ཡོད་པ་གྲོལ་འཕྲལ་རྒྱལ་བྱེད་ཚལ་དུ་སླེབ། དེ་ཁའི་སང་ཉིན། དཔོན་དྲུང་མགོན་པོ་རབ་བརྟན། འབྲོང་རྩེ་བ། ཁྱུང་རྩེ་བ་སོགས་སྦྱིན་བདག་དང་། གྲྭ་རིགས་ཀྱི་དགེ་འདུན་དྲུག་བརྒྱ་ཙམ་གྱི་དབུས་སུ། གཅུང་རིན་པོ་ཆེའི་སྐུ་སྐྱེ་ཆེ་སར་བཏོན། སྐུ་བེར། གསེར་ཆས་དངོས་གཙང་བ་སོགས་གནང་སྦྱིན་གཏོས་ཆེ་བ་བྱས། གསེར་རྐྱང་ཞོ་བཞི་བཅུ་ཙམ་གྲྭ་ཚང་གི་བོགས་ཇའི་ཐེས་དང་། གསེར་ཞོ་བརྒྱ་ཐལ་བ་ཟངས་སྒྲུབ་ལ་ངམ་རིངས་སུ་བརྫངས། སང་གསང་སྟབས་ཀྱིས་བྱ་ཡུལ་དུ་འགྲོ་བའི་སྒོ་ཤར། དེ་ཡང་བྱ་པའི་འཇིག་རྟེན་གཅིག་པུ་ལ་བལྟས་པ་མིན། 
3-515
ཙ་རི་ཀོང་པོ་ལྷོ་དབུས་སོགས་འབྲུག་པའི་བསྟན་པ་ལ། རྒྱལ་དབང་རྗེས་སྐུ་སྐྱེ་བ་བཞེས་པའི་དགོས་པ་ལ་བསམ་པ་ཡིན། ཕོ་མཐང་དུ་ཤིན་ཏུ་ན་བ་ཅིག་བྱུང་། དེ་དགོངས་རྐང་པ་ལས་ཁྲག་འཐོན་པ་ཞིག་རྨིས། སང་དེ་ཁ་དྲག །དེ་ནས་གཉལ་གྱི་གསེར་བྱ་ཁར་སླེབ་སྐབས། གཉལ་རོང་ཕྱོགས་ཀྱི་རི་ཐམས་ཅད་མཐོང་མཐིང་ཁ་མཐའ་འཇའ་འོད་སྣ་ལྔས་དཀྲིས་པ་ཞིག་གིས་གཡོགས་པ་མཐོང་། དེ་མཐོང་བས་ཡིད་ཤིན་ཏུ་སྐྱོ་བ་གཅིག་བྱུང་། སང་ཆོས་རྒྱལ་གླིང་དུ་དཔོན་ས་སྐུ་མཆེད་དང་མཇལ། དེ་ནས་རིམ་པས་སྐུ་གདུང་བཞུ་བ་དང་དགོངས་རྫོགས་ཀྱི་གྲབས་མཛད། མི་རིང་བར་གསང་བརྟོལ། མངའ་ཞབས་ཀྱི་ཆོས་སྡེ་རྣམས་ནས་དགེ་འདུན་ལྔ་བརྒྱ་ཙམ་བསྡུས། གདུང་མཆོད་བཙུགས། སྔོར་དཀར་གྱི་ཞབས་ཏོག །ངེད་རང་ལ་ཡང་སྡེ་པ་དྲིན་ཆེ་བར་ཡོང་བས། གྲྭ་པ་ཉི་ཤུ་མའི་བར་དུ་གསེར་རྐྱང་ཞོ་རེ་བཀྱེ། དེ་ནས་དགོངས་རྫོགས་ཆེན་མོའི་དུས་སུ། སྔར་བྱ་པ་རང་གི་སྲོལ་ལ། སེམས་ཅན་སྲོག་གཅོད་གཤན་པ་བཅུ་བཅུ་ལག་པ་ཕྱིད་པ་ལ་གྱ་བ་བྱེད་ཀྱི་འདུག་པས། དེ་ལ་སེམས་ཅན་གཅིག་ཀྱང་མ་བསད། ཤ་དགོས་པའང་ལོ་ལོན་ཁོ་ན་མཛད་པས་འཐད་ཞུས། དངོས་བཞིའི་དུས། དགེ་འདུན་ལྔ་སྟོང་ཙམ་འཚོགས་པའི་གྲལ་དབུར་ཕྱིན། ཆོས་ཀྱི་རྒྱལ་བོ་སྲོང་བཙན་གྱི་སྐུ། དངུལ་གྱི་ལྟེ་རི་བཟོ་ཁྱད་མཆ། 
3-516
དིང་ཕོན་ཚོན་རྫོགས་ཁྱད་དུ་འཐོན་པའི་པང་ཁེབས་སོགས་འབུལ་བའང་གཏོས་ཆེ། ངེད་ཀྱི་ཟླར་ཡང་། པད་དཀར་གྲྭ་ཚང་པ་དང་། དགའ་གདོང་པ་ཆོས་རྗེ་རབ་བརྟན་པ་སོགས་མཚན་ཉིད་གྲྭ་ཚང་དང་། ཆོས་དབང་རྒྱ་མཚོ་པ་སོགས་མཁར་ཆུ་སྔགས་གྲྭ་པ་དང་། དཀའ་བཅུ་པ་སྟག་སོགས་ཅོག་གྲྭ། ཆོས་རྗེ་མུས་པ་དང་། འུག་པ་ལུང་པ་སོགས་དབུ་ཆེ་ཧྲགས་པ། དགེ་འདུན་ཕྱེད་དྲུག་བརྒྱ་ཙམ་ལ་འགྱེད། གཞི་པ་རྣམས་ལ་སྔར་སྲོལ་ལས་བཟང་བ་མཛད། དབུས་གཙང་ཀོང་པོ་གཡེ་དྭགས་ཐམས་ཅད་ཀྱི་མི་སྣ་གཏོས་ཆེ་བ་འཚོགས། དེ་དུས་ཀྱང་ཚོང་དཔོན་དོན་གྲུབ་ཀྱིས་ཇ་ཉི་ཤུ། དྲེའུ་ལྔ་། རྟ་གཉིས། སྤོས་ཤེལ་ཤལ་སོགས་ཀྱི་འབུལ་བ་བྱས། ཁོང་རང་སྒོམ་ལ་དྲིལ། སྒོམ་ཆེན་རི་ཐུབ་པ་བྱུང་། སྡོམ་གསུམ་རྒྱན་རྩ་འགྲེལ་གྱི་པར། དཔོན་ས་ཚོགས་གཉིས་གྲུབ་མས་སྦྱིན་བདག་མཛད། རྐོས་མཁན་དྲུག་ཅུ་ཙམ་གྱིས་གྲུབ་འདུག་པའི་པར་ཡོན་གཏོས་ཆེ་བ་བྱིན། དཔོན་ས་དོན་གཉིས་གྲུབ་མས་སྦྱིན་བདག་མཛད། བསྲེ་འཕོའི་རྣམ་བཤད་ཆེན་མོའི་པར་རྐོ་བའི་དབུ་བཙུགས། ལྷོ་བྲག་ཏུ་ཨ་ཆེ་གོས་དཀར་སྒྲོལ་མས་ཕར་ཕྱིན་སོགས་པར་ཉིས་བརྒྱ་ཙམ་དང་། འབོག་ཀོང་པ་དཔོན་པོ་ཐོས་སྨྱོན་གྱིས་པར་ཤིང་སུམ་བརྒྱ་ལྷག་པའི་པར་རྐོ་བ་ལ་ཚུགས། ཕྱིས་གྲུབ་ནས་ལྷ་ཁང་དུ་བརྐོས་པ་མ་གཏོགས་གླ་ཐམས་ཅད་ཕྱག་མཛོད་ནས་སྦྱིན་ནོ། །
3-517
དེ་ནས་ལོ་གྲོར་ཕྱིན། སྤྱི་སྒོས་ཀྱིས་ཞབས་ཏོག་འབད་འབུང་བཏོན། དགུན་དགེའུ་དགའ་ལྡན་དུ། རྒྱལ་དབང་རྗེས་ཀྱང་ཕེབས་འདུག་པས་དེའི་ཤུག་གསེབ་ཏུ་བསྡད། ལྷོ་རྒྱུད་ཀྱི་སྔགས་གྲྭ་འདིའི་གཞི་བཏིང་ངོ་། །སྙིང་སྟོབས་ཉི་མ་གཏེ་མར་བཞག་ནས་སུ། །དོན་གཉེར་རིན་གྱིས་བཏང་བའི་ཉེ་ཆང་མཁན། །ཆེན་པོའི་ལུགས་བུམ་ཀུན་འཐུངས་མ་ངོམས་པར། །ཁྲོས་ཏེ་སྲིད་པའི་ཆུ་བོ་གྱེན་ལ་སློག །ར་མདར་འཁོར་བར་སླུ་བའི་མུ་སྟེག་ཅན། །འོངས་པ་ལས་འབྲས་བདེན་ཚུལ་གྱིས་བཅོམ་ནས། །ཐུབ་བསྟན་མི་ཤིག་རྡོ་བའི་ལྕིད་ཆགས་པ། །མཐུ་སྟོབས་ཅན་འདི་ད་ལྟའི་བིར་ཝ་པ། །དེ་དུས་བླ་མ་རིན་པོ་ཆེ་ཚེ་བདག་བཀྲ་ཤིས་པ་ལ་དྲག་སྔགས་བསམ་གྱིས་མི་ཁྱབ་པ་ཞུས། མགོན་པོ་མངོན་བྱུང་གི་དཀྱིལ་འཁོར་ཆེན་པོ་དེ་བྲི་བར་བརྩམས་སྐབས། འབྲུག་ནས་རྗེ་བླ་མས་གནང་བའི་ཕོ་ཉ་ཡིན་ཟེར་བ། སོག་པོའི་ཆས་ཅན་གཉིས་རྒྱབ་ན་གཟིམས་འབོག་ཆེན་པོ་ཞིག་འཁུར་ནས་ངེད་ཀྱི་རྩར་བྱུང་། ཕྱག་ཐམ་སྤྲད། བཀླགས་པས། ཁྱོད་དེར་ཆོས་སྐྱོང་དགོངས་འདུས་རྩོམ་ཡོད་འདུག་པས། དེ་ལ་གདམས་ངག་གི་གནད་འདི་ལྟ་བུ་དགོས་ཡོད་པ། དེ་དག་རྫོང་ཟེར་བ་འདུག །འབོག་དེ་ཁ་དབྱེ་བས་འཁོར་ལོ་བཅས་བཅས་པ་བསམ་གྱིས་མི་ཁྱབ་པ། གཞུང་རྒྱུད་ཀྱི་ཆིངས་ལ་སོགས་པ་མཐོང་། དགའ་ནས་ཐམས་ཅད་བཀླགས་པ་ཞིག་རྨིས། 
3-518
འདི་ལ་ཡེ་ཤེས་མགོན་པོ་ཉིད་ཀྱིས་ཀྱང་གནང་བ་ཐོབ། ལྷག་པར་བདེ་མཆོག་གི་རྒྱུད་ཇི་ལྟ་བ། སྔར། ཨཱ་ཀ་ར་ཤན་ཏི་པ་ཞེས་གྲགས་པ། ཀླ་སྒྲུབ་ཀྱི་སློབ་རྒྱུན། ཕྱིས་དཔལ་ནཱ་རོ་པའི་གསང་འདུས་སྔ་མ་གསན་ས། དེས་མཛད་པའི་དཀྱིལ་ཆོག་གི་རྒྱ་གཞུང་ལ་སོགས་པའི་རྗེས་སུ་འབྲངས་པ། འགའ་ཞིག་ཆོས་སྐྱོང་ཐམས་ཅད་བསྡུས་ནས་རྟོག་བཏགས་ཀྱིས་བྱས། དེའི་དབང་གིས་འཁུ་བཟློག་ཡོང་རྒྱུ་བླུན་པོ་དགའ་སེམས་སྲིད་སྙམ་ལོ་རྒྱུས་རྒྱས་པར་བཤད་དོ། །ལྷག་པར་བླ་མ་དང་ཆོས་སྐྱོང་གི་གནང་བ་ཐོབ་པས་བྱིན་རླབས་ཆེ་བར་འོང་བ་ཉམས་སུ་བླངས་པས་ཤེས་སོ། ། དེ་ནས་རྡོ་རྗེ་གླིང་དུ་ཕྱིན། ལམ་དུ་བདོ་ཐང་གི་ས་དཔྱད་ཆོས་སྡེ་རྒྱབ་ན་ལེགས་པར་མཐོང་། དེ་དགོངས། བླ་མ་རིན་པོ་ཆེའི་ཐུགས་དམ་ལྷ་མོའི་སྐུ་མདུན་དུ་བརྟག་པ་ཕུལ་རྨི་ལམ་བརྟགས་པས། དང་པོ་བི་ཀྲ་མ་ལ་ཤཱི་ལ་ལྟ་བུ་དགེ་འདུན་སྡེ་སྤུས་གཙང་། ཕྱིས་སོ་མ་པུ་རི་ལྟ་བུ་ཤེད་ཆེ་ཁ་ཚུབ་པར་འོང་ཟེར་བ་དང་། དབུས་ན་དགེ་འདུན་སྤུས་གཙང་བ་དང་། མཐའ་སྐོར་དུ་བུ་མོ་གཞོན་ནུ་རྒྱན་བཟང་བོས་བརྒྱན་པའི་ཁྲོམ་ཆེན་པོ་འདུག་པ་རྨིས། ཕྱོགས་དེར་འགྲོ་བའི་ནུབ། གྲུ་ལུང་བྲག་བཙན་གྱིས་ས་ཆ་ཕུལ་བ་དང་། སྣ་ལེན་བྱུང་བ་རྨིས། དེ་ཡང་སྔོན་ཆོས་རྗེ་གཙང་པ་རྒྱ་རས་ཀྱིས། 
3-519
ལི་རས་ལ་ལུང་བསྟན་པ། ལི་རས་ཀྱིས། དེ་དང་ཕ་རས་ནོར་བ་ཡིན་ཞེས་གྲགས་པ། སའི་དཔྱད་རི་རྒྱལ་པོ་གདན་ལ་བཞུགས་པ་ལྟ་བུ། ཕྱོགས་གང་ནས་འགྲོ་ཡང་དེར་འབབ་དགོས་པ། ཤར་གྱི་སྟག། །ལྷོ་ཡི་གཡུ་འབྲུག །ནུབ་ཀྱི་བྱ་དམར། བྱང་གི་རུ་སྦལ་སོགས་ཚང་པ་ལེགས་པར་མཐོང་། ཤིང་སོགས་གྲྭ་ཚང་པ་རང་གིས་སྟ་གོན་སྔ་ནས་རམ་པ་འདུག །རོང་རི་ནས་གྲོན་རོང་གི་མི་སེར་གྱིས་ཀྱང་གཏོས་ཆེ་བ་དྲངས། ས་དྲ་དུས་གཞི་བྱེས་དགེ་འདུན་རགས་པ་དང་། དམག་སྡེ་ཚར་བདུན། ཕུ་ཏོག་ཡུལ་པ་རྣམས་ཀྱིས་ལས་མི་དད་པས་བློས་བླངས། ཀ་ཆེན་སོ་དྲུག་གི་རྩིས་ཀྱི་རྨང་གཏིང་། གྱང་གཏང་། གཙང་ཁང་ཀ་གཉིས་ཀྱི་ས་ལ་ཤིང་སྤུས་གཙང་བ་དང་། བྲེ་འགྱོགས་ཀྱི་ནང་དུ་ཀ་བ་མེད་པ་བྱས། འདུ་ཁང་ཀ་བ་བཅོ་བརྒྱད། སྒོ་ཁྱམས། ལྕགས་རི་ལ་སྒོ་བཞི། མཆོད་རྟེན་རེ། ཕྱོགས་རེ་ལ་འདོམ་ཚད་བརྒྱད་ཅུ་རེ་ཡོད་པ་གྲུ་བཞི་པ་བྱས། དེར་ཆུ་འདྲེན་པའི་ཡུར་བ་ལ་དཀའ་བ་བྱས། དེ་དུས་དཀའ་བཅུ་པ་དབང་ཕྱུག་དཔལ་ལྡན་སོགས་ཅོག་པུ་བ་བརྒྱ་ཉི་ཤུ་ཙམ་ཀོང་པོར་བརྫངས། བླ་བྲེ་ཡོལ་བ་རྟེན་མཆོད་སོགས་གནང་ཆེ་བ་རྩིས་སྤྲད། དགོན་དུ་ཕའི་དགེ་བར་དམིགས་མ་ཎི་དུང་འཕྱུར་བཙུགས། དེ་དུས་སྟག་རྩེ་སྒྲུབ་སྡེར། སློབ་དཔོན་པའི་ནང་རྟེན། 
3-520
ཐུབ་པའི་སྐུ་རྒྱབ་མཐོ་བདུན་པ་ཞིག་བཞེངས་པའི་རྒྱུ་ཟངས་གང་དགོས་པ་སྤྱིན་ནས་བལ་པོ་ལ་རྟེན་གྱི་བཀོད་པ་བྱས་ཏེ་བརྫངས། དཀའ་བཅུ་པ་གྲོངས། སླར་བླ་མར་ཆོས་རྗེ་ཆོས་རྒྱལ་དབང་པོ་བཀོད། དེ་ནས་ལྷ་རྩེར་ཕྱིན། བླ་མ་རིན་པོ་ཆེར། རྡོ་རྗེ་འཕྲེང་བ་དང་། སྒྲུབ་པ་བཀའ་བརྒྱད། རྗེ་གོང་མ་བརྒྱུད་པའི་འཇིགས་བྱེད་སོགས་དབང་བཀའ་མང་དུ་ཞུས་དུས། གཙང་ནས་དབོན་དྲུང་མགོན་པོ་རབ་བརྟེན་པ་གྲོངས་ཟེར་འབོད་མི་སླེབ། ནུབ་གཅིག་རྨི་ལམ་ན། རྗེ་ཀརྨ་པ་དུས་གསུམ་མཁྱེན་པས་སྦྱིན་བདག་བྱས་པ་ཡིན་ཟེར་བའི་མཆོད་རྟེན་རྒྱུ་དངུལ་དཀར། བཟོ་ཁྱད་ཕུལ་དུ་ཕྱིན། ཕྱི་རྒྱ་གུར་བཟོ། རྒྱུ་དིང་ཕོན་གྱིས་བྱས་པའི་ནང་ན་རྨི། ཡུད་ཙམ་ལ་དེ་ཧྲུལ་གྱིས་ཞིག་པ་མཐོང་། ཡང་ཅིག་ནས། འདི་སྔར་དེ་ལྟ་བུ་འཇིག་རྟེན་གྱི་མཆོད་གནས་ཡིན་པ། རྒྱ་འདྲེས་བཤིག་པས་འདིར་སོང་། ད་ཁྱོད་ཀྱིས་བསྒྲིགས་ན་སླར་འཇིག་རྟེན་ལ་ཕན་པར་འགྱུར་ཟེར། དུམ་བུ་བསྡུས་པས་ཡང་གསེར་ཟངས་ཀྱི་མཆོད་རྟེན་སྤུས་གཙང་པ་ཅིག་ཏུ་སོང་བྱུང་བ་རྨི། ཅི་ཡིན་སྙམ། སང་འདུ་ཁང་དུ་རབ་གནས་ཞིག་ལ་ཕྱིན་གཙང་ཁང་དུ་བལྟས་པས། རྗེ་བཙུན་རས་ཆུང་པའི་སྐུ་གཟུགས་གཟུངས་བཞུགས་ཉམས་པའི་ལྷུ་བྲལ་བ་ཅིག་མཐོང་། དེ་དག་སྔར་རོང་པ་དར་ཤེས་ཟེར་བ་ཅིག་ཏུ་བཏགས་པར་འདུག །དེ་ནས་གཟེར་བསྡམས་གཟུངས་གཞུག་ལ་གཏོས་ཆེ་བ་ཕུལ་བས། 
3-521
ཆེས་ཁྱད་པར་འཕགས་པ་ཞིག་བྱུང་བ་དེ་ལ་བལྟ་བར་འདུག །དེའི་བཞུགས་ཁང་དང་། རང་ཉིད་སྒྲུབ་པ་ཞིག་སྙིང་ལ་འདོད་པར་ཡོད་པའི་གནས་ཁང་དུ་བསམ། མ་ཅིག་གྲུབ་པའི་རྒྱལ་མོ་དང་། རྗེ་བཙུན་གྱིས། ལྕང་ལོ་ཅན་དང་ཁྱད་པར་མེད་པར་ལུང་བསྟན་པ། རྗེ་རས་ཆུང་པ་མཁའ་ལ་སྤྱོད་པར་གཤེག་པའི་ཕུག་པ་དེར། ལྷ་ཁང་ཀ་གཉིས་ཤིང་རྩི་ལྡེབས་བྲིས་ལ། རྗེ་རས་ཆུང་པའི་རྣམ་ཐར་ཞིང་བཀོད་སྤུས་གཙང་གྲུབ་པ་འདིའི་བཅའ་བསྒྲིགས། གཉལ་དུ་ཆེ་སྲིད་འཐོན་འདུག་པས་ཤོག་ཟེར་ཕྱིན། སྡེ་པ་རང་བཞུགས་ཐོག་སྣེ་གདོང་རྩེ་ནས་དྲངས་པའི་བཀའ་འགྱུར་ལ་མ་མཛད། གསེར་དངུལ་སྤེལ་མའི་བཀའ་འགྱུར་ཡོངས་རྫོགས་བཞེངས་པའི་ཐུགས་བརྩིས་ལ། ཕལ་ཆེན་དང་། རྒྱུད་འབུམ་གྲུབ། གཞན་ལུས་འདུག་པ། དགོངས་རྫོགས་སུ་དམིགས། དཔོན་ས་སྐུ་མཆེད་ཀྱིས་ཐུགས་འགན་བཞེས། དངུལ་གང་དགོས། ངེད་ཀྱིས་བཏོན་ནས་ཡིག་མཁན་དྲུག་ཅུ་ཙམ་གྱིས་དེ་ལོ་མདོ་སྡེ་རྣམས་བཞེངས། ངེད་རང་གིས་ཤོག་བུ་རམས་ཚོས་གསེར་རྐྱང་པའི་འདུལ་བ་ལུང་མདའ་ཚད་དྲས་ལ་བཞེངས་པའི་གྲྭ་བཙུགས། གྲུབ་པའི་རབ་གནས་བྱས། བཀག་པོ་བཅུག །གཙང་ལ་ཉུང་བསྡུས་ཞིག་བཏེག །ངེད་འབྲོག་སྒང་དུ་སླེབ་པ་དང་། མྱང་སྟོད་མཁར་དགའ་རིན་སྤུངས་པ་ལ་ཤོར་བ་སོགས་ཀྱི་སྐད་ཆ་སླེབ། རོགས་སུ་དབུས་ཀོང་ལྷོ་རྒྱུད་ལྷོ་བྲག་པ་སོགས་གཏོས་ཆེ་བ་སླེབ་པའི་ཐབས་བགྱིས། 
3-522
ངེད་རྣམས་རྩེ་ཆེན་དུ་སླེབ། རྒྱལ་མཁར་རྩེ་ནས་བདག་པོ་ཆེན་པོ། ཆོས་ལུང་ཚོགས་པའི་མཁན་པོ། ངེད་རང་གི་སློབ་མར་འགྲོ་བ་དེ་ལ་སོགས་པ་མྱང་ལུང་པའི་ཆེ་དགུ་ཚོགས། ཚོགས་པར་མི་ཆོས་ཚོགས་ཆེན་ལྟར་ཕྱག་ལན་ཡོད་ཙམ་བྱས། མྱང་སྟོད་པ་རྣམས་སྙིང་ལྐོག་མར་འོངས་པ་ཤུགས་སུ་བཅུག །མགོན་པོའི་གཡུལ་བཟློག་གི་གཏོར་ཆེན་ཞིག་བྱས། ཕ་རོལ་པའི་སྒར་སྟེངས་སུ་བཙོ་ལ་སོགས་པ་བབས། ནད་ཡམས་ཆེན་པོ་བྱུང་ནས་མཁར་དགའ་ངེད་ལ་ཕུལ། དམག་ཕར་ལོག་འཆིང་ལུགས་ལམ་པ་ཞིག་འཐོན། མཁར་དགའ་ཆོས་སྡེ་ཆེན་པོའི་མཆོད་གཞིས་སུ་འདུག་པ་ཁོང་རང་རྣམས་ལ་སྤྲད། དེ་རེས་ངེད་ཀྱིས་གཞིས་ཀ་བ་དང་། རྒྱང་རྩེ་བ་ལབ་བྱས་ན་ལེགས་པའི་འཐད་པ་ལབ་པ་ཡིན་ཏེ། མྱང་སྟོད་པ་རྣམས་ལབ་མི་བྱེད་པ་དགོས་ཟེར། དེ་ཁའི་ཁར་འཇོག་དགོས་པ་བྱུང་། སྡེ་གཟར་སིམ་ནས། རྩེ་ཆེན་དུ་དཔོན་དྲུང་གི་དགོངས་རྫོགས་ཐང་འགྱེད་ཚོགས་ཆེན་ལ་སོགས་པ་བགྱིས་ཏེ། དེ་དུས་འབུལ་བ་གཏོས་ཆེ་བ་དང་། ལྷག་པར་གོས་སྐུའི་རྒྱབ་ཤ་རས་ཆེན་གཏོས་ཆེ་བ་བྱུང་། དེ་ནས་འབྲོང་རྩེ། རྒྱལ་རྩེ་སོགས་སུ་ཕྱིན། དེ་དུས་བྱ་ཡུལ་དུ་བལ་པོ་དཔོན་མོ་ཆེ་ཛ་ཤིང་ཕཱལ་གྲོགས་མཆེད་ཀྱིས། བྱམས་ཆེན་ཆོས་གླིང་དུ་བྱམས་པའི་སྐུ་ཐོག་ཚད་གསུམ་ཡོད་པ་ཞིག་བཞེངས་བཞིན་པ། ཁྲ་པའི་ལུས་ལོན་པ་ལ་མཁས་པ་ཛ་ཤིང་གིས། 
3-523
རང་བྱོན་ཁརྶ་པ་ཎིའི་བཞུགས་ཁང་། དཔལ་རེག་པ་མེད་པའི་མཆོད་རྟེན་གྱི་དབྱིབས་སུ། ག་ཛ་མུ་ཏིག་འབའ་ཞིག་གིས་ཁང་པའི་དངོས་གཞི། གཡུ་སྤྱང་གསེར་ཞོ་བཞི་བརྒྱ་ལྔ་བརྒྱ་རི་བ་ལྔ་དྲུག་དྲས་པ་དང་། བྱ་ཡུལ་ནས་མིའི་དབང་མོ་ཆོས་བཞིན་དུ་སྤྱོད་པ། དཔོན་ས་སྐུ་མཆེད་ཀྱི་སྐུ་རྒྱན་གྱི་གཡུ་གཏོས་ཆེ་བ་ཤིག་པའི་ཕྲ་ཚོམ། གསེར་ལྗང་བརྡུངས་ཀྱིས་དྲ་ཚགས། མེ་ཤེལ། པདྨ་རཱ་ག །ཨིནྡྲ་ནཱི་ལ་སོགས་ཀྱི་ཕྲ། སྒོ་རྒྱན་ལ་པདྨ་རཱ་གའི་ཁྱུང་གཡུའི་གཤོག་བ་ཅན་ལ་སོགས་པ། མདོར་ན་རྒྱུ་གསེར་ཞོ་གསུམ་སྟོང་ཙམ་གྱི་རིན་ཐང་སོང་བ། བཟོ་ཁྱད་ཀྱིས་ལྟ་ན་ཆོག་མི་ཤེས་པ། ཆེ་ཆུང་རྐྱང་ཁྲུ་གང་ལྷག་པ་གྲུབ་བདེ་ཡར་སླེབ། རྩེ་ཆེན་དུ་རང་བྱོན་ཁརྶ་པ་ཎ་སྤྱན་དྲངས། དེ་དུས་རང་བྱོན་དེའི་སྐུའི་གཡོན་ཟུར་ན་རིང་བསྲེལ་དམར་པོ་མོན་སྲན་ཙམ་ཞིག་དང་། དཀར་པོ་རྒྱལ་པོ་ཡུངས་ཀར་ཙམ་གཉིས་ཕེབས་པའི་དམར་པོ། གདན་ས་ལ་རྟེན་འབྲེལ་གྱི་སྒོ་ཆེ་བར་མཐོང་ནས་དེ་ཁར་བཞག །དཀར་པོ་བྱིན་རླབས་ཀྱི་རྟེན་དུ་ཞུས་པ་བྱམས་ཆེན་གྱི་སྐུའི་སྙིང་པོར་གྱུར་ཏོ། །བཞུགས་ཁང་དེའི་བཟོ་ལ་ལོ་གཅིག་འགོར། དེ་ཡང་ལྷ་དང་བཞུགས་ཁང་གཉིས་ཐད་ནས་མྱང་སྟོད་པ་རྣམས་ཧ་འགལ། དེ་དུས་གཙང་ནས་འབུལ་བ་གསེར་རང་ཡང་ཞོ་བརྒྱད་བརྒྱ་ཙམ་བྱུང་། 
3-524
རྩེ་ཆེན་དུ། དཔལ་དུས་ཀྱི་འཁོར་ལོ། གསང་འདུས་མི་བསྐྱོད་པ། རྔོག་དཀྱིལ་ལྔ། འཇིགས་བྱེད་ལྷ་མངས། སངས་རྒྱས་ཐོད་པ་རྣམས་ཀྱི་ཆོ་ག །གསང་པ་འདུས་པའི་སྤྱི་དོན་རྣམས་བརྩམས། ཅོག་གྲྭ་གསར་པ་གཙུགས། དེ་དུས་ཙ་རི་ཞིང་སྐྱོང་བའི་དབང་མོ་རྡོ་རྗེ་གཡུ་སྒྲོན་མ་བྱུང་ནས། ཙ་རི་ལ་ཟླ་བ་བདུན་པའི་ནང་དུ་སླེབ་པ་གྱིས། དེ་བྱས་ན་ཚེའི་རྟེན་འབྲེལ་འགྲིག་ཟེར་བ་རྨིས། ཆོས་རྗེ་མུས་པ་ལས་སྟོད་ཤྲཱི་བསམ་གླིང་གི་གདན་སར་བསྐོས་ཏེ་བརྫངས། དེ་ནས་འཕྱོང་རྒྱས་ནས་འབོད་མཁན་སླེབ། རྒྱལ་སྲས་གཅུང་རིན་པོ་ཆེའི་སྤྲུལ་པ་ཡང་ཕེབས། ར་ལུང་དུ་རྟེན་གསུམ་རྣམས་ལ་སྨོན་ལམ་བཏབ། ཡར་འབྲོག་སྟག་ལུང་དུ་སྡེ་པ་བསྟན་འཛིན་པའི་དྲུང་ལ་བརྟག་གཉིས་སོགས་ཕུལ། དེ་ནས་རི་བོ་བྲག་ཏུ་སྡེ་པ་གཡུ་ལོ་བ་ཡབ་སྲས་དང་མཇལ། ཞག་ལྔ་ཙམ་བསྡད་ཐོག །གསེར་གྲོང་ནས་འབོད་མི་བྱུང་སྟེ། འཕྱོང་རྒྱས་ནས་མི་སྣ་བསྐྱར་མ་བྱུང་ནས། ལྷུན་པོ་རྫོང་། བྲག་མདའ་བརྒྱུད། དེའི་དགོན་གནས་ལ་རབ་ཏུ་གནས་པ་བྱེད་སྐབས། མུ་ཏིག་དགོན་པ་དེ་འཐོར་ཞིག་ལ་གྱ་བ་འདུག་པ་མགོ་བསྡུས་འུ་ཡུག་སྨྱོན་པ་བླ་མ་རེ་བསྐོས། བྲག་མདར་ཡང་། ཙ་རི་ནས་བུ་མོ་གཞོན་ནུ་མ་གཉིས་བྱུང་བར། ཟླ་བ་བདུན་པ་ལ་མ་སླེབ་ན་མི་བཏུབ་པར་གླེང་པར་རྨིས། 
3-525
རིམ་པས་འཕྱོང་རྒྱས་སུ་སླེབ། འཕྱོང་རྒྱས་པ་ལ། ཡར་སྐུར་གྱི་དམག་སླེབ་པའི་བསྒང་དུ་སོང་། ཕན་ཤིན་ཏུ་ཐོགས་པ་ཚོ་ཟིན་ངོས་ནས། ཙ་རི་ལ་འགྲོ་རིངས། ཡར་ལམ་གྲི་གུར་དཔོན་མོ་བསྙུང་བར་འདུག་པ་མི་འཚོ་བར་ཤེས། འོན་ཀྱང་ངེད་རང་མ་སོང་པར་གཏོར་མ་ཞིག་གཙུགས། ཙཎྜི་ཀ་ལ་གཉེར། གཏོར་མ་འདི་མ་གཤེགས་བར་སྐྱོན་མི་ཡོང་བྱས། ཁོང་གིས་གསོན་དགེར་མིང་བཏགས་པ་ལ། རྟ་གསེར་རྐྱང་ཞོ་བརྒྱ་སྤྲད་པ་དེ་ལ་སོགས་པ་འབུལ་བ་འགྱེད་ཆས་ཚད་མེད་བྱས། ལུག་བཞི་བརྒྱ་བྱུང་བ་མཚན་ཉིད་གྲྭ་ཚང་པ་ལ་སྦྱར། གཉལ་དུ་སླེབ། འགྲོ་ཤུལ་དུ་བཀག་པོ་དཔོན་གཡོག་ལ་གསེར་གྲོང་བའི་དམག་གིས་བྱེད་དཀའ་འདུག་པ་ལ་མི་སྣ་བཏང་འཆིངས་བཏོན། ངེད་རྣམས་ཀྱིས་ཙ་རིར་ཕྱིན། དེ་དུས་ཆོས་ཟམ་གདོང་དུ་ཨ་ཆེ་རྡོ་རྗེ་གཡུ་སྒྲོན། མིའི་བུ་མོར་བརྫུས་ཏེ་བསུ་བ་ལ་དངོས་སུ་བྱུང་བ། ཡུད་ཅིག་བསྡད། ཞལ་འཕྲོས་ཉམས་འཆར་བ་འགའ་རེ་གླེངས་ཏེ་སོང་བ་གཉིས་གསུམ་གྱིས་མིན་པ་མ་མཐོང་སྣང་། དེ་ནས་བོད་རྡོ་མཚན་དུ་རྟེན་འབྲེལ་གྱི་གནད་ཆེན་པོ་ཞིག་རིག་རིམ་པས་ཙ་རི་ཅིག་ཅར་དུ་སླེབ། དེར་ཞིང་སྐྱོང་གི་དབང་མོས་ལུང་བསྟན་པ་ལྟར། ཕག་མོ་ལྷ་ཁང་བྱེད་བརྩིས་ས་དྲས་བརྐོས་པ་ན། ས་རིམ་མདའ་ཚད་ཙམ་གྱི་འོག་ནས། གཉོས་ཆེན་པོའི་རྡོ་གཅལ་འཐོན། 
3-526
དེ་གནས་གསུམ་གྱི་མཁའ་འགྲོའི་འདུ་སར་གཟིགས་པར་འདུག ། དེ་ནས་བྱང་དུ་ཕྱོགས་པ་ལྷ་ཁང་འདིའི་ལྟེ་བའི་ཐད་དུ། རྡོ་ནག་པོ་ཕག་པ་ཇི་ལྟ་བ་ཅིག་སྣང་བ་རང་བྱུང་གིས་འོག་ཏུ་སྤྱོད་པའི་ཕག་གདོང་མའོ་ཞེས་ཐོས། དེ་ལ་ཅུང་ཟད་རེག་པས་ཀྱང་རྩུབ་འགྱུར་ཆེ་བར་བྱུང་ནས། དེར་གཙུག་ལག་ཁང་ཀ་བཞི་ཕྱི་བསྐོར་ལམ་ཁོར་ཡུག་ཏུ་ཡོད་པའི་རྨང་གཏིང་། དེ་དུས་ས་དྲས་དེར། ཉེ་ལོགས་པ་ཀུན་གྱིས་ཐོས་སར་བུ་མོའི་གླུ་བྲོ་བསམ་གྱིས་མི་ཁྱབ་པ་བྱུང་། དེ་ཙ་ན་གནས་ནང་ན་ཉ་མའི་རིས་མེད་པས་ཐམས་ཅད་ཅི་ཡིན་ན་སྙམ་པ་བྱུང་སྣང་། ངེད་ཀྱིས་དེ་དང་ཉེ་བའི་སྤང་གཤོངས་སུ་གུར་རྒྱབ་ཏེ་བསྡད། ཉ་མ་མང་པོ་མཇལ་དུ་བྱུང་བའི་ཞོགས་གཅིག །དེ་དང་ཕག་མོའི་ལྷ་ཁང་གཉི་གའི་བསྐོར་ལམ་དུ་བྱིས་པ་ལོ་བརྒྱད་ཙམ་པའི་རྐང་རྗེས་ཅི་གསལ་གྱིས་ལྟེམ་གང་འདུག་པས། ཉ་མ་ཞོགས་བསྐོར་བ་རྣམས། མཁའ་འགྲོ་མས་བསྐོར་བ་བརྒྱབ་པར་འདུག་ཟེར་ཡ་མཚན་བྱེད་སྣང་། ཟིང་པོ་ནས་རྟུལ་མིས་སྐར་མེ་རུབ་ནས་སེམས་ཅན་འགའ་འཁྲིད། ལྷག་པར་ཇ་བསྒྲུབས་བརྡུངས་བྱས་དུས་ཀོང་པོ་རྣམས། འབྲུག་པས་འདི་ལ་མཐུ་མ་བྱུང་ན་བནྡེ་གཞན་ལ་བཟོད། ཕྱིས་ཐམས་ཅད་བརྡུང་ཟེར་འདུག་གསུང་། བླ་མ་བྱ་ཁྱུང་པ་གསུང་། ངེད་ཀྱིས་ཞི་ལབ་འཐོན་རི་སྐོར་ཡུག་བྱས་ཏེ་མ་འཐོན། 
3-527
དེར་ལྷ་ཁང་དེ་རམ་པ་ཕུག་ནས་གཡུ་མཚོ་སྐོར་བ་ལ་ཕྱིན། རྡོའི་སྙིང་ཕུག་ཏུ་ངེད་རང་གཅིག་པུས་བསྡད། གྲོགས་རྣམས་ལ་བ་ཕུག་ཏུ་བཞག །ཚེས་བཅུ་བཞི་ཞིག་དང་འགྲིག་པའི་ཐོ་རངས་བུད་མེད་བརྒྱ་སྟོང་ཚོགས་ཀྱི་འཁོར་ལོ་མཚན་ཉིད་དང་ལྡན་པའི་ཁྲོད་དུ་སྐལ་བ་ལོན་པ་རྨིས། སང་མགོན་པོ་རོང་དུ་སླེབ་ཁར། དེའི་མར་སྣ་བྲག་ཅིག་བྱ་རོག་རང་དུ་མཐོང་ནས་སྐད་ལྷང་ལྷང་གྲག །ཉེ་མོར་སོང་བ་དང་རྡོར་རེད་དེའི་ཉིན་ཁམས་མ་བདེ་ནས་དེའི་ཐད་དུ་ཁོང་ཚོ་ཚོགས་ཀྱི་འཁོར་ལོའི་གྲབས་བྱེད་དུས་གཉིད་ལོག་བསྡད་པས། མི་གཅིག་ནས། སྔར་གྱི་བྱ་རོག་གདོང་དེ་སྲོག་བདག །ད་རེས་ཁྱོད་ཀྱིས་མཐོང་བ་འདི་འཆི་བདག །མཐའ་ལ་བདུད་མགོན་བྱ་གདོང་དངོས་སུ་མཐོང་བ་ཡོད། བྱ་རོག་སྐད་སྒྲོགས་པ་དེ། ཁྱེད་ཀྱི་དགྲ་གཉའ་རིངས་ཡན་པར་མི་འཆོར་ཞུ་བར་འདུག་ཟེར་བ་རྨིས། ཡང་ལོ་ལྟས་ཇི་ལྟ་བ་བཞིན་བྱུང་། དེ་ནས་གསར་མ་ལ་ཕྱིན་ཕག་མོ་ཕུག་ཏུ་ས་རུབ་པ་ལས་མ་སླེབ། དེར་རི་བསྙིལ་བ་ལྟ་བུའི་སྒྲ་དང་། གསེར་མའི་ཐང་འོད་མེའི་ཕུང་པོ་ལྟ་བུ་ལྷམ་ལྷམ་ཡང་ཞི་ཡང་འབར་བྱེད་པ་ཀུན་གྱིས་མཐོང་ཐོས། ངེད་སྡོད་པའི་བྲག་སྟེང་དུ་ཟླ་འོད་ཐལ་ཕོག་པ་དང་བྲག་དེ་ནས་ཆུ་ཐིགས་བྱུང་། ཟླ་བ་དེ་ལ་མི་འཕོག་པ་དང་ཆད་སོང་། 
3-528
ཆུ་ཤེལ་ལྟ་བུ་ཞིག་ཡོད་དམ་བསམ། སང་གསར་མའི་ལྗོངས་སུ་ས་གཡོས་སྒྲ་ཆེན་པོ་བྱུང་། ཚེ་དཔག་མེད་སྟོང་སྐུ་ཡིན་ཟེར་བ་དེ་མཐོང་བའི་ལ་སྒང་དེར་བསྡད། སྟོང་སྐུ་ཡིན་ཟེར་བའི་དབུས་ན་རྣམ་རྒྱལ་མཆོད་རྟེན་གྱོལ་ལེ་བ་ཅིག །དེའི་བུམ་ཐད་ཀྱི་ཕྱིར། རྗེ་མི་ལའི་སྐུ་འདྲ་བའི་དཀར་ཡེ་རེ་བ་ཅིག་འདུག །ཁོང་ཚོ་ཚེ་ཆུ་ལྟར་སོང་བས། ཉི་མ་གསུམ་ཙམ་གནམ་དངས་བས་ཆུ་མི་འདུག་ཟེར། དེ་ནས་མོད་ལ་ད་ཅིའི་རྣམ་རྒྱལ་མཆོད་རྟེན་དེ་ཤིན་ཏུ་བཟོ་དོད་པ་དཀར་ལྷང་ངེར་གྱུར་པའི་བུམ་ནང་དུ། རྗེ་བཙུན་གྱི་སྐུ་འདྲ་བ་དེ་བཞུགས་པ་རྣམ་རྒྱལ་མ་རང་དུ་ལྷན་སོང་བ་བརྒྱང་ཙམ་པ་ཞིག་བྱུང་། ངེད་ཀྱི་འཁྲིས་ན་ཡོད་པ་ཚོས་ཀྱང་རྣམ་རྒྱལ་མཆོད་རྟེན་འཐོང་འདུག་དེ་བསྟུན་བྲག་དེ་ལ་ཚེ་ཆུ་ཤམ་ཤམ་བྱུང་ཟེར། དེ་ནས་ཆུ་ཁྱོར་བས་འགྱེད་རྒྱུ་བྱུང་། གནས་མཐིལ་ན་འཁྲུས་མཚོའི་སྟེང་། རྣམ་རྒྱལ་ཁང་བཟང་གི་འོག་ཙམ་དུ་ཆོས་ཁྲི་ཅིག་ཕུལ་བའི་ཉམས་བྱུང་། དེར་ཆོས་བཤད། དེ་ནས་བྱམས་པ་རོང་བསྐོར་ན་འཁོར་བ་ཙམ་གྱི་ཆོད་ལ་འགྲིག་པ་འདྲ། ངེད་ཚོས་དེར་མ་ཕྱིན། ཁྲུས་མཚོའི་སྟེང་གི་སྒང་དུ་ངལ་གསོ་སྐབས། མཁའ་འགྲོ་མ་འདུ་བའི་རྒྱལ་སྒོ་ཡིན་ཟེར་བ་དང་ཐད་འགྲིག་གི་སྟེང་གི་བག་དེ་ནས་མཁར་ཆུང་གཅིག་ཙམ་ཡོང་བའི་བྲག་གཤགས་པ་བྲུལ་ལ་ཁད། 
3-529
དེ་དང་བྲག་མའི་བར་དུ་གློ་ཁ་ཁྲ་རང་འདྲ་བ་ཅིག་གིས་བྲག་དེ་འཕུལ་གྱི་འདུག་པ་མཐོང་། ཟླ་བོ་རྣམས་བཀའ་སྒོ་འབྱེད་འཐེན་འདུག་པ་དེའི་སྒྲ་ལྷང་ལྷང་བྱུང་བ་དང་ཚུར་བལྟས་བྱུང་། ངེད་མཐོང་བ་དང་། ཁ་སྐྱེངས་པ་འདྲ་བ་ཞིག་བྱས་ཁ་ཕྱིར་ལོག་སྟེ་ཡལ་སོང་། དེ་ནས་གཉའ་ཙམ་དུ་སྒྲ་ཆེན་པོ་རང་ཞིག་བྱུང་། དེར་གནམ་ཤིན་ཏུ་དངས་པར་འདུག་ནས་རྣམ་པར་རྒྱལ་བའི་ཐང་ནས་འཇའ་སྣ་ལྔ་འཕྲེང་རྒྱུགས་རང་ལ་ཐལ་འོངས་ཏེ་ཁོ་བོའི་སྙིང་གར་ཟུག་པ་ཀུན་གྱིས་མཐོང་ངོ་། །དེ་ཁས་ཚེའི་རྟེན་འབྲེལ་འགྲིག་པར་བསམ་མོ། །དེ་ནས་འོད་འབར་དུ་སླེབ། གཉིད་སད་པའི་མཚམས་ཞིག་ལ་མདུན་གྱི་རི་གཞན་རྨུགས་པས་གཡོགས་པའི་དཀར་སིང་སིང་ལ། ཕུག་པ་རང་གི་ཐང་དུ་མཐིང་གིས་བྲིས་པ་ལྟ་བུར་སྔོ་བའི་རྫབ་མའི་ཨ་ཐོག་སོ་ལྔ་དྲུག་ཙམ་ཡོད་པ་ཤིན་ཏུ་གཙང་བ་ཅིག་བྱུང་། ཟླ་བོ་ལ་སྦྲན་པས་གཉིང་སད་མི་བཏུབ་པར་སྣང་། ཕོ་བྲང་དུ་བསྡད་སྐབས་རྒྱ་འདྲེ་ལྦ་བ་དགུ་བརྩེགས་འཁོར་བན་བཙུན་ཧྲུལ་པོ་ལྔ་བརྒྱ་ཙམ་གྱིས་བབས་འབུལ་བ་ལ་ཡོངས་པ་ཡིན་ཟེར་གུས་བཏུད་བྱས་ནས་སོང་། སྟག་ཚང་དུ་སླེབ་དགོངས་སྲོད་ལ་གཉིད་ཐུམ་ལོག་པ་ན། བུད་མེད་ནག་མོ་འབས་རལ་ཅི་ཡང་ཞིག་འདུས་ནས། ཉ་འུ་གཅིག་ངའི་མདུན་དུ་བཀོད། ངེད་ལ་ཕོད་ཀ་ཞྭ་ནག་ཕུར་པ་སྤྲད་དེ་འདི་སྒྲོལ་ཟེར་འཆམས་དང་བཅས་ཏ་བཏབ་པའི་བར་དུ་བྱས། 
3-530
བུད་མེད་དེ་ཐམས་ཅད་ཀྱིས་རོལ་མོ་གསོ་སྒྲ་དང་བཅས་བྱེད་འདུག །ཡང་གཉིད་སད། ནམ་གུང་ཙམ་ལ་ཡང་། བུད་མེད་སྔ་མ་རྣམས་མིན་པ་དེ་ལས་མང་བ་གོས་གཟབ་པ་ཞིག་འདུས་ནས་སྔ་མ་བཞིན་བྱས་པ། ཐོ་རངས་བུད་མེད་རས་གོས་སྔོ་སིང་སིང་གྱོན་པ་མཛེས་མ་རྐྱང་པ་འདུས་ནས་སྔ་མ་ཇི་ལྟ་བ་བྱེད་པ་ཅིག་བྱས་པ་རྨིས། དྲག་སྔགས་ཀྱི་ལས་ལ་བསྐོས་པ་འདྲ་ཞིག་བྱུང་། ཕྱིར་ལོག་སྐུ་རབ་ནས་ལྕམ་དྲུང་པ་ཕེབས་གཞི་ལེན་དང་དོད་འདུག །ཕྱིར་འཁོར། དེ་དུས་ཟངས་ཆེན་པ་རྣམས་ཁྲིམས་འགལ་རང་བྱེད་པ་ཞིག་སྣང་བ་ཆམ་ལ་ཕབ། །ཆོས་པའི་སྲོལ་འཛིན་དུ་བཅུག །ཀོང་པོ་ནས་ཅོག་གྲྭ་བ་འཁོར། རྟ་དྲུག །དྲེའུ་བརྒྱད། ཇ་བཅུ་དྲུག་ལ་སོགས་པ་འབུལ་བ་གཏོས་ཆེ་བ་བྱུང་། ལོ་གྲོ་བ་རྣམས་ཀྱིས་ཞབས་ཏོག་ནས་འབུལ་ལེགས་པར་བསྒྲུབས། མཚོ་སྣར་ཕྱིན། གསེར་དང་རས་ཆ་འབྲི་གནག་ལ་སོགས་པ་གཏོས་ཆེ་བ་བྱུང་། འབྲི་གནག་བརྒྱ་དང་བཅོ་བརྒྱད་ཙམ་མཚན་ཉིད་གྲྭ་ཚང་པ་ལ་སྦྱར། རས་རྣམས་ཅོག་གྲྭ་གསར་རྙིང་དང་སྔགས་གྲྭ་པའི་ཚོགས་གུར་ཅོག་པུ་ལ་སྦྱར། དེ་དུས་སྤོས་ཤེལ་གཏོས་ཆེ་བ་དགེ་འདུན་གྱི་ན་བཟའི་རྐྱེན་ལ་བྱིན། གོས་སྐུའི་ཐིག་བཏབ། སྒམ་པོར་ཤོག་གསུང་སྤྱན་སྔ་རིན་པོ་ཆེའི་བཀའ་སྩལ་བྱུང་རུང་། མྱང་སྟོད་དུ་ནང་ཟིངས་ཡོང་མཐང་པ་བྱུང་ནས་འགྲོ་དགོས་ཤར། 
3-531
དེ་དུས་སྡེ་པ་གཞུང་ལ་འཇུར་དགག་ཤིན་ཏུ་དམ་པ་འདུག་པ། དཔོན་བློན་བར་དུ་ལབ་བྱས་གཤིབ་ཐུབ་པ་བཟོས། ཚད་མ་སྡེ་བདུན་མདོ་དང་བཅས་པའི་འགྲེལ་ཆེན་རགས་པ་གཙང་མར་བལྟས། ཚད་མའི་ཟུར་བཀོལ་དང་འགྲེལ་པ་གཞན་གལ་ཆེ་སྐབས་ལྟ་བ་བསྒྲགས། རྒྱན་མཁན་པོའི་བཞེད་པ། ཚད་མ་རྣམ་འགྲེལ་དབུ་མ་རང་རྒྱུང་དུ་གནས་པ་ལྟར། དཀའ་འགྲེལ་འཇམ་པའི་དབྱངས་ཀྱི་དགོངས་རྒྱན་ཞག་བཅུ་གཉིས་ལ་གྲུབ་པར་བགྱིས། དེ་དུས་མྱང་སྟོད་པ་འདི་རྣམས་དགྲ་ལ་དགྲར་མི་འཛིན། གཉེན་དང་རོགས་བྱེད་མཁན་ལ་དགྲ་རང་དུ་བལྟས་ནས་དགྲ་བསྡོངས་ལག་སྦྲེལ་ཁོ་ན་བྱེད་པ་ཞིག་འདུག །ངེད་པ་སྣམ་འཛིན་པ་ཁོང་ཚོ་སྐྱབ་པའི་ཕྱིར་ཡིན་ཏེ། རོགས་མཁྲངས་དྲག་ན་ཁོང་རང་ཚོ་དང་འཛིང་དགོས་པར་མཐོང་ནས་པ་སྣམ་རིན་སྤུངས་པ་རང་ལ་སྤྲོད་བརྩིས། དེ་ཡང་རྒྱལ་བྱེད་ཚལ་ལ་སོགས་པའི་ཐང་དུ་ཡིན་བབས་རིན་སྤུངས་པས་བྱེད་བསམ་པ་མ་ཤར། དེ་བྱེད་པ་ལ་ཁྲེལ་ཡོད་ངོ་ཚ་ཤེས་པ་ཞིག་དགོས་པར་འདུག །དེ་ཚང་ལ་མེད་པར་གོ །རྒྱལ་བྱེད་ཚལ་ལེགས་པར་བཏབ་པའང་སངས་རྒྱས་ཀྱི་བསྟན་པ་ལ་བསམས་པ་ཡིན། འཇིག་སྙིང་འདོད་ན་རྒྱ་གར་རྡོ་རྗེ་གདན་ཡང་གཞིག་འགྲོ། འཆགས་སྙིང་འདོད་ན་ཅི་རིགས་ཀྱི་བསམ་པའི་དབང་དུ་མི་འགྲོ། ཁྱད་པར་གཙུག་ལག་ཁང་འདིའི་སྲུང་མར་རྒྱལ་པོ་པེ་ཧཱ་ར་དང་། 
3-532
རྡོ་རྗེ་ལེགས་པ་ལ་སོགས་པ་སྡེ་བརྒྱད་མང་པོས་ཁས་བླངས་དམ་བཅས་པ་ཡིན་པས་ཇི་འདྲས་བྱེད་པ་ལྟ་བསམ་ཆགས་པར་མ་བྱས། དེ་ནས་ཁྱུང་རྩེ་བ་ངོ་ལོག་པའི་གཤིས་ཀྱིས་རིན་སྤུངས་པའི་དམག་ཚང་མ་ཞིག་དྲིལ་བ་པ་སྣམ་དུ་འཚངས་སྣང་ཡང་། མི་བསད་ཀྱི་རྒྱུ་མིན་པ་ཅི་ཡང་མ་བྱུང་། འོན་ཀྱང་དགྲ་ལ་མ་འཇིགས་གཉན་ལ་སྐྱོ་བས་ཕྱིར་གཏད། གསེར་ཞོ་བརྒྱ་གྲྭ་ཚང་པའི་ཕོགས་ཐེས་ལ་སྤྲད་དོ། །མགྲིན་པ་ཐ་དད་ནའང་ལུས་གཅིག་བསམ། །རང་བཞིན་བཟང་དེས་གཞན་གཉིད་མ་སད་བར། །གཉིས་ཕན་བདུད་རྩི་ཅི་དགར་ཟས་པ་ལ། །ཅིག་ཤོས་སད་ནས་དྲི་ཚོར་ཁོང་གནག་ནས། །རང་གི་མེལ་ཚེ་རིས་ལ་དུག་གི་འབྲུ། །མི་འདོད་ལས་ཀྱིས་འཕངས་པ་མདུན་སླེབ་པ། །བཅུད་དུ་བསམ་ཟོས་དེ་ཡི་ལེ་ལན་གྱིས། །གཉིས་འཕུང་གྱུར་པ་མྱང་སྟོད་ཁོ་ནར་མིན། །ངེད་རྣམས་ལྷོ་བྲག་ཕྱོགས་སུ་བཏེག །དེ་རེས་གྲོ་བོ་ལུང་མཇལ། ལྷ་ཁང་གི་སྟེང་ཡང་རྩེ་སྤང་དུ་ཡུན་རིང་བ། ཆོས་ཞུ་བ་སྟོང་ཐལ་བར་རྒྱུད་བཤད། བསྲེ་འཕོ་རོ་སྙོམས་སོགས་མན་ངག །མི་འཁྲུགས་པ་སོགས་དབང་ཅི་ཡང་བྱས། དར་རྩེ་མདོ་ནས། ངོས་ཀྱི་སློབ་མ་འབུམ་རམ་འབྱམས་ཐུབ་པ་བའི་འབུལ་བ་ཇ་བཅུ་དྲུག་གིས་བྱང་དྲངས་པ་སླེབ། ལྕང་གླིང་བཅིག་ཅར་རྡོར་འཛིན་དུ་བསྐོས། བེར་རྟ་སོགས་ཀྱི་གནང་སྦྱིན་བྱས་ནས་བརྫངས། 
3-533
འོད་གསལ་སྒང་ནས་སྨྱོང་ཁའི་མཚོ་ལ་དམིགས་པའི་གཏོར་འབུལ་བྱས་དུས། ཁྲིས་པ་བཞི་ལྔས་མཐོང་བར། མཚོ་སྟེང་མའི་དབུས་ནས་དབུ་སྔོ་འཕྱུར་འོངས་ནས་ཁེབས། དེ་ནས་མཚོ་ནང་དུ་མེ་ཕུང་འབར་བ་དངོས་སུ་བྱུང་། ཚུར་ལྷོ་རྒྱུད་དུ་སླེབ། འབོག་ཀོང་པས་མཁར་པོ་ཆེར་རྫོང་བརྩིགས་འདུག་པས། བྱ་འབྲུག་སྤྱི་ལ་སླེབ་ཆུང་བར་མཐོང་ནས་བཤིག་ཏུ་བཅུག །ངེད་རྣམས་བྱམས་པ་ཆོས་གླིང་དུ་ཕྱིན། བྱམས་པའི་སྐུ་ལེགས་པར་གྲུབ་པའི་རབ་ཏུ་གནས་པ་ལ། དཔོན་ས་དོན་གཉིས་སྒྲོལ་མ་དཔོན་གཡོག་བྱོན། སྔགས་གྲྭ་པ་རྣམས་ཀྱིས་འཇམ་དཔལ་གཤིན་རྗེའི་འཆམས་སོགས་ལྟད་མོ་དང་སྟོན་མོ་བཟང་པོ་བྱས། སྐུ་འདི་ཟངས་བརྡུངས་པ་མཁས་པས་ཁལ་བརྒྱ་ཉི་ཤུ་ཙམ་ལས་མ་སོང་། གསེར་རྐྱང་ཞོ་ཕྱེད་དང་བཞི་བརྒྱ་གསོལ། བལ་པོ་ལ་ཡང་ཡོན་གསེར་རང་ཞོ་ཕྱེད་དང་བཞི་བརྒྱ་སྤྲད། གཞན་སྟོན་རྒྱབ་སོགས་ཀྱིས་མགུ་བར་བྱས། གཉྫིར་ལེགས་པར་བཙུགས། གསལ་རྗེར་བླ་མ་སྐལ་བཟང་དབང་པོ་བསྐོས། མཆོད་གཞིས་ཉམས་པ་བསླང་། དེ་ནས་བཀྲ་ཤིས་མཐོང་སྨོན་དུ་སླེབ། དེ་དུས་རྒྱལ་བྱེད་ཚལ་དུ་གྲྭ་ཚང་བ་རྣམས་ལ་འབྲོང་རྩེ་བ་དང་རིན་སྤུངས་པ་སུའི་སྐྱོན་ཡིན་ཀྱང་སྡོད་མ་བདེ། གཙུག་ལག་ཁང་ཞིག་རལ་ལ་བློ་རྩེ་གཏད་སྣང་རུང་འཁྲིས་ཀྱི་ཤིང་བཅད་ལ་རིན་སྤུངས་པའི་མི་སྣ་འོངས་པ། སྨྱོ་འབོག་གིས་ཟླ་བ་མ་འགོར་བར་ཤི། 
3-534
འབྲོང་རྩེ་བ་རང་གི་ནང་ནས་བྱེད་པ་པོ་ལ་རིགས་གྲི་ལམ་ལ་རིམ་པས་ཤོར་བ་སོགས་ཀྱིས། གཙུག་ལག་ཁང་སྐུ་ཁམ་བཟང་། སྡེ་བརྒྱད་རྣམས་ཆད་བཙན་པར་བྱུང་། མི་འགའ་ཞིག་ཁོ་བོ་སྨད་པར་འདོད་ནས་རྣམ་པ་ཀུན་ཏུ་མཐུ་རང་བྱེད་པར་གླེང་། མཐུ་ཡང་སྡེ་བརྒྱད་ལས་སུ་བཀོལ་ནུས་པ་ཞིག་གིས་གྲུབ་པར་སྣང་། མཐུ་བསྟན་པར་ཕན་པའི་ཕྱིར་བྱེད་ན། དེ་ཁས་སངས་རྒྱས་ཀྱི་གསུང་ལ་ཉན་པར་སོང་། སངས་རྒྱས་ཀྱི་བསྟན་པ་བསྲུང་བའི་ཆེད་དུ་གསུངས་པ་ཡིན་པས་བརྟགས་ན་བསྟོད་པར་སྣང་སྟེ། བླུན་པོས་སྨད་པ་བསྟོད་རར་སོང་གི་དཔེ་རང་དུ་འདུག །ལར་ཁོ་བོས། རང་ལ་དུག་བླུད་མི་གཉིས་ཙམ་ངོ་ཆོད་དེ་བཀའ་བཀྱོན་མ་བྱས། གནང་སྦྱིན་བྱས་ནས་བརྫངས། བསྟན་པ་ལ་གནོད་པ་རིངས་མ་བཅུག་གོ །མགོན་ཁང་རྙིང་བར་ཞག་བཅུ་བཞི་པ་ཅིག་སྒྲུབ་པ་བྱས། མགོན་ཁང་སྣུམ་བག་དང་ལྡན་པར་གྱུར་པ་དང་ལྟས་ལེགས་པར་བྱུང་ཞིང་། གཙུག་ལག་ཁང་དུ་ཟླ་བ་ལྷག་པ་མཚམས་བྱས། དེ་ནས་གསུང་ཆོས་འཕེལ་བ་དང་། གཞི་པའི་བཙན་བཙུན་གྱིས་འབུལ་བ་གཏོས་ཆེ་བ་ཉིན་རེ་བཞིན་བྱུང་། ལྷོ་རྒྱུད་ཀྱི་སྔགས་གྲྭ་སློབ་དཔོན་དུ་གཡའ་བཟང་པ་ཆོས་མཛད་ངག་དབང་ཀུན་དགའ་སྙིང་པོ་བསྐོས། དེ་ནས་དོལ་དཔལ་རི་བརྒྱུད། བླ་མ་དགེ་འདུན་ཁུ་མཚན་གྱིས་ཞབས་ཏོག །ལྷ་རྩེར་མཁའ་སྤྱོད་ཕུག་ཏུ་མཚམས་བྱས། 
3-535
དེ་གྲོལ་འཕྲལ་བཀྲ་ཤིས་མཐོང་སྨོན་དུ། ཅོག་གྲྭ་གསར་པའི་བླ་མར་རོང་སྤང་ཆེན་བཀའ་བཅུ་པ་བསྐོས། བྱར་དུ་ཏིང་ཏིང་ནས་དབྱངས་ཅན་དགའ་བ་འདས་པའི་གྲལ་དབུར་འབོད་མི་བྱུང་བ་བཞིན་བཏེག །རྩེ་མོ་རིར་གོས་སྐུ་ཆེན་མོ་དང་ཆུང་བ་གཅིག །བཀའ་འགྱུར་ཡོངས་སུ་རྫོགས་པར་གྲུབ་པ་རྣམས་ཀྱི་རབ་གནས། གོས་སྐུ་འདི་ལ་གོས་ཆེན་དིང་ཕོན་ཚོན་རྫོགས་མ་རད་ཡུགས་བཞི་ཙམ། གཞན་ཁྱད་གོས་འབའ་ཞིག་བརྒྱ་ཉི་ཤུ་ཙམ། །བསོད་པ་ལ་ཡུགས་གྲངས་བཅུ་ཙམ་སོང་ཞིང་། བཅད་ཀྱང་གོས་ཆེན་དང་ཚོན་སི་མཆིན་ཁ་དང་ནག་གང་འོས་སུ་བཏང་། སྲིད་དུ་ཐོག་ཚད་དགུ་ཙམ། ཞེང་དུ་གདུང་ཡུལ་ཆེན་མོ་ལྔ་ཙམ། ལྷ་གྲངས་ཀྱང་གཙོ་བོར་སྟོན་པ་རིན་པོ་ཆེ། བྱམས་འཇམ་དབྱངས་ལྡེམ། ཆོས་རྗེ་གཙང་པ་རྒྱ་རས་དང་། རྗེ་འབྲུག་པ་རིན་པོ་ཆེ་ངག་དབང་ཆོས་ཀྱི་རྒྱལ་པོ། སྒྲོལ་དཀར་དང་ཚེ་དཔག་མེད། འོག་ཏུ་མགོན་པོ་ཕྱག་བཞི་པ་དང་། དུད་སོལ་ལྷ་མོ། སྤྲུལ་སྐུ་བསོད་རྒྱམ་གྱིས་བཀོད་པ། དབོན་རྣམ་རྒྱལ་དཔལ་འབྱོར་སོགས་དྲུག་གིས་ལོ་གཅིག་ལ་མཐར་ཕྱིན་པ་བཟོ་ཁྱད་འཐོན་པ་བསྒྲུབས། འཕྲལ་གྱི་མཐུན་རྐྱེན་སྡེ་པ་གཞུང་ནས་སྦྱར། བཟོ་རིག་པའི་གནང་སྦྱིན་ངེད་རང་གིས་བྱས། གོས་སྐུ་རྒྱབ་ཤ་བཙེམས་ནས་ཡོངས་སུ་རྫོགས་པའི་བར། དཔོན་ས་སྐུ་གཞོན་པ་ཐུགས་བཅག་གིས་གངས་ནས་འདྲོངས་པས་རྒྱུ་རྣམས་རྩིས་སྤྲད། 
3-536
ཐིག་རྩ་སོགས་ཁོ་བོ་རང་གི་བཀོད་པ་བྱས། གཞན་རྣམ་པར་གཡེང་བ་མ་དགོས། གོས་སྐུ་ཡངས་པ་ཅན་གྱི་ངོགས་ལ་བཀྲམ། རབ་ཏུ་གནས་པ་ཀླུ་སྡིངས་གདོང་ནས། གུར་ཡོལ་བ་སོགས་ཁྱད་པར་འཕགས་པས་གདུགས་འཇམ་པ། འཆམས་ལ་སོགས་པའི་ལྟད་མོ་རྒྱས་པ་ཁྲོམ་ཤིན་ཏུ་ཆེ་བ་བྱུང་། དེ་གྲུབ་འཕྲལ་དབྱར་ས་བརྒྱུད་བྱར་ལ་བཏེག །ཏིང་ཏིང་གི་བྲེལ་བ་ཆོད་འཕྲལ། བེའུ་ཁ་བསྐོར། ཇོ་བོ་ཁོ་བོས་སྔ་མ་མཇལ་ནས་དེའི་བར་ལ་ལོ་ཉི་ཤུ་རྩ་གཉིས་ཙམ་སོང་འདུག་པ་ལ། འཕྲལ་གྱི་སྐུ་རྒྱས་པ་དང་། སྐྱེ་མཆེད་དོད་པར་སོང་འདུག་པས་རང་བྱོན་ངེས་འདྲོངས། དེ་ནས་རྩ་རིར་སླེབ། དཔོན་ཇོ་བོ་གཟུངས་སོགས་འཁྲིད། ཕག་མོ་ལྷ་ཁང་ཐོག་སོགས་འབུབས་བསྐྱར་བྱས། རྡོ་རྗེ་ཕག་མོ་ཕག་ཞལ་ཅན་གྱི་སྐུ། རྒྱུ་གསེར་ཟངས་ལ་ག་ཛ་མུ་ཏིག་བཞི་བཅུ་ཙམ་དང་། མུ་ཏིག་ཕལ་པ་སྙིམ་པ་གང་ཙམ། དཔོན་ས་སྐུ་མཆེད་ཀྱི་སྐུ་རྒྱན་ཤས་ཆེ་བའི་གཡུ་སྤྱང་། ཤེལ་རིགས་སོགས་ཀྱི་ཁྲ། སྤྱན་རས་ཤེལ་ནག །ཚོམས་མུ་ཏིག་ལྗོན་ཤིང་གིས་བྱས་པ། སྐུ་ཚད་རྒྱབ་ཡོལ་མེ་རི་དང་བཅས་པ་ཐོག་སོ་ཕྱེད་གཉིས་ཙམ། གསེར་ཐོག་གཎྫི་ར་དང་བཅས་པ། བྱམས་པ་ཆོས་གླིང་དུ་བསྒྲུབས་ནས། དེ་ཁར་བསྒྲིགས་ཚོམ་བྱས། བྱིན་རླབས་ཀྱང་སངས་རྒྱས་ཀྱི་རིང་བསྲེལ། རྡོ་རྗེ་ཕག་མོ་ཉིད་ཀྱི་གཟུངས་འབུམ་ཕྲག་གཅིག་ལ་སོགས་པ་བསམ་པས་བརྒལ་བ་བཞུགས། 
3-537
རབ་ཏུ་གནས་པ་བྱས། དེ་དུས་དྭགས་ཀོང་གི་ཉ་མ་ཙ་རིར་འོངས་པ་ཙམ་ལ་མང་ཟེར་བ་བྱུང་། སྐྱེན་པ་རྒྱལ་པོ་སྒོ་གོང་འོག །བླ་གཡེ་བ་སོགས་ཀྱིས་འབུལ་བ་ཞབས་ཏོག་ལེགས་པར་སྣང་། འཕྲལ་མར་ལོག་རྩིས། བཀོད་པ་བསྒྱུར་བཀོད་སོགས་ཀྱིས་འགྱངས་པ་ལ། སྐྱེན་པ་ཆོས་མཛད་མགོན་པོ་བཀྲིས་ཀྱིས་ཕོགས་ལེགས་པར་ཕུལ། དེ་དུས་ཕག་མོ་ལྷ་ཁང་དུ་ཉལ་བའི་ཚེ། སྒྲ་ཅིག་ལ། སྟེང་དུ་མཁའ་སྤྱོད། འོག་ཏུ་ས་སྤྱོད། བར་དུ་རྡོ་རྗེ་ཕག་མོ་ཡེ་ཤེས་ལྷ་མངོན་སུམ་དུ་ཆགས་པ་དེའི་རྟེན་འབྲེལ་ལས། བོད་ཁམས་ཀྱི་སྐྱེ་དགུ་ལ་བདེ་སྐྱིད་ཕུན་སུམ་ཚོགས་པ་འབྱུང་ངོ་། །ཞེས་པ་དང་། སྐབས་ཤིག་རྨི་ལམ་ལ། །བུད་མེད་མཛེས་སྡུག་གི་ཕུལ་དུ་ཕྱིན་པ། ཤ་མདངས་དཀར་ལ་དམར་བ་མེ་ཏོག་གིས་ཐོད་བཅིངས། གོས་བོད་འདྲ་བ་ཅིག་ལ། འཁོར་བཞི་ཡོད་པ་ཞིག་བྱུང་ནས། རྗེ་བཙུན་ཏིལླི་པའི་གཏད་རྒྱར། ཡིད་བཞིན་གྱི་ནོར་བུ་རྣམ་པ་གསུམ་རྣམ་བཤད་དང་བཅས་པ་ལ། རྒྱས་འགྲེལ་བྱེད་པ་པོར་ཁྱོད་ལུང་བསྟན་པ་ཡིན་པས། རྩོམ་པའི་དུས་ལ་བབ་བོ་ཞེས་བསྐུལ་བ་ཅིག་རྨི། ཚུར་ལོག་ཕུན་ཚོགས་རབ་བརྟན་དུ་སླེབ་ནས། དེ་སྔ་སྙན་བརྒྱུད་ལ་དེ་ཙམ་དོ་གལ་མ་བྱས། དེ་ནས་ལེགས་པར་བལྟས། སྟེང་སྒོ་ཡེ་ཤེས་གསལ་བྱེད་སོགས་ཀྱི་གཞུང་ཕལ་མོ་ཆེ། རྗེ་བཙུན་གྱིས་མཛད་དོ་ཞེས་ཁ་གཡར་བ་མ་གཏོགས། 
3-538
ཞང་ལོ་ཆེན་པོས་མཛད་པར་ཤེས། རྡོ་རྗེའི་ཚིག་རྐང་། དེའི་རྣམ་བཤད། ཏིལླི་པའི་གཞུང་ཆུང་གཉིས་རྙོག་པ་མེད་པའི་ཡི་གེར་མཐོང་། དེ་དུས་བདེ་མཆོག་གི་རྣམ་བཤད་ཆེན་མོ་ཚོགས་ལ་བཤད་པར་འོས་པ་བརྩམས། དེའི་གཞུག་ཏུ་སློབ་མ་ལ་བཤད་པ་སྙན་རྒྱུད་ཀྱི་འགྲེལ་པས་བསྟན་པར་མཐོང་ནས་བརྩམས་པར་འགོ་བཙུགས། དེ་དུས་སྤྱི་དང་མཐུན་པར་མདོར་བསྟན་བྲིས་པའི་དགོངས། སྔར་གྱི་བུད་མེད་བཟང་མོ་དེ་འོངས་ནས། ཨེ་ཝཾ་གཟུགས་སུ་གྲུབ་པ་ཝ་རྟུ་ལའི་ཡི་གེ་ཞིག་བསྟན། བྱིན་གྱིས་བརླབས་པ་དང་། འཁྲིས་ན་མི་འདི་ཡིན་རང་མེད་པ་ཞིག །ཨེ་ཝཾ་སྒྲས་སྒྲུབ་འདུག་པ་ཞིག་རྨིས་ནས་བརྡར་གོ ། དེ་ནས་ཚིག་དོན་རྨོངས་པ་མེད་པར་སོང་། དེ་མཐར་ཕྱིན། འདྲི་བསམ་པ་མིག་ན་བ་ཅིག་གིས་འཕྲོ་མར་ལས་སོ། །དེར་ཟླ་བ་བདུན་པའི་ཡར་ཚེས་བརྒྱད་ལ། དཔལ་ལྷས་བསྟན་གྱི་རི་བོ་གསང་སྔགས་ཆོས་གླིང་གི་གཙུག་ལག་ཁང་གི་ས་དྲས། དེར་སྣང་སྲིད་ཀྱི་ལྷ་འདྲེ་རོགས་སུ་འོང་བས་ཡི་གེ་མཐོང་། ཞེས་ཞིང་སྐྱོང་གི་མཁའ་འགྲོ་མ་ཆེན་མོས་སྔ་ནས་ལུང་བསྟན་པ་བཞིན་བྱས་པས། གཞི་བདག་རེ་ཞིག་འཕོས་བསྐྱས་བྱས་ནས་ས་དགུ་རྩེ་ཡང་མེད་པ་དང་། ཡི་གེ་ལ་འཇའ་ཉི་མ་གཉིས་སུ་ཟུག་པ་དང་། ཕྱིས་ལས་འོལ་ཀྱང་གཞན་ལས་ཆེ་བར་བྱུང་། དེར་རྡོ་ནི་ཤིན་ཏུ་སྤུས་གཙང་བས་གཡེ་ནས་རྡོ་བཟོ་བ་དགོས་ཚུལ། 
3-539
སྡེ་པ་རྒྱ་རི་ནས་ལ་བྱས་པས་ཁོང་གིས་མཁས་པ་བཞི་བརྫངས། རྨང་དྲ་དུས། གཡས་རུ་བྱང་ནས་བདག་ཆེན་ཀུན་དགའ་རིན་ཆེན་པས། རྗེ་བཙུན་དམ་པ་ཀུན་དགའ་གྲོལ་མཆོག་པའི་བཀའ་འབུམ་པར་དུ་བཀོད་པའི་གྲོགས་གྱིས། ལྟོ་ཡོན་ཡ་གི་ནས་གནང་གསུང་བའི་ཇ་ཞུས་ལ། ག་ཐོག་པ་དཔལ་བ་དང་། མཚོ་བྱང་པ་འཕགས་མཆོག་པ་སླེབས། ཁམས་ནས་གྲྭ་པ་འགས། རྒྱལ་བ་རིགས་ལྔའི་གསེར་ཐང་། གསེར་མཚལ་སོགས་གཏོས་ཆེ་བར་བྱུང་བས་བཀྲ་ཤིས་པར་གོ །ཟླ་བ་གཉིས་ལ་འདུ་ཁང་ཤབ་བགྱོངས་ཆེ་བའི་ཀ་ཆེན་བཅུ་གཉིས་ཀྱིས། གཙང་ཁང་ཀ་གཉིས་སྟེང་དུ་ཀ་བཞི་ཡོང་རྒྱུ། བླ་བྲང་རྣམས་ཀྱི་འོག་ཐོག་བཀལ་ཆོག་པ། གཙང་ཁང་མ་གཏོགས་ཕལ་ཆེར་ཁེལ། སྤྱིར་གྱིས་བྱར་ལུང་པ་དེ་ཤིང་གི་འབྱུང་ཁུངསུ་སྣང་ཡང་། ཉེ་འཁྲིས་ན་ཤུག་པ་དང་། རྒྱ་ཤིང་སྤུས་གཙང་རྙེད་པས། ལྷོ་པ་མི་དགུ་རང་གིས་མི་ལག་བརྒྱ་ཙམ་གྱིས་ཤོག་བཏོན། བཀོད་པ་བྱིན་ཕྱག་མཛོད་པ་མི་ཕམ་བླ་མར་བཞག་ནས། བྱར་ལུང་པ་ཡར་ལ་ལ་ནས་སྡུད་སོ་སོར་བརྒྱ་འབུལ་བཟང་པོ་གྲངས་མང་བ་དང་། རྫོང་ཆེན་དུ་སླེབ། གཉལ་ཤོ་བུད་སྙིའི་མེ་ཏོག་བསྡུ་སྐབས་གདན་ས་ཆེན་པོ་བྱང་སྟག་ལུང་ནས། ཆོས་ཀྱི་རྗེས་ཤོག་གསུངས་ནན་ཆེ་བ་ཕེབས་པ་བཞིན། གླང་ཐང་སྤྱན་སྔ་སོགས་ཀྱིས་ཀྱང་བྱུང་། བུ་མོ་གཉིས་ནས། 
3-540
སྙན་རྒྱུད་ཀྱི་འགྲེལ་པོ་རྩོམ་རན་ཟེར་བསྐུལ་བ་རྨིས། དེ་ནས་རྩེ་མོ་རིར་སླེབ། བྲག་གོང་འོག་གིས་ནས་འབུལ་གཏོས་ཆེ་བ་བྱས། དེ་ལོའི་དབྱར་སྤྲུལ་སྐུ་བསོད་རྒྱམ་པ་དང་། མཚོ་སྐྱེས་པད་དཀར་གྱིས་རི་མོ་བྱས། ལག་གཡོག་པ་འགའ་དང་བཅས། རྡོ་རྗེ་གདན་གྱི་གཙུག་ལག་ཁང་གི་ཤིང་རྩི། འདུ་ཁང་གི་གདོང་ཆེན་ལ། དཀར་བརྒྱུད་ཕོ་བྲང་དང་། ཐུབ་པ་སེམས་དཔས་བསྐོར་བ། གཞན་འཕགས་པའི་གནས་བརྟན་བཅུ་དྲུག །གདོང་ལ་བཀའ་བསྡུ་སི་ཐང་དངོས་ལ་བཤུས་པའི་སྤུས་གཙང་གྲུབ་པའི་རབ་གནས་བྱས། གཉལ་རོང་ཡར་འདྲེན་བྱང་ཆུབ་སྨན་ལྗོངས་སུ་དགུན་སྒར་པ་སུམ་བརྒྱ། ཆོས་ཞུ་བ་དང་བཅས་པས་བཞི་བརྒྱ་ཙམ་ལ་ཆོས་ཀྱི་འཁོར་ལོ་ལྟ་བུ་བསྐོར། དེ་དུས། མཻ་ཏྲི་སྙན་རྒྱུད་ལ་འགྲེལ་པ། དེ་ནས་གྲོན་དུ་སྡེ་པ་རྒྱལ་བས་ཤོག་ཟེར་བས། ལུང་བསྟན་དགོན་པ། ཀུན་སྤངས་རྗེའི་སྒྲུབ་གནས་རོང་རི་ཐུལ་སོགས་བལྟས། གྲོན་དུ་སླེབ། གཞི་ལེན་བཟང་། འཕྲལ་དུ་སྐོར་རོ་བྲག་ཏུ་ཕྱིན། ཐོག་མར་མཚམས་རྒྱང་བ་བྱས་དུས། རྫོང་ཆེན་དུ་བྱུང་བའི་བུ་མོ་དེ་གཉིས་བྱུང་ནས། སྙན་རྒྱུད་ཀྱི་འགྲེལ་པ་འཕྲོ་ལ་བཞག་ན་མི་ཡེང་ཟེར་བ་རྨིས། དེ་དུས་སྐུ་རིམ་གྱིས་གཡེངས། དེ་དག་ཏུ་དྲག་སྔགས་ཀྱི་ལྟས་ལེགས་པར་བྱུང་བ་བཞིན། རིན་སྤུངས་སུ་ཡང་གཟིམས་ཁང་ཞུགས་ལ་བཞན། ལྟས་རེ་མང་བྱུང་སྣང་། 
3-541
དེ་ནས་བྱམས་ཆེན་ཆོས་གླིང་དུ་གཞི་གསུམ་གྱི་ལག་ལེན་འཛུགས་པའི་རྩིས་བྱས། རབ་འབྱམས་པ་མང་པོ་བསྙེན་རྫོགས་བསྒྲུབས། བླ་མ་རྡོ་རྗེ་བཀྲ་ཤིས་འཆད་ཉན་པར་བཀོད། དེ་དུས་ཤར་ཀོར་པོ་མཚོ་མཇུག་ནས་ཆོས་རྗེས་སྐྱེ་དཔོན་སློབ་ཕེབས། འབུལ་བ་དང་། མེ་རག་མདོ་པའི་སྤྱི་བླ་དཔོན་པོ་སྒྲ་གཅིན་འཛིན་བཟང་པོ་བསྐོས། དེ་ནས་བྱར་དུ་མཁར་ལན་གྱི་བཀོད་པ་ལ་ཕྱིན། ཙ་རིའི་གནས་ཡིག་ལེགས་པར་བྱས། ཚུར་ལོག །ཕོ་བྲང་ཡང་རྩེའི་བྱ་འདབ་ཆོས་རྒྱལ་གླིང་དུ་བསྡད། སྙན་རྒྱུད་ཀྱི་འགྲེལ་པ་ལེགས་པར་གྲུབ། ཡང་རྩེའི་མགོན་ཁང་ནང་མའི་གཏོར་ཆེན་ལས་ཁྲག་བྲེ་གང་ཙམ་འཛག་སྣང་བས་ཕ་རོལ་གྱི་བསམ་སྦྱོར་ལ་ནུས་པ་མི་འབྱུང་བར་ཤེས། དེ་ནས་ཡར་རྡོ་རྗེ་གདན་སླེབ་པའི་དགོངས། སྲིན་ཡུལ་པདྨ་འོད་ཀྱི་གཞལ་ཡས་ནས། རིག་འཛིན་ཆེན་པོ་པདྨ་འབྱུང་གནས་ཀྱི་ཕོ་ཉ་ཡིན་ཟེར་བ་སྲིན་གཟུགས་གཉིས་ཀྱིས། སློབ་དཔོན་གྱི་ལུང་དྲག་པོ་དམར་པོ་ལ་བརྟེན་པའི་མན་ངག་ཟབ་མོའི་འཕྲིན་སྤྲད། ད་ལོའི་བར་ཆད་ཐམས་ཅད་འདིས་ཟློག །ཕྱིས་ཡང་ཉམས་སུ་བླངས་ན་བར་ཆད་ལས་རྒྱལ་བར་འགྱུར་རོ། །ཞེས་གསུང་གི་འདུག་གོ་ཟེར་ལོག་སོང་བ་རྨིས། ཕས་ཀྱིས། བྱ་པ་ནང་སོ་འབྲུག་པ་མཆོད་ཡོན་བདེན་མེད་དུ་གཏོང་བསམ་རྩབ་རྩུབ་རེ་དགའ་གོ་ལ་མ་གོ་སྣང་སྟེ། རང་རང་ལས་ལ་སྤྱོད་པར་སྣང་བས། 
3-542
ཕས་རྒོལ་གྱི་ནུས་པ་རང་ཞི་ནས། རྒྱལ་ཁམས་བདེ་འཇམ་དུ་གྱུར་པ་འདི་ཁའོ། །ཨེ་མ་སྐད་ཅིག་རེ་རེ་ལ། །རྣམ་པ་སྣ་ཚོགས་ལས་བགྱིད་མཁན། །སྙིང་རྗེའི་གཟུགས་འདིའི་ངང་ཚུལ་གང་། །རྒྱས་པ་ཀུན་གྱི་བློར་མི་འཆུན། །ཕྱོགས་ལྷུང་རལ་པའི་ངོར་མིན་པ། །ངག་ཚིག་གངྒཱའི་བུ་མོ་འདིའི། །ངོ་མཚར་རྦ་རླབས་འཛུམ་པའི་འོད། །དད་ལྡན་སྙིང་ལ་ཀཏྤུ་ར། །གཞན་གྱི་དོན་ལ་ཅི་ཡང་དང་བ་རབ་ཏུ་རྒྱས་པའི་གངས་ཅན་མཚོའི། །བླ་མེད་བྱང་ཆུབ་སྨོན་པའི་པདྨོ་སྒྱུ་འཕྲུལ་རྡོ་རྗེའི་ཟེ་བའི་རྩེར། །མ་ལུས་འཇིག་རྟེན་སྙིང་ལ་འབབ་བཀོད་དཔག་ཡས་རྣམ་མཁའི་མཐའ་ཁྱབ་པ། །ཀུན་ཏུ་བཟང་པོའི་ཟློས་གར་རྩེ་སའི་དོ་ར་བཟང་པོ་བསྔགས་པར་འོས། །ད་ལྟ་གངས་ཅན་ཆོས་རྗེ་ཕལ། །རྣ་བའི་བཅུད་ལན་བཟང་པོ་དེ། །མངོན་སུམ་རེག་ལ་བདུད་རྩི་ནི། །ཟླ་ཤེལ་འདི་ཡིན་གཉིས་པ་གར། །ཁྲི་དཔོན་ཆེན་པོ་མཚོ་སྐྱེས་རྡོ་རྗེ་དང་། །དཔོན་དྲུང་མགོན་པོ་རབ་བརྟན་གྱིས། །རིང་མོ་ཞིག་ནས་ཡོན་དང་བཅས་ནན་གྱིས་བསྐུལ་བ་དང་། ཕྱིས་རྡོ་རྗེ་འཛིན་པ་ཆེན་པོ་གྲུབ་པའི་ས་བརྙེས་པ་ཆོས་ཀྱི་མགོན་པོ་དང་། མཁས་པའི་དབང་པོ་ཆོས་དཔལ་བཟང་གིས་གསེར་གྱི་མེ་ཏོག་དང་བཅས་ཆེད་དུ་བསྐུལ་ཞིང་། གཞན་ཡང་སློབ་མའི་ཚོགས་ཆེན་པོའི་ངོར། རང་ཉིད་ཀྱི་རྣམ་པར་ཐར་པ་སྒྲོ་མ་བཏགས་པར། 
3-543
མདོར་བསྡུས་པ་ཐུགས་རྗེ་ཆེན་པོའི་ཟློས་གར་ཞེས་བྱ་བ། གཉལ་ཡངས་པ་ཅན་གྱི་དབུས་དཔལ་གྱི་རི་བོའི་ངོགས། རྡོ་རྗེ་གདན་གྱི་ཆོས་གྲྭར་སྦྱར་བའོ།། །། ཀུན་མཁྱེན་བླ་མའི་གསུང་འབུམ་ཁ་སྐོང་རིགས། །མཛོད་ཁྲི་ཐབས་མཁས་བཞེངས་དགེས་དོན་བརྒྱུད་ཀྱི། །བསྟན་པ་འཕེལ་རྒྱས་སྐུ་གཤེག་དཔལྡན་གཙོས། །འབྲེལ་ཐོགས་མཁའ་མཉམ་སྐུ་བཞི་མྱུར་ཐོབ་ཤོག། །།


目录
སེམས་དཔའ་ཆེན་པོ་པདྨ་དཀར་པོའི་རྣམ་ཐར་ཐུགས་རྗེ་ཆེན་པོའི་ཟློས་གར་ཞེས་བྱ་བ།